2 तिमिथियुस 3:15 - मंडयाली नंऊँआं नियम

¹⁵ होर जेबे तू एक बच्चा ई था ता तैं पवित्र सास्त्रा जो सिख्या, जो तुस्सा री एस गल्ला जो समझणे मन्झ मदद करहा कि, जेबे तुस्से मसीह यीसू पर विस्वास करहे, ता परमेसर तुस्सा रा उद्धार करहा।

2 तिमिथियुस 3:15 Iomraidhean Croise

मत्ती 22:29

यीसूए तिन्हा जो जवाब दितेया कि, “तुस्से पवित्र सास्त्र होर परमेसरा री सामर्थ नी जाणदे, होर ये ही तुस्सा री गलती ई।

लूका 1:15

क्यूंकि तेस प्रभु रे साम्हणें महान हूंणां; होर तेस नसे वाल़ा रस होर सराब कधी नी पीणा; होर तेस आपणी माऊआ रे गर्भा ले ई पवित्र आत्मा ले परिपूर्ण हूंणां।

लूका 2:40

होर से बच्चा यीसू बढ़दा, होर ताकतवर हुन्दा, होर बुद्धि किन्हें परिपूर्ण हुन्दा गया; होर परमेसरा रा अनुग्रह तेस पर था।

लूका 24:27

तेबे यीसूए मूसा री व्यवस्था ले होर सभ नबिया ले सुर्हू करी किन्हें सारे पवित्र सास्त्रा मन्झा ले, आपणे बारे मन्झ कितिरी गला रा मतलब तिन्हा जो समझाया।

लूका 24:32

तिन्हें आपु मन्झ बोल्या, “जेबे से पैंडे मन्झ आस्सा किन्हें गल्ला करहा था, होर पवित्र सास्त्रा रा मतलब आस्सा जो समझाहां था, ता क्या आस्सा रा मन आसा किन्हें नी भरेया था?”

लूका 24:45

तेबे यीसूए पवित्र सास्त्रा जो समझणे रे कठे तिन्हारी समझ खोल्ही दिती।

यहून्ना 5:47

पर मुसे जेह्ड़ा मेरे बारे लिखिरा अगर तुस्से एस गल्ला रा विस्वास नी करदे, ता मेरी गल्ला रा विस्वास तुस्सा किहाँ करणा?”

चुणिरे चेले रे काम 10:43

तेसरे सभ नबी गुआही देहां ऐं कि जेस केसी यीसू पर विस्वास करणा, तेस्जो तेसरे नांऊँआं रे ज्रीए पापा री माफी मिलणी।

चुणिरे चेले रे काम 13:29

“होर जेबे तिन्हें से सब कुछ पूरा करी लितेया जो तेसरे बारे मन्झ पवित्र सास्त्रा मन्झ लिखिरी गल्ला पूरी हुई तेबे तिन्हें से क्रूसा प्रयाल्हे चढ़ाया, होर फेरी क्रूसा ले तुआरी किन्हें डुआर मन्झ रखी दितेया।

चुणिरे चेले रे काम 16:1

फेरी से दिरबे होर लुस्त्रा सैहरा मन्झ भी गये, होर तेथी तिमिथियुस नांऊँआं रा एक चेला था, जो केसी यहूदिया ईलाके री विस्वासणी रा मह्ठा था, पर तेसरा बापू यूनान देसा रा था।

चुणिरे चेले रे काम 17:2

होर पौलुस आपणे रूआजा रे मताबक तिन्हा वाले चली गया, होर तीन अरामा रे ध्याड़े से पवित्र सास्त्रा ले तिन्हा किन्हें चर्चा करदा रैंहयां।

चुणिरे चेले रे काम 26:24

पौलुस जेबे आपणे बचाऊआ मन्झ इन्हा गल्ला जो बोल्या करहा था कि फेस्तुस हाकमे चिंगी किन्हें बोल्या, “हे पौलुस तेरा दमाग खराब हुई गईरा! तेरी ज्यादा पढ़ाई ऐं तू पागल बणाई दितिरा।”

रोमियो 1:2

प्रभु यीसू रे एस दुनिया मन्झ आऊणें ले बौह्त पैहले ई परमेसरे पवित्र सास्त्रा मन्झ आपणे नबिया रे ज्रीए एस खुसी री खबरा जो जाहिर करणे रा वादा कितिरा था।

