फिलिप्पियो 1:9 - मंडयाली नंऊँआं नियम

⁹ होर हांऊँ ये प्रार्थना करहा कि, तुस्सा मन्झ सच्चाई रा ज्ञान होर सही फैसला लेणे री समझ बढ़दी रहे, होर एक दूजे किन्हें तुस्सा रा प्यार भी ज्यादा ले ज्यादा बढ़दे जाए।

फिलिप्पियो 1:9 Iomraidhean Croise

1 कुरिन्थियो 14:20

हे भाईयो होर बैहणो, तुस्से इन्हा गल्ला जो समझणे मन्झ बच्चे साहीं नी बणा; तेबे बी बुराई रे कठे बच्चे साहीं मासूम बणा; पर इन्हा गल्ला जो समझणे मन्झ स्याणे बणां।

2 कुरिन्थियो 8:7

तुस्से सब गल्ला मन्झ दूजेया ले बढ़िया करहा ऐं। तुस्सा रा विस्वास पक्का आ, तुस्से परमेसरा रे बचना रा प्रचार करणे रे लायक ऐं, होर तुस्सा जो ज्यादा ज्ञान भी आ। तुस्से दूजेया री मदद करणे रे कठे यत्ना करहा ऐं, होर आस्सा किन्हें दूजेया ले ज्यादा प्यार करहा ऐं। ऐबे तुस्सा री कोसिस ये हो कि तिहां ही गरीब विस्वासी लोका जो ढब्बे देणे रे कामा मन्झ भी बढ़दे जाऊआ।

इफिसियो 5:17

इधी कठे नर्क्कले मत बणा, पर समझदारी किन्हें ये जाणने री कोसिस करा कि, प्रभु क्या चाहां कि तुस्से करो।

कुलुस्सियो 1:9

इधी कठे जेस ध्याड़े ले आस्से तुस्सा रे बारे मन्झ सुणिरा आ, आस्से हमेसा तुस्सा रे कठे प्रार्थना होर विनती किती। आस्से प्रार्थना करहे कि परमेसरा री आत्मा तुस्सा जो ज्ञान होर समझा दे कि तुस्से तेसरी इच्छा जो पूरी तरहा समझी जाओ।

कुलुस्सियो 3:10

होर ऐबे तुस्सा जो नंऊँआं स्वभाव मिली गईरा, होर ये नंऊँआं स्वभाव ज्यादा ले ज्यादा तेसरे रचणे वाले रे साहीं बणना, जेस वजहा ले तुस्से तेस जो होर भी ज्यादा समझी सके।

1 थिस्सलुनकियो 3:12

होर आस्से ये भी प्रार्थना करहे कि प्रभु एह्ड़ा करहे कि, जेह्ड़ा आस्से तुस्सा किन्हें प्यार रख्हा ऐं; तेह्ड़ा ई तुस्सा रा प्यार भी एक दूजे मन्झ, होर सभ माह्णुंआं साउगी बढ़े, होर तरक्की करदा जाए।

1 थिस्सलुनकियो 4:1

हे भाईयो होर बैहणो ऐबे आखरी, आस्से तुस्सा ले अर्ज करहा ऐं, होर तुस्सा जो प्रभु यीसू मन्झ सम्झाहें कि, जिहां तुस्से आस्सा ले ठीक व्यवहार रखणा, होर परमेसरा जो खुस करणा सिख्या, होर तुस्से ठीक व्यवहार रख्हा ऐ भी, तिहां ईं इन्हा गल्ला मन्झ होर बी ज्यादा बढ़दे जाऊआ।

2 थिस्सलुनकियो 1:3

हे भाईयो होर बैहणो, तुस्सा रे बारे मन्झ आस्सो हमेसा परमेसरा रा धन्यावाद करणा चहिए। आस्सा रे कठे ये करणा ठीक भी आ, क्यूंकि यीसू मसीह मन्झ तुस्सा रा विस्वास बौह्त बढ़ी गईरा, होर एक दूजे किन्हें तुस्सा रा प्यार होर भी ज्यादा बढ़दा जाहाँ।

फिलेमोन 1:6

हांऊँ प्रार्थना करहा कि विस्वासी लोका किन्हें तुस्सा री संगती होर भी डुघ्ही हुन्दी जाये, ये जाणदे हुए कि परमेसरे आस्सो कुण-कुण खरी चीजा दितिरी। एह्ड़ा हूंणे ले मसीहा री महिमा हो।

इब्रानियो 5:14

पर नाजा रा खाणा विस्वासा मन्झ स्याणेया रे कठे आ, जिन्हें आपणे अनुभवा ले भले बुरे मन्झ फर्क करणा सीखी लईरा।

1 पतरस 1:22

सच्चा जो मनणे री वजहा ले ही तुस्से आपणे पापा ले सुद्ध किती गईरे। इधी कठे ऐबे आपणे विस्वासी भाई बैहणा किन्हें गहरा होर पुरे दिला किन्हें प्यार करदे रैहया।

2 पतरस 3:18

एता रे बजाय आस्सा रे प्रभु, होर उद्धारकर्ता यीसू मसीह रे अनुग्रहा जो होर ज्यादा ले ज्यादा मैहसूस करदे रैहया। होर तेसरे बारे मन्झ जो तुस्से समझ रखे तेता मन्झ बढ़दे जाऊआ। तेसरी बढ़ाई ऐबे, होर जुग-जुग हुन्दी रहे। आमीन।