Metiu 5:12 - Madak

¹² Do dina lox i xuren, mina momo la mina sosoro, mila langsangan luunun miba ruuna ka i ro vana at laxalibet. Limixin kakapmek me gano diga lox asongot lavaeme vapaase alii no diga rooro gano. La kerepmo limixin kakapmek diba lox asongot bok nimi.”

Metiu 5:12 Iomraidhean Croise

Sam 19:11

Leeme Silok, leventaangas taram im taba ia mi lakleklen, nia lasaxaruki ram; anabak lok kaka luunun teren, mo do nia ana mumu asu levelinga ram.

Sam 58:11

La melemu limixin dinaba tong i do, “I ruturun do limixin mokmokso dik lok kaka luunun boro at ne Moroa; la i ruturun tinotno do ne Moroa mo i nemen la i viila mumu loklok at limixin at na lavatbung menemen.

Metiu 16:27

Nenia, Laradi Mevana, mo anaba vot mi lisisixam silok at ne Tamak la eburu mi lubungangelo, la ap mo laaleng limixin axap dinaba lok kaka luunun i epovo mi leveloklok diga lox i.

Metiu 6:16

La ne Iesu ga lok bok tidi, “La do mina mun an, nemen gat mita ven bukbulu, i ngan lavapen aala di mumu asu i. Dit pas saasaa ro xantubu at limixin kusu limixin diba reven lemeren di do nedi mo di mun an. A tong tuturun i rinimi do luunun atdi, dira lok ka axap pam i.

Lagale Lavavang At Ne Iesu Karisito Luk Ga Malagan i 13:34

La ne Iesu ga bulu aleng la ga lok, “Limixin me Jerusalem. Lavalabat atnimi digap sev amet lavaeme vapaase alii, la diga lulu vat nedi limixin papaase asu levelinga, ne Moroa ga riki nedi ude. Buaang levenaleng a lok do ana kok nemi mi lukngak, i ngan lavatpalak kaxak i kok laxannatnat kaxak teren, ketla mixo siam ka ia.

Lagale Lavavang At Ne Iesu Karisito Luk Ga Malagan i 6:23

Mina momo aleng do na lempanga na vot, la mina tii momo, mila langsangan luunun tinimi mo i nemen tangais nimi to vana at laxalibet. Do na lempanga na vot, nemen mita lok bukbulu. Lavalabat atnedi mo limixin kapmek diga lok bok lempanga xapmek kerepmo tinedi lavaeme vapaase alii at ne Moroa.

Lagale Lavavang At Ne Iesu Karisito Luk Ga Malagan i 6:35

Mina balamu limixin dit kis munepen minimi, la mina lok luvukat tidi; mina raba di mi lempanga la nemen gat mita sing amlong tin. Do mina lok na lempanga avukat, miba ruuna ka langsangan luunun, la nemi miba ngan laxamdak at ne Moroa Silok Aleng. Mila Moroa ik lox avukat tinedi limixin kopmen dinak lox avukat tin la tinedi bok dik lok laxakapmek.

Leven Gugu 16:25

At laxanimin tubu Pol mi ne Sailas duga lok lising la dugak pixan momo saparap ne Moroa, la lentaba luvuttadi bok mo diga xoxo nedi, digang tonga du.

Leven Gugu 5:41

Luvuttadi vavang diga vas kaxat basinge luvuttadi amgomgo, diga umsu mi lomomo mila ne Moroa ga siam do diga epovo rip kip lainmangan at laasen at ne Iesu.

Lovoang At Ne Pol Ti Limixin Nunu to Rom 5:3

La dik ta xip aurut bok laasen teren keneng at levenmumuat atnedik, atla dik taklen i do levenmumuat im taba dik mi lololos kusu ata tu atmatkun keneng at leveloklok tong pen.

