प्रकासना री गल्ला 2:3 - मंडयाली नंऊँआं नियम

³ होर तू मेरे पर विस्वास करणे री वजहा ले सबर रखी किन्हें दुःख सहन करा। दुःख सहन करदे हुए भी तैं मेरी सेऊआ करणी नी छाडी।

प्रकासना री गल्ला 2:3 Iomraidhean Croise

मरकुस 15:21

कुरेनी सैहरा रा एक समौन नांऊँआं रा माह्णुं से जे सिकंदर होर रूफसा रा बापू आ, से यरुस्लेम सैहरा वखा जो आई करहा था; तिन्हें तेस जो बगारी मन्झ जबरदस्ती पकड़ेया कि से यीसू रा क्रूस चकी किन्हें लई चले।

लूका 14:27

होर जो कोई मेरा चेला बणना चाहे से आपणा क्रूस चके, होर मेरे पीछे आये।

लूका 18:1

फेरी एक ध्याड़े यीसूए आपणे चेले जो उदाहरण देई किन्हें बोल्या कियां हमेसा प्रार्थना करणा होर हिम्मत नी छाडणी चहिए।

लूका 21:19

आपणे धीरज रखणे ले ही तुस्से आपणी जान बचाई सक्हा ऐं।”

लूका 5:5

समौने यीसू जो जवाब दितेया कि, “हे माल्का, आस्से सारी रात बडी मैहनत किती होर कुछ नी पकड़ेया; पर तेबे बी तेरे बोलणे ले हांऊँ जाल पाई देहां।”

लूका 8:15

पर बढ़िया जमीना पर पऊणे वाल़ा बेजा तिन्हा लोका साहीं आ, जो भले होर खरे मना ले परमेसरा रे बचना जो सुणे होर सबर रखी किन्हें परमेसरा री इच्छा जो पूरी करहे।”

यहून्ना 15:21

पर लोका तुस्सा साउगी ये सब कुछ करणा क्यूंकि तुस्से मेरे चेले, होर स्यों मेरे भेजणे वाले जो नी जाणदे।

रोमियो 12:12

खुस रैहया क्यूंकि तुस्सा वाले बौह्त बड़ी आस ई; दुःखा मन्झ सबर रखा; प्रार्थना मन्झ लगातार लगी रैहया।

रोमियो 16:12

त्रूफैन्ना होर त्रूफोसा दुहीं बैहणा जो नमस्कार, जो प्रभु रे कामा रे कठे मैहनत करही। लाडली दोस्त पिरसिस बैहणा जो मेरा नमस्कार, जो प्रभु रे कामा रे कठे बौह्त ज्यादा मैहनत करही।

रोमियो 2:7

जो लोक खरे कामा जो करदे हुए परमेसरा री वखा ले मिलणे वाली महिमा, आदर होर कधी ना खत्म हूंणे वाली जिन्दगी री तोपा मन्झ रैंहयां ऐं, परमेसरा तिन्हा सभी जो अनंत जिन्दगी देणी।

रोमियो 8:25

पर जेस चीजा जो आस्से नी देख्दे, अगर तेता जो पाणे री आस रख्हा ऐं, ता धीरजा किन्हें तेसरा इंतजार भी करहा ऐं।

1 कुरिन्थियो 13:7

स्यों लोक हमेसा सभ गल्ला जो सही लैहें, स्यों परमेसरा पर विस्वास करणा कधी नी छाडदे, स्यों हमेसा आस रखायें, जेबे तिन्हो परेसानिया होर कष्ट हुयें तेबे भी सबर रखे।

1 कुरिन्थियो 16:16

इधी कठे हांऊँ तुस्सा ले अर्ज करहा कि एह्ड़े लोका री सुणेया करहा, बल्की एह्ड़े सभी री सुणा जो प्रभु रे कामा जो बौह्त मैहनता किन्हें होर बड़ी भक्ति किन्हें करहे।

2 कुरिन्थियो 10:15

होर आस्से सीमा ले बाहर होरी री मैहनता पर गर्व नी करदे; बल्की आस्सा जो आस ई कि, जिहां तुस्सा रा विस्वास बढ़दा जाणा तिहां आपणी सीमा मन्झ रेह्न्दे हुये तुस्सा रे ओरे परे रैहणे वाले लोका जो मसीह रे कठे जीती सके।

2 कुरिन्थियो 11:23

क्या स्यों ईं मसीह रे सेवक ऐं? हांऊँ तिन्हा ले बढ़ी किन्हें आ! हांऊँ पागल आदमी साहीं हुई किन्हें बोल्हा कि मैं तिन्हा ले ज्यादा मैहनत कितिरी; तिन्हा ले ज्यादा जेल्हा मन्झ पाईरा; कई बारी कुटीरा; कई बारी मुंजो मौता रा साम्हणां करणा पईरा।

