1 Korintus 2:14 - Muna Southern Dialect

¹⁴ Mie tapa mandeꞌaono Lahataꞌala nokiido natumahima sabhaha maiꞌaono ne Rohino Lahataꞌala, nokonaemo sanea bhohe. Daanumo miina bhe kapoolinoa nalumosangie, hampano sabhaha maiꞌaono ne Rohino Lahataꞌala naꞌa kaneꞌo dolosangie fahalaano ane dotiisangie noangka ne Rohino Lahataꞌala.

1 Korintus 2:14 Iomraidhean Croise

Matius 16:23

Yesus nodolimo maka nopugau ne Petrus, “Gampi hintu seetani! Hintu onto-ontomi kanau, kapaꞌamo fekihimu suano fekihino Lahataꞌala, tamaka fekihino manusia.”

Yohanes 10:20

Dobhahi mugauno ambado, “Anoa nobheemo, nopesuakiemo seetani. So dua ae metingkeꞌaoꞌomu pugauno?”

Yohanes 12:37

Mahinggamo Yesus nobhahimo sepaliꞌa nofotiwohaanda tanda timenteꞌaono, tamaka miina dua damarasaea ne Anoa.

Yohanes 14:17

Anoamo Rohino Lahataꞌala meowano kabanara. Dhunia pae damooli datumahimaea, hampano miina daohaea, miina dua damandeꞌaanea. Tamaka hintimiu pandeꞌaaneomu, kapaꞌamo Anoa napobhaiangkoomu bhe naeate we lalomiu.

Yohanes 14:26

Tamaka mada kaowu nahumato Rohino Lahataꞌala, Fotulumino so netuduno Amaku weo neaku. Anoamo so mohatoangkoomu kosasawiꞌae kafoinaꞌuku, Anoamo dua so meꞌulaiangkoomu sabhaha wambaku ne hintimiu.

Yohanes 15:26

Mada kaowu atumuduangkoomu Fotulumino maiꞌaono ne Amaku, Rohino Lahataꞌala meowano kabanara. Anoamo itu sumakusii kanau.

Yohanes 5:44

Hintimiu gaomiu damosibhalakoomu mie bhaimiu, miina meꞌondofiomu kafosibhala maiꞌao ne Kaseemie-mieꞌano. Dadiꞌanomo, nada amai marasaeaꞌomu gahaꞌa?

Yohanes 8:43

Noafa bhahaa miina lumosangianeomu wambaku? Ingka mbaꞌinomo mokiidoomu metingkeomu pugauku.

Tula-tulando rasulu 16:14

Ne olotando metingkeno nandoo seemie hobhine koneaꞌano Lidia. Anoa nomaiꞌao we kotano Tiatira, nopodagaꞌao kai wungo. Anoa ini noteꞌi dua ne Lahataꞌala. Ompu nolengka totono lalono sampe pugauno Paulus notahimae.

Tula-tulando rasulu 17:18

Nandoo seemie hodua mie moꞌosano fekihi maiꞌaono ne walakando Epikuros bhe Stoa dopuga-pugau dua bhe anoa. Nandoo mugauno ambado, “Napugauꞌao ae bhahaa mie pande gau maitu, kabhahino wambano!” Tamaka ambado dua sigaoꞌano, “Kao-kaomo nehatoꞌao kafoguhuno dewando koliwuno.” Kapugauꞌando peda maitu mbaꞌinomo netula-tulaꞌao Yesus bhe kawanuꞌando mie mate.

Tula-tulando rasulu 17:32

Dofetingke kawanuꞌando mie mate, nandoo tadebheu bhe dofuta-futaaꞌie. Tamaka nandoo dua mugauno ambado, “Gao mani tametingke toha tana sepaku metula-tulaꞌao medano aitu.”

Tula-tulando rasulu 18:15

Tamaka nepoꞌala-alatiꞌaomiu ini, ingka poꞌalati kaowu wamba, o nea bhe tubhono agama sapada-pada hintimiu. Dadiꞌanomo fosintuwuꞌao wutomiu, o idi aongahe aebhotusi giu medano aitu.”

Tula-tulando rasulu 25:19

Ampamo kaowu doposala-salamaꞌanaꞌao agamando. Dopotagaliꞌao seemie koneaꞌano Yesus nomatemo, tamaka ambano Paulus mie amaitu suli nodadi.

