Zoɛli 3:1 - Bibeli do fee

¹ Aɔ̃ Lafɛ̃ɛ í ni, si anyiɛ an jɔ̀ hundem ku naa si inɛ fei. Ama inɛmɔkɔ do ama inaabo nŋɛ ŋa aa na a maa ce walii. An ya n maa n ba mɔkɔ ngbo nŋɛ ŋa ide ku fɔ si ala, nɔ awaasũ nŋɛ ŋa mɔ aa ya ce kuyɛ ŋa.

Zoɛli 3:1 Iomraidhean Croise

Iri ku kɔ̃ 14:7

Ǹ bi faaba ku naai si inɛi Izirɛli ŋa hai Siɔ̃ɔ wa. Waati iyi Aɔ̃ Lafɛ̃ɛ á baaò inɛ ŋa iyi à mu aru ŋau wa, dimii Zakɔbu ŋa do inɛi Izirɛli ŋau fei aa wa si inɔ didɔ̃.

Iri ku kɔ̃ 85:1

Iriu ihɛ̃ ti inɛ ngboi woo kɔ̃ iri ŋai do amai Kore ŋa.

Mɔnda ŋa 1:23

I sotĩ i gbɔ kai iyi ǹ wa n dɔ̃ nŋɛ, nɔ n da nŋɛ si hundem n má nŋɛ inya do ikɔ ŋa.

Ezai 44:3

Ntɔ ntɔ, ilɛ hai nɛ mandiu, an fãsi inyi, nɔ n jɔ̀ inyiu ku maa cã si ilɛ ngbɛu. An jɔ̀ hundem ku naa si amaɛ ŋa nɔ kuweem ku naa si tɔkuɛ ŋa.

Zeremi 16:15

Amma aa ya ce kugbasii a ni, do irii Aɔ̃ Lafɛ̃ɛ nŋu iyi í wɛɛ, nŋu iyi í nya inɛi Izirɛli ŋa wa hai ilɛi awɔ njɛi kpãai inunu do hai si ilɛ mmu ŋa fei bii à koo à wa wo, waati iyi í lele ŋau. Aɔ̃ Lafɛ̃ɛu í ni, an baaò ŋa wa si ilɛ nŋa tengi bii ǹ tako ǹ muaa bala nŋa ŋau.

Zeremi 30:18

Ide iyi Aɔ̃ Lafɛ̃ɛ í nyi í fɔ má wee. Í ni, an jɔ̀ nyaanzei Zakɔbu ŋa iyi à waa jɛ aru ŋau a baa. An ce araarei kpasɛ̃ nŋa ŋau. Aa teese a ma iluui si bommau. Nɔ kpasɛ̃ kusĩa ŋau, aa wa si agbɛ nwo nŋa ŋau mái.

Zeremi 30:3

Nɔ Aɔ̃ Lafɛ̃ɛ í nyi í ni má, ajɔ wa naa si bii an jɔ̀ inɛi Izirɛli do inɛi Zudaa inɛm ŋa iyi à wa ilɛ mmu ŋau a baa si ilɛ iyi ǹ tako ǹ muaa bala nŋa ŋau. Nɔ aa nyi a nɔɔ mái hee do ajɔ fei.

Ezekiɛli 16:53

An jɔ̀ kuwɛɛi Sodomu do ama inaaboɛ ŋa do ti Samari do ama inaaboɛ ŋa ku baa si agbɛɛ. Nɔ an jɔ̀ kuwɛɛi awɔ mɔ ku baa si agbɛɛi.

Ezekiɛli 39:25

Amma ide iyi amu Aɔ̃ Lafɛ̃ɛ ǹ wa n fɔ wee. Hai nsɛi bɛbɛi, an ce araarei inɛi Izirɛli tɔkui Zakɔbu ŋau. An jɔ̀ kuwɛɛ nŋa ku baa ku yɛ bɛi ti tako, nɔ n tilasi aŋa fei a mà bɛɛrɛi irim.

Daniɛli 12:1

Ŋɔi amalekau í bam ide ku fɔ má í ni, si waatiu bɛi Misɛli inɛ ngboi amaleka ŋau á faata wa, nŋu iyi í jɛ inɛ iyi á kɔ̀ò zamaaɛu. Waatiu, waatii wahalai á jɛ iyi a kù yɛ dimiɛ bii kãma hee ku naa si waatiu bɛ. Si waatiu bɛ, inɛɛ ŋa iyi à kɔ iri nŋa si tiai kuwɛɛu fei, aa ba a fita si.

Amɔsu 9:14

An baaò inɛi Izirɛli inɛm ŋa iyi à mu ŋau wa, nɔ aa teese a ma ilu nla ŋa iyi à lɛgɛu. Bɛi aa wa, nɔ aa lɔ jĩi ndii rezɛ̃ɛ ŋa nɔ aa mɔ vɛ̃ɛ, aa ce lambo ŋa nɔ aa jɛ isoɛ.

Kuka 11:29

Ŋɔi Moizi í jɛa í ni, ì waa ce igu na irim nii? Bii í jɛ Aɔ̃ Lafɛ̃ɛ í jɔ̀ hundeɛ í naa si inɛi Izirɛli ŋau ku ba aŋa fei a jɛ walii wo ni.

Kuka 12:6

Nɔ í sɔ̃ ŋa í ni, i de itĩ i gbɔ idem ku ce ncɛɛ ŋa, bii walii gɔ í wa inɔ nŋɛ, si kuyɛi amu Aɔ̃ Lafɛ̃ɛ ǹ ya n nyisiɛ aram, nɔ si alai ǹ ya n baa ide ku fɔ.

Wooda ku kɔsi 30:3

Aɔ̃ Lafɛ̃ɛ nŋɛ á nyi ku teese kuwɛɛ nŋɛ má. Á ce araare nŋɛ, nɔ á tɔtɔɔ inɛ nŋɛ ŋa wa hai si dimi mmu ŋa bii í jɔ̀ ì fangaa ì nɛ̀ ŋau fei ŋa.