Zeremi 2:3 - Bibeli do fee

³ Iŋɛ inɛi Izirɛli ŋa, ǹ cica ŋɛi i jɛ ti amu akã ŋa. Iŋɛi ì jɛ bɛi amaajɛ sintem ŋa iyi ǹ da. Inɛ ŋa iyi à lu ŋɛ fei à ba taalei, nɔ à ba wahala. Ide iyi amu Aɔ̃ Lafɛ̃ɛi ǹ fɔ mbɛ.

Zeremi 2:3 Iomraidhean Croise

Kufita 22:29

Nɔ i ya nam ama kɛtɛ sinte iyi kɛtɛ nŋɛ ŋa à bí do angudã nŋɛ ŋa. Ajɔ mɛɛjei á ce bi iyeɛ, si ajɔ mɛɛjɔsiau nɔ i ceem do kuwee ŋa.

Kufita 23:16

Si anyiɛ nɔ aa ya ce jingaui Amaajɛ sinte ŋa iyi ì da si iko nŋɛ ŋa. Nɔ bii adɔ̃ wa kpa iri, waati iyi ì ka isoi jĩi ndii ilɛ nŋɛ ŋa ì tã ŋa waati bɛɛbɛi aa ya jɛ jingaui Isoi jĩi ŋa ku ka.

Ezai 41:11

Inɛ ŋa iyi à wɛɛò idɔɔkɔ̃ do awɔ fei, anyɔ do bitii á jɛ tu ŋa. Inɛ ŋa iyi à waa dɛdɛ ijaɛ ŋau, a kaa naa a jɛ nkãma, nɔ aa ce nfe mɔm nii.

Ezai 47:6

Idɔm í kɔ̃i wo si inɛm ŋau, nɔ ǹ jɔ̀ anyɔ í mu ŋa. Ǹ so ŋai wo ǹ daaɛ si awɔɛ ŋa. Amma i kù ce araare nŋa baa keeke. Ì jɔ̀ aso kuwo í tɛ mɔkɔ ngbo ntɔ ntɔ.

Zeremi 12:14

Ide iyi Aɔ̃ Lafɛ̃ɛ wa fɔ si gãmɛi inɛ laalɔ ŋa iyi à wa kɔkɔi inɛi Izirɛli ŋa wee. Í ni, inɛ ŋa iyi à lù ilɛ iyi ǹ na inɛm ŋa inɛi Izirɛli ŋau, an nya lafɛ̃ɛ ŋai hai si ilɛ nŋa, nɔ n nya inɛi Zudaa ŋa mɔ hai si anini nŋa.

Zeremi 2:4

Iŋɛ tɔkui Zakɔbu ŋa, iŋɛ iyi ì jɛ nyaanzei inɛi Izirɛli ŋau fei, i sotĩ i gbɔ idei Aɔ̃ Lafɛ̃ɛ ŋa.

Zeremi 30:16

Na nŋu, inɛ ŋa iyi à waa ce nfeɛ ŋau fei, aa ce nfei aŋa mɔi. Nɔ mbɛɛɛ ŋau mɔ, aa mu aŋa fei arui. Inɛ ŋa iyi à waa ceɛ ile, aa ce aŋa mɔ ilei. Inɛ ŋa mɔ iyi à waa kó mii ndɛɛ ŋa fei, aa kó mii ndii aŋa mɔi.

Zeremi 50:7

Nɔ inɛ ŋa iyi à nɛ à ko ŋa fei, à ya kpa ŋai, nɔ mbɛɛ nŋa ŋa à ya maa ni, awa a kù jɛ ilu taale ŋa, domi aŋai à ce dulum bi Aɔ̃ Lafɛ̃ɛ nŋa, do si tengi bii í jɛ bi kuwai Aɔ̃ Lafɛ̃ɛu. Si Aɔ̃ Lafɛ̃ɛu bɛi kpãa ku cɔi bala nŋa ŋa í wa wo.

Zoɛli 1:3

I sisia ama nŋɛ ŋa, nɔ ama nŋɛ ŋau mɔ a sisia ama nŋa ŋa, nɔ ama nŋa ŋau mɔ a sisia tɔku ŋa iyi aa na a naa.

Amɔsu 6:1

Iŋɛ ilu inɔ kufɔ ŋai iŋɛ iyi ì wa Siɔ̃ɔ do laakai ku sũ ŋa, do iŋɛ mɔ iyi ì wɛɛò laakai ku sũ si iri kutai Samari, iŋɛ iyi ì jɛ inɛ nla ŋa, nɔ ilɛ nŋɛi wa jɛ iri si ilɛ ŋa, iŋɛ iyi inɛi Izirɛli ŋau à waa naa bi tu ŋɛ.

