प्रकासना री गल्ला 4:1 - मंडयाली नंऊँआं नियम

¹ ये सभ कुछ हूंणे रे बाद मैं यहुन्ने स्वर्गा मन्झ एक दुराजा खुलिरा देखेया। तेबे मैं दबारा से पैहली अवाज सुणी, जो तुरही रे बाजे साहीं एक बड़ी भारी अवाज थी। तेस्से मेरे किन्हें बोल्या कि, “मेरे वाले एथी गास आई जा, होर मां तुजो स्यों गल्ला दसणी, जिन्हारा इन्हा गल्ला ले बाद पूरा हूंणां जरूरी आ।”

प्रकासना री गल्ला 4:1 Iomraidhean Croise

मत्ती 3:16

होर यीसू बपतिस्मा लई किन्हें झटपट पाणी ले बहार आया, होर तेसरे कठे आसमान खुल्ही गया; होर परमेसरा री आत्मा जो कबूतरा रे रूपा मन्झ आपणे गास उतरदे देख्या।

मरकुस 1:10

होर जेबे से पाणी ले निकली किन्हें ऊपर आया, ता तेबे ई तिन्हें आसमान खुल्हदे होर पवित्र आत्मा जो कबूतरा रे रूपा मन्झ आपणे गास उतरदे देख्या।

लूका 3:21

पर एता ले पैहले कि यहून्ना बपतिस्मा देणे वाल़े जो जेहला मन्झ पाई दितेया जांदा, सब लोका रा बपतिस्मा हुआ, तेबे यीसू रा भी बपतिस्मा हुआ, तेता ले बाद, जेबे यीसू प्रार्थना करेया करहा था, ता आसमान खुल्ही गया।

यहून्ना 16:13

पर तेस पवित्र आत्मा जो आस्सा जो सच्चाई पर लेई जांहीं जेबे आऊंणा, ता तेस तुस्सा जो परमेसरा री सारी सच्चाईया दसणी। क्यूंकि से आपणे आपा ले कुछ नी बोलदा, पर जो गल्ला से परमेसरा ले सुणना, तेस तेह्ड़ा ई बोलणा, होर इधी कठे हूंणे वाली गल्ला तुस्सा जो दसणी।

चुणिरे चेले रे काम 10:11

होर तिन्हें देख्या कि, आसमान खुल्ही गया; होर एक बडी चादरा साहीं कोई चीज हेठ उतरेया करहा ई, तेता जो चारो कुणे ले पकड़ी किन्हें धरती पर तुआरेया करहा था।

चुणिरे चेले रे काम 7:56

होर स्तिफनुसे तिन्हा किन्हें बोल्या, “हांऊँ स्वर्गा जो खुलिरा, होर हांऊँ माह्णुं रे मह्ठे जो परमेसरा री सीधी वखा जो खड़ीरे देख्हा।”

प्रकासना री गल्ला 1:10

तुआरा रे ध्याड़ा, जो प्रभु रा ध्याड़ा पवित्र आत्मा मेरे पर आई गई, होर मैं आपणे पीछे ले तुरही रे बाजे साहीं एक बड़ी भारी अवाज सुणी।

प्रकासना री गल्ला 1:12

होर मैं पीछे मुंह फेरी किन्हें देखेया कि कुण मेरे किन्हें बोलदा लगीरा। जेबे मैं पीछे मुड़ी किन्हें देखेया ता मैं सोने री सात दीऊदानिया देखी।

प्रकासना री गल्ला 1:19

“इधी कठे जो कुछ तू देख्या करहा, यानि जो ऐबे गल्ला हुआ करहा ईं, होर जो गल्ला आऊणें वाले ध्याड़े मन्झ पक्का हूंणे वाली, इन्हा दुहीं गल्ला जो तू कताबा मन्झ लिखी ले।”

प्रकासना री गल्ला 11:12

होर तेता ले बाद तिन्हें स्वर्गा ले एक बडी भारी अवाज जो ये बोलदे हुए सुणेया कि, “एथी ऊपर आऊआ!” ये सुणी किन्हें स्यों बादला पर सुआर हुई किन्हें आपणे दुस्मणा रे देख्दे-देख्दे स्वर्गा री वखा जो चली गये।

प्रकासना री गल्ला 11:19

होर परमेसरा रा मन्दर जो स्वर्गा मन्झ आ, से खोल्ही दितेया, होर तेसरे मन्दरा मन्झ वाचा रा सन्दूक सुझ्या। होर बिजलिया री चमक होर बादला री गड़गड़ाहट री अवाजा होर हिलण हुए, होर बौह्त ज्यादा सुणाटा री भरमार हुई।

प्रकासना री गल्ला 16:17

होर सातुवे स्वर्गदूते जाई किन्हें आपणे डोंगें मन्झ ले परमेसरा रे गुस्से जो बागर पर दली दितेया। होर स्वर्गा रे मन्दरा रे अंदर परमेसरा री राजगद्दी वाले ले मुंजो केसी रे बोलणे री अवाज आई कि, “सभ कुछ पूरा हुई गया।”

प्रकासना री गल्ला 19:11

फेरी मैं स्वर्गा जो खुलिरा देख्या, होर तेथी मेरे साम्हणें एक चिटा घोड़ा था। होर जो तेस पर एक सुआर था, तेस जो भरोसे रे लायक, होर सच्चा बोल्या जाहाँ था। से धार्मिकता किन्हें आपणे दुसमना रा न्याय करहा होर तिन्हारे बरखलाफ युद्ध करहा।

प्रकासना री गल्ला 22:6

तेता ले बाद स्वर्गदूते मेरे किन्हें बोल्या कि, “जो गल्ला तुस्सा किन्हें बोलिरी, स्यों भरोसे रे लायक, होर सच्ची ई। प्रभु परमेसर जिन्हें आपणी आत्मा सभी नबिया जो दितिरी, तिन्हें ही आपणे स्वर्गदूता जो एथी आऊणें रे कठे आदेस दितेया कि, आपणे सेऊआदारा जो स्यों गल्ला दसे। जिन्हारा बौह्त जल्दी पूरा हूंणां जरूरी आ।”