फिलिप्पियो 3:12 - मंडयाली नंऊँआं नियम

¹² ये मतलब नी आ कि, हांऊँ ये सारी गल्ला पाई लितिरी; या सिद्ध हुई चुकिरा। पर हांऊँ कोसिस साउगी आगे बढ़दा लगिरा कि मुंजो से मिली जाए, जेसरे कठे मसीह यीसू हांऊँ चुणी लईरा।

फिलिप्पियो 3:12 Iomraidhean Croise

मत्ती 5:48

इधी कठे कि तुस्से सिद्ध बणा, जेह्ड़ा तुस्सा रा स्वर्गीय बापू सिद्ध आ।

चुणिरे चेले रे काम 9:15

पर प्रभुए तेस किन्हें बोल्या कि, “तू चला जा; क्यूंकि साऊल ता अन्यजाति लोका होर राजे माहराजे, होर इस्राएल देसा रे साम्हणें मेरा नांऊँ रा प्रचार करणे रे कठे मेरा चुणिरा एक जरीआ।

1 कुरिन्थियो 13:12

होर ये ही गल आस्सा विस्वासिया साउगी भी, क्यूंकि आस्से तेस माह्णुं साहीं ऐं, जो आपणी सकल धुंधले सीसे मन्झ देखी करहा, क्यूंकि ऐबे तक भी आस्से सारी गल्ला जो साफ-साफ नी समझी सके। सारी गल्ला आस्से आऊणें वाले टैम मन्झ ही समझी सके, क्यूंकि आस्सा परमेसर आम्हणें-साम्हणें देखणा। ऐबे, मेरा ज्ञान पूरा नी आ। आऊणें वाले टैम मन्झ ही मां से सच्चे जाणना, जिहां परमेसर मुंजो जाणहां।

1 कुरिन्थियो 9:24

तुस्से पक्का जाणांहे कि, दौड़ा मन्झ ता बौह्त सारे लोक दौड़हा ऐं, पर इनाम एक ई लई जाहाँ। तुस्से एह्ड़े दौड़ा कि, इनाम जीती सको।

2 कुरिन्थियो 13:9

जेबे आस्से कमजोर हुंहाँ ऐं, होर तुस्से ताकतवर, ता आस्से बौह्त खुस हुंहाँ ऐं। होर ये प्रार्थना भी करहा ऐं कि, तुस्से विस्वासा मन्झ सिद्ध हुंदे जाओ।

2 कुरिन्थियो 7:1

हे लाडले भाईयो होर बैहणो जेबे कि परमेसरे आस्सा किन्हें ये वादा कितिरा कि आस्से तेसरे लोक हूंणे। ता आऊआ, आस्से आपणे सरीर होर आत्मा री सब गंदगी जो दूर करहे; होर परमेसरा रा सम्मान करदे हुए पूरी तरहा पवित्र जिन्दगी जीणे री भी कोसिस करदे रहुआ।

गलातियो 5:17

क्यूंकि आस्सा री पापा री इच्छा पवित्र आत्मा रे बरखलाफ ई, होर पवित्र आत्मा पापा री इच्छा रे बरखलाफ ई; क्यूंकि ये एक दूजे रे व्रोधी ऐं। इधी कठे आस्से तिन्हा खरे कामा जो हमेसा नी करी पांदे जो आस्से करणा चाहें।

इफिसियो 1:4

संसारा जो रचणे ले पैहले ई, परमेसरे आस्सा जो आपणे लोक हूंणे रे कठे चुणी लितेया क्यूंकि आस्से मसीह साउगी एक ऐं, ताकि आस्से तेसरी नजरा मन्झ पवित्र होर बेकसूर बणी सके।

इफिसियो 4:12

परमेसरे ये बरदान इधी कठे दितिरे, ताकि परमेसरा रे लोक तेसरी सेऊआ करणे रे लायक बणे, होर कलीसिया री बढ़ौतरी रे कठे काम करी सके, जो मसीह रा सरीर आ।

फिलिप्पियो 1:1

हांऊँ पौलुस, तिमिथियुस साउगी ये चिठ्ठी लिखी करहा, होर आस्से यीसू मसीह रे सेऊआदार ऐं। हांऊँ ये चिठ्ठी फिलिप्पी सैहरा मन्झ रैहणे वाले परमेसरा रे पवित्र लोका रे कठे होर कलीसिया रे अगुवे होर सेऊआदारा रे नांऊँ लिख्या करहा।

फिलिप्पियो 3:16

इधी कठे आस्से तेस सच्चाई रे मताबक चलणा जो परमेसरे आस्सो पैहले दसी दितिरी।

फिलिप्पियो 3:3

क्यूंकि हकिकता मन्झ परमेसरा रे लोक आस्से ई ऐं, जो पवित्र आत्मा रे ज्रीए अराधना करहा ऐं, होर मसीह यीसू साउगी गहरी संगती रखणे मन्झ बडयाई करहा ऐं, होर आस्से आपणे कितिरे भले कामा पर भरोसा नी रख्दे।