रोमियो 16:26

होर जिहां सुर्हू ले परमेसरे हुक्म दितेया होर नबिया रे ज्रीए लिखी गया, ऐबे ये ल्कोईरी गल्ल सब जाति रे लोका मन्झ प्रचार किती गई, ताकि स्यों भी परमेसरा पर विस्वास करणे वाले, होर तेसरे हुक्म मनणे वाले बणी जाऐ।

रोमियो 2:27

होर जो माह्णुं बगैर खतने कितरे ही मूसा री व्यवस्था जो मना, तेस तू दोसी ठैहराणा, क्यूंकि तेरे वाले व्यवस्था ई होर खतना भी हुईरा पर फेरी भी तू व्यवस्था जो नी मनदा।

1 कुरिन्थियो 1:21

क्यूंकि जेबे परमेसरे आपणे ज्ञाना रे मताबक देखेया कि संसारा रे लोक आपणे ज्ञाना रे ज्रीए तेस जो कधी नी जाणी सकदे, ता परमेसरा जो ये ठीक लग्या कि आस्सा री खुसी री खबरा जो प्रचार करणे रे ज्रीए विस्वास करणे वाले लोका रा उद्धार करहे, भले ही कुछ लोका जो ये गल नर्क्कली लगाई।

इफिसियो 6:4

होर हे बच्चे वालेयो, आपणे बच्चेया जो जलेरा मत, पर प्रभु ले मिलिरे उपदेस होर बिधिया जो स्खान्दे हुए, तिन्हा जो पाला-पोसा।

1 तिमिथियुस 4:13

जेबे तक हांऊँ नी आऊँ, तेबे तक पवित्र सास्त्रा जो विस्वासी लोका जो जोरा किन्हें पढ़ी किन्हें तिन्हो सुनाणे रे कठे टैम काढ, तिन्हो हिम्मत दे होर पवित्र सास्त्रा रे मतलबा जो समझाणे मन्झ लगी रैह।

2 तिमिथियुस 1:1

हाऊँ पौलुसा एस्सा चिठ्ठी जो लिखी करहा। परमेसरे चाहां कि हाऊँ यीसू मसीह रा चुणिरा चेला बणुं। तिन्हें हांऊँ इधी कठे चुणेया कि हांऊँ ये प्रचार करी सकूं कि मसीह साउगी एक हूंणे री वजहा ले परमेसरे आस्सो अनंत जिन्दगी देणे रा वादा कितिरा।

2 तिमिथियुस 1:5

तेरी माऊ युनिके रे अंदर जो भरपूर विस्वास था से मुंजो याद आ, होर तेरी नानी लोईस रा भी तेह्ड़ा विस्वास था। होर मुंजो भरोसा आ कि सेई भरपूर विस्वास तेरे मन्झ भी हाया।

2 पतरस 3:16

से आपणी सभ चिठ्ठीया मन्झ जो तिन्हें सारे विस्वासी लोका रे कठे लिखी, तिन्हें स्यों ही गल्ला लिखी जो तुस्सा रे कठे भी लिखीरी। पर तेसरी चिठिया मन्झ कुछ गल्ला जो समझणा कठण आ। जो लोक कम पढ़ी लिखिरे होर आपणे विस्वासा मन्झ कमजोर ऐं, स्यों इन्हा कठण गल्ला रे मतलबा जो तोड़े मरोड़े, जिहां स्यों पवित्र सास्त्रा रे बाकि बचना रा मतलब भी तोड़ मरोड़ करहा ऐं, एह्ड़ा करी किन्हें स्यों आपु ही परमेसरा रे ज्रीए नास हूंणे री वजहा बणहां ऐं।

प्रकासना री गल्ला 19:10

होर जेबे मैं ये सुणेया ता जो मेरे किन्हें ये गल्ला करी करहा था, हांऊँ तेसरे पैरा पर पई किन्हें तेसरी अराधना करणे ही वाल़ा था। पर तिन्हें मेरे किन्हें बोल्या, “देख, एह्ड़ा मत कर, सिर्फ परमेसरा री ही अराधना कर। क्यूंकि हांऊँ तुस्सा साहीं होर तुस्सा रे सभ विस्वासी भाई बैहणा साहीं परमेसरा रा एक सेऊआदार आ। जिन्हारी एक ई गुआही कि यीसू ही तिन्हारा प्रभु आ।” यीसूए जो ये सच्च जाहिर कितिरा से ही लोका जो परमेसरा री खबरा री भविस्यवाणी करणे री सामर्थ देहां।