Efesus 5:5 - Muna Southern Dialect

⁵ Tandaiꞌeomu kotu-kotuꞌu: mie pokawite-witeno, mie pokahaku bhe mie kumadau-dauno pae namantasia daeala dawu weo kafopahintaꞌano Kristus bhe Lahataꞌala. O kakadau-dau ini ingka nopototo bhe desombai barahala.

Efesus 5:5 Iomraidhean Croise

Tula-tulando rasulu 20:32

Aitu afopuliemo ne Ompu somo dumambaꞌaangkoomu, neanomo sadaa-daa mintahakieꞌomu bhihitano rahamatino. Lahataꞌala nokokuasa namekatangka kaparasaeamiu bhe nadumawuangkoomu sabhaha kadawu nefotantuno so mie nefekangkilono.

Tula-tulando rasulu 8:21

Miina bhe hakumua weo kahadhaa mani ini, hampano totono lalomu miina naelaaꞌa ne pomatano Lahataꞌala.

Galatia 5:19

Kapoindalono wuto nentaleamo notiwoha ne habu pedando ini: dopokawite-wite, dopokahaku, nafusuu modai,

Galatia 5:21

dopomole-moleaꞌao lalo, dololanu, sakahame dohumaa dofohoꞌu, bhe sabhaha habu modai sigaoꞌano. Peda padamo afohatokoomu endefiꞌini, aitu amenduaꞌangkoeꞌomu dua, mie humabuno sabhaha podiu medando maitu paise daeꞌawa kadawu weo Kafopahintaꞌano Lahataꞌala.

Efesus 5:3

Hintimiu umati mongkilono Lahataꞌala, dadiꞌanomo miina namantasia mepakeomu podiu pokawite-wite bhe pokahaku tawa kakadau-dau. Podiu medando aini mahingga sumambilieꞌomu koise.

Kolose 1:13

Lahataꞌala nofosalamati kaita maiꞌao weo kuasano kahohondo maka nofogampi kaita weo kafopahintaꞌano Anano kamoasiꞌaono.

Kolose 3:5

Dadiꞌanomo fekamateeꞌomu weo totono lalomiu sabhaha fekihino dhunia: podiu tampahasa bhe pokahaku, o nafusuu bhe kapoindalo modai bhe kakadau-dau, kapaꞌamo o kakadau-dau ini ingka nopototo bhe desombai barahala.

1 Timotius 6:10

Kapaꞌamo ane dofeompu ne dhoi ingka katandaꞌanomo sabhaha modaiꞌano. Nandoo mie meꞌambano dhoi sampe dopingkamo maiꞌao ne kaparasaeando maka totono lalondo dosikisaaꞌane sabhaha kasabha.

1 Timotius 6:17

Ne mie hangkaea we dhunia ini mefeꞌulaianda, koise nelangke diundo, koise doposahunaꞌao ne bara pata titangkaꞌaono peda kahangkaea. Tamaka mefeꞌulaianda daposahunaꞌao ne Lahataꞌala, tapa megana-ganano nofowaꞌao sabhaha kafaraluuntoomu so kaetaaꞌano namisintoomu.

Ibrani 13:4

Kosasawiꞌamiu fosibhalaeꞌomu o kakawi, koise pokadengoꞌao kaodoꞌamiu, kapaꞌamo mie pokawite-witeno bhe monsuleno nabhitahakida Lahataꞌala.

Powoha 21:8

Tamaka mie katehe, mie tapa marasaeano, mie timolampi, mie fopongkono, pokawite-witeno, kowuhakeno, mesombaino barahala bhe sabhaha mie kopahano, andoa maitu daꞌumawa dawundo weo efi ngkowaleha ngkalai-laino ne kantobha bhalano. Anoamo ini mate kahaa pakuno.”

Powoha 22:15

Tamaka sabhaha daꞌu, kowuhakeno, mie pokawite-witeno, mie fopongkono, mesombaino barahala bhe mie moindalono paha bhe kopahano, kosasawindo naꞌa daeate-ate we simbalino kota.