Powoha 11:17 - Muna Southern Dialect

¹⁷ Ambado, “Taefoampe katumpuno lalo ne Hintu Ompu Lahataꞌala Fofoliuno Kuasa, ndumandoono bhe toka ndumandoono, hampano Hintu pakeemo kuasamu bhalano, metandakimo pahinta peda Omputo.

Powoha 11:17 Iomraidhean Croise

Matius 11:25

Wakutuu anaꞌa Yesus nosambaheamo ambano, “Notumpu laloku, Ama, Ompuno lani bhe dhunia, kapaꞌamo kosasawiꞌae ini febunie ne mie kotimbangi bhe mie mande, tamaka fotiwohae ne mie mepandano kaengkohaꞌa pata kokasikolano.

Lukas 10:21

Wakutuumo dua aitu Yesus nowula lalono hampano nokabhintie Rohino Lahataꞌala, maka ambano, “Notumpu laloku ne Hintu, Ama, Ompuno lani bhe dhunia, kapaꞌamo kosasawiꞌae ini febunie ne mie kotimbangi bhe mie mande, tamaka fotiwohae ne mie ndidiki tapa kokasikolano. Daanumo Ama, pedamo aitu kaposahasiꞌanomo lalomu.

Yohanes 11:41

Dadiꞌanomo dofogampimo kontu anaꞌa. Pada aitu Yesus nototohanamo bhe nopugau ambano, “Ama, notumpu laloku ne Hintu hampano fetingke kanau.

2 Korintus 2:14

Foampe kaitaomu katumpuno lalo ne Lahataꞌala, kapaꞌamo Kristus noowa kainsami tabhatompa weo hame-hameno kafotaloꞌano, hampano kaseꞌise mani bhe Anoa. Lahataꞌala nopake kainsami taefolele Bhihita Metaano Kristus ne amai maka dua tapedamo wonono mina-mina mowonduno.

2 Korintus 9:15

Foampe kaitaomu katumpuno lalo ne Lahataꞌala hampano kawaꞌaono pata tikiha-kihano!

1 Timotius 1:12

Notumpu laloku ne Kristus Yesus Ompuntoomu mekamatangka kanau, kapaꞌamo noabhi kanau atiposahunaꞌao, katifoparasaeaꞌakumo taka aini so ameompuꞌao ne Anoa.

Powoha 1:4

Salam aini nomaiꞌao ne Yohanes so kofitu tombuꞌae umati we kadieno Asia. Sio-siomo sadhia napobhaiangkoomu kabarakati bhe katohopono dadi nomaiꞌao ne Anoa ndumandoono, toka ndumandoono bhe so humatono, bhe nomaiꞌao dua ne kofitu bansaꞌae Rohi ne wiseno kaengkohaꞌano kumalabhiano,

Powoha 1:8

“Idi ini Alfa bhe Omega ⸤ maꞌanano kabhao-bhaono bhe kafetompaino⸥ ”, pedamo anaꞌa bhoasaono Ompu Lahataꞌala, ndumandoono, toka ndumandoono bhe so humatono, Fofoliuno Kuasa.

Powoha 11:15

Pada aitu malaꞌekati kapipituno nobusomo duhuleleno maka notifetingkemo suaha-suaha mohaaꞌi sepaliꞌa weo surugaa, ambado, “Kuasa kafopahintaꞌano dhunia nointahaemo Ompuntoomu bhe Mesias Omputo Fosalamatino, Anoa namahinta nada omputo ampa suhue dhamani.”

Powoha 15:3

Andoa delagu-laguꞌao laguno Musa palima-limano Lahataꞌala bhe laguno Anano Dhumba. Ambado, “Hintu Ompu Lahataꞌala Fofoliuno Kuasa! Nobhala bhe notimenteꞌao mpuu angkaꞌano limamu. Noꞌadhili bhe nobanara mpuu sabhaha habumu. Hintu Omputo sabhaha bansano liwu!

Powoha 16:14

Andoamo maitu rohindo seetani mehabuno sabhaha tanda tapa mentela. Kototolundo dokalamo dofohompu sabhaha omputo ne dhunia so dapopahisaꞌao nahumato oleo bhalano, oleonomo Lahataꞌala Fofoliuno Kuasa.

Powoha 16:5

Afetingkemo dua malaꞌekati kumuasaino oe nopugau ambano, “Hintu ndumandoono bhe toka ndumandoono, Hintu mongkilono, noꞌadhili mpuu kahukumu nefondawumu.

Powoha 16:7

Afetingkemo dua suaha nomaiꞌao ne medha kaetunuꞌa dupa nopugau ambano, “Uumbe daanumo Hintu Ompu Lahataꞌala Fofoliuno Kuasa, kahukumu nefondawumu nobanara bhe noꞌadhili.”

Powoha 18:8

Dadiꞌanomo sabhaha balaa nakumangkanaiꞌe seꞌoleo: o hopu, o kaguguhu, o gaba bhe dahumampuniane efi, hampano nokokuasa mpuu Ompu Lahataꞌala bhotusie.”

Powoha 19:11

Pada aitu awohamo surugaa notilengka, maka nandoo seꞌulu adhaha kapute. Mie sumawikie dokonae “Mie Tiparasaeano bhe Banarano”. Anoa noꞌadhili nofobhotusi bhe nopopahisa.

Powoha 19:6

Pada amaitu afetingkemo kanggetu suahando kantawundo mie bhahi, pedamo guhuntumano luano oe bhalano, pedamo dua nduuno guntu mobhibhiisano ambado, “Haleluya! Ompu Lahataꞌalantoomu Fofoliuno Kuasa nembalimo omputo.