प्रकासना री गल्ला 21:3 - मंडयाली नंऊँआं नियम

³ फेरी मैं परमेसरा री राजगद्दी मन्झा ले केसी जो उच्ची अवाजा मन्झ ये बोल्दे सुणेया कि, “सुण! ऐबे ले परमेसरा रे रैहणे री जगहा माह्णुंआं रे बीचा मन्झ हुआ करणी, होर तेस तिन्हा साउगी रैहणां, होर स्यों तेसरे लोक हूंणे। होर परमेसरा आपु तिन्हा जो आपणे लोक बोलणा, होर तिन्हा साउगी रैहणां, होर तिन्हा भी से आपणा परमेसर मनणा।

प्रकासना री गल्ला 21:3 Iomraidhean Croise

2 कुरिन्थियो 6:16

होर मूर्तिया री परमेसरा रे मन्दरा मन्झ कोई जगहा नी। क्यूंकि आस्से ता जिन्दे परमेसरा रे मन्दर ऐं, जेह्ड़ा परमेसरे पवित्र सास्त्रा मन्झ बोलिरा कि, “मां इन्हा लोका साउगी रैहणां, होर तिन्हारे बीचा मन्झ चल्या फिरया करणा; होर मां तिन्हारा परमेसर हूंणां, होर तिन्हा मेरे लोक हूंणां।”

यहून्ना 14:23

यीसूए तेस जो जवाब दितेया, “अगर कोई मेरे किन्हें प्यार रखघा, ता तेस मेरे बचन मनणें। होर मेरे बापू तेस किन्हें प्यार रखणा, होर आस्सा तेस वाले आऊंणा, होर तेस साउगी रैंह्णां।

इब्रानियो 8:10

फेरी प्रभु बोल्हा, क्यूंकि येई से वाचा ई, जो वाचा मां आऊणें वाले ध्याड़े ले बाद इस्राएला रे घराने साउगी बान्हणी; से येई कि कि मां आपणी व्यवस्था तिन्हो याद कुराणी, होर तिन्हा स्यों गल्ला आपणे दिला मन्झ रखणी, होर मां तिन्हारा परमेसरा बणना, होर तिन्हा मेरे लोक हूंणा।

इब्रानियो 11:16

पर स्यों एक खरे स्वर्गा रे देसा रे चाहणे वाले ऐं, इधी कठे परमेसर तिन्हारा परमेसर कैहलाए जाणे मन्झ तिन्हा ले नी सरमान्दा, इधी कठे तिन्हें तिन्हारे कठे एक सैहर त्यार करी लया।

प्रकासना री गल्ला 7:15

“एस वजहा ले, स्यों परमेसरा री राजगद्दी रे साम्हणें ऐं, होर स्यों परमेसरा रे मन्दरा मन्झ राती-ध्याड़ी तेसरी सेऊआ करहा ऐं; होर जो राजगद्दी पर बैठिरा, तेस तिन्हारे बीचा मन्झ रेहणा, होर स्यों संभाल्ने।

2 कुरिन्थियो 6:18

“होर मां तुस्सा रा बापू हूंणां, होर तुस्सा मेरे मह्ठे होर मह्ठीया हूंणां; ये सर्वसक्तिमान प्रभु परमेसरा रा बचना आ।”

प्रकासना री गल्ला 21:7

जो लोक जीत हासिल करहे, तिन्हा इन्हा सभी आसिसा रे वारस हूंणां: मां तिन्हारा परमेसर हूंणां, होर तिन्हा मेरे लोक (बच्चे ) हूंणां।

यहून्ना 1:14

होर परमेसरा रे बचने माह्णुं रा रूप धारण कितेया, होर अनुग्रह होर सच्चाई किन्हें भर्ही किन्हें आस्सा मन्झ डेरा कितेया, होर आस्से तेसरी एह्ड़ी महिमा देखी, जेह्ड़ी बापू रे एकलौते मह्ठे री।

प्रकासना री गल्ला 12:10

फेरी मैं स्वर्गा मन्झा ले ये बड़ी अवाज जो ये बोलदे हुए सुणेया कि, “ऐबे आस्सा रे परमेसरा आपणे लोका रा उद्धार करणा! तेस आपणी सामर्था रे ज्रीए राजेया साहीं राज करणा! होर तेसरा मसीहा संसारा रे गास आपणा हक रखणा! क्यूंकि आस्सा रे संगी सेऊआदारा पर राती ध्याड़ी दोस लगाणे वाल़ा सैतान ऐबे परमेसरा रे साम्हणें नी खड़ी सकदा। क्यूंकि से स्वर्गा ले हेठा जो सट्टी दितेया गया!

प्रकासना री गल्ला 10:8

तेबे मैं दबारा सेई अवाज सुणी, जो स्वर्गा ले मेरे किन्हें गलाई करही थी, तेस अवाजे मेरे किन्हें बोल्या कि “जा, तेस्सा कताबा जो ले जो तेस स्वर्गदूता रे हाथा मन्झ ई, जो समुद्र होर जमीना पर खड़ीरा।”

प्रकासना री गल्ला 10:4

होर जेबे सात गर्जना री अवाज बोली बैठी, ता जो कुछ मैं सुणेया तेता जो लिखणे ही वाल़ा था, पर मैं स्वर्गा ले ये अवाज सुणी कि, “जो गल्ला तैं सात गर्जना ले सुणीरी, तिन्हा जो ल्कोई किन्हें रख, होर लिख्दा देख्या।”

1 थिस्सलुनकियो 3:11

ऐबे आस्से प्रार्थना करहे कि आस्सा रा बापू परमेसर आपु ई, होर आस्सा रा प्रभु यीसू मसीह, तुस्सा वाले आऊणें रे कठे आस्सा री मदद करहे।

इब्रानियो 8:2

होर आस्सा रा बडा याजक सच्चे तम्बू रे बड़े पवित्रजगहा मन्झ सेऊआ करहा जेह्ड़ा स्वर्गा मन्झ आ, जो परमेसरे बणाईरा ना कि केसी माह्णुं ऐ, बल्की प्रभुए खड़ा कितरा।

प्रकासना री गल्ला 22:3

परमेसरा ले स्रापित कोई चीज तेस सैहरा मन्झ नी हूंणां। परमेसर होर छेलू री राजगद्दी तेस सैहरा मन्झ हूणीं, होर परमेसरा रे सेऊआदारा तेसरी अराधना करणी।