1 Korintus 1:18

Mbali mie so binasano, bhihitano mateno Kristus te sau salipu daanumo dokonae bhohe, tamaka so intaodiomu nefosalamati bhihita amaitu katiwohaꞌanomo kuasano Lahataꞌala.

1 Korintus 1:21

Hampano kapandeno Lahataꞌala, nofotantuemo putae manusia miina naembalia namandeꞌao Lahataꞌala nomaiꞌao ne kapandeno wutono. Tamaka Lahataꞌala nokopatudhu namosalamati mie marasaeano noangka ne bhihita nefolele mani, gahaꞌaitumo bhihitamo aini nekonando dhunia sanea bhohe.

1 Korintus 1:23

Tamaka insaodi ini taefolele bhihitano Kristus mateno te sau salipu. Bhihita aini nodaiane lalondo miendo Yahudi, mie suano Yahudi dokonae tula-tula bhohe.

1 Korintus 1:25

Kapaꞌamo wohaꞌano kabhoheno Lahataꞌala ingka nofoliuꞌe kapandedo manusia, wohaꞌano kanaleno Lahataꞌala ingka nofoliuꞌe kaꞌosando manusia.

1 Korintus 15:44

Nekobuhu ingka o mbadha maiꞌaono ne dhunia, nefodadi o mbadha maiꞌaono ne Rohino Lahataꞌala. Ane bhe mbadha maiꞌaono ne dhunia, tantumo nandoo dua mbadha maiꞌaono ne Rohino Lahataꞌala.

1 Korintus 15:46

Humatono wawo suano mbadha maiꞌaono ne Rohino Lahataꞌala, tamaka mbadha maiꞌaono ne dhunia; pada anaꞌa kaneꞌomo mbadha maiꞌaono ne Rohino Lahataꞌala.

1 Korintus 2:12

Intaodiomu miina daetahima rohino dhunia, tamaka netahimantoomu o Rohi maiꞌaono ne Lahataꞌala, neanomo damandeꞌaane sabhaha newaꞌaono Lahataꞌala ne intaodiomu.

1 Korintus 3:1

Bhahitieꞌiku! Wakutuu anaꞌa miinaꞌo naembalia apugau bhe hintimiu peda apugau ne mie toka nekabhintino Rohino Lahataꞌala, tamaka nandoo apugau ne mie nekuasaino kapoindalono dhunia, kao-kaomo hintimiu sadaa-daa kaana-anaꞌi weo kaparasaeamiu ne Kristus.

Yakobus 3:15

Kakotimbangi pedando naꞌa suano maiꞌaono te surugaa, tamaka nomaiꞌao ne dhunia, ne nafusuundo manusia, bhe ne seetani.

1 Yohanes 2:20

Tamaka hintimiu miina nada anaꞌa, ingka metahimamoomu Rohino Lahataꞌala maiꞌaono ne Kristus, dadiꞌanomo kosasawimiu losangiemoomu kabanara.

1 Yohanes 2:27

Tamaka hintimiu, Kristus ingka padamo nofosampuangkoomu Rohino weo totono lalomiu. Dadiꞌanomo miina namaraluua damoinaꞌukoomu mie sigaoꞌano. Rohino Kristus nofoinaꞌuangkoomu bhahi-bhahiꞌae bhe kafoinaꞌuno nokotuꞌu, suano wamba kabuangkaa. Dadiꞌanomo dadiomu weo kaseꞌise bhe Kristus, peda toka nefoinaꞌuꞌaono Rohino naꞌa.

1 Yohanes 5:20

Dopandeꞌaanemo dua Anano Lahataꞌala padamo nomai we dhunia ini, nowaꞌa kaitaomu kapooli damandeꞌao Anoa banarano. Intaodiomu dodadi doseꞌise bhe Lahataꞌala, doseꞌise dua bhe Yesus Kristus, Anano. Anoamo itu Lahataꞌala sakotuꞌuno, Anoamo dua meowano dadi suhue dhamani.

Yudas 1:19

Andoamo maitu so meowano powengke-wengkeꞌa, dadindo nokuasaiꞌemo kapoindalono mbadha, Rohino Lahataꞌala miina naeate weo totono lalondo.