Roma 9:30 - Muna Southern Dialect

³⁰ Ane peda anaꞌa, damugauꞌomu dua nada amai? Ingka nada aini: bansano liwu suano Yahudi miina daꞌumulei lalondo so datitahimaꞌao peda mie banara ne Lahataꞌala, gahaꞌaitu notahimadamo Lahataꞌala peda mie banara. Katitahimaꞌando ini nengkoha ne kaparasaeando.

Roma 9:30 Iomraidhean Croise

Roma 10:10

Kapaꞌamo manusia doparasaeaꞌao totono lalondo sampe notahimada Lahataꞌala peda mie banara, bhe dopugauꞌao wiwindo sampe dosalamati.

Roma 10:20

Sedhuluꞌa dua kakadono wambano anabii Yesaya, ⸤ Ambano Lahataꞌala⸥ , “Mie tapa umondofi kanau dopoꞌawa kanaumo, afotiwohamo wutoku ne mie tapa meenaꞌa kanau.”

Roma 10:6

Tamaka katitahimaꞌa ne Lahataꞌala mengkohano ne kaparasaea notibuhi dua weo Kitabi peda aini, “Koise nokodukua lalomu, ‘Naetaa daeꞌondofi mie so monino te surugaa’, (patudhuno damosampu Kristus we dhunia).

Roma 3:5

Tamaka ane kaꞌadhilino Lahataꞌala sedhuluꞌa kantaleano hampano habu modaintoomu, kaowu damugauꞌomu nada amai bhahaa? (Pugauku ini aangkafi kaowu fekihindo manusia.) Bhahaa damugau putae Lahataꞌala miina naꞌumadhilia ane namondawu kaita kahukumuno?

Roma 4:11

Kasuna maitu notahimae peda sehonda tanda, o bukutii motangka putae Lahataꞌala notahimae peda seemie banara hampano kaparasaeano. Gahaꞌaitumo ingka miinaꞌo naesunaa, noparasaeamo. Pedamo anaꞌa Abraham nembalimo amando kosasawindo mie tapa nesuna marasaeano, neanomo Lahataꞌala natumahimada peda mie banara.

Roma 4:13

Lahataꞌala nopodhandi ne Abraham bhe sampuꞌano namaꞌanda dhunia ini somo fehebuaꞌando. Dhandi aini nobhoasaane Lahataꞌala suano mbaꞌinomo Abraham noangkafi tubhono agama Yahudi, tamaka hampano kaparasaeano, sampe Lahataꞌala notahimae peda seemie banara.

Roma 4:22

Kanandooꞌanomo Abraham notahimae Lahataꞌala peda seemie banara.

Roma 4:9

Bhahaa wambano dawua ini mbali kaowu mie nesuna, tawa mbali dua ne mie tapa nesuna? Ingka padamo tapugauane saꞌituini, Abraham notahimae Lahataꞌala peda mie banara hampano kaparasaeano.

Roma 5:1

Dadiꞌanomo, hampano Lahataꞌala notahima kaitaomu peda mie banara mbaꞌinomo kaparasaeantoomu, maka ampa aitu intaodiomu dopometaamoomu bhe Lahataꞌala, noangka ne Yesus Kristus Ompuntoomu.

Roma 9:14

Ane peda anaꞌa, damugauꞌomu dua nada amai? Bhahaa nokomaꞌana Lahataꞌala miina naꞌumadhilia? Ingka miina sepaliꞌa!

Roma 9:31

Nopobhansule bhe miendo Yahudi, mahingga sadhia doꞌulei lalondo doangkafi tubhono agama so datitahimaꞌao peda mie banara ne Lahataꞌala, gahaꞌaitu miina natosampe patudhundo.

Galatia 2:16

Mahinggamo peda anaꞌa, tapandeꞌaanemo o manusia notahimae Lahataꞌala peda mie banara mpahinomo hampano noparasaea ne Yesus Kristus, suano mbaꞌinomo nodhalangi tubhono agama Yahudi. Dadiꞌanomo insaodi dua taparasaeamo ne Yesus Kristus, neanomo weo kaparasaea mani maitu naembali natumahima kainsami Lahataꞌala peda mie banara, suano mbaꞌinomo taangkafi tubhono agama. Kapaꞌamo bhe naseemie miina bhe netahimano Lahataꞌala peda mie banara mbaꞌinomo nodhalangi tubhono agama Yahudi.

Galatia 3:24

Dadiꞌanomo tubhono agama Yahudi naembali dapototoane bhe seemie dhaga tumonda kaita ampa kahatoꞌano Kristus, neanomo Lahataꞌala nafotahima peda mie banara hampano doparasaeamoomu ne Kristus.

Galatia 3:8

Weo Kitabi mpini endefiꞌini notipandeꞌaomo, putae Lahataꞌala notahima dua mie suano Yahudi peda mie banara hampano kaparasaeando ne Anoa. Kapaꞌamo nandoo Bhihita Metaa nefosampeno wawo ne Abraham, ambano, “Namangka ne hintu, sabhaha bansano liwu daeꞌawa kabarakati.”

Galatia 5:5

Tamaka insaodi, bhe katulumino Rohino Lahataꞌala, taantagi neposahunaꞌao mani putae Lahataꞌala natumahima kainsami peda mie banara hampano kaparasaea mani ne Kristus.

Efesus 2:12

Wakutuu anaꞌa miinaꞌo bhe taiꞌamiu ne Kristus, hintimiu mie we sembalino miendo Israel, miinaꞌo tilentuomu umati nepilino Lahataꞌala. Miinaꞌo dua mealaomu dawu weo podhandino Lahataꞌala toka nedhandiꞌaono ne umatino. Hintimiu dadiomu te dhunia miinaꞌo bhe neposahunaꞌaomiu, miina dua mandeꞌaoꞌomu Lahataꞌala.

Filipi 3:9

bhe kotu-kotuꞌu aseꞌise bhe Anoa. Katitahimaꞌaku ne Lahataꞌala peda mie banara suanomo kaowuleꞌano wutoku adhalangi tubhono agama, tamaka katitahimaꞌaku ne Lahataꞌala mbaꞌinomo aparasaea ne Kristus. Dadiꞌanomo katitahimaꞌa peda mie banara naꞌa nomaiꞌao ne Lahataꞌala, nengkoha ne kaparasaea ne Kristus.

1 Timotius 6:11

Tamaka hintu manusia fehebuaꞌano Lahataꞌala, fekakodoꞌo wutomu ne kosasawiꞌae naꞌa. Ambae dadi banara, dadi lumebe, kampuu-mpuu weo kaparasaeamu, moasianda mie bhaimu, kosabaha potaami weo kasabha, fekamalu lalomu.

Ibrani 11:7

Hampano kaparasaeano, Nuh nofodhagae Lahataꞌala so kumadhadhiaꞌano te wise, tapaꞌo newohano. Nuh neangka ne Lahataꞌala sampe nefotoka bhangka bhalano, mbalimo mosalamatie bhe koseꞌonu polambuno. Noangka ne kaparasaeano naꞌa dhunia dohukumue, tamaka wutono Nuh notahimae Lahataꞌala peda seemie banara hampano kaparasaeano.

1 Petrus 4:3

Ingka endefiꞌini nompona sepaliꞌa angkafiomu kapoindalondo manusia tapa mandeꞌaono Lahataꞌala. Hintimiu angkafiomu sabhaha nafusuu, kapoindalo modai, fohoꞌu ampa mololanuomu, sakahame, mempohoꞌuomu, bhe mesombaiꞌomu barahala timohakuno.