Daniɛli 12:3 - Bibeli do fee

³ Inɛ ŋa iyi à jɛ ilu laakai ŋa aa maa daanai bɛi inya kumái lelei Aɔ̃. Aŋa iyi aa nyisi inɛ ŋa yaase bɛi aa jɛò dee dee bi Ilaaɔ̃, aa maa daanai waati kãma fei bɛi leleaɔ̃ ŋa.

Daniɛli 12:3 Iomraidhean Croise

Kufita 34:35

à ya yɛ wajuɛ wa daanai. Si anyiɛ í ya bii wajuɛi do acɔu hee bii wa bɔ ku ba Aɔ̃ Lafɛ̃ɛ ide ku fɔ má ku bɛi ku nyaa.

Mɔnda ŋa 11:30

Kucei inɛ dee dee í yɛi bɛi jĩi ndii kuwɛɛ, nɔ ilu laakai í ya fa inɛ ŋa wa si kpãa jiida.

Mɔnda ŋa 3:35

Ilu bisi ŋa aa nɛ bɛɛrɛ, amma nnyɛi ŋa aa yɛ anyɔ.

Mɔnda ŋa 4:18

Kpãai inɛ dee dee ŋa í yɛi bɛi inya kumái daadaakɔ iyi wa daana nɔ inya kumáɛu í la wa koo hee koo to dasã.

Woo lasabu 12:9

Iyi í gbe má, nŋui í jɛ iyi woo lasabuò yaasei andunyau í nɛ laakai nɔ kù gbɛɛjiò inɛ ŋa ku kɔsi mii iyi í mà. Si anyiɛ í tɔtɔɔ mɔnda nkpɔ nkpɔ iyi nŋu takaɛ í cɔ do laakai nɔ í lasabu si.

Ezai 53:11

Ŋɔi Aɔ̃ Lafɛ̃ɛ í ni, si anyii wahala ŋa iyi woo ce icɛm nɔu á bau, á nyi ku yɛ inya kumái kuwɛɛ má hee ku too. Nɔ na saabui kumà iyi woo ce icɛm nɔu í nɛ, nŋu iyi í jɛ dee deeu, á jɔ̀ inɛ nkpɔ ku jɛ dee dee, nŋu iyi í so kurara nŋa ŋau.

Zeremi 23:22

Bii í jɛ awaò ŋa à buba à fɔ ide mɔm nii wo, aa yɔkɔ a sɔ̃ inɛm ŋa bɛi ǹ fɔ fei, nɔ aa jɔ̀ a sinda a jɔ̀ kpãa laalɔ nŋa do kuce laalɔ nŋa ŋau.

Daniɛli 11:33

Nɔ si zamaau, inɛ ŋa iyi aa mà mii ŋa ku wũaa, aa ya maa sɔ̃ inɛ nkpɔ idei do bisi. Waati gɔ á na ku naa, inɛ gɔ ŋa aa koosɛi na igũ. Aa jo inɛ gɔ ŋai. Inɛ gɔ ŋa mɔ aa gba amani nŋa ŋai nɔ a dasi ŋa piisɔ̃ɔ.

Daniɛli 11:35

Si inɔi inɛ ŋa iyi aa jɛ woo mà yaasei mii ŋa ku wũaa ŋau, inɛ gɔ ŋa aa ku. Nɔ iku nŋaui á jɔ̀ zamaau ku má, nɔ nŋui á jɔ̀ ku wɛɛò sɔɔlui waatii ankãanyiu. Waati iyi à jilɛu kù to wa titã.

Daniɛli 12:10

Ilaaɔ̃ á jɔ̀ inɛ nkpɔ nkpɔ ku maajui hee a fũuta, nɔ wahala ku wɛ ŋa. Woo ce laalɔ ŋa aa maa ce laalɔi, nɔ a kaa yɔkɔ a gbɔ yaasei nkãma. Amma ilu laakai ŋa aa gbɔ yaasei mii ŋa iyi wa ce.

Matie 13:43

Nɔ waati bɛɛbɛ inɛ ŋa iyi à waa dɛ idɔɔbii Ilaaɔ̃ ku ce aa maa má inyai bɛi inunu si bommai Ilaaɔ̃ Baa nŋa. Inɛ iyi í nɛ itĩ iyi á gbɔò ide, ku gbɔ.

