Efesus 4:22 - Muna Southern Dialect

²² Ingka padamo dofoinaꞌukoomu peda aini: hunsaeꞌomu toha kodadimiu ngkodauꞌano, kapaꞌamo dadimiu ngkodauꞌano naꞌa nodai-daiꞌe sabhaha kapoindalo fofekakolilinono.

Efesus 4:22 Iomraidhean Croise

Roma 6:6

Ingka dopandeꞌaanemo, kamanusianto ngkodauꞌano dopongkoemo te sau salipu poowa bhe Kristus, neanomo kuasano dhosa ne mbadhanto nahumansurumo. Dadiꞌanomo paemo namobhatua kaita dhosa.

Roma 7:11

Noangka ne pahintano agama maitu, dhosa neꞌawa kasalawa nobhohe-bhoheꞌi kanau, bhahamoa noangka ne pahinta maitu nopongko kanau.

2 Korintus 11:3

Ampamo kaowu nomihi laloku bhahasaa dofekakolilino fekihimiu sampe paemo nakumampuu-mpuu kataino lalomiu ne Kristus, peda endefiꞌini Hawa nobhohe-bhoheꞌie akalano ule.

Galatia 1:13

Ingka fetingkeemoomu, peda amai dadiku endefiꞌini weo agama Yahudi; miina aegana-ganaa afodee-dee umatino Lahataꞌala, patudhuku amobinasada.

Efesus 2:3

Sakotuꞌuno endefiꞌini kosasawintoomu nopototo dua bhe andoa; dodadi doangkafi nafusuu bhe kapoindalono mbadha bhe fekihi modai. Sakotuꞌuno nopantasi mpuu Lahataꞌala nafoꞌamahaki, peda dua andoa maitu.

Efesus 4:17

Dadiꞌanomo, amohatokoomu weo neano Ompu bhe amodhagakoomu: koemo toha dadiomu peda mie tapa mandeꞌaono Lahataꞌala, mefekihino sabhaha tapa kofahalaano.

Efesus 4:25

Kanandooꞌanomo bhahitieꞌiku, koemo kopahaomu, pugauꞌomu kumotuꞌuꞌano ne mie bhaimiu, kapaꞌamo intaodi ini saneamo katokano mbadhano Kristus.

Efesus 4:31

Ohoeꞌomu sabhaha kaleano lalo, ponanti-nantiꞌao bhe amaha. Ohoeꞌomu dua pokei-keisiꞌao amaha, bhe pofeka-fekaꞌaebu. Fekakodoꞌoeꞌomu bhahi-bhahiꞌae naꞌa bhe sabhaha podiu modai.

Kolose 2:11

Weo kaseꞌisemiu bhe Kristus, hintimiu padamo dosunakoomu. Ampamo kaowu suano kasuna nekahadhaando limando manusia, tamaka kasuna nekahadhaano Kristus weo totono lalomiu, maꞌanano noaliangkoomu kuasano dhosa we lalomiu.

Titus 3:3

Endefiꞌini intaodiomu dobhoheomu dua, miina daeangkaa bhe nokolilino totono lalontoomu, dembaliomu bhatuano nafusuu bhe sabhaha kapoindalono mbadha. Dadintoomu noponoꞌao podiu modai bhe kakonduano lalo, o mie dofobansi bhe intaodiomu dobansi dua mie bhainto.

Ibrani 12:1

Intaodiomu ini dofowaliligi sakusii bhahino naꞌa, tapedamo o olu dofokaputi. Dadiꞌanomo ⸤ kanggetu meangkafino pogolo-goloꞌa⸥ hunsa kaitaeꞌomu toha sabhaha fofekabhieno bhe foꞌonto-ontomino bhe dhosa mansopikano. Tende kaitaomu kansuhu, potaami kaitaomu weo pogolo-goloꞌa newisekintoomu ini.

Ibrani 3:13

Tamaka naetaa seꞌo-seꞌoleo pofeka-fekatangkaomu lalo tinangke dadiomu ne dhamani nekonando “Oleo Itu” weo Kitabi, keana bhe mekatuꞌa pongkeno ne olotamiu itu sampe nabhohe-bhoheꞌie dhosa.

Yakobus 1:21

Dadiꞌanomo ohoeꞌomu toha podiu mohaku bhe sabhaha kanea modai. Fekamalu lalomiu bhe tahimaeꞌomu bhoasaono Lahataꞌala toka netisa weo totono lalomiu, kapaꞌamo bhoasao aitu nokokuasa namosalamatikoomu.

Yakobus 1:26

Ane seemie noabhi wutono nokoꞌagama tamaka miina namooli nofewanaki lelano, ingka nobhohe-bhoheꞌimo wutono, agamano miina nakofahalaa.

1 Petrus 1:18

Ingka pandeꞌaanemoomu, o ae katolosino toka netanduaꞌao so mobebasikoomu maiꞌao ne dadi sia-sia kahunsaꞌaondo awuaꞌimiu. Katolosino anaꞌa ingka suano bara mobinasa, peda bulawa tawa salaka,

1 Petrus 4:3

Ingka endefiꞌini nompona sepaliꞌa angkafiomu kapoindalondo manusia tapa mandeꞌaono Lahataꞌala. Hintimiu angkafiomu sabhaha nafusuu, kapoindalo modai, fohoꞌu ampa mololanuomu, sakahame, mempohoꞌuomu, bhe mesombaiꞌomu barahala timohakuno.

2 Petrus 2:13

Kakadee-dee so neꞌawando naꞌa kanggetu dua ponambono habu modaindo fofodee-deeno. Dohabu pokahaku ole-oleo dokonaemo dua kataano namisindo. Ane dohumaa dopombali-mbali bhe hintimiu weo kahamendo umati, diundo notimolampi bhe notimoambanoꞌao mbaꞌinomo dololanuꞌao nafusuu modai.

2 Petrus 2:7

Wakutuu anaꞌa ampamo Lot nefosalamati. Anoa ini mie banara, nosabha mpuu handano hampano habundo mie tapa mefadhulino atora bhe dumadino weo nafusuu modai.