Markus 8:34 - Muna Southern Dialect

³⁴ Pada aitu Yesus nosaliꞌimo mie bhahi bhe anaguhuꞌino maka nopugau ambano, “Ane dopoindalo damangkafi kanau, tetewei dahumunsa kapoindalondo wutondo. Mada anaꞌa datumongku sau salipundo ⸤ maꞌanano doꞌunda mahingga damate⸥ maka damangkafi kanau.

Markus 8:34 Iomraidhean Croise

Matius 10:38

Laꞌae so pata tumongkuno sau salipuno maka namangkafi kanau, pae namantasia so Idi.

Matius 16:24

Pada peda maitu Yesus nopugau ne anaguhuꞌino, “Laꞌae maka so mangkafi kanau tabeano nahumunsa kafaraluuno wutono, natumongku sau salipuno ⸤ maꞌanano doꞌunda mahingga damate⸥ maka namangkafi kanau.

Matius 27:32

Tangasano dohope we simbalino kota, dopoꞌawaꞌaomo seemie miendo Kirene koneaꞌano Simon. Tantara dofosuhu mie aitu natumongku sau salipuno Yesus.

Markus 10:21

Noꞌondo mie amaitu, Yesus noasiane maka nopugau ambano, “Tasehonda nekaemimua! Sulimo, asoe sabhaha fehebuaꞌamu, olino dawu-dawuandae mie mokae, maka meꞌawa arataa te surugaa. Mada anaꞌa maimo angkafi kanau.”

Markus 7:14

Pada anaꞌa Yesus nosaliꞌimo toha mie bhahi maka nopugau ambano, “Kosasawimiu, fetingkeeꞌomu pugauku ini bhe hunsaeꞌomu weo totono lalomiu!

Lukas 13:24

Notobhoosimo Yesus ne mie bhahi ambano, “Uleiꞌomu lalomiu pesuaꞌomu ne fointo mosekeꞌano. Kapaꞌamo amohatokoomu dobhahi mie mesobano damesua, tamaka paise damoolia.

Lukas 14:33

Pedamo dua anaꞌa hintimiu, laꞌae tapa mosipulino wutono maiꞌao ne sabhaha fehebuaꞌano, paise naembalia so anaguhuku.

Lukas 18:22

Nofetingke peda naꞌa Yesus nopugaumo ambano, “Tadua sehonda so nedhalangimua, asoe sabhaha fehebuaꞌamu, olino dawu-dawuandae mie mokae maka meꞌawa arataa te surugaa. Mada anaꞌa maimo angkafi kanau!”

Lukas 20:45

Tangasano mie bhahi dofetingke kafoinaꞌuno, nopugaumo Yesus ne anaguhuꞌino ambano,

Lukas 9:23

Kosasawindo nofohatodamo ambano, “Laꞌae maka so mangkafi kanau tabeano nahumunsa kafaraluuno wutono, natumongku sau salipuno seꞌo-seꞌoleo ⸤ maꞌanano doꞌunda mahingga damate⸥ maka namangkafi kanau.

Yohanes 10:27

Dhumbaku dotandaiꞌe suahaku, Idi apandeꞌaanda, andoa doangkafi kanau.

Yohanes 19:17

Poowa notongku sau salipuno, Yesus nolimbamo we simbalino kota nohope te kabhawo nekonando Kaꞌuada. Weo wamba Ibrani dokonae Golgota.

Tula-tulando rasulu 14:22

Ne itu dofekatangka lalondo mangkafino Yesus, dotangahida nakumampuu-mpuu lalondo weo kaparasaeando ne Yesus. Dofohatoda dua tetewei nabhahi daeꞌawa kasabha so damesuaꞌao weo Kafopahintaꞌano Lahataꞌala.

Roma 6:6

Ingka dopandeꞌaanemo, kamanusianto ngkodauꞌano dopongkoemo te sau salipu poowa bhe Kristus, neanomo kuasano dhosa ne mbadhanto nahumansurumo. Dadiꞌanomo paemo namobhatua kaita dhosa.

Roma 8:17

Ane intaodiomu dembalimo anaꞌino Lahataꞌala, nokomaꞌana dokohakumo dua daꞌumawa sabhaha kabarakati nefontaa-ntaano Lahataꞌala so anaꞌino. Kabarakati nefontaa-ntaa naꞌa datumahimaeꞌomu dapoowa-owa bhe Kristus. Kapaꞌamo ane dokadee-deeꞌomu poowa bhe Kristus, teteweimo dua dafofekalabhia poowa bhe Kristus.

1 Korintus 15:31

Seꞌo-seꞌoleo aewiseki mate. Bhe kawoseno bhakeku ne hintimiu bhahitieꞌiku, pugauku ini nokotuꞌu, hampano weo Kristus Yesus Ompuntoomu nowoseangkoomu bhakeku.