1 Korin 3:8

Mo lara itlotlo la mo lara i soli dan, nedu du epovo mun, la nedu getgesara duba lok ka luunun naba epovo at lugugu atdu,

2 Korin 4:17

La na levesongsongot lixilik i lox asuusu i do langsangan luunun avolo i umsu aleng mi lisisixam at ne Moroa mo i gagas kusu rinama; la i silok aleng ti levesongsongot man tuuna xaka i.

Pilipai 1:29

Moroa ga raba nimi mi lugugu at ne Karisito, kopmen do at lunuunu xusuk ketla minaba ekip tangarang bok mi losongsongot.

Pilipai 2:17

Ketla i lox avukat mun do dina sev amer ia, kusu labantuxu rak naba lok ngan laplavang atnimi saparap ne Moroa la na laramtaba naba lox asuusu lunuunu atnimi; mo do kuren a lok momo eburu minimi.

Kolosi 1:24

La na nga nia a lok momo mumu levesongsongot tarak nia ap kiv i ti lok tooro nimi; la kerepmo a lox epovo levesongsongot no ne Moroa ga lok katling i ria kusu na lok tooro limixin at lotu min, mo i lok ngan labantuxu at ne Karisito.

Kolosi 3:24

Mina xasep do Leeme Silok naba raba nimi mi laramtaba, i ngan luunun tinimi, mila nemi mi gugu ri ne Karisito, neni Leeme Silok atnimi.

1 Tesalonia 2:15

La mo limixin me Judaia diga sev amet Leeme Silok ne Iesu; ganoxa lavalabat atdi diga sev amet lavaeme vapaase alii at ne Moroa. La nedi diga riki xepe nama boro at lenep silok Judaia. Moroa i xopara ri mo loklok atdi. La di lok kapmek lixitkis at limixin axap keretna;

Ibru 10:34

Miga balamu nedi digak lok at loogu xokoxo la miga lok momo mene nga do limixin diga sak paxat ka levempanga atnimi mila migaklen i do nemi xa miba ruuna lapnovos i lox avukat aleng no vana at laxalibet, mo lapnovos naba nemen amisik.

Ibru 11:26

Moses ga doma i do ik mokso do neni na lok ka lainmangan eburu mi limixin teren at lugugu at Lanarong. Mo lainmangan ga lox avukat aleng ti lapnovos boro Isip, mila neni ga reven ti mo luunun move ne Moroa ba raba i min.

Ibru 11:33

diga ruuna lunuunu, kuren la leventaba atdi diga sep kepe levenabung mixin, leventaba atdi diga lok tatao limixin atdi mi loklok mokmokso, la kerepmo ne Moroa ga lok tooro di xerekngan neni ga vaase alii min tidi; la leventaba atdi, lavamolon diga lu arup midi uto at laramet laion la lubung laion di goxo epovo na anan di, mila ne Moroa ga vamngus lubung laion.

Ibru 11:6

La mo do tara xopmen tunuunu ren, ixo epovo ni na lox amomo ne Moroa, mila do tara i vara na vot pasa ne Moroa, neni na nuunu do ne Moroa mo i rooro la neni i epovo naba lox anarong nedi lebelen di i ngaongao xusu dinaklen ne Moroa.

Jems 1:2

Luvutnetak mi luvurinuk. Do levenasen panga mumuat na vot parap nimi, i lox avukat do mina momo mene,

Jems 5:10

Luvutnetak mi luvurinuk. Mina doma bilong ti lavaeme vapaase alii. Nedi diga vavang mi laasen at Leeme Silok la limixin diga lox asongot di, ketla diga tu tuxuruxun. La nedi di lok ngan lampoovo rinimi kusu mina tu tuxuruxun, mo do levenmumuat na vot saparap nimi.

1 Pita 4:13

Ketla mina sosoro atla nemi mi ru buru mi ne Karisito at losongsongot teren, kusu minaba umsu mi lomomo at laaleng lisisixam teren na ru asuvos.