12 I gbɛ̃a ara nŋɛ iyi í jɛ dee dee ŋa, nɔ i da zaka bɛi dee dee ku jɛ nŋɛu í to. I da iko titɔ̃ ŋa. Waati í to i dɛdɛ Aɔ̃ Lafɛ̃ɛ ŋa hee ku maa to waati iyi á baa nɔ ku jɔ̀ dee dee ku jɛɛ ku bii si ŋɛ.
Aɔ̃ Lafɛ̃ɛ á jɔ̀ ijĩ ku wɔ si dimi iyi ì gbɛ̃ si ilɛ ŋa, nɔ ilɛu á jɔ̀ amaajɛ nŋɛ ŋa a kpɔ nɔ a jɛ sɔnda jiida. Si waati nŋu bɛ, mɛɛmu nŋɛ ŋa aa ba fɔfɔ a maa jɛ si bantuma kucĩ gɔ.
Inɔ kufɔi á jɛ ti inɛ ŋa iyi aa bɔ Ezibiti ku ba a ba sobi. Acĩ ŋai à waa kaaba, nɔ naanɛ nŋa í wa si sarɛti ku ja igũ ŋa si na iyi í jɔ̀ à kpɔ, do si masa ŋa, domi à nɛ gbugbã ntɔ ntɔ. Amma a kù sinda ikpa bi Aɔ̃ Lafɛ̃ɛ Inɛ Kumái Izirɛliu, nɔ a kù bee lasabuɛ.
Ikpã ku naa hai lelei Aɔ̃, kudũi ijĩ ku jɔ̀ dee dee ku jɛ ku naa bɛi ijĩ í ya wɔ, nɔ ilɛ ku cĩ ku ba inɛ ŋa a yɛ isoi faaba, nɔ dee dee ku jɛ mɔ ku fita wa. Amu Aɔ̃ Lafɛ̃ɛi ǹ ce fei ndɛɛ.
Ntɔ ntɔ, bii ì de itĩ do laakai ì gbɔ woodam ŋa wo, kuwee nkpɔ nkpɔi á naa siɛ bɛi inyii ido nla iyi wa cã, nɔ dee dee ku jɛɛ á yɛi bɛi kutãngãm dii inyii tenku.
An jɔ̀ ilɛu ku wɛɛɛ bɛɛbɛi. Inɛ kãma kaa ya teese amaawɔi jĩi ŋau, nɔ inɛ kãma kaa ya logooɛ. Jĩi ku nɛ agũ ŋa do agũ mmu ŋai aa dede a biiɛ. Nɔ n kaa n jɔ̀ ijĩ ku dũ hee ku wɔ si ilɛu.
Aɔ̃ Lafɛ̃ɛ í ni, si ajɔ nŋu ŋau bɛ, do si waatiu bɛ, inɛi Izirɛli ŋa do inɛi Zudaa ŋa, aa nyi wai ajɔ. Aa nɛi a maa kpataò nɔ a maa dɛdɛò Aɔ̃ Lafɛ̃ɛ nŋa.
Inɛi ilui Samari ŋa à nɛ a yɛ ijuukpãi kurara nŋai si na iyi í jɔ̀ à ce ide ku kɔ̀ bi Aɔ̃ Lafɛ̃ɛ nŋa. Na nŋu, igũi á naa si ŋa ku kpa ŋa. Aa tɛɛsɛ ama kpɔtɔɔ nŋa ŋai, nɔ a pũ inaabo bãasĩ nŋa ŋa.
Na nŋu, ka mà nɔ ka dɛdɛ Aɔ̃ Lafɛ̃ɛ ku mà. Kunaaɛ kù nɛ sika kãma bɛi kunaai amɛɛjuumá. Á naa si wai bɛi ijĩ, bɛi ijĩi jɛadɔ̃ iyi í ya jɔ̀ ilɛ ku mandi.
Si bɛi fufui ì waa gbɛ̃ ŋa, fufu dabii nla nlai aa na i da ŋa. À ya kpa mɔnda gɔ a ni, bilee iyi í fita nɔ kù bí, i kaa ba iyafũɛ. Nɔ baa bii í jɛ í bí mɔi, inɛ njoo ŋai aa jɔɔ.
I cé laalɔ ŋa nɔ i bi jiida ŋa, i jɔ̀ dee dee ku jɛ ku jɛ bomma bi ku ce kiiti nŋɛ ŋa. Á yɔkɔ ku jɛ do yaase bɛɛbɛ Aɔ̃ Lafɛ̃ɛi lele do ilɛ á ce araarei inɛi kpasɛ̃i Zozɛfu ŋa iyi à gbe.
Aɔ̃ Lafɛ̃ɛ í ce leleaɔ̃ ikã ikã nɔ í jilɛ aŋa fei si inya ikã ikã. Í ya kpaasi ilu kuku ku baa ku jɛ inya kumái daakɔ. Í ya jɔ̀ dasã ku kpɔò idũ, nɔ í ya tɔtɔɔ inyii tenku ŋa nɔ ku nikã ŋa si ilɛ fei. Iriɛi í jɛ Aɔ̃ Lafɛ̃ɛ.
Ilaaɔ̃i í ya na woo gbɛ̃ dimi nɔ ku jɔ̀ ku so jiida ku jɛ mii iyi á jɛ. Nŋu mɔi á mu nŋɛ gbugbã i ceò amuau ŋa. Amuau á yɛi bɛi dimi iyi ì waa gbɛ̃ ŋa, nɔ Ilaaɔ̃ ku jɔ̀ icɛ jiida nŋɛu ku la nɔ ku so iso nkpɔ nkpɔ.
Inɛ ŋa iyi à waa dɛ anu akã à ya ce kuwɛɛ nŋa feii si laakai ku sũ. Laakai ku sũu í yɛi bɛi dimi iyi à waa gbɛ̃ nɔ mii iyi aa na a da nŋui í jɛ kuwɛɛ dee dee.