Yudas 1:7 - Muna Southern Dialect

⁷ Feꞌulaiꞌeomu dua kotano Sodom bhe Gomora bhe liwu-liwu pomaꞌotiꞌano. Podiundo miendo kota aini tanopototomo dua bhe habundo malaꞌekati saꞌituini: dehabu sabhaha diu pokawite-wite bhe dopokagaa-gaa sapada moꞌane tawa sapada hobhine. Andoa ini dosikisaaꞌanda efi suhue dhamani, somo kafodhagando sabhaha mie.

Yudas 1:7 Iomraidhean Croise

Matius 10:15

Amohatokoomu kotu-kotuꞌu, nahumato Oleono Kiama kahukumu neꞌawano witeno Sodom bhe Gomora nandoo naosape ane dapototoane bhe so neꞌawano liwu aitu.”

Matius 11:24

Tamaka amohatokoomu, nahumato Oleono Kiama, naosape kahukumuno miendo Sodom bhe kahukumu so neꞌawamiu.”

Matius 25:41

Pada anaꞌa napugaumo dua ne mie we kemano, ‘Gampiomu maiꞌao ne wiseku ini, hintimiu mie nekangkanaino balaa! Pesuaꞌomu weo efino narakaa tapa mopoopeono ampa suhue dhamani, toka nefontaa-ntaa so Kafeompuꞌando seetani bhe malaꞌekati sabhangkaꞌino.

Lukas 17:29

Tamaka ne oleono Lot nohunsa kotano Sodom, nosampumo efi bhe waleha kabeanga o use nomaiꞌao te lani nofobinasada kosasawindo.

1 Korintus 6:9

Miina mandeꞌaaneomua bhahaa putae mie humabu modaino paise daeꞌawa dawu weo Kafopahintaꞌano Lahataꞌala? Koise nokolilino totono lalomiu! Mie pokawite-witeno, mesombaino barahala, mie monsule, karambole moꞌane, gumaano sapada moꞌane tawa hobhine,

2 Tesalonika 1:7

Hintimiu kumadee-deeno ampa aini namaꞌangkoomu kalalesa meeneiꞌomu, pedamo dua ne insaodi. Anaꞌa nakumadhadhia ne oleono Ompu Yesus namotiwoha Wutono maiꞌao te surugaa, weo efi ngkalai-lai napoowa-owa bhe malaꞌekatino kokuasano.

2 Tesalonika 1:8

Nahumukumu mie kumiidono mandeꞌaono Lahataꞌala bhe pata mangkafino Bhihita Metaano Yesus, Ompuntoomu.

2 Petrus 2:2

Dabhahi mie so mangkafino podiundo nekuasaino sabhaha nafusuu modai. Hampano kafoinaꞌu bhe habundo dabhahi mie so mekaꞌaebuno Kaangkaꞌano Kabanara, ⸤ maꞌanano kaparasaea ne Kristus⸥ .

2 Petrus 2:6

Pedamo dua anaꞌa ne kotano Sodom bhe Gomora, Lahataꞌala nohukumuda nohampunianda efi, somo sandahano so kumadhadhiano ne mie modai.

2 Petrus 3:7

Tamaka hampanomo dua bhoasaono naꞌa lani bhe dhuniantoomu ampa aitu sadaa-daa nodambaꞌaane, neanomo mada kaowu namohansuruane efi; nohunsa-hunsae ampa nahumato tempono so katibhotusiꞌando bhe katifobinasaꞌando mie modai.