2 कुरिन्थियो 4:1

इधी कठे जेबे आस्सा पर परमेसरा री एह्ड़ी दया हुई कि, आस्सा जो परमेसरा रे बचना जो प्रचार करणे री सेऊआ मिली, ता आस्से हिम्मत नी हारदे।

2 कुरिन्थियो 4:16

इधी कठे आस्से हिम्मत नी हारदे; जेब्की आस्सा रा सरीर मजे-मजे मरदा लगिरा, पर तेबे भी आस्सा रे अंदर आस्सा री आत्मा रोज-रोज नौंईं हुन्दी जाहीं।

2 कुरिन्थियो 5:9

ऐस वजहा ले आस्सा रे मना री इच्छा येई कि, चाहे आस्से स्वर्गा मन्झ परमेसरा साउगी रहे, चाहे धरती मन्झ तेस ले दूर रहे, पर आस्से तेस जो खरे लगदे रहे।

2 कुरिन्थियो 6:5

आस्से कोड़े खाधे, आस्सा जो जेल्हा मन्झ पाई दितेया, होर दंगे फसादा मन्झ आस्सो चोट लगी। आस्से बढ़ी मैहनत किती, बगैर सोये होर बगैर खाणे-पीणे रे रहे।

गलातियो 6:2

जेबे कोई परेसान मन्झ ऐं आ, ता तेसरी मदद करहा, होर इंहां करी किन्हें तुस्से मसीह री व्यवस्था जो पूरी करणी।

गलातियो 6:9

आस्से खरे काम करणे रे कठे हिम्मत नी छाडे; क्यूंकि अगर आस्से हार नी मनदे, ता आस्सा जो परमेसरा रे तय कितिरे टैमा पर इनाम मिलणा।

फिलिप्पियो 2:16

जिन्दगी रे बचना जो मजबूती किन्हें पकड़ी रखा ताकि मसीह रे दबारा वापस आऊणें रे ध्याड़े मुंजो एस गल्ला रा बडयाई हो कि, मेरी जिन्दगी री भाग दोड़ होर मेरी मैहनत बेकार नी हुई।

फिलिप्पियो 4:3

होर हे सच्चे, सहकर्मी हांऊँ तेरे ले ये अर्ज करहा कि, तू इन्हा दुहीं बैहणा री आपु मन्झा री बैहसा जो सुल्हा करा, क्यूंकि तिन्हें मेरे साउगी खुसी री खबर सुनाणे रे कठे, क्लेमेन्स होर मेरे दूजे सहकर्मी साउगी मैहनत किती। होर ऐबे इन्हा सभीरा नांऊँ जिन्दगी री कताबा मन्झ लिखिरा।

कुलुस्सियो 1:11

हांऊँ प्रार्थना करहा कि परमेसर आपणी महिमा री सक्ति रे मताबक तुस्से सभ किस्मा री सामर्था ले मजबूत करहे। ताकि जेबे तुस्से परेसानिया जो सहे तेबे हर तरहा ले धीरज होर सबर दसी सको। होर खुसी किन्हें भरी जाऊआ।

1 थिस्सलुनकियो 1:3

होर जेबे आस्से आपणे बापू परमेसरा किन्हें प्रार्थना करहा ऐं, तुस्सा रे कामा रे कठे जो विस्वासा री वजहा ले तुस्से करहा ऐं, होर दूजेया किन्हें प्यार करणे रे कठे जो मैहनत करहा ऐं, होर आस्सा रे प्रभु यीसू मसीह मन्झ उम्मीद रखणे रे वजहा ले जो धीरज पैदा हुंहाँ, तिन्हा गल्ला जो आस्से हमेसा याद करहा ऐं।

1 थिस्सलुनकियो 2:9

क्यूंकि हे भाईयो होर बैहणो, तुस्से आस्सा री कढ़ी मैहनता जो याद करहा ऐं कि, आस्से रात ध्याड़ काम धंधा करी किन्हें तुस्सा जो परमेसरा री खुसी री खबरा रा प्रचार कितेया, ताकि आस्से तुस्सा मन्झा ले केसी पर बोझ नी बणे।

1 थिस्सलुनकियो 5:12

होर हे भाईयो होर बैहणो, आस्से तुस्सा ले अर्ज करहा ऐं कि, तिन्हारी इज्जत करहा जो तुस्सा रे बीचा मन्झ रैहन्दे हुए तुस्सा रे कठे बौह्त मैहनत करहा ऐं, होर जो प्रभु मन्झ तुस्सा रे अगुवे ऐं, होर तुस्सा जो स्खाहें, तिन्हारी मना।

