Efesus 5:2 - Muna Southern Dialect

² Dadimiu tabeano nakumabhintie kanini kaasi, peda wutono Kristus nofomoasiꞌao. Nofotawakalamo Wutono so intaodiomu sampe dopongkoe. Anoa nembali kapopanga mowondu nefoampe ne Lahataꞌala, mekaꞌianomo lalono Lahataꞌala.

Efesus 5:2 Iomraidhean Croise

Matius 20:28

Kapaꞌamo wutono Anano Manusia - Idimo ini - nomai pae naefeꞌondofaoa tamaka nafoꞌondofao bhe nafowaꞌao inawano so katolosindo mie bhahi.”

Yohanes 13:34

Awaꞌangkoomu pahinta buꞌou: pomoa-moasiꞌaoꞌomu. Tapedamo Idi aoasiangkoomu, nadamo dua anaꞌa hintimiu pomoa-moasiꞌaoꞌomu.

Yohanes 6:51

Idimo ini roti dumadino sumampuꞌano maiꞌaono te surugaa. Ane mie naomaa roti aini nadumadi ampa suhue dhamani. Roti so newaꞌaoku maitu dhagiku Wutoku, somo kadadiꞌando dhunia.”

Roma 15:16

Takaku ini ingka aembali mie umondofaono Kristus Yesus ne olotando sabhaha bansano liwu suano Yahudi. Aembalimo kanggetu seemie imamu meowano Bhihita Metaa maiꞌaono ne Lahataꞌala, neanomo sabhaha bansano liwu daembali kanggetu kapopanga titahimano ne Lahataꞌala bhe nefekangkilono Rohino Lahataꞌala.

Roma 4:25

Anoamo mada neowa ne limando fopongkono dhohono dhosantoomu, tamaka padamo dua nofowanue Lahataꞌala maiꞌao ne mate so naembaliꞌao dasumuli dapometaa bhe Lahataꞌala.

Roma 8:3

O ae pata nepoolino tubhono agama Yahudi, hampano kanaleno mbadha kamanusia, padamo nohabue Lahataꞌala. Lahataꞌala notudu Anano wutono ⸤ nomai we dhunia ini⸥ nokatu mbadha kodhosa nembali kapopanga metolosino dhosa. Pedamo anaꞌa Lahataꞌala nohukumu dhosa nepake mbadha kamanusia.

Roma 8:37

Mahinggamo peda anaꞌa, weo sabhaha kasabha maitu intaodiomu deꞌawaomu kafotalo mangaliuno, noangka ne Anoa moasi kaita.

1 Korintus 16:14

Habueꞌomu sabhaha kahadhaamiu weo kanini kaasi.

1 Korintus 5:7

Ohoeꞌomu ragi ngkodau itu ⸤ kaꞌibahatino dhosa⸥ , neanomo membaliomu nada kadhalono tarigu buꞌou pata koragiꞌano. Ingka hintimiu daanumo pedamo anaꞌa. Kapaꞌamo Kristus, anano dhumbantoomu so kapopanga ne hohaeaꞌano Paska, padamo dosumbelee.

2 Korintus 2:14

Foampe kaitaomu katumpuno lalo ne Lahataꞌala, kapaꞌamo Kristus noowa kainsami tabhatompa weo hame-hameno kafotaloꞌano, hampano kaseꞌise mani bhe Anoa. Lahataꞌala nopake kainsami taefolele Bhihita Metaano Kristus ne amai maka dua tapedamo wonono mina-mina mowonduno.

2 Korintus 2:15

Kapaꞌamo insaodi ini tapedamo wonono dupa netununo Kristus so Lahataꞌala, ne olotando mie nefosalamati bhe ne olotando mie so binasano.

2 Korintus 8:9

Ingka pandeꞌaanemoomu rahamatino Ompuntoomu Yesus Kristus: mahinggamo nohangkaea, nohelasimo nembali mie mokae so hintimiu, neanomo noangka ne kakaeno hintimiu humangkaeaꞌomu.

Galatia 1:4

Yesus Kristus nofotawakala wutono sampe dopongkoe mbali katolosino dhosantoomu, so namolapaꞌao intaodiomu maiꞌao ne dhamani modai ini. Habuno Kristus ini noangkafi kapoindalono Lahataꞌala Amantoomu.

Galatia 2:20

Tamaka ampa aitu adadimo. Ampamo kaowu suanomo dadiku wutokua, tamaka Kristus dumadino we laloku ini. Dadi nedambaꞌaoku ini, ingka o dadi weo kaparasaea ne Anano Lahataꞌala. Anoa noasi kanaumo sampe nofotawakala wutono dopongkoe so idi.

Efesus 1:4

Mpini miinaꞌo natifokonandoo dhunia, Lahataꞌala nofopilimo noangka ne Kristus, neanomo daembali mie mongkilo bhe pata kodengono ne wiseno.

Efesus 3:17

Sio-siomo hampano kaparasaeamiu, Kristus naeate kansuhu weo totono lalomiu, maka dadimiu naengkoha bhe nakopahaka weo kanini kaasi.

Efesus 3:19

Sio-siomo kanini kaasi anaꞌa lumosangieꞌomu, mahinggamo sakotuꞌuno pae damondoiꞌe damahamue, neanomo dadimiu nakumabhintiemo sifatino Lahataꞌala foliuno kasumangka.

Efesus 4:15

Tamaka ane damintaha ne kabanara, damugauꞌao kumotuꞌuꞌano weo kanini kaasi, tetewei dadintoomu dhulu kasumangka peda dadino Kristus, mefotu kaita.

