2 Ibahano seemie hobhine gumaano, weo tubhono kagaa ingka notitapu ne moꞌaneno sasuhue dadino moꞌaneno naꞌa. Ane moꞌaneno nomatemo, ingka hobhine anaꞌa miinamo natitapua ne tubhono kagaa.
Tamaka ane moꞌaneno nandoo nodadi, gahaꞌa hobhine aitu nogaa toha bhe moꞌane sigaoꞌano, ingka dokonae nomonsule. Ampamo kaowu ane moꞌaneno nomatemo, hobhine aitu nobebasimo ne tubhono kagaa; mahinggamo nagumaa toha bhe moꞌane sigaoꞌano, miina namonsulea.
Tamaka ampa aitu domatemoomu maiꞌao ne tubhono agama Yahudi, dobebasimoomu maiꞌao ne tubho fokuhumano. Ampa aitu intaodi dofeompu ne Lahataꞌala doangkafi tubho buꞌou, tubhono Rohino Lahataꞌala; miinamo damangkafi tubho ngkodau tibuhino weo Kitabi.
Seemie hobhine gumaano bhe katapuno kaomponano nodadi moꞌaneno. Ane nomate moꞌaneno, ingka nobebasi nagumaa dua bhe moꞌane nepoindalono, sumanomo mie marasaeano ne Ompu.
Seemie hobhine miina nakokuasa ne mbadhano wutono tamaka nokuasaiꞌe moꞌaneno; pedamo dua itu seemie moꞌane miina nakokuasa ne mbadhano wutono tamaka nokuasaiꞌe hobhineno.