2 थिस्सलुनकियो 3:13

हे भाईयो होर बैहणो तुस्से हिम्मत नी हारी किन्हें सही काम हमेसा करदे रैहया।

2 थिस्सलुनकियो 3:5

आस्से प्रार्थना करहे कि प्रभु यीसू मसीह तुस्सा जो ये गल जाहिर करहे कि, परमेसर तुस्सा किन्हें कितना प्यार करहा होर तुस्से से ही सबरा रखा, जो मसीहे भी रखीरा था।

2 थिस्सलुनकियो 3:8

होर केसी री रोटी मुफ्त नी खाधीरी; पर मैहनत होर दुःख सही किन्हें रात-ध्याड़ काम धन्धा करहा ऐं थे, ताकि आपणी जरूरता रे कठे तुस्सा मन्झा ले केसी पर बोझ नी बणे।

1 तिमिथियुस 4:10

आस्से एस जिन्दगी जो पाणे रे कठे मैहनत होर कोसिस इधी कठे करहा ऐं, क्यूंकि आस्सा री आस तेस जिउंदे परमेसरा पर ई, जो सभ माह्णुंआं रा, होर खास कर विस्वासी लोका रा उद्धारकर्ता आ।

1 तिमिथियुस 5:17

जो कलीसिया रे अगुवा आपणा सारा काम खरे ढंगा किन्हें करदा हो, खास करी किन्हें जो परमेसरा रे बचना जो सुनाणे होर स्खाणे रे कठे मैहनत करहा हो, स्यों आदर होर पूरी मजदूरी, इन्हा दुहीं जो पाणे रे लायक समझे जाएं।

इब्रानियो 10:36

क्यूंकि तुस्सा जो सबर रखणा जरूरी ई, ताकि तुस्से परमेसरा री इच्छा जो पूरी करी सके। तेबे परमेसरा तुस्सा जो से सब कुछ देणा जेता रा देणे रा वादा तिन्हें तुस्सा किन्हें कितिरा।

इब्रानियो 12:1

एस वजहा ले जेबे बौह्त लोका री विस्वासा री गुआहिया आस्सो इतने बड़े बादला साहीं घिर्ही गईरे, ता आऊआ, आस्से हर एक रोकणे वाली चीज, होर उलझाणे वाले पाप दूर करी किन्हें, से दौड़ जेस मन्झ जे आस्सा जो दौड़ना आ, सब्र रखी किन्हें दौड़े।

इब्रानियो 13:13

ता आऊआ बलिदान री बिधिया जो छाडी किन्हें यीसू वाले आये होर जिहां तिन्हें लोका रे तम्बू ले बाहर जाई किन्हें बेज्जती जो झेल्या ऐं, तिहां ही आस्से भी तेस बेज्जती जो झेल्हा ऐं।

इब्रानियो 6:10

तुस्से परमेसरा रे खातर तेसरे पवित्र लोका री सेऊआ बड़े प्यारा किन्हें करहे थे होर करदे भी लगिरे, परमेसर एस कामा जो नी भूल्दा। क्यूंकि परमेसर अन्याय करणे वाल़ा नी आ।

इब्रानियो 6:15

होर एस तरहा अब्राहमे बौह्त टैमा तक सबर रखणे रे बाद तेस वादे जो आपणे जिन्दगी मन्झ पूरा हुंदे देख्या।

2 पतरस 1:6

होर समझदारी किन्हें काम करणा ही नी पर आपणे हर एक कामा मन्झ धीरज रखा, होर हर कामा मन्झ धीरजा ही नी पर दुखा मन्झ सबर भी रखा; होर दुखा मन्झ सबर रखणा ही नी पर सच्ची भक्ति री जिन्दगी भी जिया।

प्रकासना री गल्ला 1:9

हांऊँ यहून्ना तुस्सा रा विस्वासी भाई आ। यीसू मसीह साउगी एक हूंणे री वजहा ले हांऊँ दुःख सहन करहा, जिहां तुस्से भी करहे। हांऊँ परमेसरा रे राज्जा रा, जिहां कि तुस्से भी ऐ। होर मुंजो भी धीरज रखणा चहिए, जिहां कि तुस्से भी रखे। परमेसरा रे बचना रा प्रचार, होर मसीह रे सच्चे उपदेसा जो सुनाणे री वजहा ले कैदी बणाई किन्हें हांऊँ पतमुस टापू जो भेजी दितेया।

प्रकासना री गल्ला 3:10

जेबे तुस्से दुखी थे ता तेता जो सबरा साउगी सहन करणे रे कठे तुस्से मेरी गल्ला जो मन्नेया, होर एस वजहा ले मां भी तू परीक्सा रे टैमा बचाई रखणा। ये परखणी रा टैम सभ संसारा रे लोका पर आऊंणा।