Yohanes 6:68 - Muna Southern Dialect

⁶⁸ Notobhoosimo Simon Petrus ambano, “Waompu, takumala se laꞌae bhahaa? Wambamumo meowano dadi suhue dhamani.

Yohanes 6:68 Iomraidhean Croise

Matius 16:16

Notobhoosimo Simon Petrus ambano, “Hintumo Mesias, Omputo Fosalamatino, Anano Lahataꞌala dumadino ⸤ suhue dhamani⸥ .”

Markus 8:29

Yesus nofeenadamo dua ambano, “Ane hintimiu, kona kanauꞌomu laꞌae?” Notobhoosimo Petrus, ambano, “Hintu ini Mesias, Omputo Fosalamatino!”

Lukas 9:20

Yesus nofeenadamo dua ambano, “Ane hintimiu, kona kanauꞌomu laꞌae Idi ini?” Notobhoosimo Petrus, “Hintumo Mesias, Omputo Fosalamatino maiꞌaono ne Lahataꞌala.”

Yohanes 12:49

Kapaꞌamo wambaku ini miina namaiꞌao ne Wutokua, tamaka nomaiꞌao ne Amaku. Amaku tumudu kanau, Anoamo mahintangi kanau bhe nofohato kanau o ae so nepugauꞌaoku bhe so nefosampeku.

Yohanes 12:50

Apandeꞌaane pahintano neowa dadi suhue dhamani. Dadiꞌanomo wamba nepugauꞌaoku, ingka o bhoasaonomo dua Amaku ne Idi.”

Yohanes 17:8

Kapaꞌamo sabhaha wamba kawaꞌaomu ne Idi padamo afosampeandae bhe dotahimae. Aitu kotu-kotuꞌu dopandeꞌaanemo Idi ini amaiꞌao ne Hintu, doparasaeamo dua Hintumo tumudu kanau.

Yohanes 5:24

Amohatokoomu, kotu-kotuꞌu sasuka metingkeno wambaku bhe marasaeano ne Tumudu kanau, ingka neꞌawamo dadi suhue dhamani. Paise naeꞌawa kahukumu, kapaꞌamo nogampimo maiꞌao ne mate nopesuamo weo dadi.

Yohanes 6:40

Ainiꞌaemo kapoindalono Amaku, gaono mpuu sasuka mohano Anano bhe marasaeano ne Anoa naeꞌawa dadi suhue dhamani maka amodadie ne Oleono Kiama.”

Yohanes 6:63

Fowaꞌaono dadi buꞌou ingka Rohino Lahataꞌala, kaꞌosano mbadhano manusia miina sepaliꞌa nakofahalaa. Sabhaha wamba nefosampeku ne hintimiu, wambano Rohino Lahataꞌala, meowanomo dadi.

Tula-tulando rasulu 13:26

Bhahitieꞌiku, naetaa sampuꞌano Abraham naetaa sigaoꞌano moteꞌino ne Lahataꞌala, bhihita kasalamatiꞌa ini padamo dofofohatoane.

Tula-tulando rasulu 4:12

Ampamo kaowu Yesus fosalamatino, kapaꞌamo te dhunia ini we simbalino Anoa bhe naseemie miina bhe meꞌawano kuasa maiꞌaono ne Lahataꞌala so nafofosalamatiꞌao.”

Tula-tulando rasulu 5:20

Ambano malaꞌekati naꞌa, “Kala meehe-eheomu we Lambuno Lahataꞌala maka foleleomu bhihitano dadi buꞌou ini ne mie bhahi.”

Tula-tulando rasulu 7:38

Wakutuuno umatino Israel dohompu we pandaso bhalano, Musamo dua ini membalino poatoꞌaono wambano malaꞌekati bhe awuaꞌintoomu. O malaꞌekati naꞌa nokowamba ne Musa te kabhawono Sinai. Ingka anoamo dua tumahimano bhoasao meowano dadi maiꞌaono ne Ompu Lahataꞌala so nefosampe ne hintimiu.

Tula-tulando rasulu 8:37

[Notobhoosimo Filipus, “Ane nokampuu-mpuumo lalomua weo kaparasaeamu, naembalimo dakumadiuko.” Ambano toha, “Aparasaeamo Yesus Kristus Anano Lahataꞌala.”]