Abakuku 1:11

Inɛ laalɔ ŋau à ya lɔi bɛi fufu nla nla. Gbugbã nŋai à waa kaaba, nŋui í jɛ bɛi iwɛ̃ nŋa.

Zakari 1:15

Amma ǹ wɛɛ do idɔɔkɔ̃ jiida si dimi ŋa iyi à waa tɔɔ fufu si ŋa. Tako wo idɔɔkɔ̃m kù la si inɛi Izirɛli ŋa, amma aŋai à kɔ̃ɔsi ijuukpã nŋa à kpa iluu.

Zakari 2:8

nɔ í sɔ̃ɔ í ni, sɛi i koo i sɔ̃ awaasũ iyi wa mu ikũu i ni a maà ma idĩ a kaakoò Zeruzalɛmu, domi amanɛ ŋa do mɛɛmu ŋa iyi aa na a wa bɛ aa kpɔ a caa.

Kuka 18:12

Amaajɛ sinte ŋa iyi à naam wa fei, awɔi an na. Mii iyi í jɛ jiida í re fei, hai ikpo, do vɛ̃ɛ, do bilee fei, titɛɛi á jɛ.

Romu 11:16

Si iyafũi pɛ̃ɛ iyi à kpo, bii pɛ̃ɛ sinte iyi à ceu í jɛ ti Ilaaɔ̃, debɛi pɛ̃ɛu fei ti Ilaaɔ̃i. Bɛɛbɛ mɔi bii icãi jĩi í jɛ ti Ilaaɔ̃, do amaawɔɛ ŋa fei ti Ilaaɔ̃i.

Romu 16:5

Nɔ i ce inɛi igbɛi Jesu ŋa iyi à ya tɔtɔɔ kpasɛ̃ nŋau fɔɔ. Nɔ i ceem Epanɛti kpaasi jiidam nɔu fɔɔ, nŋu iyi í tako í dasi Kirisi naanɛ si ilɛi Azii.

Efɛɛzu 1:4

Ilaaɔ̃ í cica wa tã hai waati iyi kù taka andunya ka jɛ titɛɛ si anu akã nwa do Kirisi, nɔ ka jɛ inɛ kumá ŋa ka maà nɛ taale kãma bi tɛɛ.

Wooda ku kɔsi 14:2

Iŋɛi ì jɛ zamaa iyi Aɔ̃ Lafɛ̃ɛ nŋɛ í nya ikã ku ba i jɛ titɛɛ ŋa. Iŋɛi í cica si inɔi zamaa iyi í wa si andunya ihɛ̃ fei.

Wooda ku kɔsi 26:19

ku ba ku jɔ̀ i wa antaii dimi ŋa iyi í taka ŋau fei nɔ i nɛ bɛɛrɛ ŋa do yiiko nɔ iri nŋɛ ku fangaa bii fei, nɔ i jɛ inɛ ŋa iyi à nya ikã na iriɛ ŋa si bɛi í sɔ̃ ŋɛu.

Wooda ku kɔsi 7:6

Ntɔ ntɔ iŋɛi ì jɛ dimi iyi à nya ikã í jɛ ti Aɔ̃ Lafɛ̃ɛ. Aɔ̃ Lafɛ̃ɛ nŋɛ í cica ŋɛi ku ba i jɛ titɛɛ ŋa si inɔi dimii inɛi andunya ŋau ihɛ̃.

Zaaki 1:18

Si idɔɔbiɛ, í bí wa isɛ gbeejisia do saabui ide ntɔɛ ku ba hai si inɛ ŋa iyi í taka fei ka jɛ bɛi amaajɛ sinte ŋa iyi à jɛ tɛɛ.

Piɛɛ 1, 2:9

Amma iŋɛi ì jɛ dimi iyi Ilaaɔ̃ í cica, nɔ iŋɛi ì jɛ woo weei ilaalu ŋa, ì jɛ dimi iyi í má ŋa iyi Ilaaɔ̃ í ya ku ba i fɔ jiida ku jɛɛ, nŋu iyi í kpe ŋɛ hai si ilu kuku ì naa ì lɔ si inya kumá ilu bɛɛrɛɛ.

Kuyɛi Zãa 14:4

Inɛ ŋau, a kù sũò inaabo. À mu ara nŋa a kù mà inaabo titã. À waa too ama angudãu bii wa bɔ fei. À yá ŋa hai si inɔi amanɛ ŋa. À yɛi bɛi amaajɛ sinte iyi à na Ilaaɔ̃ do ama angudãu.