1 Korintus 8:13

Dadiꞌanomo ane o oti nehumaa naembali kakodhosaꞌano bhahitieku, akiido sepaliꞌa aomaa oti aitu ampa suhue dadiku, keana aehabu dhosa so bhahitieku naꞌa.

1 Korintus 9:19

Idi ini o mie bebasi, suano bhatuando manusia. Ampamo kaowu afobhatua wutoku ne kosasawindo mie, neanomo sedhuluꞌa dua kabhahindo mie so neowaku ne Kristus.

Galatia 2:20

Tamaka ampa aitu adadimo. Ampamo kaowu suanomo dadiku wutokua, tamaka Kristus dumadino we laloku ini. Dadi nedambaꞌaoku ini, ingka o dadi weo kaparasaea ne Anano Lahataꞌala. Anoa noasi kanaumo sampe nofotawakala wutono dopongkoe so idi.

Galatia 5:24

Mie membalino fehebuaꞌano Kristus Yesus, kapoindalono mbadhano padamo dofekamatee te sau salipu, maꞌanano sabhaha nafusuu bhe kapoindalono kamanusiano dosobuemo.

Galatia 6:14

Tamaka o idi akiido naowose bhakeku ne ae maka dua, mpahinomo Ompuntoomu Yesus Kristus mateno te sau salipu nefosibhalakua. Kapaꞌamo mbaꞌinomo mateno Kristus te sau salipu, dhunia ini miinamo bhe fahalaanoa so idi, kao-kaomo nomatemo so idi. Pedamo dua idi ini, kao-kaomo amatemo so dhunia.

Filipi 3:10

Ampamo sehonda kapoindaloku: amandeꞌao Kristus, amandeꞌao dua kuasa kawanuꞌano maiꞌao ne mate, bhe aeala dawu weo kakadee-deeno, neanomo asekatu bhe Anoa weo mateno.

Filipi 3:7

Kosasawiꞌae naꞌa endefiꞌini kunaꞌekumo kanggetu laba ⸤ so meowa kanau kasalamati⸥ , tamaka aitu akonaemo kahugi hampano Kristus.

Kolose 1:24

Aitu nowula laloku akadee-dee so hintimiu. Kapaꞌamo weo kakadee-deeno mbadhaku ini, ingka afopansuhu kakadee-dee nenamisino Kristus mbali mbadhano, maꞌanano umati marasaeano.

Kolose 3:5

Dadiꞌanomo fekamateeꞌomu weo totono lalomiu sabhaha fekihino dhunia: podiu tampahasa bhe pokahaku, o nafusuu bhe kapoindalo modai bhe kakadau-dau, kapaꞌamo o kakadau-dau ini ingka nopototo bhe desombai barahala.

2 Tesalonika 3:11

Kapugauꞌa mani peda aini hampano tafetingke nandoo mantawano kumiidono kumahadhaano, gunando fisa deꞌatoro urusundo bhaindo.

Titus 2:12

Noangka ne rahamatino, Lahataꞌala nofoinaꞌu kaita dakumukundo sabhaha podiu modai bhe kapoindalono dhunia. Nofoinaꞌu kaita dua damewanaki totono lalonto, daembali mie banara bhe dadumadi lumebe we dhunia ini.

Ibrani 13:13

Dadiꞌanomo mai dokalaomu se Anoa we sembalino kapoliwuꞌa, daeala dawu weo kafekaꞌaebu nenamisino.

1 Petrus 4:1

Mbadha kamanusiano Kristus nenamisi kakadee-dee, dadiꞌanomo hintimiu dua tetewei fekamatangka fekihimiu so nohelasiꞌao kumadee-deeꞌomu. Kapaꞌamo mie madano menamisino kakadee-deeno mbadha, nokukundomo dhosa.

1 Petrus 4:13

Tamaka fowulae lalomiu, hampano mealaomu dawu weo kakadee-deeno Kristus, neanomo nahumato tempono kakalabhiano Kristus damotiwohae, sedhuluꞌa kaꞌia bhe kawulano lalomiu.

2 Petrus 1:14

Kapaꞌamo apandeꞌaane dadiku ini paemo naomponaa, ingka padamo nofohato kanau wutono Yesus Kristus Ompuntoomu.

1 Yohanes 3:16

Dopandeꞌaaneomu maꞌanano kanini kaasi, hampano Kristus nopotahoꞌao inawano so intaodiomu. Dadiꞌanomo intaodiomu tabeano dua dahumelasi dapotahoꞌao inawanto so bhahitieꞌintoomu.

Powoha 2:10

Koise moteꞌia ne kakadee-dee so neꞌawamiu! Tandaiꞌe, Kafeompuꞌando seetani naꞌumohofi seemie hodua ne olotamiu itu weo katohongku patudhuno nasumobakoomu, maka meꞌawaomu kasabha naompuluꞌa. Fintahakieꞌomu mpuu kaparasaeamiu mahingga mewisekiomu mate, maka amaꞌangkoomu dadi suhue dhamani mbali kawaꞌaondo fotalono.