Luku 13:34 - Bibeli do fee

³⁴ Iŋɛ inɛi Zeruzalɛmu ŋa, iŋɛ iyi ì ya kpa walii ŋa, nɔ i ta ama abɛi Ilaaɔ̃ ŋa mɔ kuta i kpa ŋa ŋa, isɛ fɛloi ǹ ya n bi n tɔtɔɔ ŋɛ si abɛm bɛi ajɛɛ í ya tɔtɔɔ amaɛ ŋa si ikpaɛ, amma i kù jɛ ŋa.

Luku 13:34 Iomraidhean Croise

Neemi 9:26

Do nŋu fei a kù jirimaɛ, à na à dedeò ide ku kɔ̀ siɛ. À nyɔ woodaɛ do anyi nŋa. À kpa waliiɛ ŋa iyi à waa mante ŋa a baa wa bi tɛɛ. Nɔ à waa ce daa ŋa iyi kù sĩa.

Neemi 9:30

Do nŋu fei ì temuaò ŋa adɔ̃ nkpɔ nkpɔ. Ì jɔ̀ hundeɛ í naa si waliiɛ ŋa ku ba a sɔ̃ ŋa a ce laakai. Amma a kù de si ŋa itĩ. Ŋɔi ì so ŋa ì daa dimi mmu ŋa si awɔ.

Iri ku kɔ̃ 149:2

Izirɛli, jɔ̀ i wɛɛò inɔ didɔ̃ na woo takaɛ. Iŋɛ inɛi Siɔ̃ɔ ŋa, i wɛɛò inɔ didɔ̃ ŋa na ilaalu nŋɛ.

Iri ku kɔ̃ 17:8

Mum bɛi amanɛ í ya maa nɛ laakaii ijuɛ. Biim do jĩjĩi ikpaɛ ŋa.

Iri ku kɔ̃ 36:7

Dee dee ku jɛɛ í gbokai bɛi iri kuta nla ŋa. Lasabuɛ ŋa à jĩisai bɛi ido nla. Aɔ̃ Lafɛ̃ɛ, awɔi ì ya faaba amanɛ do mɛɛmu ŋa fei.

Iri ku kɔ̃ 57:1

Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do imu iyi wa ni, maà jɔ̀ ku ce nfe. Iriu wa fɔ idei waati iyi Davidi í ba í saa Saulu í koo í manji si isai kutau.

Iri ku kɔ̃ 81:13

Na ŋɔi í ce ǹ jɔ̀ ŋa a cica si idɔ nŋa, a ce iyi à lasabu.

Iri ku kɔ̃ 91:4

Nŋui á biiɛ do ikpaɛ ŋa. Si abɛi ikpaɛ ŋaui aa ba bi ku manji. Dee dee ku jɛɛi í jɛ bɛi tɛli ilu naanɛ.

Ezai 30:15

Ŋɔi Aɔ̃ Lafɛ̃ɛ, nŋu iyi í jɛ Inɛ Kumái Izirɛliu í fɔ í ni aa ba faaba ŋai, bii ì sinda ì nyi wa bi ti nŋu, nɔ ì wɛɛ sɛ̃ɛ ŋa. Si sɛ̃ɛ ku ce nŋɛ do si naanɛ ku dasi nŋɛ si nŋu Aɔ̃ Lafɛ̃ɛi aa ba gbugbã ŋa. Amma i kù bi iyi bɛ ŋa.

Ezai 50:2

Waati iyi ǹ naa, na mii í jɔ̀ n kù yɛ inɛ kãma. Waati iyi ǹ kpe ŋɛ, na mii í jɔ̀ inɛ kãma kù jɛ. Awɔm í kandaa bɛi n kaa n yɔkɔ n faaba ŋɛi? Gbugbã wa gaiziam bɛi n kaa n yɔkɔ n faaba ŋɛ? Bii ǹ la si tenku, í to tenku ku gbɛ, nɔ ido nla ŋau mɔ a baa a kpɔò gbaa. Waati bɛɛbɛ, inyi á gaizia, nɔ cɛ̃ɛ ŋa aa ku do agbɛ, nɔ a sãmi.

