2 तिमिथियुस 3:12 - मंडयाली नंऊँआं नियम

¹² पर ये गल्ला सच्च ई कि जितने लोक मसीह यीसू साउगी एक हुई किन्हें भक्ति री जिन्दगी जीणा चाहें, स्यों सभ सताए जाणे।

2 तिमिथियुस 3:12 Iomraidhean Croise

मत्ती 16:24

तेबे यीसूए आपणे चेले किन्हें बोल्या, “जो कोई मेरा चेला बणना चाहां, से आपणी इच्छा पूरा करणे रे बजाए दुःखा रा क्रूस चकी किन्हें मेरा चेला बणे।

मत्ती 23:34

इधी कठे मां तुस्सा वाले नबी होर बुद्धिमान होर व्यवस्था स्खाणे वाल़े भेजणे। होर तुस्सा तिन्हा मन्झा ले कुछ लोक मारी देणे, होर दूजे लोक क्रूसा प्रयाल्हे चढ़ाणें। होर कुछ लोका जो आपणी यहूदी सभा मन्झ कोड़े मारणे, होर एक गांऊँआं ले दूजे गांऊँआं तक तिन्हारा पीछा करदे रैंह्णां।

मरकुस 10:30

तिन्हा जो एस युगा मन्झ घर-बार होर भाई-बैहण होर माऊ, बाल-बच्चे होर जमीन, सौ गुणा वापस मिलणे। हलांकि मेरे चेले हूंणे री वजहा ले एस संसारा मन्झ रैहन्दे हुए स्यों स्ताए जाणे, आऊणें वाले युगा मन्झ तिन्हा जो अनंत जिन्दगी मिलणी।

यहून्ना 16:2

तिन्हा तुस्से यहूदी सभा मन्झा ले काढी देणे। बल्कि एह्ड़ा टैम आहूँआं कि, जो कोई तुस्सा जो मारघा तेस ये समझणा कि से परमेसरा री सेऊआ करेया करहा।

यहून्ना 16:33

मैं ये गल्ला तुस्सा किन्हें इधी कठे बोली, ताकि तुस्सा जो मेरे मन्झ सांति मिलो; संसारा मन्झ तुस्सा जो कलेस हुंहाँ, पर हिम्मत करहा! मैं संसार जीती लईरा।”

यहून्ना 17:14

मैं तेरा बचन तिन्हा वाले पुजाई दितिरा, होर संसारा रे लोके तिन्हा किन्हें नफरत किती, क्यूंकि जिहां-हांऊँ संसारा रा नी आ, तिहां ईं स्यों भी संसारा रे नी ऐं।

चुणिरे चेले रे काम 14:22

होर हर गांऊँआं रे चेले रे मना जो मजबूत करदे रैहे होर ये उपदेस देंदे रैहे कि, “आस्सा जो बडे दुःख सही किन्हें परमेसरा रे राजा मन्झ दाखल करणा पऊणा।”

1 कुरिन्थियो 15:19

अगर आस्से सिर्फ एथी री जिन्दगी रे कठे मसीहा पर आस रख्हा ऐं, ता एस संसारा रे सभ माह्णुंआं ले बढ़ी किन्हें आस्सा री हालत दुःखदाई।

2 कुरिन्थियो 1:12

आस्से आपणी अंतरात्मा री सच्चाई पर बडयाई करहा ऐं। संसारा मन्झ होर खास करी किन्हें तुस्सा रे बीचा मन्झ आस्सा रा जीवन पवित्र होर सच्चा था, जो परमेसरा री तरफा ले आस्सा जो मिलिरा था। आस्से माह्णुंआं रे ज्ञाना पर भरोसा नी रखेया, बल्कि परमेसरा रे अनुग्रहा पर भरोसा रखेया।

2 कुरिन्थियो 4:9

सताये ता जाहें; पर छाडी नी जान्दे; गिराये ता जाहें, पर खत्म नी हुन्दे।

1 तिमिथियुस 2:2

राजेया रे कठे होर अधिकारिया रे कठे प्रार्थना करहा, ताकि आस्से सुख-चैना किन्हें रहे, जेता ले आस्से परमेसरा री भक्ति करी सके होर दूजे लोका साउगी सही बर्ताव करी सके।

1 तिमिथियुस 3:16

होर एता मन्झ कोई सक नी आ कि, परमेसरे जो सच्ची खबर जाहिर कितिरी, से पूरी तरहा ले सच्च ई, मसीह जो माह्णुं रे रूपा मन्झ जाहिर हुआ, पवित्र आत्मे तेस जो हर कामा मन्झ धर्मी ठैहर्या, स्वर्गदूते से देखेया, होर स्वर्गा री महिमा री वखा जो से चकी लितेया गया, लोके तेसरे बारे मन्झ जाति-जाति मन्झ प्रचार कितेया, संसारा रे लोके तेस पर विस्वास कितेया।

1 तिमिथियुस 6:3

अगर कोई गलत उपदेसा जो सखा; होर आस्सा रे प्रभु यीसू मसीह रे दितिरे सही उपदेस होर परमेसरा री भक्ति री बिधिया ले राजी नी हुंदा,

तितुस 1:1

हांऊँ पौलुस, एस्सा चिठ्ठी जो लिख्या करहा। हांऊँ परमेसरा रा सेऊआदार होर यीसू मसीह रा चुणिरा चेला आ। हांऊँ परमेसरा रे चुणिरे लोका रे विस्वासा जो मजबूत करणे रे कठे नियुक्त कितिरा, ताकि स्यों सच्चा जो जाणे होर परमेसरा जो खुस करणे वाली जिन्दगी जीए।

तितुस 2:12

एस अनुग्रहा ले परमेसर आस्सो सखा कि, आस्से संसारा री चीजा रे कठे इच्छा जो छाडी दे, होर परमेसरा जो खुस नी करणे वाली गल्ला जो करणा छाडी दे। एता रे बजाय ऐबे रे टैमा मन्झ परमेसरा जो खुस करणे वाली धार्मिक होर आपु पर काबू रखणे वाली जिन्दगी जीए।

1 पतरस 3:14

होर अगर खरा करी किन्हें भी तुस्से दुःख सहन करहे ता परमेसरा तुस्सा जो आसीस देणी। तुस्से तिहां करहा जिहां यसायाह नबिये लिखिरा: “जो लोक तुस्सा जो धमकी दे तिन्हा ले नी डरा, होर नी घबराऊआ की लोका क्या करणा।”

2 पतरस 3:11

जेबे कि परमेसरा एस तरीके किन्हें इन्हा सभी चीजा रा नास करणा; ता तुस्सा जो पवित्र होर सच्ची भक्ति री जिन्दगी जीणी चहिए।

प्रकासना री गल्ला 12:4

होर तेसरी पूंछे आसमाना रे तारे रा एक तिहाई हिस्सा खिंजी किन्हें धरती पर डयाई दितेया। होर अजगर तेस्सा ज्नाने रे साम्हणें खड़ा हुई गया, ताकि अजगर बच्चे जो जणदे ही निगली ले।

प्रकासना री गल्ला 7:14

मैं तेस किन्हें बोल्या, “हे माल्का, हांऊँ नी जाणदा, पर तू आप्हुए जाणहां।” तिन्हें मेरे किन्हें बोल्या, “ये स्यों लोक ऐं, जो तेस महान क्लेसा रे टैमा मरी गईरे थे, होर इन्हें आपणे कपड़े छेलू रे खूना मन्झ धोई किन्हें चिटे कीतिरे, यानि तिन्हारे पाप टाही दितिरे।”