1 Petrus 1:22 - Muna Southern Dialect

²² Hampano meangkaomu kafoinaꞌu banarano, totono lalomiu nomoindamo bhe nohelasimo pomoni-moniniꞌaoꞌomu. Dadiꞌanomo pomoa-moasiꞌaoꞌomu sampuu-mpuuno lalomiu.

1 Petrus 1:22 Iomraidhean Croise

Yohanes 15:17

Pedamo aini pahintaku ne hintimiu: pomoa-moasiꞌaoꞌomu.”

Yohanes 15:3

Daanumo monggelamoomu hampano wamba nefosampeku ne hintimiu.

Yohanes 17:17

Gaatidamo dembaliꞌao fehebuaꞌamu mongkilono. Fofekangkilono naꞌa ⸤ kafoinaꞌuno⸥ kabanara. Ingka bhoasaomu itu o kabanara.

Yohanes 17:19

Somo andoa afotawakala Wutoku ne Hintu, neanomo andoa daeꞌawa kabanara, maka damotawakala dua wutondo ne Hintu, daembali fehebuaꞌamu mongkilono.

Tula-tulando rasulu 15:9

Lahataꞌala miina napoꞌala-alaandaa bhe intaodiomu; totono lalondo padamo nofekangkiloe hampano doparasaea.

Tula-tulando rasulu 6:7

Bhoasaono Ompu Lahataꞌala sadhulu-dhulu kaꞌewa nolelea. Mie marasaeano we Yerusalem sedhuluꞌamo dua kabhahindo. Dobhahi dua imamu tumuhuno maka doparasaea ne Yesus.

Roma 1:5

Noangkamo dua ne Yesus Kristus, insaodi ini taeꞌawa rahamati taembali rasulu so mowano sabhaha bansano liwu suano Yahudi damarasaea bhe daeangka ne Kristus, somo katifekalabhiaꞌano.

Roma 2:8

Tamaka mie mosibhalano kaowu wutono, tapa meangkano ne kabanara bhe tanoangka-angkamo modaiꞌano, andoa daeꞌawa amahano bhe kahukumuno Lahataꞌala.

Roma 8:13

Ane dumadi mangkafiomu kapoindalono mbadha, tetewei momateomu, tamaka ane bhe kuasano Rohino Lahataꞌala ⸤ sadhia⸥ mongkoeꞌomu sabhaha habu modaino mbadha, tetewei dumadiomu.

2 Korintus 6:6

nongkilo totono lalo mani, takotimbangi, takosabaha, netaa lalo mani, bhe katulumino Rohino Lahataꞌala, bhe kanini kaasi kumampuu-mpuuno;

Galatia 3:1

Hintimiu miendo Galatia, kabhohemiu gahaꞌa! Nofobhohe-bhoheꞌikoomu laꞌae bhahaa ⸤ sampe hunsaomu kafoinaꞌu banara⸥ ? Ingka padamo afekantale-ntaleaꞌangkoeꞌomu mateno Yesus Kristus te sau salipu.

Galatia 5:5

Tamaka insaodi, bhe katulumino Rohino Lahataꞌala, taantagi neposahunaꞌao mani putae Lahataꞌala natumahima kainsami peda mie banara hampano kaparasaea mani ne Kristus.

Galatia 5:7

Endefiꞌini ingka netaa sepaliꞌa dhuluno kaparasaeamiu. Laꞌae bhahaa wudhukoomua sampe miinamo meangkaomu ne kabanara?

Efesus 4:3

Uleiꞌe lalomiu pometa-metaaꞌomu, neanomo kaseꞌisemiu kawaꞌaono Rohino Lahataꞌala sadaa-daa notidambaꞌao.

Filipi 1:9

Sambaheaku sio-siomo kanini kaasimiu sadhulu-dhulu kabhahi ampa napontalabhi-labhi, nasedhuluꞌa dua mandeꞌaoꞌomu kabanara bhe meꞌawaomu fekihi kotimbangi.

1 Tesalonika 3:12

Sio-siomo dua Ompu namodhulu kabhalano kanini kaasimiu sapada-pada hintimiu bhe ne sabhaha mie ampa napontalabhi-labhi, pedamo dua kanini kaasi mani ne hintimiu.

