प्रकासना री गल्ला 10:7 - मंडयाली नंऊँआं नियम

⁷ होर जिहां ही सातुऐ स्वर्गदूता रा तुरही बजाणे रा टैम आऊंणा, ता परमेसरा आपणी ल्कोईरी योजना जाहिर करणी, जेसरे बारे मन्झ तिन्हें आपणे नबिया किन्हें बोलिरा था, जो तेसरी सेऊआ करहे थे।”

प्रकासना री गल्ला 10:7 Iomraidhean Croise

चुणिरे चेले रे काम 3:21

जरूरी आ कि से स्वर्गा मन्झ तेस टैमा तक रैहे जेबे तक कि से सभ गल्ला रा सुधार नी करी ले, जेसरी चर्चा परमेसरे बौह्त पैहले से ही आपणे पवित्र नबिये रे ज्रीए कितिरी।

रोमियो 11:25

हे भाईयो होर बैहणो, हांऊँ चाहां कि तुस्से एस गुप्त सच्चाई जो समझी लो ताकि तुस्से बडयाई ना करो। होर इस्राएल रे लोका रे बारे मन्झ गुप्त सच्चाई ये ही कि जेबे तक सब अन्यजाति रे लोक मसीह वाले नी आई जांदे, तेबे तक इस्राएल देसा रे कुछ लोका एह्ड़े ही ढीठ बणी रैंह्णां।

रोमियो 16:25

ऐबे आस्से परमेसरा री बढ़ाई करहे, जो तुस्सा जो मेरे सुणाई री खुसी री खबरा रे ज्रीए यानि यीसू मसीह रे बारे मन्झ कितिरे प्रचार रे मताबक, तुस्सा जो विस्वासा मन्झ मजबूत करी सक्हा। यीसू मसीह रे एस प्रचारे तुस्सा अन्यजाति लोका रे कठे परमेसरा री योजना जो जाहिर करी दितिरा, से योजना जो सुर्हू ले ही भेदा मन्झ ल्कोई रखिरी थी।

प्रकासना री गल्ला 14:6

फेरी मैं एक होर स्वर्गदूता जो आसमाना पर बौह्त गास उडदे हुए देख्या। होर तेस वाले धरती रे रैह्णे वाले लग-लग देसा रे लोका, होर हर कुला रे लोका, होर जातिया रे लोका, होर लग-लग भासा बोलणे वाले लोका जो सुणाणे रे कठे अनंतकाला री खुसी री खबर थी।

प्रकासना री गल्ला 17:17

होर से ज्नाने, जो तैं देखी, ये से महान सैहर जो धरती रे सभ राजेया पर राज करही। तेस्सा किन्हें ये सभ कुछ इधी कठे हुआ, क्यूंकि परमेसरे ही तिन्हारे मना जो आपणे मकसदा जो पूरा करणे रे कठे बदली रा, होर एस वजहा ले जेबे तक परमेसरे जो बोलिरा, से पूरा नी हो, इन्हें सभिये राजे आपणा हक राक्सा जो देई दितिरा था।”