Lukas 8:13 - Muna Southern Dialect

¹³ Mondawuꞌano ne kamoꞌali, maꞌanano mie metingkeno bhoasaono Lahataꞌala naꞌa, lasao dotahimae bhe doꞌiaꞌane, tamaka miina nakopahakaa weo totono lalondo. Doparasaea sebantaha kaowu, sadeꞌawa kasabha dohunsa kaparasaeando kosowo-sowondo.

Lukas 8:13 Iomraidhean Croise

Markus 6:20

Kapaꞌamo Herodes padamo netudu mie dadhumagani Yohanes, mbaꞌinomo nomihikie, nopandeꞌaane Yohanes maitu mie metaa, mie mongkilo. Ane nopugau Yohanes, noasiane dua nofetingkee mahingga totono lalono miina nahumempoa.

Lukas 8:12

Mondawuꞌano ne wiwino kaangkaꞌa maꞌanano mie metingkeno tamaka nomai Kafeompuꞌando seetani noala bhoasao anaꞌa maiꞌao weo totono lalondo keana doparasaea, keana dua dosalamati.

Lukas 8:14

Mondawuꞌano weo kahoku kokihi maꞌanano mie metingkeno bhoasaono Lahataꞌala tamaka nobhahi dofekihi so kadadiꞌando, so kahangkaeando bhe so kambakano namisindo. Kosasawiꞌae naꞌa nopesua weo totono lalondo maka noꞌontiꞌi bhoasaono Lahataꞌala sampe miina nakohasilia.

Yohanes 15:2

Sasuka haꞌaku tapa kobhakeno nolakoe, tamaka sasuka haꞌaku kobhakeno nofekanggelaꞌie so nodhuluꞌao kabhahino bhakeno.

Yohanes 15:6

Sasuka tapa seꞌiseno bhe Idi daꞌumohoe we simbali nada haꞌano sau maka nakekele. Mada anaꞌa damoꞌonue maka daꞌumohoe weo efi sampe notitawu.

Yohanes 5:35

Yohanes maitu tapedamo kantalea humende nokotilanga, hintimiu moꞌiaꞌaneomu tilangano, tamaka sebantaha kaowu.

1 Korintus 13:2

Mahinggamo aeꞌawa kapooli akosuaha peda anabii, alumosangie sabhaha rahasia bhe amandeꞌaane sabhaha kapande, namatangka kaparasaeaku sampe naembali aefogampi kabhawo, tamaka ane pae bhe kanini kaasiku, ingka miina bhe faha-fahalaakua.

1 Korintus 15:2

Noangka ne Bhihita Metaa aini dofosalamatikoomu, sumanomo fekatangka fintahakieꞌomu, peda toka nefosampeku. Ane paise, ingka nosia-siamo kaparasaeamiua.

Galatia 3:1

Hintimiu miendo Galatia, kabhohemiu gahaꞌa! Nofobhohe-bhoheꞌikoomu laꞌae bhahaa ⸤ sampe hunsaomu kafoinaꞌu banara⸥ ? Ingka padamo afekantale-ntaleaꞌangkoeꞌomu mateno Yesus Kristus te sau salipu.

Galatia 3:4

Nosia-sia bhahaa sabhaha kadhadhia madano netompaloimiu? Koasimo dua nosia-sia!

Efesus 3:17

Sio-siomo hampano kaparasaeamiu, Kristus naeate kansuhu weo totono lalomiu, maka dadimiu naengkoha bhe nakopahaka weo kanini kaasi.

Kolose 1:23

Tamaka tabeano mpuu-mpuunieꞌomu kaparasaeamiu, fekamatangkae kofindamiu. Koise nomagoeaꞌa, koise dua nogampi posahunaꞌao neꞌawamiu wakutuuno fetingkeomu Bhihita Metaa. Bhihita Metaa ainimo nefolele ne sabhaha manusia we towawano lani ini. Idimo dua ini, Paulus, katudu mefoleleno Bhihita Metaa naꞌa.

Kolose 2:7

Kaparasaeamiu ne Anoa tabeano nakopahaka, bhe wutono Kristus naembalimo kaengkohaꞌano dadimiu. Kaparasaeamiu tabeano dhulu kamatangka, noposahataa bhe kafoinaꞌu netahimamiu. Totono lalomiu nakaꞌende-ende mefoampeomu katumpuno lalo.

1 Tesalonika 3:5

Dadiꞌanomo, mbaꞌinomo miinamo natitagalia kakambano lalo mani, tatudumo Timotius, amandeꞌao kaowu koeateno kaparasaemiu. Kapaꞌamo nomihiangkoomu laloku, bhahasaa nopoolikoomu kawudhuno Kafeompuꞌando seetani sampe nasumia-sia kawule mani.

1 Timotius 1:19

Fintahakie kaparasaeamu bhe totono lalomu metaano kumatanga-tangano. Kapaꞌamo nandoo seemie hodua miinamo daꞌumondofaanea totono lalondo kumatanga-tangano naꞌa, sampe kaparasaeando nohungga tapeda kapala tisoheno.

Ibrani 10:39

Ampamo kaowu intaodiomu ini suano umati mesowo-sowono so binasano, tamaka intaodiomu ini umati marasaeano so meꞌawano dadi.

Yakobus 2:26

Ane o mbadha miinamo nakoinawa, ingka nomatemo. Pedamo dua aitu o kaparasaea, ane miina naseowaꞌa bhe habu, ingka nomatemo.

2 Petrus 2:20

Kapaꞌamo ane o mie nopandeꞌaomo Ompu bhe Omputo Fosalamatino Yesus Kristus, ingka nolapamo maiꞌao ne sabhaha kuasano dhunia pokahakuno. Tamaka ane suli toha dotigogantu bhe dotalo ne sabhaha kuasa naꞌa, ingka sedhuluꞌa kadahano bhe endefiꞌini.

2 Petrus 2:22

Podiundo nopokantibha mpuu bhe wambano kapalenda aini “O daꞌu suli nososo tongkano, o wewi mada mekadiuno nosuli toha nofelembo.”

1 Yohanes 2:19

Andoa mewangino Kristus maitu daanumo domaiꞌao ne olotantoomu, tamaka sakotuꞌuꞌano suano mientoomu. Kapaꞌamo ane kotu-kotuꞌu mientoomu, teteweimo sadaa-daa dapobhai bhe intaodiomu. Tamaka limbando maitu somo notiwohaꞌao putae kosasawindo maitu suano sabhangkantoomua.

Yudas 1:12

Weo hame-hamendo umati notimolampi diundo, kapaꞌamo miina daoambanoa deagoi oti, tadofeꞌulai kaowu wutondo. Andoa tapedamo olu nelola-lolaꞌaono kawea tamaka miina naeowa use. Andoa tapedamo dua sau tapa kobhake mahinggamo ne tandaiꞌano nakobhake, mbaꞌinomo padamo dobunae bhe paha-pahakano, nomatemo sepaliꞌa.