इफिसियो 1:1 - मंडयाली नंऊँआं नियम

¹ हांऊँ पौलुस, एस्सा चिठ्ठी जो लिखी करहा। होर हांऊँ परमेसरा री इच्छा ले यीसू मसीह रा चुणिरा चेला हूंणे रे कठे चुणिरा। हांऊँ ये चिठ्ठी इफिसुस सैहरा मन्झ रैहणे वाले तुस्से, जो परमेसरा रे पवित्र लोका ऐं, तुस्सा रे कठे लिखी करहा।

इफिसियो 1:1 Iomraidhean Croise

लूका 16:10

जो थोह्ड़े ले थोह्ड़ी गल्ला मन्झ ईमानदार आ, से बौह्ता गल्ला मन्झ भी ईमानदार आ, होर जो थोह्ड़े ले थोह्ड़ी गल्ला मन्झ बईमान आ, से बौह्ता गल्ला मन्झ भी बईमान आ।

चुणिरे चेले रे काम 16:15

आपणे पुरे टब्बरा समेत बपतिस्मा लैणे ले बाद तिन्हें आस्सा किन्हें ये बोल्दे हुए अर्ज किती, “अगर तुस्से मुंजो प्रभु री विस्वासी मन्नहां ऐं ता आऊआ होर मेरे घरा रुका,” होर से आस्सा जो मन्नाई किन्हें लई गई।

चुणिरे चेले रे काम 18:19

फेरी तिन्हें इफिसुस सैहरा मन्झ पुज्ही किन्हें तिन्हें प्रिसकिल्ला होर अक्विला जो तेथी छाडी दितेया, होर आपु ई यहूदी सभा मन्झ जाई किन्हें यहूदी लोका किन्हें बैहस करदा लग्या।

चुणिरे चेले रे काम 18:21

पर ये बोली किन्हें तिन्हा ले विदा हुएया कि, “अगर परमेसरे चाहंगा ता मां तुस्सा वाले दबारा आऊंणा।” तेबे से इफिसुस सैहरा ले जहाजा पर चढ़ी किन्हें चली गया।

चुणिरे चेले रे काम 9:13

हनन्याहे जवाब दितेया, “प्रभु, मैं एस आदमी रे बारे मन्झ बौह्त लोका ले सुणिरा कि, इन्हें यरुस्लेम सैहरा मन्झ तेरे परमेसरा रे पवित्र लोका साउगी बडी-बडी बुराईया कितिरी।

रोमियो 1:1

हांऊँ पौलुस ये चिट्ठी लिख्या करहा। हांऊँ यीसू मसीहा रा सेऊआदार आ। परमेसरे एक चुणिरा चेले रे रूपा मन्झ मेरा चुणाव कितेया, होर परमेसरे हांऊँ खुसी री खबर सुनाणे रे कठे नियुक्त कितिरा।

रोमियो 1:7

ये चिठ्ठी रोम सैहरा रे लोका रे कठे ई, जिन्हा किन्हें परमेसर प्यार करहा होर आपणे पवित्र लोक हूंणे रे कठे चुणिरे। आस्से प्रार्थना करहे कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे।

रोमियो 8:1

इधी कठे ऐबे जो मसीह यीसू मन्झ विस्वास करहे, तिन्हा पर सजा रा हुक्म नी आ।

1 कुरिन्थियो 4:12

होर आस्से आपणे हाथा ले मैहनत करहा ऐं। जेबे लोक आस्सा जो बुरा बोल्हा ऐं, ता आस्से तिन्हो आसरीवाद देहां ऐं; जेबे लोक आस्सो स्ताहें, ता आस्से सबरा किन्हें सैहन करहा ऐं।

1 कुरिन्थियो 4:17

इधी कठे मैं तिमिथियुस तुस्सा वाले भेजिरा। हांऊँ तेजो एक मह्ठे साहीं प्यार करहा, होर से प्रभु रा भरोसे लायक सेऊआदार आ तेस तुस्सा जो दसणा कि हांऊँ क्या करहा होर कियां मसीह यीसू रा चेला बणी किन्हें जियां, ठीक स्यों गल्ला जो हांऊँ हर जगहा री सभ कलीसिया रे लोका जो सखा।

2 कुरिन्थियो 1:1

हांऊँ पौलुसा ये चिठ्ठी तुस्सा रे कठे लिख्दा लगिरा। हांऊँ परमेसरा री इच्छा ले मसीह यीसू रा चुणिरा चेला आ। होर मसीह मन्झ आस्सा रा भाई तिमिथियुस मेरे साउगी आ। हांऊँ ये चिठ्ठी कुरिन्थुस सैहरा रे परमेसरा री कलीसिया रे लोका रे कठे होर सारे अखाया ईलाके रे सब परमेसरा रे पवित्र लोका रे कठे लिखी करहा।

गलातियो 1:1

हांऊँ पौलुस, एस्सा चिठ्ठी जो लिख्या करहा। होर हांऊँ चुणिरा चेला आ। मुंजो कुछ लोके या केसी माह्णुंऐ चुणिरा चेला हूंणे रे कठे नियुक्त नी कितेया। पर यीसू मसीह रे ज्रीए होर बापू परमेसरा रे ज्रीए हांऊँ चुणिरा चेला बणेया। परमेसरे यीसू जो मरिरे मन्झ ले जिउंदा कितेया। हांऊँ एस्सा चिठ्ठी जो गलातिया ईलाके री कलीसिया रे विस्वासी भाई बैहणा जो लिख्या करहा। होर जो विस्वासी भाई बैहण ऐबे मेरे साउगी एथी ऐं, स्यों तुस्सा जो नमस्कार बोल्हा ऐं।