Zeremi 2:30

Ǹ kpã ama nŋɛ ŋa ijui si ngbɛ. A kù ce laakai si mii iyi í ba ŋau. Do taakuba nŋɛi ì kpaò walii nŋɛ ŋa, bɛi muusu nla kugaabu.

Zeremi 26:23

Inɛ ŋau à koo à mu Uria wa à baaɛ wa à koo à na ilaalu Zoakimu, nɔ í jɔ̀ à gũu do taakuba à kpaa, à bɛi à so ikuɛu à koo à dasi inɔ balɛ bii à si zamaa nkpɔ nkpɔ.

Zeremi 35:14

Yonadabu amai Rekabu í tako í na amaɛ ŋa wooda í ni a maà mɔ vɛ̃ɛ. Nɔ nyaanzei Rekabu ŋau à gba ideɛ ŋau à ceò icɛ. À bu ara nŋa a ci ya mɔ vɛ̃ɛ hee ku baa nnyi, domi idei bala nŋai à jirima. Nɔ amu Aɔ̃ Lafɛ̃ɛ, ǹ wasi ku ba ŋɛ ide ku fɔ n kù leekĩ, amma ì kɔ̀ ku gbɔ idem ŋa.

Zeremi 35:17

Nɔ Zeremi í sɔ̃ ŋa má í ni, na nŋu, Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í ni, wahala ŋa iyi ǹ fɔ ideɛ si gãmɛi inɛi Zudaa ŋa do inɛi Zeruzalɛmu ŋau fei, an jɔ̀ ku naa si ŋai, domi iyi ǹ ba ŋa ide ku fɔ a kù desim itĩ, nɔ iyi ǹ kpe ŋa à kɔ̀ ku jɛ.

Zeremi 6:16

Aɔ̃ Lafɛ̃ɛ í fɔ í ni, i bɔ si kpãa ŋau ŋa, i bee kpãa jiidai tako nŋɛ ŋau, nɔ i tooɛ ŋa. Do yaase bɛɛbɛ, aa nɛ laakai ku sũ ŋa. Amma à jɛ à ni, a kaa ka too si.

Kukpata 1:16

Na ŋɔi í jɔ̀ ǹ wa n kpata. Cikãajum ŋa a kù waa leekĩ. Inɛ iyi á lɛlɛm ku muum gbugbã n baò kuwɛɛ, í jĩim. Amam ŋa à mɔngɔ, domi mbɛɛ í nɛ gbugbã í re ŋa.

Kukpata 4:13

Wahalau í naai na dulum dii walii ŋau do kurarai woo wee ŋau, domi aŋai à kpa inɛ dee dee ŋa si inɔ iluu.

Ozee 11:2

Amma si anyiɛ, inɛi Izirɛli ŋa à na à nɛ hee jĩijĩ. Nɔ bɛi à waa kpe ŋa fei, bɛɛbɛi à ya maa jĩò inɛ ŋa iyi à waa kpe ŋau. À ya maa cea iwɛ̃ ŋa iyi à ya kpe Baali ŋau kuwee nɔ à ya joa iwɛ̃ mmu ŋa tuae ŋa.

Ozee 11:7

Zamaam nɔu wa leekĩi si dee dee hai jɛɛ si gãmɛm. À waa kpe ŋa a dede a leekĩ, amma kãma nŋa kù bi ku dede.

Zoɛli 2:23

Nɔ iŋɛ mɔ inɛi Siɔ̃ɔ ŋa, i jɔ̀ i wɛɛò inɔ didɔ̃ ŋa na irii Aɔ̃ Lafɛ̃ɛ nŋɛ, domi bii atɛ í tɛ, í ya jɔ̀ ijĩ ku naa nŋɛ zaka bɛi ì nɛ bukaataɛ ŋa. Í ya jɔ̀ ijĩu ku naai na iri nŋɛ nkpɔ nkpɔ. Í ya jɔ̀ ijĩi jɛadɔ̃ do ti sɔnkpasa ku naai bɛi í ya maa ce hai tako.