फिलिप्पियो 3:8

क्यूंकि हांऊँ आपणे मसीह जो जाणना चाहां, जो सभ चीजा ले कीमती आ, इधी कठे मैं इन्हा सारी चीजा जो बेकार समझा। मैं सभ चीजा जो छाडी दितेया, होर तिन्हा चीजा जो हांऊँ कूड़ा सम्झहा, ताकि हांऊँ यीसू मसीह जो जाणी सकूं।

1 थिस्सलुनकियो 5:15

येह ध्यान रखा कि कोई केसी किन्हें बुराई रे बदले बुराई नी करहे, पर हमेसा सब लोका किन्हें होर एक दूजे किन्हें भलाई करणे रा जतन करहा।

2 थिस्सलुनकियो 2:13

हे भाईयो होर बैहणो, आस्सो हमेसा तुस्सा रे कठे परमेसरा रा धन्यावाद करणा चहिए, प्रभु तुस्सा किन्हें प्यार करहा। क्यूंकि तिन्हें संसारा जो रचणे ले पैहले ही तुस्से चुणी लितिरे कि पवित्र आत्मा रे कामा रे ज्रीए तुस्सा रा उद्धार करहे; जो तुस्सा जो पवित्र बणा। होर यीसू मसीह रे बारे मन्झ सच्चाई री खबरा पर विस्वास करणे रे ज्रीए भी।

1 तिमिथियुस 5:10

होर दूजे लोक तिन्हारे बारे मन्झ ये बोलदे हो कि तेस्से हमेसा भले काम कितिरे, जिहां कि तेस्से आपणे बच्चे रा पालन पोसण खरे किन्हें कितिरा। सफर करणे वाले विस्वासी लोका जो आपणे घरा मन्झ सादी किन्हें तिन्हारी आदर-खातर कितिरा, तिन्हें परमेसरा रे पवित्र लोका री बड़ी नम्रता किन्हें सेऊआदारा साहीं तिन्हारी सेऊआ कितिरी, जो लोक दुखा मन्झ थे तिन्हारी मदद कितिरी। होर तिन्हें हर एक भले कामा जो मन ल्गाईरा किन्हें कितिरा।

1 तिमिथियुस 6:19

अगर स्यों एह्ड़ा करहे ता मानो स्यों आपणे रे कठे स्वर्गा मन्झ धन कठा करी करहे, जो कधी भी नास नी हूंणा। होर तिन्हा जो सच्ची जिन्दगी भी मिलणी यानि हमेसा री जिन्दगी।

इब्रानियो 12:14

सभी साउगी सांति किन्हें रैहणे, होर तेस पवित्र हूंणे रे कठे हर तरहा कोसिस करदे रहो, जेसरे बगैर कोई प्रभु जो कधी भी नी देखी सक्दा।

इब्रानियो 12:23

होर तुस्से परमेसरा रे पैहलौठे संताना री मण्डली मन्झ आई गईरे, जिन्हारे नांऊँ स्वर्गा मन्झ लिखे गईरे। ये धर्मी लोका री आत्मा ई जो हाल्ले स्वर्गा मन्झ ई होर तिन्हो सिद्ध कितिरा, होर तुस्से आपु परमेसरा वाले गईरे जो सभी गल्ला रा न्याय करणे वाल़ा।

याकूब 3:2

आस्से सभ बौह्त बारी भूल करी बैठ्हा ऐं; पर जो कोई बोलणे मन्झ कधी भी भूल नी करदा, सेई ता सिद्ध माह्णुंआं, होर तेस ही आपणे सारे कामा जो काबू मन्झ रखी सक्हा।

1 पतरस 5:10

होर ऐबे परमेसर जो अनुग्रहा ले भरिरा आ, होर जिन्हें यीसू मसीह साउगी जुड़े रैहणे री वजहा ले आस्सा जो स्वर्गा मन्झ आपणी अनंत महिमा मन्झ साझी हूंणे रे कठे सादीरा, तुस्सा रे थोह्ड़ी देरा तक दुःख उठाणे ले बाद तेस आपु ई तुस्से खरे बनाणे, ताकि तुस्सा मन्झ कोई गलती नी हो होर तेस तुस्सा रे दिल मजबूत करणे, होर तेस तुस्से सामर्थी बणाई देणे ताकि तुस्सा रा विस्वास कमजोर नी हो।

2 पतरस 3:18

एता रे बजाय आस्सा रे प्रभु, होर उद्धारकर्ता यीसू मसीह रे अनुग्रहा जो होर ज्यादा ले ज्यादा मैहसूस करदे रैहया। होर तेसरे बारे मन्झ जो तुस्से समझ रखे तेता मन्झ बढ़दे जाऊआ। तेसरी बढ़ाई ऐबे, होर जुग-जुग हुन्दी रहे। आमीन।