प्रकासना री गल्ला 1:5 - मंडयाली नंऊँआं नियम

⁵ हांऊँ प्रार्थना करहा कि यीसू मसीह भी तुस्सा जो आपणा अनुग्रह होर सांति देंदा रहे, जेसरी गल्ला भरोसे रे लायक ई। सेई आ, जो मरणे रे बाद जिउंदा हुआ, होर एस संसारा रे राजेया रा हाकम आ। से आस्सा किन्हें प्यार करहा, होर तिन्हें आपणी मौता रे ज्रीए आस्से पापा ले छुड़ाये।

प्रकासना री गल्ला 1:5 Iomraidhean Croise

मत्ती 20:28

हांऊँ माह्णुं रा मह्ठा इधी कठे नी आईरा कि, मेरी सेऊआ किती जाए, पर इधी कठे आईरा कि, हांऊँ आपु दूजे री सेऊआ करूं, होर कईया रे छुटकारे रे कठे आपणी जान देऊँ।”

मत्ती 28:18

यीसूए तिन्हा वाले आई किन्हें बोल्या कि, “स्वर्ग होर धरती रा सारा हक मुंजो दितिरा।

यहून्ना 13:1

ऐबे ये फसहा रे साजे ले पैहले हुआ। यीसूए जाणी लया कि, तेसरा सही टैम पूरा हुई गईरा होर तेस संसारा जो छाडी किन्हें बापू वाले वापस चली जाणा। जो संसारा मन्झ तेसरे आपणे थे तिन्हा किन्हें तिन्हें आखरी तक तेह्ड़ा ई प्यार रख्या, जेह्ड़ा प्यार से तिन्हा किन्हें रख्दा आईरा था।

यहून्ना 13:34

हांऊँ तुस्सा जो एक नंऊँआं हुक्म देहां एक दूजे किन्हें प्यार रखा, जो मैं तुस्सा किन्हें रखिरा, तेह्ड़ा ई तुस्से भी एक दूजे साउगी प्यार रखा।

यहून्ना 15:9

“जिहां बापूए मेरे किन्हें प्यार रखिरा, तिहां ईं मैं भी तुस्सा किन्हें प्यार रखिरा। मेरे प्यारा मन्झ बणी किन्हें रैंहयां।

यहून्ना 18:37

पिलातुस हाकमे तेस किन्हें बोल्या, “खरा ता तू राजा आ?” यीसूए जवाब दितेया, “तू बोल्हा कि, हांऊँ राजा आ। मैं इधी कठे जन्म लईरा, होर हांऊँ इधी कठे संसारा मन्झ आईरा कि हांऊँ सच्चाई रे बारे मन्झ सिखाई सकूं। होर जो कोई सच्चाई किन्हें प्यार करहा, स्यों मेरी गल्ला मनाएं।”

यहून्ना 3:11

हांऊँ तुस्सा किन्हें सच्च -सच्च बोल्हा कि आस्से जो जाणहां ऐं, से बोल्हा ऐं, होर जो आस्से देख्या तेता री गुआही देहां ऐं, होर तुस्से आस्सा री गल्ला पर विस्वास नी करदे।

यहून्ना 3:16

क्यूंकि परमेसरे संसारा रे लोका किन्हें एह्ड़ा प्यार कितेया कि तिन्हें आपणा एकलौता मह्ठा देई दितेया, ताकि जो कोई तेस पर विस्वास करहे से नास नी हो पर अनंत जिन्दगी पाए।

यहून्ना 3:32

जो कुछ तिन्हें देख्या, होर सुणेया, से लोका जो तेसरे बारे दसेया; पर कुछ लोक ई तेसरी गल्ला मन्नी।

चुणिरे चेले रे काम 20:28

“इधी कठे आपणी होर आपणे झुंडा री चौकसी करा; जेस ले पवित्र आत्मे तिन्हा जो कलीसिया रे अगुवे ठैहराईरा: ताकि तुस्से परमेसरा री तेस कलीसिया रा ध्यान रखा, जेस जो तिन्हें आपणे खूना रे बदले खरदी लईरा था।

चुणिरे चेले रे काम 26:23

कि मसीहा जो दुःख उठाणा पऊणा, होर तेस ई सभी ले पैहले मरिरे मन्झा ले जी उठणा, आस्सा रे लोका मन्झ होर अन्यजाति लोका मन्झ तेस ज्योति रा प्रचार करणा जेस ले तिन्हारा उधार हूंणा।”