Zakari 1:4

Ǹ wa n tɔɔ ŋɛ, i maà ti i sisi bala nŋɛ ŋa. Hai kukpɛi waliim ŋa à sɔ̃ ŋa idem, à ni a jɔ̀ kuwɛɛ laalɔ do kookoosu laalɔ nŋa ŋa iyi à waa ceu, amma a kù bi ku gbɔ mɔm hee a jirimam.

Matie 22:3

nɔ í bɛ amaacɛɛ ŋa í ni a koo a kpe inɛ ŋa iyi à kpe abɔdɔ̃u wa. Amma inɛ ŋau a kù waa bi ku naa.

Matie 22:6

Gɔgɔ ŋa à mu amaacɛ ŋau à cã ŋa à kpa ŋa.

Luku 15:28

Ŋɔi igbãu í damɔɔ í kɔ̀ ku lɔ kpasɛ̃. Ŋɔi baau í fita wa í naa ku lɛlɛɛ.

Luku 19:44

Aa lɛgɛ ilu nŋɛ nɔ a kpa iŋɛ inɛɛ ŋa iyi ì wa inɔɛ ŋa. A kaa jɔ̀ kuta baa akã ku maa lesi njɛ ajɔ nŋu. Bɛɛbɛi á ce si na iyi í jɔ̀ Ilaaɔ̃ í naa bi tu ŋɛ nɔ i kù mà waati iyi í to wa bi tu ŋɛ.

Luku 23:28

Iyi Jesu í sinda í cɔ ŋa ŋɔi í ni, iŋɛ inaaboi Zeruzalɛmu ŋa, i maà kpata na irim, amma i kpata na iri nŋɛ do na irii ama nŋɛ ŋa.

Woo bɛ ŋa 7:52

Walii yooma ŋai bala nŋɛ ŋa a kù kpã iju. À kpa hee do inɛ ŋa iyi à fɔ kunaai Inɛ Dee Deeu, inɛ iyi iŋɛ taka nŋɛ ì zambaɛ si nsɛi ì kpaa ŋau.

Woo bɛ ŋa 7:59

Si bɛi à waa ta Etiɛni kutau ŋɔi Etiɛni í ce kutɔɔ í ni, Lafɛ̃ɛ Jesu, gba hundem.

Woo bɛ ŋa 8:1

Waati iyi à kpa Etiɛniu Sɔlu mɔ í jɛsi. Hai ajɔ nŋu bɛi à sinti ku kpã inɛi igbɛi Jesu ŋa iyi à wa Zeruzalɛmu iju ntɔ ntɔ. Bii kù jɛ woo bɛ ŋau baasi, woo dasi Jesu naanɛ ŋau fei à fangaai si ilɛi Zudee do si ilɛi Samari.

Wooda ku kɔsi 32:29

Bii à nɛ laakai baa keeke wo, aa gbɔ yaasei tengi bii ide ŋau ihɛ̃ fei wa bɔò ŋa.

Wooda ku kɔsi 5:29

Bii í jɛ waati kãma fei aa ya maa jirimam wo, nɔ a maa ceò woodam ŋau fei icɛ, aŋa do tɔku nŋa ŋau fei aa ya maa wɛɛò inɔ didɔ̃i wo waati kãma fei.

Kuyɛi Zãa 11:8

Iku nŋa á maa sũi si bantumai ilu nla bii à kpakpa Lafɛ̃ɛ nŋa si jĩi nɔu. À nɛ a kpe iluui wo Sodomu walakɔ Ezibiti.

Ruutu 2:12

Ilaaɔ̃ Lafɛ̃ɛi inɛi Izirɛli ŋa ku sãɛ mii iyi ì ce fei nɔ ku jɔ̀ i ba riba nla nla hai bi tɛɛ, si na iyi í jɔ̀ si awɔ gbugbãɛi ì naa i wa ku maa degbeɛ.