2 तिमिथियुस 4:8 - मंडयाली नंऊँआं नियम

⁸ प्रभुआ मुंजो से ताज देणा जो धार्मिकता रा ताज आ। से जो धर्मा किन्हें न्याय करहा, जेस ध्याड़े तेस दबारा वापस आऊंणा मुंजो ये इनाम देणा। तेस सिर्फ मुंजो ई नी, बल्की तिन्हा सभी जो भी देणा, जो सच्चे चाहे कि से दबारा वापस आई जाये।

2 तिमिथियुस 4:8 Iomraidhean Croise

मत्ती 24:36

“तेस ध्याड़े होर तेस घड़ी रे बारे मन्झ कोई नी जाणदा, ना स्वर्गा रे स्वर्गदूत, होर ना मह्ठा, पर सिर्फ बापू।

मत्ती 7:22

न्याय रे ध्याड़े बौह्त लोका मेरे किन्हें बोलणा, ‘हे प्रभु, हे प्रभु, क्या आस्से तेरे हका ले भविस्यवाणी नी किती? होर तेरे हका ले दुस्टात्मा नी काढी? होर तेरे हका ले बौह्त बडे चमत्कारा रे काम नी किते?’

लूका 10:12

हांऊँ तुस्सा किन्हें सच्च-सच्च बोल्हा कि, तेस ध्याड़े तेस गांऊँआं रे लोका री हालत सदोम सैहरा रे लोका री हालत ज्यादा खराब हूणीं।”

रोमियो 2:5

पर एह्ड़ा करणे रे बजाय, तू जिद्दी हुई किन्हें पाप करणा नी छाडदा, इधी कठे परमेसरा तुजो सख्त सजा देणी, होर जेस ध्याड़े परमेसरा गुस्से हूंणां तेस ध्याड़े परमेसरा रा न्याय धार्मिकता साउगी जाहिर हूंणां।

रोमियो 8:23

होर सिर्फ परमेसरा री रचिरी चीजे ई नी पर आस्से भी आपणे आपा मन्झ करलाहें हालांकि आस्से मन्झ पवित्र आत्मा वास करहा, जो आऊणें वाली महिमा रा पैहले ले सुआद चखणे रे रूपा मन्झ आस्सा साउगी आ। पर ऐबे आस्से इंतजार करहा ऐं कि परमेसरा आस्से आपणे सच्चे बच्चे बनाणे, होर ये तेबे हूंणा जेबे तेस आस्सा रे सरीरा जो छुटकारा देणा।

1 कुरिन्थियो 2:9

पर ये ही गल जो पवित्र सास्त्रा मन्झ लिखिरी; “जो कधी हाखिये ले नी सुझ्या, होर जो कधी काना ले नी सुणेया, होर जो गल माह्णुंआं रे दिला मन्झ नी आई, एह्ड़ी गल्ला परमेसरे आपणे प्यार रखणे वाले रे कठे त्यार कितरी।”

1 कुरिन्थियो 3:13

पर न्याय रे ध्याड़े आगिया हर केसी रे काम जाहिर करणे कि केसरे काम खरे थे होर केसरे काम बुरे थे; होर आगिया दसणा कि तेस माह्णुं रे कामा री कोई कीमत हाई की नी।

1 कुरिन्थियो 9:25

जो लोक दौड़ मन्झ दौड़ना चाहें स्यों पैहले एता री त्यारी करहे, होर हर तरहा रा सबर करहा ऐं, स्यों एह्ड़ा जीतणे रे कठे होर इज्जत पाणे रे कठे करहे। तिन्हारी इज्जत पातरा रे बणिरे मुक्टा किन्हें करी जाहीं, जो जल्दी सुक्की जाहें। पर आस्से जो यीसू मसीह मन्झ विस्वास करहे, आस्सा री भी इज्जत हूणीं, होर आस्सो एह्ड़ी आसीस मिलणी; जो जुग-जुग रे कठे बणी रैहणी। होर इधी कठे आस्सो होर भी सबर रखणा चहिए।

2 कुरिन्थियो 5:2

एस सरीरा मन्झ रैहन्दे हुए ता आस्से रोहां धोहां ऐं, होर बड़ी इच्छा रख्हा ऐं; कि आस्सा आपणे स्वर्गीय सरीर पैन्ह्णा।