रोमियो 3:25

परमेसरे मसीह यीसू जो आस्सा रे पापा रे प्रायस्चित रे कठे भेजेया, होर तिन्हें आपणा खून बहाई किन्हें आपणी जान देई दिति ताकि मसीह यीसू पर विस्वास करणे रे ज्रीए आस्से परमेसरा वाले आये। होर परमेसरे ये इधी कठे कितेया ताकि से एस गल्ला जो जाहिर करी सके कि पैह्ल्के जमाने मन्झ से पापी लोका साउगी सबर रखणे मन्झ होर तिन्हारे पाप माफ करणे मन्झ धार्मिक थे। पर एस टैम परमेसरा री धार्मिकता जाहिर हुन्दी लगिरी कि जेस ले से आपु ई धर्मी ठैहरे, होर जो यीसू पर विस्वास करहे, तिन्हो भी आपणी नजरा मन्झ धर्मी माह्णुं बणाए।

रोमियो 8:37

पर इन्हा सभी गल्ला ले आस्से मसीह रे ज्रीए जिन्हें जे आस्सा किन्हें प्यार कितेया, जयवन्ता ले भी बढ़ी किन्हें आ।

1 कुरिन्थियो 6:11

होर तुस्सा मन्झा ले कुछ लोक पैहले एह्ड़े ई थे, पर प्रभु यीसू मसीह रे नांऊँआं ले होर परमेसरा री दितिरी आत्मा ले तुस्सा रे पाप धोई दितिरे, ताकि तुस्से पवित्र होर परमेसरा री नजरा मन्झ धर्मी बणी सको।

गलातियो 2:20

ये एह्ड़ा था जिहां हांऊँ मसीह साउगी तेसरे क्रूसा प्रयाल्हे मरी गया, हांऊँ से नी आ जो ऐबे भी जिउंदा, पर मसीह मेरे मन्झ जिउंदा। होर जेस तरहा ले ऐबे हांऊँ जिउंदा, ता सिर्फ परमेसर रे मह्ठे पर विस्वास करणे रे ज्रीए जिउंदा, जिन्हें मेरे किन्हें इतना प्यार कितेया कि तिन्हें आपणी जान मेरे कठे देई दिती।

इफिसियो 2:4

पर परमेसरे जो बौह्त ज्यादा दयावान आ; तिन्हें आपणे तेस बड़े प्यारा रे कारण आस्सा किन्हें प्यार कितेया।

इफिसियो 5:2

एक दूजे किन्हें साउगी प्यारा किन्हें जिन्दगी जीया; जेह्ड़ा मसीहे भी तुस्सा किन्हें प्यार कितेया, होर तुस्सा रे पापा जो माफ करणे रे कठे आपणे आपा जो बलिदान करी दितेया। परमेसर एता ले खुस हुआ, क्यूंकि से बलिदान तेसरे कठे मीठी मुस्का साहीं था।

कुलुस्सियो 1:18

मसीह ही कलीसिया रा मूंड आ; होर कलीसिया मसीह रा सरीर आ। सेई सुर्हू आ, होर मरिरे मन्झा ले जिउंदा हूंणे वाल़ा पैहला था; ताकि हर गल्ला मन्झ पैहली जगहा तेस जो ई मिले।

1 तिमिथियुस 6:13

परमेसरा जो गुआह मनी किन्हें, जो सभी जो जिन्दगी देहां, होर मसीह यीसू जो भी गुआह मनी किन्हें जिन्हें पुन्तियुस, पिलातुस हाकमा रे साम्हणें सच्च बोलिरा था, हांऊँ तुजो ये हुक्म देहां,

1 तिमिथियुस 6:15

परमेसर जो बढ़ाई रे लायक आ, होर एकमात्र राजा, से राजेया रा राजा, होर प्रभुआ रा प्रभु आ, तेस मसीह जो ठीक टैमा पर जाहिर करणा।

इब्रानियो 10:29

ता सोची लऊआ कि तिन्हा लोका जो कितनी ज्यादा सजा मिलणी, जिन्हें परमेसरा रे मह्ठे जो पैरा थाले रौंदया, होर परमेसरा री वाचा रा खूना जो बेकार समझ्या; जेस खूना रे ज्रीए पाप सुद्ध किते जाहें। होर जिन्हें पवित्र आत्मा री बेज्जती किती, जो आस्सो अनुग्रह देईं।

इब्रानियो 9:14

मसीह बेकसूर था, होर तिन्हें आपणे आपा जो अनंत होर आत्मिक बलिदान करी किन्हें परमेसरा रे साम्हणें आस्सा रे पापा रे कठे चढ़ाई दितेया। होर इधी कठे तेसरा खून सिर्फ आस्सा रे सरीरा री असुद्धता जो दूर करणे रे कठे ही नी, पर अंतरात्मा जो सुद्ध करणे रे कठे सामर्थी आ, ताकि आस्से जिउंदे परमेसरा री सेऊआ करहे, होर एह्ड़े पापा रे काम नी करहे, जो मौता री वखा जो लेई जाहें।

