2 तिमिथियुस 2:10 - मंडयाली नंऊँआं नियम

¹⁰ इधी कठे हांऊँ परमेसरा रे चुणिरे लोका रे कठे सभ कुछ सैहन करहा, ताकि स्यों भी मसीह यीसू पर विस्वास करी किन्हें उद्धार पाए, होर अनंत महिमा पाए।

2 तिमिथियुस 2:10 Iomraidhean Croise

मत्ती 24:22

होर अगर स्यों ध्याड़े नी घटाए जांदे, ता कोई भी प्राणी नी बचदा; पर चुणिरे लोका री वजहा ले स्यों ध्याड़े घटाये जाणे।

मत्ती 24:24

“क्यूंकि झूठे मसीह होर झूठे नबिया आऊंणा, होर तिन्हा बड़े चिन्ह होर चमत्कार दसणे, होर हुई सके ता परमेसरा रे चुणिरे लोक भी भरमाई देणे।

मत्ती 24:31

होर तेस धरती पर आपणे स्वर्गदूत बड़ी तुरही री अवाज किन्हें भेजणे, ताकि स्यों धरती रे हर जगहा ले चुणिरे लोक कठे करहे।”

लूका 18:7

एता कठे क्या परमेसरा आपणे चुणिरे लोका रा न्याय नी चुकाणा, जो राती ध्याड़ी तेसरी दुहाई देहां ऐं, होर क्या तेस तिन्हारे बारे मन्झ देर करणी?

लूका 22:57

पर पतरस मुखरी गया कि, “ओ जनानिये, हांऊँ तेस जो नी जाणदा।”

यहून्ना 11:52

होर ना सिर्फ तिन्हारे कठे, पर तिन्हारे कठे भी कि से परमेसरा रे बाहर भटकीरे बच्चेया जो कठा करी सके।

यहून्ना 17:24

हे बापू, हांऊँ चाहां कि जेह्ड़े लोक तैं मुंजो दितिरे, जेथी हांऊँ आं, तेथी स्यों भी मेरे साउगी हो कि स्यों मेरी तेस महिमा जो देखी सके जो तैं मुन्जो दितीरी, क्यूंकि तैं संसारा रे रचणे ले पैहले ले ई मेरे किन्हें प्यार रख्या।”

यहून्ना 17:9

“हांऊँ तिन्हारे कठे प्रार्थना करहा। हांऊँ संसारा रे लोका रे कठे प्रार्थना नी करदा, पर तिन्हारे कठे जो तैं मुंजो दितिरे, क्यूंकि स्यों तेरे ऐं।

रोमियो 2:7

जो लोक खरे कामा जो करदे हुए परमेसरा री वखा ले मिलणे वाली महिमा, आदर होर कधी ना खत्म हूंणे वाली जिन्दगी री तोपा मन्झ रैंहयां ऐं, परमेसरा तिन्हा सभी जो अनंत जिन्दगी देणी।

रोमियो 9:23

होर से आपणी महान महिमा जो तिन्हा लोका पर जाहिर करणा चाहां था, जिन्हा पर तिन्हें दया किती, होर जो पैहले ले ही तेसरे महिमा मन्झ साझी हूंणे रे कठे चुणिरे थे।

1 कुरिन्थियो 1:21

क्यूंकि जेबे परमेसरे आपणे ज्ञाना रे मताबक देखेया कि संसारा रे लोक आपणे ज्ञाना रे ज्रीए तेस जो कधी नी जाणी सकदे, ता परमेसरा जो ये ठीक लग्या कि आस्सा री खुसी री खबरा जो प्रचार करणे रे ज्रीए विस्वास करणे वाले लोका रा उद्धार करहे, भले ही कुछ लोका जो ये गल नर्क्कली लगाई।

1 कुरिन्थियो 9:22

कि जेबे हांऊँ तिन्हा लोका साउगी रैहया था, जो कुछ गल्ला जो लेई किन्हें सक करहे थे कि इन्हा गल्ला जो करणा प्रभु री नजरा मन्झ ठीक आ की नी, ता मैं भी गल्ला जो करणा छाडी दिती; ताकि हांऊँ तिन्हा जो भी मसीह वाले ल्याई सकूं। होर हांऊँ सभ माह्णुं रे कठे सभ कुछ बणेया, ताकि किहाँ नी किहाँ मेरे ज्रीए परमेसर कुछ लोका रा उद्धार करी सके।

2 कुरिन्थियो 1:6

आस्से दुःख सैहया करहे, ताकि परमेसर तुस्सा जो तस्सली दे, होर तुस्सा रा उद्धारा करहे। क्यूंकि परमेसर आस्सो तस्सली देआ, इधी कठे तेस तुस्सा जो भी तस्सली देणी। क्यूंकि तुस्से बड़े सबरा साउगी आस्सा साहीं दुःख सहीरा।

