Ibrani 2:10 - Muna Southern Dialect

¹⁰ Ingka nopantasimo so Lahataꞌala, Anoamo mokonandoono bhahi-bhahiꞌae somo dua Wutono, nohabu Yesus mbali melengkano kaangkaꞌano kasalamatiꞌa, nofosangkaane kakadee-dee. Pedamo anaꞌa noangka ne Yesus dobhahi manusia nebhasino Lahataꞌala daeala dawu weo kakalabhiano.

Ibrani 2:10 Iomraidhean Croise

Lukas 13:32

Notobhoosimo Yesus ambano, “Kalaomu, fohatoomu kilau naꞌa, ‘Idi aefolimba seetani bhe aefekaꞌosa mie mosaki seꞌoleo itu bhe naewine, naefua atumokaemo kahadhaaku.’

Lukas 2:14

“Nokalabhia mpuu Lahataꞌala te wawono wawo, katohopo mpuu we dhunia, so manusia posahasiꞌano lalo bhe Lahataꞌala.”

Lukas 24:26

Ingka Mesias Omputo Fosalamatino tetewei naenamisi kadeki kosasawiꞌae maitu so namehapiꞌao kakalabhiano.”

Lukas 24:46

Ambano toha, “Notibuhi peda ini: Mesias Omputo Fosalamatino tetewei naenamisi kakadee-dee bhe namanu maiꞌao ne mate ne katolu oleono.

Yohanes 11:52

Gahaꞌaitumo suano kaowu so raꞌeatino Yahudi, tamaka nomateꞌao dua kosasawindo anano Lahataꞌala tikambisano, neanomo sumuli namoꞌonuda bhe namoseꞌiseda.

Yohanes 19:30

Pada nofenami angguru mokolo naꞌa, Yesus nopugaumo ambano, “Notokamo!” Pada anaꞌa nofolongkomo fotuno maka nofotawakala inawano, nobhotumo.

Tula-tulando rasulu 3:15

Anoamo fowaꞌaono dadi, gahaꞌa pongkoemoomu. Tamaka Lahataꞌala nofowanue nomaiꞌao ne mate. Insaodimo ini mohaꞌaono wuntano mata mani kadhadhia anaꞌa.

Tula-tulando rasulu 5:31

Anoamo nesangkeno Lahataꞌala bhe nowaꞌanemo kuasa mbali Neangka bhe Omputo Fosalamatino, neanomo miendo Israel dametompaꞌao diundo modaino, so notiꞌamponiꞌao dhosando.

Roma 11:36

Kapaꞌamo bhahi-bhahiꞌae nomaiꞌao ne Anoa, nonandoo hampano Anoa, bhe nasumuli dua ne Anoa. Notifosibhala mpuu Lahataꞌala ampa suhue dhamani! Amin.

Roma 9:23

Kahabuꞌano peda anaꞌa Lahataꞌala, neanomo namotipandeꞌao kakalabhiano pontalabhi-labhino ne mie nemobhelaꞌaono lalono, mie toka nefontaa-ntaano wawo so tumahimano kakalabhiano.

1 Korintus 2:7

Wambano kapande nepulaoꞌao mani ini nomaiꞌao ne Lahataꞌala, rahasia aini notifebuni sampe miinaꞌo damandeꞌaane mieno dhunia. Tamaka mpini miinaꞌo bhe dhunia Lahataꞌala tokamo nofontaa-ntaaꞌe mbali intaodiomu, so daealaꞌao dawu ne kakalabhiano Lahataꞌala.

1 Korintus 8:6

tamaka so intaodiomu ampamo Lahataꞌala Kaseemie-mieꞌano, Amantoomu. Anoamo mokonandoono bhahi-bhahiꞌae, dadintoomu somo dua Anoa. So intaodiomu Ompu seemie-mieno dua, Yesus Kristus. Noangka ne Anoa bhahi-bhahiꞌae dofokonandooꞌe, hampanomo dua Anoa kadadiꞌantomoomu.

2 Korintus 3:18

Ampa aitu kosasawintoomu ini sanea tapa mekantutuno, ulantoomu miina natidapohia, tapedamo paeasa motiwohano kakalabhiano Ompu. Kanandooꞌanomo intaodiomu dotibhaliiꞌomu dhulu kapototo bhe ulano Wutono, dhulu kaompona dhulu kakalabhia. Kakalabhia amaitu ingka nomaiꞌao ne Ompu, Rohinomo Lahataꞌala.

2 Korintus 4:17

Kapaꞌamo kasabha mosape sebantahano ini, naeowa kainsami kakalabhia suhue dhamani pata tikiha-kihano, sabhaha kasabha mani ini paemo bhe maꞌa-maꞌananoa.

2 Korintus 5:18

Kosasawiꞌae ini nomaiꞌao ne Lahataꞌala. Noangka ne Kristus Lahataꞌala padamo nopometaa kaita bhe Wutono bhe nowaꞌa kainsami taka kaꞌondofao tapometaaꞌao manusia bhe Wutono.