गलातियो 3:26

होर जेबे तुस्से मसीह रे नांऊँआ रा बपतिस्मा लितिरा था, तुस्से मसीह रे स्वभावा जो इंहां पैहनी लितेया, जिहां कोई नंऊँऐं कपड़े पैहना। इधी कठे जेबे तुस्से मसीह यीसू पर विस्वास कितेया, ता तुस्से सब परमेसरा रे बच्चे बणी गईरे।

गलातियो 3:28

इधी कठे मसीह मन्झ ऐबे ना कोई यहूदी लोक आ, होर ना कोई गैर-यहूदी लोक ऐं; ना कोई गुलाम आ, ना कोई अजाद आ; ना कोई मर्ध आ, ना कोई ज्नाने ई; क्यूंकि तुस्से सभ यीसू मसीह मन्झ एक ऐं।

गलातियो 3:9

इधी कठे जो लोक परमेसरा पर विस्वास करहा ऐं, परमेसर तिन्हो भी अब्राहमा साहीं आसीस देआ।

इफिसियो 1:15

परमेसरे जो कुछ कितिरा तेता री वजहा ले, जेबे मैं ये सुणेया कि तुस्से मसीह यीसू पर विस्वासा करहे, होर तुस्से सभ परमेसरा रे पवित्र लोका किन्हें प्यार करहे,

इफिसियो 2:10

क्यूंकि आस्से परमेसरा रे हाथा री सभी ले बढ़िया रचना ई; होर मसीह यीसू साउगी एक हूंणे री वजहा ले आस्से भले काम करणे रे कठे बणाये गईरे, जिन्हा जो परमेसरे पैहले ले आस्सा रे करणे रे कठे त्यार कितिरा।

इफिसियो 2:13

एक टैम था जेबे तुस्से परमेसरा ले दूर थे, पर ऐबे तुस्से यीसू मसीह साउगी एक हूंणे री वजहा ले, मसीह रे बहाईरे खूना रे ज्रीए परमेसर तुस्सा जो आपणे वाले लेई किन्हें आईरा।

इफिसियो 2:6

मसीह यीसू साउगी एक हूंणे री वजहा ले परमेसरे आस्से मरिरे मन्झ ले जिउंदे किते, होर स्वर्गीय स्थाना मन्झ तेस साउगी बैठाया।

इफिसियो 6:21

हांऊँ चाहां कि तुस्से ये जाणो कि हांऊँ केह्ड़ा होर क्या करदा लगिरा, होर इधी कठे मैं विस्वासी भाई तुखिकुस तुस्सा वाले भेजी करहा। से मेरा लाडला दोस्त आ, होर भरोसे रे लायक प्रभु रा सेऊआदार आ। तेस तुस्सा जो दसणा कि, हांऊँ केह्ड़ा, होर तेस तुस्सा जो हिम्मत देणी।

कुलुस्सियो 1:2

हांऊँ ये चिठ्ठी कुलुस्स सैहरा रे मन्झ रैहणे वाले मसीह रे पवित्र होर सच्चे विस्वासी भाई बैहणा रे कठे लिखी करहा। हांऊँ प्रार्थना करहा कि आस्सा रा बापू परमेसर तुस्सा जो अनुग्रह होर सांति देंदा रहे।

प्रकासना री गल्ला 17:14

“तिन्हा दस राजेया होर राक्सा छेलू साउगी युद्ध करणा। पर छेलूआ होर तेसरे साथीया स्यों हराई देणे, क्यूंकि छेलु राजेया रा राजा, होर प्रभुआ रा प्रभु आ। तेसरे साथी स्यों जिन्हों परमेसरे चुणिरा होर सादिरे होर जो भरोसे रे लायक ऐं।”

प्रकासना री गल्ला 2:10

जो दुःख तुध सैहणे, तिन्हा ले मत डर। सैताना तुस्सा मन्झा ले लोका जो पकड़ाई किन्हें जेल्हा मन्झ पाणे, ताकि तुस्से परखे जाओ; होर तुस्सा जो दस ध्याड़े तक क्लेस उठाणा पऊणा। प्राण देणे तक मेरे पर विस्वास करदा रैह, तेबे मां तुजो जीता रे इनाम मन्झ अनंत जिन्दगी देणी, जो ताजा साहीं ई।

प्रकासना री गल्ला 2:13

हांऊँ ये ता जाणहां कि, तू जेस सैहरा मन्झ रैंहयां, जेथी सैताना रा गढ़ आ। तू मेरे कठे वफादार रैहया, होर तैं कधी मेरे पर विस्वास करणा नी छाडेया। तेबे भी नी जेबे अन्तिपास तुस्सा रे सैहरा मन्झ मारी दितिरा था, जेथी जे सैताना रा वास आ, क्यूंकि से भरोसे रे लायक सेऊआदार था जिन्हें मेरे बारे मन्झ प्रचार कितिरा था।