Kolosee 3:5 - Bibeli do fee

⁵ Na nŋu, i kpa kubii mii ndii andunya iyi wa ce icɛ si ŋɛ fei. Mii ndii andunya ŋaui à jɛ sɛ̃ɛ ku tɔtɔɔ hai nɛ yaase, do daa laalɔ, do binɛ, do kubi nfe nfe, do kɔdɛɛi mii nkpɔ. Ntɔ ntɔ bii ì waa ce kɔdɛɛ, mii nkpɔi ì ya tɔɔ si agbɛi Ilaaɔ̃.

Kolosee 3:5 Iomraidhean Croise

Kufita 37:22

Iso ŋau do amaawɔ ŋau fei ara akãi í jɛ. À ce fei ndɛɛi do wura alala iyi à cã.

Matie 15:19

domi hai si idɔi amanɛi lasabu laalɔ wa naa. Inɛ ku kpa, do sakara, do sɛ̃ɛ ku tɔtɔɔ do mudɛ̃ɛ hai ce abɔdɔ̃, do ile, do sɛɛda ibo, do inɛ ku bɛjɛ, mii ŋau bɛ fei hai si idɔi wa naa,

Romu 1:26

Ŋɔi í jɔ̀ Ilaaɔ̃ í fũsi ŋa awɔ nɔ à dasi kɔdɛɛ iyi í jɔ̀ à waa cã anyi. Inaabo nŋa ŋa a ci ya jɛ baa inɛmɔkɔ ku sũò ŋa má, bii kù jɛ aŋa duusɔ̃ɔ.

Romu 1:29

Nɔ laalɔ fei í wɛɛ nŋa, hai inɔ ku kã do kɔdɛɛ do njɛ ku cé do igu do inɛ ku kpa do ija do ibo do bisi laalɔ, hee do irii njɛ ku sɔ.

Romu 6:13

I maà ti i jɔ̀ ikɔ̃ ikɔ̃i ara nŋɛ kãma kù wa si awɔi dulum má i maa ceò laalɔ ŋa. Amma i so ara nŋɛ i na Ilaaɔ̃ bɛi inɛ ŋa iyi à jĩ wa hai si balɛ, nɔ i so ikɔ̃ ikɔ̃i ara nŋɛ fei i daa Ilaaɔ̃ si awɔ ŋa i maa ceò jiida.

Romu 6:6

À mà iyi à kpakpa daa nwo nwa si jĩi ku gaau do Jesu ajɔ, ku ba daa nwo nwa iyi wa dasi wa dulum nɔu ku kpa iri, nɔ ka maà jɛ arui dulum má,

Romu 7:23

amma si kucei ikɔ̃ ikɔ̃i aram fei ǹ wa n yɛ ide mmu gɔ iyi wa ja do lasabum, nɔ wa cem arui dulum iyi í wa sim.

Romu 7:5

Waati iyi à wɛɛò daa nwo nwa ŋa wo, wooda í dede kɔdɛɛ laalɔ si wa, nɔ kɔdɛɛu wa ce icɛ si ikɔ̃i ara nwa ikã ikã fei nɔ wa bɔò wa bi iku.

Romu 8:13

Ntɔ ntɔ, bii ì waa ce idɔɔbii ara aa ku ŋa. Amma bii ì jɔ̀ Hundei Ilaaɔ̃ í sobi ŋɛ i kpaò kookoosui arau aa nɛ kuwɛɛ ŋa,

Kɔrɛnti 1, 5:1

À waa gbɔ bii fei à ni inɛ akã nŋɛ gɔ wa ce sakara iyi baa hai dasi Jesu naanɛ ŋa a kaa yɔkɔ a coo. À ni inɛ akã nŋɛ í ya maa sũò aboi baaɛ.

Kɔrɛnti 1, 6:11

Bɛɛbɛi inɛ gɔ nŋɛ ŋa à yɛ wo. Amma à wɛ ŋɛ, nɔ à jɔ̀ ì má ŋa, nɔ ì jɛ dee dee ŋa na saabui irii Lafɛ̃ɛ nwa Jesu Kirisi do Hundei Ilaaɔ̃.

Kɔrɛnti 1, 6:13

Ì ya nyi i ni ŋa, ijɛ í wɛɛi na inɔ, nɔ inɔ mɔ í wɛɛi na ijɛ. Ntɔi, amma do nŋu fei Ilaaɔ̃ á na ku kpa irii mii minji ŋau bɛ fei. Amma i ce laakai ŋa, ara kù wɛɛ na abo kaafe ŋa ku sũò. Í wɛɛi na Lafɛ̃ɛ nɔ Lafɛ̃ɛ mɔ í wɛɛi na iriɛ.

Kɔrɛnti 1, 6:18

I saa adɛi abo ŋa. Kurara iyi amanɛ wa ce fei ci ya má si araɛ, amma inɛ iyi wa ce adɛi abo, arai nŋu takaɛi wa dasi kurara.