फिलिप्पियो 3:11

ताकि हांऊँ केसी भी तरीके ले मरिरे मन्झा ले जी उठी सकूं।

कुलुस्सियो 1:5

तुस्सा रा ये प्यार होर विस्वास तेस आसा री वजहा ले आ, जो तुस्सा रे कठे स्वर्गा मन्झ रखिरा। तुस्से एस आसा रे बारे मन्झ पैहली बारी तेबे सुणेया जेबे तुस्से खुसी री खबरा री सच्चाई पर विस्वास कितिरा था।

1 थिस्सलुनकियो 1:10

होर तेसरे मह्ठे यीसू रा स्वर्गा ले वापस आऊणें रा इंतजार करदे रैहया, जेस जो परमेसरे मरिरे मन्झा ले जिउंदा कितेया, होर जो आस्सा जो आऊणें वाले न्याय रे डरा ले बचाहां।

1 थिस्सलुनकियो 5:4

पर हे भाईयो होर बैहणो, तुस्से बुराई रे नह्यारे मन्झ नी ऐं कि, प्रभु यीसू रे दबारा वापस आऊणें रा ध्याड़ा तुस्सा पर चोरा साहीं अचानक आई जाए।

2 थिस्सलुनकियो 2:8

तेता ले बाद तेस दुस्ट आदमिया जाहिर हूंणां, पर बादा मन्झ जेबे प्रभु यीसू मसीह आऊंणा, ता से तेस आपणे मुंहा री फूका किन्हें मुकाई देणा, होर आपणे आऊणें रे तेजा किन्हें भस्म करी देणा।

1 तिमिथियुस 6:19

अगर स्यों एह्ड़ा करहे ता मानो स्यों आपणे रे कठे स्वर्गा मन्झ धन कठा करी करहे, जो कधी भी नास नी हूंणा। होर तिन्हा जो सच्ची जिन्दगी भी मिलणी यानि हमेसा री जिन्दगी।

2 तिमिथियुस 1:10

होर ऐबे आस्सा रा उद्धारकर्ता मसीह यीसू आई गईरा होर आस्सा पर आपणा अनुग्रह दसिरा। तिन्हें मौता री सामर्था जो हराई दितेया, होर खुसी री खबरा रे ज्रीए ये जाहिर कितेया कि कधी नी खत्म हूंणे वाली जिन्दगी तक पूजणे रे एक रस्ता।

2 तिमिथियुस 1:12

होर एस वजहा ले ही हांऊँ एथी जेल्हा मन्झ दुःख सहन करी करहा, पर सर्मिन्दा नी हुन्दा, क्यूंकि हांऊँ मसीह जो जाणहां, जेस पर मैं भरोसा रखीरा कि, मसीह आपणे वापस आऊणें रे ध्याड़े तक तेस चीजा री रखवाली करी सक्हा, जो तिन्हें मुंजो सौंपीरी।

2 तिमिथियुस 1:18

न्याय रे ध्याड़े प्रभु उनेसिफुरुस पर आपणी दया दसे! होर तुस्से आप्हुए जाणांहे कि इफिसुस सैहरा मन्झ रैहन्दे हुए तिन्हें मेरी कितनी मदद कितिरी।

2 तिमिथियुस 2:5

होर एस तरहा जेबे अखाड़े मन्झ लड़ने वाल़ा पैहल्वान अगर बिधिया रे मताबक नी लड़े ता से इनाम नी पांदा।

2 तिमिथियुस 4:1

जेबे मसीह यीसू राजेया साहीं राज करदे आऊंणा, तेबे तेस जिउंदेया रा होर मरिरे दुहीं रा न्याय करणा। होर इधी कठे परमेसर होर मसीह जो गुआह मनी किन्हें हांऊँ तुजो आदेस देआ,

तितुस 2:13

आस्से एह्ड़ा ही करदे रहे जेबे कि आस्से आपणे म्हान परमेसर होर उद्धारकर्ता यीसू मसीह जो आपणी महिमा साउगी एस संसारा मन्झ वापस आऊणें री आस करदे लगिरे।