Matie 19:28

Nɔ Jesu í sɔ̃ ŋa í ni, ntɔ ntɔ ǹ wa n sɔ̃ ŋɛi, waati iyi Ilaaɔ̃ á ce mii fei titɔ̃ nɔ amu Amai Amanɛ n maa n buba si batai bomma ilu amboem, iŋɛ amanɛ maateeji iyi ì waa toom ŋau ihɛ̃, iŋɛ mɔ aa buba si batai bommau i kiitiò dimi maateejii inɛi Izirɛli ŋau.

Matie 24:45

Í sɔ̃ ŋa má í ni, yooi í jɛ amaacɛ ilu naanɛ iyi í nɛ laakai. Lafɛ̃ɛi í jɛ inɛ iyi ilu kpasɛ̃ gɔ í kpe nɔ í so amaacɛ kpaasiɛ ŋa í daa si awɔ ku maa cɔ ŋa ku na ŋa ijɛ si bɛi í jɔ.

Laabaau jiida iyi Zãa í kɔ 4:36

Inɛ iyi wa da í wasi fiaɛ ku gba tã, nɔ amaajɛ iyi wa tɔtɔɔu ti kuwɛɛ hai tãi. Si bɛɛbɛ woo gbɛ̃ do woo da à nɛ inɔ didɔ̃ ajɔ.

Laabaau jiida iyi Zãa í kɔ 5:35

Zãau bɛ í yɛi bɛi fitila iyi à má ku má inya. Nɔ waati keeke gɔ ì jɛsi i wɛɛò inɔ didɔ̃ si inya kumáɛu ŋa.

Woo bɛ ŋa 13:1

Walii do woo kɔsi cio gɔ ŋa à wa si inɔi inɛi igbɛi Jesu ŋa Antiɔsi bɛ. Iri nŋa wee. Baanabasi, do Simeɔ̃ iyi í jɛ amanɛ dũdũ, do Lusiusi inɛi Sirɛni, do Manahɛnu, nŋu iyi à bíi do Herodu ilaaluu inya akã, do Sɔlu.

Kɔrɛnti 1, 3:10

Amu mɔ, na saabui didɔ̃ iyi Ilaaɔ̃ í ceem, amui ǹ nyɔ icui ileu bɛi woo ma iyi í nɛ laakai. Nsɛi inɛ mmu gɔi wa ma si antaiɛ. Amma inɛ fei ku ce laakai si yaase bɛi wa ma si.

Efɛɛzu 4:11

Amua ŋa iyi í cea inɛ ŋa wee. Í cica inɛ gɔ ŋa à jɛ woo bɛ ŋa, inɛ gɔ ŋa mɔ walii ŋa, inɛ gɔ ŋa mɔ woo sisi laabaau jiida ŋa, inɛ gɔ ŋa mɔ woo degbe inɛi igbɛi Jesu ŋa, inɛ gɔ ŋa mɔ woo kɔ inɛ ŋa si cio.

Ebɛɛ 5:12

Waati í to bɛbɛi bii í jɔ iŋɛ mɔ i kɔ inɛ gɔ ŋa mɔ si ideu, nɔ do nŋu fei, ì kɔ̀ ì waa nɛ bukaatai inɛ iyi á kɔ ŋɛ si mii sinte ŋa si idei Ilaaɔ̃. Iŋɛ iyi ì to i jɛ ijɛ kili nla nɔ ì nyi ì waa nɛ bukaatai amɔ má ŋa.

Piɛɛ 2, 3:15

I doo temuai Lafɛ̃ɛ nwa bɛi kpãai faaba nŋɛ, si bɛi Pɔlu baakɔɔ nwa í kɔ nŋɛ do bisi iyi Ilaaɔ̃ í muaa.

Kuyɛi Zãa 1:20

Leleaɔ̃ mɛɛje ŋa iyi ì yɛ si awɔ njɛm nɔu do bi ku lesi fitilai wura mɛɛje ŋau yaasei aŋa fei wee. Leleaɔ̃ mɛɛje ŋaui à jɛ amaleka mɛɛje ŋa iyi à waa mu igbɛ mɛɛje ŋau, nɔ bi ku lesi fitila mɛɛje ŋau, akã fei igbɛ akãi.

Woo kiiti ŋa 5:31

Aɔ̃ Lafɛ̃ɛ, jɔ̀ mbɛɛɛ ŋau fei a ku bɛi Sisera í kuu bɛ. Amma baakɔɔɛ ŋau fei, jɔ̀ a yɛ bɛi inunu iyi wa fita wa do inya kumá nla nlaɛ. Ŋɔi ilɛu í nɛ laakai ku sũ má adɔ̃ ciiji.