Kɔrɛnti 2, 12:21

Ǹ wa n ce njo Ilaaɔ̃ ku maa na ku kayem si waju nŋɛ waati iyi an na ǹ nyi wa bi tu ŋɛ má. Nɔ ǹ wa n ce njo má n maa n na n kpata na irii inɛ nkpɔ ŋa iyi à tako à ce dulum wo nɔ a kù kpaasi idɔ hai si abo kaafe ŋa ku sũò do si daa sãmi nkpɔ do daa bɛɛtɛkɛ iyi à ya ce.

Galati 5:24

Nɔ inɛ ŋa iyi à jɛ ti Jesu Kirisi í yɛ bɛi à kpa kucei daai ara nŋa si jĩi ku gaauu, do binɛɛ do kubiɛ fei.

Efɛɛzu 4:19

A kù nɛ anyɔ gɔ má, à na ara nŋa mam mam si dulum a ceò daa laalɔ dimi ikã ikã fei do binɛ.

Kolosee 2:11

Nɔ si anu akã nŋɛ do nŋu à dasi ŋɛ bango. Kù jɛ bango iyi amanɛ ŋa à ya ce, amma iyi Kirisi í ya ceui. Bangou, nŋui í jɛ daa nwo nwa ŋa iyi Kirisi í bu í nyɔu.

Tɛsalonika 1, 4:3

Mii iyi Ilaaɔ̃ í bi si ŋɛ, nŋui í jɛ i má ŋa, i nɔ ara nŋɛ mam mam i maà ya ce sakara ŋa.

Tɛsalonika 1, 4:5

ku maà ti ku jɛ do kɔdɛɛi ara bɛi dimi mmu ŋa à waa ce, aŋa iyi a kù mà Ilaaɔ̃.

Timɔtee 1, 6:10

Bɛɛbɛi á ce si na iyi í jɔ̀ kubii fiai í jɛ icãi laalɔ ikã ikã baa yooma fei. Nŋui inɛ gɔ ŋa à lɔsi ku dɛ hee à yaa hai si kpãai naanɛ ku dasi, à baa à dasi ara nŋa si kpãai wahala.

Ebɛɛ 12:16

I ce laakai ŋa ku ba inɛ gɔ ku maà ce sakara, nɔ inɛ gɔ ku maà na ku kɔ̀ ku mà bɛɛrɛi mii jiida ŋa. Bɛɛbɛi Esau í ce waati iyi í so yemma ku jɛɛ í taa na ijɛ jɛɛ akã.

Ebɛɛ 13:4

Inɛ baa yooma fei ku mà bɛɛrɛi abɔdɔ̃ nɔ mɔkɔ do abo a leekĩò njɛ dim dim. Ntɔ ntɔ Ilaaɔ̃ á kiiti inɛ ŋa iyi à waa sũò njɛ hai ce abɔdɔ̃ do inɛ ŋa iyi à waa ce sakara.

Ebɛɛ 13:5

I maà ti i jɔ̀ kubii fia ku mu ŋɛ. I jɔ̀ iyi ì nɛ ku ce nŋɛ zaka, domi Ilaaɔ̃ í ni, n kaa n jɔ̀ɛ pai, n kaa n nɔ n fũsiɛ awɔ baa ajɔ gɔ.

Zaaki 4:1

Mii í ya naaò kakɔɔ do ija wa si aninii nŋɛ. Nŋu bɛ wa naai hai si kɔdɛɛi mii nkpɔ iyi wa ba idɔ nŋɛ ku ja.

Piɛɛ 1, 2:11

Iŋɛ baakɔɔm ŋa, ǹ wa n tɔɔ ŋɛi, iŋɛ iyi ì yɛ bɛi inɛ njoo ŋa si andunyau ihɛ̃, i jɔ̀ i nɔ ara nŋɛ do binɛi ara iyi í ya maa ce igũ do hunde nŋɛ.

Kuyɛi Zãa 21:8

Amma inɛ ŋa iyi à mɔngɔ do hai dasi naanɛ ŋa do woo ce laalɔ ŋa do woo kpa inɛ ŋa do woo ce sakara ŋa, do woo ce dobu dobu ŋa do woo tɔɔ iwɛ̃ ŋa do woo sɔ ibo ŋa fei aa ba ikpɛ̃ nŋa si ina nla iyi wa jo do fainwitau. Iyi bɛi í jɛ iku minjisiau.

Kuyɛi Zãa 22:15

Amma anyii iluui woo ce laalɔ ŋa aa wa do woo ce dobu dobu ŋa do woo ce sakara ŋa do woo kpa inɛ ŋa do woo tɔɔ iwɛ̃ ŋa do inɛ ŋa iyi à bi ibo nɔ à ya maa sɔ ibou fei.