Efesus 4:2

Naetaa sadhia mekapanda wutomiu, naomalu lalomiu bhe kosabahaomu. Fotiwohaeꞌomu kanini kaasimiu weo potulu-tulumiꞌa.

Efesus 5:15

Dadiꞌanomo ondofaane fekataa-taaꞌe dadimiu. Koe dadi ngkabhohe-bhoheomu, tamaka dadiomu peda mie mande.

Efesus 5:25

Hintimiu moꞌane, moasianeomu hobhinemiu pedamo Kristus noasiꞌao umatino, nofotawakalaanda Wutono sampe nomateanda.

Filipi 4:18

Kosasawiꞌae atahimaemo, nokapotiemo kafaraluuku, tanokolabhimo dua. Pada atahima kapakatumiu ne Epafroditus, miinamo akonikaea. Kawaꞌaomiu ini tapedamo kapopanga mowondu, mekaꞌiano lalono Lahataꞌala bhe nemoasiꞌaono.

Kolose 3:14

Te wawono bhahi-bhahiꞌae naꞌa pomoa-moasiꞌaoꞌomu, kapaꞌamo o kanini kaasi kanggetumo kawawe mosangkano kaseꞌisendo umati.

1 Tesalonika 4:9

Ingka miinamo namaraluua taebuhiangkoomu nada amai pomoni-moniniꞌaoꞌomu sapada-pada hintimiu, mbaꞌinomo wutono Lahataꞌala pada nofoguhukoomu pomoa-moasiꞌaoꞌomu.

1 Timotius 2:6

Anoa ini noowa Wutono mbali katolosino dhosando kosasawindo manusia. Pedamo anaꞌa Lahataꞌala nofotiwohamo kakampuu-mpuuno nofosalamati manusia ne tempo toka nefotantuno.

1 Timotius 4:12

Koise bhe misakiko mbaꞌinomo nandoo nohangku dadimu. Tamaka membalimo sandaha so neangkafindo mie marasaeano, weo pugaumu, weo podiumu, weo kanini kaasi ne mie bhaimu, weo kaparasaeamu ne Kristus Yesus bhe weo kangkilono dadimu.

Titus 2:14

Anoa padamo noowa Wutono sampe dopongkoe so intaodiomu, mbali nofofobebasiꞌao maiꞌao ne sabhaha podiu modai. Patudhuno dua naefokonandooꞌao umati mongkilono, so fehebuaꞌano Wutono, umati mokokosono humabu metaano.

Ibrani 8:3

Seemie-seemie Imamu Bhalano dosangkee so naefoampeꞌao kawaꞌao bhe kapopanga nesumbele ne Lahataꞌala. Pedamo dua aitu Imamuntoomu nofaraluu dua bhe nefoampeno.

Ibrani 9:14

bhemo toha heano Kristus! Weo kuasano Rohino Lahataꞌala dumadino suhue dhamani, Kristus nofoampe Wutono mbali kapopanga pata kodengono ne Lahataꞌala. Dadiꞌanomo heano tetewei namekangkilo totono lalontoomu maiꞌao ne sabhaha podiu meowano mate, neanomo naembali dameompuomu ne Lahataꞌala dumadino.

Ibrani 9:23

Bhahi-bhahiꞌae ndumandooꞌano ⸤ weo tenda naꞌa⸥ , kaꞌibahatino ndumandooꞌano te surugaa, tabeano dofekangkiloe peda anaꞌa. Tamaka bhahi-bhahiꞌae kanandoo sakotuꞌuno te surugaa nofaraluu damekangkiloane kapopanga sedhuluꞌano kataa.

Ibrani 9:26

Kapaꞌamo ane ibahano namendua, nokomaꞌana tabeano namekantuhu-ntuhu nakadee-dee mpini pakatifokonandoono dhunia. Tamaka miina nada naꞌa: ne pandano dhamani ini Kristus nohato ne dhunia ini sepaku kaowu noowa Wutono mbali kapopanga nesumbele so katitolosiꞌano dhosa.

1 Petrus 4:8

Tamaka fofoliuꞌano, pomoa-moasiꞌao sampuu-mpuuno lalomiu, kapaꞌamo ane dopomoa-moasiꞌao dohelasimo dua dopomaꞌa-maꞌafuꞌao, mahingga nobhahi kaꞌalando.

1 Yohanes 3:16

Dopandeꞌaaneomu maꞌanano kanini kaasi, hampano Kristus nopotahoꞌao inawano so intaodiomu. Dadiꞌanomo intaodiomu tabeano dua dahumelasi dapotahoꞌao inawanto so bhahitieꞌintoomu.

1 Yohanes 3:23

Pahintano peda aini: damarasaeaꞌomu ne Yesus Kristus Anano Lahataꞌala, bhe dapomoa-moasiꞌao pedamo dua pahintano Kristus ne intaodiomu.

Powoha 1:5

bhe nomaiꞌao dua ne Yesus Kristus, sakusii tiparasaeano, kabhao-bhaono manuno maiꞌao ne mate bhe kokuasano ne sabhaha omputo ne dhunia ini. Yesusmo ini moasi kaitaomu bhe noangka ne tuhuno heano padamo nofolapa kaita maiꞌao ne dhosa.

Powoha 5:9

Andoa delaguꞌao lagu buꞌou ambado, “Hintu nopantasi tahima kaluluno kitabi aitu bhe lumengka kafulutino, hampano Hintu padamo dosumbeleko, heamu padamo metolosiane manusia maiꞌao ne sabhaha sampuꞌa, sabhaha wamba, sabhaha siwulu bhe sabhaha bansano liwu so Lahataꞌala.