2 Tesalonika 1:3

Bhahitieꞌiku, insaodi tabeano sadhia taefoampe katumpuno lalo ne Lahataꞌala mbaꞌinomo hintimiu. Daanumo nopantasimo peda anaꞌa, kapaꞌamo kaparasaeamiu saꞌende-ende, pomoni-moniniꞌa sapada-pada hintimiu seemieno bhe seemieno dhulu kamatangka.

2 Tesalonika 2:13

Bhahitieꞌi nemoasiꞌaono Ompu! Insaodi tabeano sadhia taefoampe katumpuno lalo ne Lahataꞌala hampano hintimiu, kapaꞌamo mpini kabhao-bhaono Lahataꞌala nopilikoomu namosalamatikoomu. Kasalamatimiu naꞌa noangka ne Rohino Lahataꞌala fofekangkilono bhe kaparasaeamiu ne kabanara.

1 Timotius 1:3

Gaoku mpuu meate kansuhu we kotano Efesus, pedamo kamesaloku wakutuuno akala we kadieno Makedonia. Kapaꞌamo we Efesus nandoo seemie hodua mefomantaleno kafoinaꞌu tapa kumotuꞌu, dadiꞌanomo hintumo so mofetumpudaa.

1 Timotius 1:5

Patudhuno katangahiku ini amodhulu o kanini kaasi. O kanini kaasi naꞌa tabeano namaiꞌao weo totono lalo mongkilo, weo totono lalo metaa kumatanga-tangano, bhe weo kaparasaea kumampuu-mpuuno ne Ompu.

1 Timotius 4:12

Koise bhe misakiko mbaꞌinomo nandoo nohangku dadimu. Tamaka membalimo sandaha so neangkafindo mie marasaeano, weo pugaumu, weo podiumu, weo kanini kaasi ne mie bhaimu, weo kaparasaeamu ne Kristus Yesus bhe weo kangkilono dadimu.

1 Timotius 5:2

Kamungkulaꞌi hobhine pototoanda bhe inamu; hobhine mohangkuno dadi pototoanda dua bhe kakutaꞌamu, namaiꞌao ne fekihimu mongkilono.

2 Timotius 1:14

Dhaganie kafoinaꞌu neposahunaꞌaono ne hintu tapedamo arataa mokesa, bhe katulumino Rohino Lahataꞌala dumadino weo totono lalontoomu.

Ibrani 11:8

Hampano kaparasaeano, Abraham neangka ne pahintano Lahataꞌala wakutuuno nobhasie bhe notudue nakumala we wite nedhandiꞌaono Lahataꞌala somo kahunsaꞌao so siwuluno. Abraham tanokalamo mahingga miina namandeꞌaanea nahumope ne amai.

Ibrani 13:1

Naetaa sadhia pomoni-moniniꞌaoꞌomu peda mie pobhahi-bhahitieno!

Ibrani 5:9

Nosangka kaowu dadino, Yesus nembalimo meowano kasalamati suhue dhamani so kosasawindo mie meangkano ne Anoa.

Ibrani 6:10

Lahataꞌala suano Lahataꞌala tapa umadhilinoa. Ingka pae naolimpuꞌaanea sabhaha kahadhaa bhe kanini kaasimiu ne Anoa nefotiwohamiu wakutuuno ondofaoꞌomu umati marasaeano endefiꞌini taꞌampamo aitu.

Ibrani 9:14

bhemo toha heano Kristus! Weo kuasano Rohino Lahataꞌala dumadino suhue dhamani, Kristus nofoampe Wutono mbali kapopanga pata kodengono ne Lahataꞌala. Dadiꞌanomo heano tetewei namekangkilo totono lalontoomu maiꞌao ne sabhaha podiu meowano mate, neanomo naembali dameompuomu ne Lahataꞌala dumadino.

Yakobus 1:21

Dadiꞌanomo ohoeꞌomu toha podiu mohaku bhe sabhaha kanea modai. Fekamalu lalomiu bhe tahimaeꞌomu bhoasaono Lahataꞌala toka netisa weo totono lalomiu, kapaꞌamo bhoasao aitu nokokuasa namosalamatikoomu.

Yakobus 4:8

Fekamaꞌo wutomiu ne Lahataꞌala, maka Anoa namaꞌotikoomu dua. Hintimiu mie kodhosa, fekangkilo dadimiu. Hintimiu kohaꞌano totono lalo, fekamoinda totono lalomiu.