2 Korintus 6:18

“Idi aembali amamiu, hintimiu somo anaꞌiku moꞌane bhe hobhine; pedamo naꞌa bhoasaono Ompu, Fofoliuno Kuasa.”

Galatia 3:26

Hintimiu membalimoomu anaꞌino Lahataꞌala, hampano kaparasaeamiu ne Kristus Yesus.

Efesus 2:7

Patudhuno Lahataꞌala neanomo ne dhamani te wise namotiwoha kabhalano kataano lalono ne intaodiomu ini. Kataano lalono bhe kanini kaasino nofosampue ne intaodiomu noangka ne Kristus Yesus.

Efesus 3:10

Patudhuno Lahataꞌala, ampa aitu sabhaha mintahano kuasa bhe rohi neangka te antara, damandeꞌaane dua kandalono fehikino Lahataꞌala mangkaꞌano ne umatino.

Kolose 3:4

Kristusmo ini kamaiꞌano dadintoomu; mada kaowu ane namotiwoha Wutono, hintimiu dua tetewei tiwohaomu bhe Anoa mesuaꞌomu weo kakalabhiano.

2 Timotius 2:10

Kanandooꞌanomo taꞌasabahamo apotaamiꞌao bhahi-bhahiꞌae ini so kaetaaꞌando mie nepilino Lahataꞌala. Patudhuku sio-siomo andoa daeꞌawa dua kasalamati neowano Kristus Yesus bhe kakalabhia suhue dhamani.

Ibrani 12:2

Poowa bhe tendentoomu, ondo kaitaomu kansuhu te wise, te Yesus. Anoamo melengka kaita kaangkaꞌano kaparasaea, Anoamo dua so mosangkano kaparasaeantoomu. Yesus netaami kakadee-dee te sau salipu bhe miina naoheruane putae domate te sau salipu maitu giu timoambanoꞌaono, hampano sehonda-honda nefeꞌulaino: te wiseno nandoo kawulano lalo bhalano so netahimano. Ampa aitu Anoa nengkohamo ne suanano kaengkohaꞌano kumalabhiano Lahataꞌala.

Ibrani 6:20

Yesus nopaꞌindulumo nopesua te naꞌa nofomelengkaꞌao kaangkaꞌa, nembalimo Imamu Bhalano ampa suhue dhamani peda imamu Melkisedek.

Ibrani 7:26

Imamu Bhalano pedandomo anaꞌa nefaraluuntoomu: Anoa mie mongkilo, miina nakodhosaa, miina nakodengo-dengoa, nopogaati bhe mie kodhosa, dosangkee te surugaa te wawono wawo.

Ibrani 7:28

Tubhono agama Yahudi nesangke mie monale dembali Imamu Bhalano. Tamaka nopalusi tubhono agama amaitu, Lahataꞌala nehabu dhandi bhe nofemata nosangke Anano mbali Imamu Bhalano, nefosangka ampa suhue dhamani.

1 Petrus 1:12

Lahataꞌala nofohato ana-anabii naꞌa putae bhihita nekosuahaꞌaondo, suano so wutondo tamaka so hintimiu. Ingka bhihitamo dua anaꞌa nefetingkemiu ampa aini ne mie meowano Bhihita Metaa. Weo kuasano Rohino Lahataꞌala nefosampu maiꞌao te surugaa, mie anaꞌa dofosampeangkoomu Bhihita Metaa anaꞌa. Mahinggamo malaꞌekati, gaondo damandeꞌaane dua bhihita aini.

1 Petrus 5:1

Nandoo kamesaloku ne kamungkulaꞌi neangkando umati. Kaebuhiꞌaku peda aini, ingka idi ini seemie dua kamungkulaꞌindo umati peda hintimiu, pakade awohaꞌao wuntano mataku kakadee-deeno Kristus. Nahumato tempono natiwoha kakalabhiano Kristus, ingka aeꞌawa dua dawu weo kakalabhiano naꞌa.

1 Petrus 5:10

Tamaka Lahataꞌala kamaiꞌaoꞌano sabhaha rahamati, Anoamo bhasikoomu so mealaomu dawu weo kakalabhia suhue dhamani bhe Kristus. Dadiꞌanomo namada kumadee-deeꞌomu sebantaha, Lahataꞌala namosangkamo dadimiu, namoehekoomu, namekaꞌosakoomu bhe namekamatangka kofindamiu.

Powoha 4:11

“Ompu bhe Lahataꞌala mani, Hintu nopantasi tumahima sabhaha kapudhi, kafosibhala bhe kuasa, kapaꞌamo Hintumo mokonandoono sabhaha ndumandooꞌano; kosasawiꞌae maitu donandoo bhe dofokonandooda hampano kapoindalomu.”

Powoha 7:9

Pada amaitu awohamo kantawundo mie, miina natilentua kabhahindo. Andoa domaiꞌao ne sabhaha liwu, sabhaha sampuꞌa, sabhaha siwulu, bhe sabhaha wamba, deehe-ehe ne wiseno kaengkohaꞌa kumalabhiano bhe ne wiseno Anano Dhumba, depake dhuba kapute deintaha hoono potubu.