Roma 8:11 - Muna Southern Dialect

¹¹ Ane Rohino Lahataꞌala madano mowanuno Yesus maiꞌao ne mate neate weo totono lalomiu, maka Anoa mowanuno Kristus Yesus maiꞌao ne mate naꞌa, teteweimo dua namodadi mbadha kasaramiu itu, namangka ne Rohino meateno weo totono lalomiu.

Roma 8:11 Iomraidhean Croise

Yohanes 14:17

Anoamo Rohino Lahataꞌala meowano kabanara. Dhunia pae damooli datumahimaea, hampano miina daohaea, miina dua damandeꞌaanea. Tamaka hintimiu pandeꞌaaneomu, kapaꞌamo Anoa napobhaiangkoomu bhe naeate we lalomiu.

Yohanes 5:21

Amano nefowanu mie komate-mateno bhe nofodadida, pedamo dua anaꞌa Anano nefodadi dua ampa nepoindalono.

Tula-tulando rasulu 2:24

Tamaka Lahataꞌala nofodadie, nofolapae nomaiꞌao ne kakadee-deeno mate, hampano pae bhe kapoolia nasumadaa-daa nakumuasaiꞌe mate.

Roma 16:10

Salam so Apeles, anoa padamo doꞌudhie maka nokobukutiimo kamatangkano kaparasaeano ne Kristus. Salam dua so mie weo polambuno Aristobulus.

Roma 16:3

Fosampe kanauꞌomu salam ne Priskila bhe Akwila, posabhangkaꞌaku weo kahadhaa so Kristus Yesus.

Roma 16:7

Salam so Andronikus bhe Yunias, miendo Yahudi medano dua idi. Padamo dua dotitohongku poowa bhe idi. Dotilentu rasuluꞌi tiangkano, dopaꞌindulu doparasaea andoa ne Kristus bhe idi.

Roma 16:9

Salam so Urbanus, posabhangkaꞌaku weo kahadhaa so Kristus, bhe dua so Stakis, bhahitie nemoasiaꞌaoku.

Roma 6:12

Koemo undaꞌaaneomu o dhosa nokokuasa weo mbadha kasaramiu, keana sadhia angkafiomu kapoindalono.

Roma 8:1

Dadiꞌanomo ampa aitu mie seꞌiseno bhe Kristus Yesus paemo dahumukumudaa.

Roma 8:12

Bhahitieꞌiku! Daanumo bhe takantoomu, tamaka suano taka so daꞌumondofaoꞌao mbadha kamanusianto, kapaꞌamo miinamo namaraluua damangkafi kapoindalono.

Roma 8:2

Kapaꞌamo noangka ne Kristus Yesus, tubhono Rohino Lahataꞌala meowano dadi padamo nofobebasikoomu maiꞌao ne tubhono dhosa bhe mate.

Roma 8:9

Tamaka hintimiu ingka miinamo dumadiomu angkafi kapoindalono mbadha, dadiomu angkafiomu kaatono Rohino Lahataꞌala, ane kotu-kotuꞌu Rohino Lahataꞌala neate weo totono lalomiu. Mie tapa tumahimano Rohino Kristus, ingka suano fehebuaꞌano Kristus.

1 Korintus 15:16

Kapaꞌamo ane kotu-kotuꞌu mie mate miina damowanuda, Kristus pae dua damowanuea.

1 Korintus 6:14

Lahataꞌala mowanuno Ompu Yesus maiꞌao ne mate, namodadi kaita dua hampano kuasano.

2 Korintus 4:11

Maꞌanano, weo dadi mani ini sadhia taewiseki balaano mate hampano Yesus, neanomo dadino Yesus natiwoha dua weo mbadha kasara mani.

2 Korintus 4:14

Kapaꞌamo tapandeꞌaane putae Lahataꞌala mowanuno Ompu Yesus maiꞌao ne mate, namowanu kainsami dua tapoowa-owa bhe Yesus. Mada anaꞌa namowa kainsami te wiseno tapoowa-owa bhe hintimiu.

2 Korintus 5:4

Nandoo deateomu weo kadempo ini, sadhia dofedee hampano kabhieno wowoꞌontoomu. Daanumo miina gaontoomu dahumunsaemo mbadha kasara ini, tamaka gaontoomu damakeemo mbadha nsurugaa, neanomo mbadha kasarantoomu ini natumoloemo dadi suhue dhamani.

Galatia 6:8

Ane doangkafi kapoindalono mbadha tantumo datumobhe dua hasilino kapoindalono mbadha, o kabinasa. Tamaka mangkafino kapoindalono Rohino Lahataꞌala datumobhe dua hasilino kapoindalono Rohino Lahataꞌala, o dadi suhue dhamani.

Efesus 2:5

Lahataꞌala nofodadi kaita dopoowa bhe Kristus, mahinggamo domatemoomu hampano dokangkalaꞌi pahintano. Tandaiꞌeomu, hintimiu nofosalamatikoomu Lahataꞌala hampano kataano lalono.

Filipi 3:21

Nahumato kaowu Kristus nabhalii mbadha kasarantoomu monaleno ini naembali nasekatu bhe mbadhano wutono kumalabhiano. Kanandooꞌano peda anaꞌa mbaꞌinomo Kristus nokokuasa namotuhu sabhaha ndumandoono ne wiseno.

Ibrani 13:20

Ingka Lahataꞌala padamo nofowanu Ompu Yesus maiꞌao ne mate. Hampano tuhuno heano, Anoa nembalimo Dhagano Dhumba Kumalabhiano so intaodiomu, mekamatangkanomo dua podhandiꞌa suhue dhamani nehabuno Lahataꞌala bhe intaodiomu.

1 Petrus 1:21

Noangka ne Kristus hintimiu parasaeaꞌomu ne Lahataꞌala, modadino Kristus maiꞌao ne mate maka nofekakalabhiaꞌe. Dadiꞌanomo kaparasaea bhe posahunaꞌaomiu senaꞌa-naꞌa ne Lahataꞌala.

1 Petrus 3:18

Kapaꞌamo wutono Kristus nomateꞌao dhosantoomu, sepaku kaowu so suhue dhamani. Anoa mie banara nomateꞌao mie modai. Kamateꞌano ingka so natumondaꞌao hintimiu ne Lahataꞌala. Mbadha kamanusiano dopongkoe, tamaka Rohino Lahataꞌala nofowanue maiꞌao ne mate.

Powoha 1:18

Idimo dumadino, padamo amate, tamaka ondo kanau itu, ingka adadimo ampa suhue dhamani. Idimo mintahano kunsino mate bhe dhuniano mate.

Powoha 11:11

Nopalusi tolu oleo sekaꞌindotu nopesuakidamo inawa nomaiꞌao ne Lahataꞌala sampe dowanu maiꞌao ne mate lasao doehe. Kosasawindo mie mohada notolau kateꞌindo.