Mathui 7:11 - Ṉa Alaofua Falu 1923 1949

¹¹ Mania mada sa ni kamulua, toa na mulu taa, muki thaitoomana fale lana si do lea ki na keki tona falea ifana wela kamulua ki, fale la si tatha Maka kamulua ne ni mei thalo kai fale asi do lea ki ifana toa na keki gani nia?

Mathui 7:11 Iomraidhean Croise

GENESIS 6:5

Ma tha God e rikia abula taa lana imole ki ka baita i la fanua ne i iano, ma lioda ma si do ki sui bana na kera manatatoona i ruruuda talitoona si do taa ki sulia boṉi.

GENESIS 8:21

Ma do eki ka makwafia tha Jihova ka lea; ma tha Jihova ka soree i ruruuna, Nau e a’i kwasi alua lau taa la fafia theegano inunufana imole; boro so si manata la ni sui bana na imole keka manatatoona i ruruuda e taa asia naa ita u boo i faekwa lada; ma nau e a’i kwasi thauṉia lau do maruki eki sui bana, sulia abula laku na nau ku ilia na ba.

Fa Ṉu Abu ki 84:11

Uria na tha Jihova God na ṉa thato ma ṉa talo: tha Jihova kai tona falea kwaiofei la ma inotoa baita: kei e’i si lufia ta si do lea faisia toa eki na abula lade oolo.

Fa Ṉu Abu ki 85:12

Iu, tha Jihova kai falea boo si do na ka lea; ma fanua kulu kai falea mai unii do rafo nia.

Fa Ṉu Abu ki 86:15

Ma sui ni oe, Arai Lo, na ṉa God asi lio baita ni tatakomi la, mo kwaiofei, osi rakeiri fofoa, o ade lea ka tatha mo mamana asia naa.

Fa Ṉu Abu ki 86:5

Sulia na ni oe, Arai Lo ae, o ade lea, si lio oe ana manata lube la, tatakomia oe ka baita asia naa ifana toa eki sui boo na kera ’ai thatamu.

Mathui 23:9

Ma musi maka ata wane i fanua nei iano: uria na amulua tee Maka, ne ni mei thalo.

Mathui 7:10

Mado sa nia kai gania uria ta ia, nia ka falea wa aala ifana?

Jone 3:16

Uria na tha God e liothau una eri ana fanua nei iano, nia ka falea mai tee fa Kaluwane nia, fasia ni tei bana na kai fitoona ka ai si sui, ma kai to ana marukia tatha.

Roma 3:19

Kulu thaitoomana boo na si do ki sui bana ṉa lo e sorea, e ṉata isana toa eki na kere ni fara ṉa lo; fasi keki faabona fokoe imole ki sui bana, ma keki ofua toa na fanua nei iano ki sui bana keki to ifara si do na tha God na Wane ni Kotu kai sorea:

Roma 3:9

Ma ṉa ta ni lau? kamilia lea ka tatha ani kera? E ai dodoloa: uria na mili bii alaṉia Ju ki ma toa i Girisi ki asi do eri, na kera sui boo kera to ana abula taa la;

Roma 8:32

Nia ne ai si suusia taa la faisia Kaluwane nia i talaana, me alamatania uri kulu sui, e ai si tona falea bana si do ki sui bana iakulua bi nia?

Galesia 3:22

Ma kekeda la abu eri e suusia si do ki sui bana i la lokafu ana abula taa la, fasi alaṉaia eri ana fitoona lana tha Jesus Christ keki tona falea ifana toa eki na kera fitoo.

Jemesi 1:17

Si do lea ki sui bana na keka tona falea, ma si do ki sui bana na keka falea ne sukwai ka tatha, ka too mai ia, ma ka sifo mai ana ṉa Maka ana laafa ki, ne ai dodoloa si tatala, me ai ta nunui do si thu fafi nia uria bulasi lana.

I. Jone 3:1

Muki rikia fasi liothau la baita eri na ṉa Maka e liothau iakulua ania, na keki alaṉi kulu ana wela tha God ki: mania fanua nei iano ka ai si thaitoomakulua, uria ne ai si thaitoomana ni nia.

I. Jone 4:10

Liothau la ka to fatai asi kula eri, na ni kulu kulu liothau atha God e ai, ni nia e liothau ani kulu, me arasia mai Kaluwane nia, wane na ka dianalio uria abula taa la kulu ki.