1 पतरस 1:19

पर तुस्सा रा छुटकारा यीसू मसीह रे कीमती खूना रे ज्रीए हुआ, जो बेकसूर होर बेदाग छेलू साहीं था।

1 यहून्ना 1:7

पर जिहां परमेसर प्रयासे मन्झ आ, तिहां ईं आस्सा जो भी प्रयासे मन्झ चलणा चहिए, ता आस्से एक दूजे किन्हें साथ रख्हा ऐं; होर तेसरे मह्ठा यीसू मसीहा रा खून आस्सा जो सभ पापा ले पवित्र करहा।

1 यहून्ना 4:10

प्यार एता मन्झ नी आ कि आस्से परमेसरा किन्हें प्यार कितेया; पर प्यार एता मन्झ आ कि परमेसरे आस्सा किन्हें प्यार कितेया; होर आस्सा रे पापा रे प्रायस्चिता रे कठे आपणा मह्ठा भेज्या।

प्रकासना री गल्ला 11:15

होर जेबे सातुऐ स्वर्गदूते तुरही बजाई, ता मैं स्वर्गा मन्झ बौह्त भारी अवाज सुणी। होर तेस अवाजा ये बोल्या कि, “आस्सा रा प्रभु परमेसर होर तेसरा चुणिरा मसीह पुरे संसारा मन्झ राज करणे रा हक मिलिरा, होर आस्सा रे परमेसरा जुग-जुग राज करणा।”

प्रकासना री गल्ला 11:3

होर तेस टैम मां आपणे दो गुआहा जो ये हक देणा कि, एक हजार दो सौ साठ ध्याड़े तक भविस्यवाणी करहे, होर तिन्हा टाट रे कपड़े पैन्ह्णे।”

प्रकासना री गल्ला 17:14

“तिन्हा दस राजेया होर राक्सा छेलू साउगी युद्ध करणा। पर छेलूआ होर तेसरे साथीया स्यों हराई देणे, क्यूंकि छेलु राजेया रा राजा, होर प्रभुआ रा प्रभु आ। तेसरे साथी स्यों जिन्हों परमेसरे चुणिरा होर सादिरे होर जो भरोसे रे लायक ऐं।”

प्रकासना री गल्ला 19:11

फेरी मैं स्वर्गा जो खुलिरा देख्या, होर तेथी मेरे साम्हणें एक चिटा घोड़ा था। होर जो तेस पर एक सुआर था, तेस जो भरोसे रे लायक, होर सच्चा बोल्या जाहाँ था। से धार्मिकता किन्हें आपणे दुसमना रा न्याय करहा होर तिन्हारे बरखलाफ युद्ध करहा।

प्रकासना री गल्ला 19:16

होर तेसरे कपड़े होर सीधी जाँघा पर जो नांऊँ लिखिरा, से ये आ: “राजेया रा राजा होर प्रभुआ रा प्रभु।”

प्रकासना री गल्ला 2:13

हांऊँ ये ता जाणहां कि, तू जेस सैहरा मन्झ रैंहयां, जेथी सैताना रा गढ़ आ। तू मेरे कठे वफादार रैहया, होर तैं कधी मेरे पर विस्वास करणा नी छाडेया। तेबे भी नी जेबे अन्तिपास तुस्सा रे सैहरा मन्झ मारी दितिरा था, जेथी जे सैताना रा वास आ, क्यूंकि से भरोसे रे लायक सेऊआदार था जिन्हें मेरे बारे मन्झ प्रचार कितिरा था।

प्रकासना री गल्ला 3:14

फेरी तिन्हें मेरे किन्हें ये बोल्या कि, “लौदिकिया सैहरा री कलीसिया रे दूत जो ये संदेस लिख कि: हांऊँ ई आ जेस जो आमीन बोले, क्यूंकि हांऊँ भरोसे रे लायक आ, होर मैं परमेसरा रे बारे मन्झ गुआई देहां कि से सच्चा। हांऊँ ई आ जेसरे ज्रीए परमेसरे सारी सृस्टी री रचना किती। हांऊँ तुस्सा किन्हें ये बोल्हा कि:

प्रकासना री गल्ला 7:14

मैं तेस किन्हें बोल्या, “हे माल्का, हांऊँ नी जाणदा, पर तू आप्हुए जाणहां।” तिन्हें मेरे किन्हें बोल्या, “ये स्यों लोक ऐं, जो तेस महान क्लेसा रे टैमा मरी गईरे थे, होर इन्हें आपणे कपड़े छेलू रे खूना मन्झ धोई किन्हें चिटे कीतिरे, यानि तिन्हारे पाप टाही दितिरे।”