इब्रानियो 12:11

जेस टैम स्यों आस्सो सुधारे, तेस टैम से सुधार आस्सो खरा नी लगदा, बल्की से बुरा लगहा, तेबे भी जो सुधारा जो सैहन्दे-सैहन्दे पक्के हुई गईरे, ता बादा मन्झ आस्सो सांति होर धार्मिकता रा इनाम मिल्हा।

इब्रानियो 9:28

तिहां ईं मसीह भी कई लोका रे पाप माफ करणे रे कठे एक ई बारी बलिदान हुआ। पर जेबे तेस दबारा एस धरती पर आऊंणा, ता तेस पाप माफ करणे रे कठे नी, पर तिन्हा लोका जो उद्धारा करणे रे कठे आऊंणा, जो तेस जो न्हायल्दे लगिरे।

याकूब 1:12

धन्य आ से आदमी, जो परखणी मन्झ मजबूत रैंहयां; क्यूंकि तेस तेस्सा परखणी जो पार करी किन्हें अनंत जिन्दगी रा से मुकट पाणा, जेसरा देणे रा वादा परमेसरे तिन्हा कठे कितिरा, जेह्ड़े परमेसरा किन्हें प्यार करहे।

1 पतरस 1:4

आस्से तेस विरासता जो पाणे रे कठे देखी करहे, जो परमेसर आपणे लोका रे सम्भाली किन्हें रखिरी। परमेसरे युयां आसिसा स्वर्गा मन्झ रखिरी, जेथी स्यों ना सड़दी ना खराब हुन्दी होर ना ही लुप्त हुन्दी।

1 पतरस 5:4

होर जेबे प्रधान रखवाला यानि यीसू मसीह दबारा वापस आऊंणा, ता तुस्सा जो एक बांका ताज देणा, जेसरी तेज महिमा कधी भी खत्म नी हूणीं।

प्रकासना री गल्ला 1:7

सुणा, से बादला साउगी आऊणें वाल़ा आ। होर हर एकी माह्णुं से देखणा, बल्की जिन्हें जे से क्रूसा प्रयाल्हे भाले किन्हें कोती किन्हें मारी दितिरा था, तिन्हा भी से वापस आऊंदे हुए देखणा। होर धरती रे सारी जातिया रे लोका से देखणा, ता तिन्हा छाती पिटी-पिटी किन्हें रोणा। हां ये गल्ला पक्का हूणीं! आमीन।

प्रकासना री गल्ला 19:11

फेरी मैं स्वर्गा जो खुलिरा देख्या, होर तेथी मेरे साम्हणें एक चिटा घोड़ा था। होर जो तेस पर एक सुआर था, तेस जो भरोसे रे लायक, होर सच्चा बोल्या जाहाँ था। से धार्मिकता किन्हें आपणे दुसमना रा न्याय करहा होर तिन्हारे बरखलाफ युद्ध करहा।

प्रकासना री गल्ला 2:10

जो दुःख तुध सैहणे, तिन्हा ले मत डर। सैताना तुस्सा मन्झा ले लोका जो पकड़ाई किन्हें जेल्हा मन्झ पाणे, ताकि तुस्से परखे जाओ; होर तुस्सा जो दस ध्याड़े तक क्लेस उठाणा पऊणा। प्राण देणे तक मेरे पर विस्वास करदा रैह, तेबे मां तुजो जीता रे इनाम मन्झ अनंत जिन्दगी देणी, जो ताजा साहीं ई।

प्रकासना री गल्ला 22:20

यीसू ही इन्हा गल्ला री गुआही देहां कि यूयाँ ऐं गल्ला सच्ची। से ये बोल्हा कि, “हां, हांऊँ जल्दी आऊणें वाल़ा आ!” तेबे मैं यहून्ने जबाब दितेया, आमीन, हे प्रभु यीसू आ!

प्रकासना री गल्ला 4:4

होर तेस्सा राजगद्दी रे चारो वखा जो दूजी चौबी राजगद्दिया थी; होर इन्हा राजगद्दिया पर चौबी अगुवे चिटे कपड़े पैन्ही किन्हें बैठिरे थे। होर तिन्हारे मूंडा पर सोने रा ताज था।