Efesus 3:7 - Muna Southern Dialect

⁷ Lahataꞌala nowaꞌa kanau taka amolele Bhihita Metaa anaꞌa. Taka kaꞌondofao aini atahimae nopobutu bhe rahamatino Lahataꞌala, amondoiꞌe hampano kuasano Wutono kumahadhaano ne idi.

Efesus 3:7 Iomraidhean Croise

Tula-tulando rasulu 9:15

Tamaka Ompu nokobhoasaomo toha, “Kalamo, kapaꞌamo anoamo ini nepiliku so palima-limaku, naefebhihitaiꞌao neaku ne sabhaha bansano liwu suano Yahudi, ne sabhaha omputo bhe ne miendo Israel dua.

Roma 1:5

Noangkamo dua ne Yesus Kristus, insaodi ini taeꞌawa rahamati taembali rasulu so mowano sabhaha bansano liwu suano Yahudi damarasaea bhe daeangka ne Kristus, somo katifekalabhiaꞌano.

Roma 12:3

Hampano kadawu neꞌawaku ne Lahataꞌala, amohatokoomu kosasawimiu itu: weo fekihimiu koise abhi wutomiu nalumiuꞌe bhe mantasiꞌano, tamaka fekihiomu saetaaꞌano, noposahataa bhe kabhalano kaparasaea nedawuꞌaono Lahataꞌala ne hintimiu seemie-seemie.

Roma 15:16

Takaku ini ingka aembali mie umondofaono Kristus Yesus ne olotando sabhaha bansano liwu suano Yahudi. Aembalimo kanggetu seemie imamu meowano Bhihita Metaa maiꞌaono ne Lahataꞌala, neanomo sabhaha bansano liwu daembali kanggetu kapopanga titahimano ne Lahataꞌala bhe nefekangkilono Rohino Lahataꞌala.

1 Korintus 15:10

Tamaka hampano rahamatino Lahataꞌala idi ini ingka pedamo aini, maka rahamatino ne idi miina nasumia-siaꞌa. Idi padamo akahadhaa mobhie afoliuda kosasawindo rasulu, ampamo kaowu suano kaꞌosano wutoku tamaka rahamatino Lahataꞌala pobhai kanau.

1 Korintus 3:5

Kaowu laꞌae bhahaa Apolos maitu? Laꞌae bhahaa Paulus maitu? Andoamo itu ingka sanea palima-limano Ompu matokoomu ne kaparasaea ne Kristus. Seemie-seemie nedhalangi kaowu taka peda newaꞌaono Ompu.

2 Korintus 3:6

Ingka Anoamo maꞌa kainsami kapooli taembali mie umondofaono Podhandiꞌa Buꞌou. Podhandiꞌa aini miina naengkoha ne tubho tibuhino, tamaka nengkoha ne Rohino Lahataꞌala, kapaꞌamo tubho tibuhino neowa mate, tamaka Rohino Lahataꞌala neowa dadi.

2 Korintus 4:1

Insaodi tatahima taka kaꞌondofao aini hampano kabhelano lalono Lahataꞌala, patamo kaotembeꞌano lalo mani.

Galatia 2:8

Kapaꞌamo Lahataꞌala maꞌaono kapooli ne Petrus mbali rasulu so miendo Yahudi, Anoamo dua maꞌa kanau kapooli aembali rasulu so mie suano Yahudi.

Efesus 1:19

So mandeꞌaoꞌomu dua kabhibhiisano kuasano Lahataꞌala meateno weo totono lalontoomu mie marasaeano. Kuasa aini nopototo bhe kuasano kumalabhiano,

Efesus 3:2

Teteweimo fetingkemoomu putae weo rahamatino, Lahataꞌala nowaꞌa kanau taka kaꞌondofao aembali rasulu so hintimiu.

Efesus 3:20

Kabhalano maka kuasano Lahataꞌala kumahadhaano weo totono lalontoomu, sampe nemondoino Lahataꞌala noliuꞌe sabhaha kamesalo bhe nefekihintoomu, nobhala mpuu poꞌalaꞌano.

Efesus 3:8

Idi ini mie we pandano panda ne olotando umati mongkilono Lahataꞌala. Mahinggamo pedamo aini, Lahataꞌala nofotiwoha kanau rahamatino nowaꞌa kanau takaku ini: aefolele Bhihita Metaa ne mie suano Yahudi, aefebhihitaianda kabhalano kabarakatino Kristus pata tikiha-kihano so intaodiomu.

Efesus 4:16

Ane Anoa nofefotu kaita, kosasawiꞌae katokano mbadha dopotudu-tudumiane doangkafi losuano dembali sembadha. Ane sehonda-sehonda katokano mbadha nadhumalangi takano meteetaa, o mbadha aini tetewei sadhulu kabhala bhe kamatangka weo pomoni-moniniꞌa.

Kolose 1:29

Somo amooliꞌao anaꞌa, aꞌuleiꞌe laloku akahadhaa bhe apoewangi ampa kaꞌosano bukuku, hampano kuasano Kristus kumahadhaano weo totono laloku.

1 Tesalonika 2:13

Dadiꞌanomo, miina bhe katiehea taefoampe katumpuno lalo ne Lahataꞌala, mbaꞌinomo wakutuuno tafohatoangkoomu Bhihitano Lahataꞌala, fetingkeeꞌomu bhe tahimaeꞌomu. Bhihita aini miina mabhieꞌomu wamba maiꞌao ne manusia, tamaka mpuu-mpuuno bhoasaono Lahataꞌala. Ingka daanumo peda anaꞌa. Lahataꞌalamo ini kumahadhaano weo totono lalomiu marasaeano ne Kristus.

Ibrani 13:21

Sio-siomo Lahataꞌala kamaiꞌaoꞌano katohopono dadi, namosangkaangkoomu sabhaha metaaꞌano so dhumalangiꞌaoꞌomu kapoindalono. Sio-siomo dua weo dadintoomu Lahataꞌala naehabu podiu mekaꞌiano lalono, namangka ne Yesus Kristus. Notifekakalabhia Kristus ampa suhue dhamani. Amin.