Powoha 12:12 - Muna Southern Dialect

¹² Dadiꞌanomo, hintu surugaa bhe kosasawindo meatefie, fowulaomu lalomiu! Tamaka balaamoomu hintimiu wite bhe teꞌi, hampano nosampunikikoomu Kafeompuꞌando seetani weo amahano bhalano; nopandeꞌaane wakutuuno nosekemo.”

Powoha 12:12 Iomraidhean Croise

Lukas 15:10

Amohatokoomu, nadamo dua anaꞌa malaꞌekatino Lahataꞌala daoꞌia hampano seemie kodhosa metompaꞌaono dhosano.”

Lukas 2:14

“Nokalabhia mpuu Lahataꞌala te wawono wawo, katohopo mpuu we dhunia, so manusia posahasiꞌano lalo bhe Lahataꞌala.”

Ibrani 10:37

Kapaꞌamo ⸤ notibuhi weo Kitabi⸥ , “Tana sekabantaha sepaliꞌa, Anoa so maino ingka nahumatomo, paemo namodhulu tempono.

2 Petrus 3:8

Ampamo kaowu bhahitieꞌiku, koise molimpuꞌaaneomu dua sehondano ini: ne pomatano Lahataꞌala seꞌoleo tanopototomo bhe sehewu taꞌu, sehewu taꞌu tanopototomo bhe seꞌoleo.

Powoha 10:6

Anoa notunda nosambili Dumadino suhue dhamani, mokonandoono lani bhe sabhaha iꞌino, mokonandoono dhunia bhe sabhaha iꞌino, mokonandoono dua teꞌi bhe sabhaha iꞌino, ambano, “Paemo damodhuluea tempono.

Powoha 11:10

Mie meateno we dhunia daoꞌiaꞌao matendo bhe naowula sepaliꞌa lalondo sampe dohame-hame bhe dopopaka-pakatuꞌao kawaꞌao, mbaꞌinomo kohoduando anabii maitu dosikisaa mpuu mie meateno we dhunia.

Powoha 11:14

Balaa kahaa iseno nolalomo, natumuluemo dua balaa katolu iseno.

Powoha 12:9

Naga bhalano maitu doꞌohoe we simbali! Anoamo itu ule ngkamukula, neano dokonae Kafeompuꞌando seetani tawa Kolakindo rohi modai, mekakolilinono kosedhuniaꞌae. Anoa doꞌohoe we dhunia dopoowa-owa bhe malaꞌekatino sabhangkaꞌino.

Powoha 13:6

Dadiꞌanomo kadadi anaꞌa nofonganga wobhano nofekaꞌaebumo Lahataꞌala, nofekandidiki neano, nofekaꞌaebu dua lambu kaeateꞌano Lahataꞌala bhe kosasawindo meateno te surugaa.

Powoha 18:20

Hintu surugaa, fowula lalomu hampano kahansuruꞌano kota aitu! Fowula dua lalomiu, hintimiu umati mongkilo, rasu-rasulu bhe ana-anabii! Kapaꞌamo Lahataꞌala padamo nowaꞌane kahukumuno mbali kabhoosino sabhaha nehabuno kota amaitu ne hintimiu.”

Powoha 8:13

Taꞌawohamo dua bhe afetingke seꞌulu bhoa nelola-lola te wuntano lani bhe nokotanga nohaaꞌi sepaliꞌa ambano, “Balaamoomu! Balaamoomu! Balaamo mpuu mie meateno we dhunia, ane natifetingkemo ndiino duhulelendo malaꞌekati totoluno tapaꞌo mebusono.”

Powoha 9:12

Balaa kabhao-bhaono nolalomo, tadua nahaa ise balaa so humatono.