1 Petrus 1:2

Hintimiu dopilikoomu mbali umatino nopoangkafi bhe patudhuno Lahataꞌala Amantoomu mpini kabhao-bhaono. Hampano kahadhaano Rohino Lahataꞌala, membalimoomu umatino mongkilono, neanomo meangkaomu ne Yesus Kristus bhe dhosamiu natiꞌamponi mbaꞌinomo tuhuno heano Kristus. Sio-siomo sadhia namaꞌangkoomu kabarakati bhe katohopono dadi pontalabhi-labhino.

1 Petrus 2:17

Fosibhaladaomu kosasawindo mie, moasiandaomu bhahitieꞌimiu, moteꞌiomu ne Lahataꞌala, fosibhalaomu Omputo Kaisar.

1 Petrus 3:1

Pedamo dua hintimiu hobhineꞌi, tuhuomu ne moꞌanemiu, neanomo ane nandoo ne olotando moꞌaneꞌi maitu tapa marasaeano ne bhoasaono Lahataꞌala, podiu metaamiu somo damarasaeaꞌao, mahinggamo pae metula-tulaomu.

1 Petrus 3:20

Rohi andoa maitu saneamo pata meangkano ne Lahataꞌala ne dhamanino Nuh endefiꞌini. Wakutuu anaꞌa Lahataꞌala nokosabaha noantagi manusia dabhalii diundo, tangasano Nuh nofotoka bhangka bhalano nehabuno. Ne naꞌa seendai kaowu sumalamatino maiꞌao ne luano oe bhalano, kabhahindo dooalu.

1 Petrus 3:8

Panda-pandano, soba dadi sekakolaloomu, poanta-antangiꞌao namisimiu, pomoa-moasiꞌaoꞌomu peda mie sebhahi-bhahitieno, pomobhe-mobhelaꞌaoꞌomu lalo bhe fekapanda diumiu.

1 Petrus 4:17

Aitu nohatomo tempono Lahataꞌala nabhitahakimo dhunia, natumanda ne umatino. Dadiꞌanomo ane kabhitahakino natumanda ne intaodiomu marasaeano, nada amai bhahaa losano mie tapa marasaeano ne Bhihita Metaa?

1 Petrus 4:8

Tamaka fofoliuꞌano, pomoa-moasiꞌao sampuu-mpuuno lalomiu, kapaꞌamo ane dopomoa-moasiꞌao dohelasimo dua dopomaꞌa-maꞌafuꞌao, mahingga nobhahi kaꞌalando.

2 Petrus 1:7

Kalebeno dadi napotubhahi bhe kanini ne bhahitieꞌinto; kanini ne bhahitieꞌinto napotubhahi bhe kanini kaasi ne kosasawindo mie bhainto.

1 Yohanes 3:11

Ingka fetingkeemoomu bhihita nefosampe mpini pakaparasaeamiu putae tabeano dapomoa-moasiꞌao.

1 Yohanes 3:23

Pahintano peda aini: damarasaeaꞌomu ne Yesus Kristus Anano Lahataꞌala, bhe dapomoa-moasiꞌao pedamo dua pahintano Kristus ne intaodiomu.

1 Yohanes 4:12

Miinaꞌo bhe mohano Lahataꞌala, tamaka ane dapomoa-moasiꞌao, Lahataꞌala naseꞌise bhe intaodiomu maka kanini kaasino nasumangka weo totono lalontoomu.

1 Yohanes 4:20

Ane bhe mugauno, “Aoasiꞌao Lahataꞌala,” tamaka nobansi bhahitieno, mie aitu nekabuangka. Ane mie miina naoasiꞌao bhahitieno newohano, nada amai bhahaa naoasiꞌao Lahataꞌala tapa newohano?

1 Yohanes 4:7

Bhahitieꞌiku timoasiꞌaono! Pomoa-moasi kaitaomu kapaꞌamo kanini kaasi maitu nomaiꞌao ne Lahataꞌala. Kotika mie fomoasiꞌaono anaꞌinomo Lahataꞌala bhe nopandeꞌao Lahataꞌala.

Powoha 2:4

Tamaka nandoo dua pata nepoindaloku: hintimiu hunsamoomu kanini kaasimiu peda kabhao-bhaono.