2 कुरिन्थियो 12:15

परमेसरा जो मनणे रे कठे बौह्त खुसी किन्हें तुस्सा रे कठे आपणा सब कुछ देणा, बल्की आपणी जान भी देई देणी। हांऊँ तुस्सा साउगी बौह्त प्यार रख्हा, पर एह्ड़ा लगा कि तुस्से मेरे किन्हें कम प्यार करहे।

2 कुरिन्थियो 4:15

क्यूंकि जो भी दुःख आस्से सैहण कितिरे से तुस्सा रे फायदे रे कठे, ताकि परमेसर रा अनुग्रह ज्यादा ले ज्यादा लोका जो मिले, होर बौह्त सारे लोक परमेसरा री महिमा रे कठे तिन्हारा ज्यादा ले ज्यादा धन्यावाद करणा।

2 कुरिन्थियो 4:17

क्यूंकि आस्सा री ऐबे री ये परेसानिया बौह्त छोटी होर स्यों लम्बे टैमा तक नी टिकणी। पर इन्हा परेसानिया री वजहा ले आस्सो जुग-जुग री महिमा मिलणी, जो तिन्हा सब चीज़ा ले बढ़ी किन्हें ई, जेसरे बारे मन्झ समझाणा नामुमकिन आ।

इफिसियो 3:13

इधी कठे हांऊँ अर्ज करहा कि जो दुःख हांऊँ तुस्सा रे कठे सहन करी करहा, तेता री वजहा ले हिम्मत नी छाडा, क्यूंकि ये सब कुछ तुस्सा रे भले रे कठे आ।

कुलुस्सियो 1:24

ऐबे हांऊँ खुस आ कि हांऊँ तुस्सा रे कठे दुःख सही सक्हा। होर इधी कठे भी खुस आ कि हांऊँ आपणे सरीरा मन्झ लगातार तिन्हा दुखा जो सहेया, जो मसीहे सहीरे थे। होर ये दुःख हांऊँ मसीह री कलीसिया रे कठे सहेया जो तेसरा सरीर आ।

कुलुस्सियो 1:27

क्यूंकि परमेसर चाहां था कि तेसरे लोक ये जाणी ले कि मसीह रे धन होर महिमा तुस्सा गैर-यहूदी लोका रे कठे भी हाई। होर लुख्ही री गल येई कि मसीह तुस्सा मन्झ वास करहा। होर एता ले आस्सो येह हिम्मत मिली कि आस्सा तेसरी महिमा रे साझीदार हूंणा।

1 थिस्सलुनकियो 5:9

क्यूंकि परमेसरे आस्सा जो गुस्से मन्झ सजा देणे रे कठे नी चुणिरा, पर इधी कठे चुणिरा, ताकि आस्से आपणे प्रभु यीसू मसीह रे ज्रीए उद्धार पाए।

2 थिस्सलुनकियो 2:14

परमेसरे तेस खुसी री खबरा रे ज्रीए जो आस्से तुस्सा जो सुणाई री थी, तुस्से सादिरे कि तुस्सा रा उद्धार करी सके; ताकि तुस्से आस्सा रे प्रभु यीसू मसीह री महिमा मन्झ साझी हुई सको।

2 तिमिथियुस 1:1

हाऊँ पौलुसा एस्सा चिठ्ठी जो लिखी करहा। परमेसरे चाहां कि हाऊँ यीसू मसीह रा चुणिरा चेला बणुं। तिन्हें हांऊँ इधी कठे चुणेया कि हांऊँ ये प्रचार करी सकूं कि मसीह साउगी एक हूंणे री वजहा ले परमेसरे आस्सो अनंत जिन्दगी देणे रा वादा कितिरा।

2 तिमिथियुस 2:1

इधी कठे हे मेरे मह्ठे तिमिथियुस, तू ये जाणी किन्हें आपणे आपा जो मजबूत कर कि, परमेसरे तुजो से अनुग्रह दितिरा, जो आस्सा रे मसीह यीसू साउगी एक हूंणे ले वजहा ले मिला।

2 तिमिथियुस 2:3

तू एक मसीह यीसू रा खरा स्पाही आ, इधी कठे जिहां दूजे लोक दुःख सहन करही करहे, तिहां तू भी तिन्हा दुःखा जो सहन कर।

तितुस 1:1

हांऊँ पौलुस, एस्सा चिठ्ठी जो लिख्या करहा। हांऊँ परमेसरा रा सेऊआदार होर यीसू मसीह रा चुणिरा चेला आ। हांऊँ परमेसरा रे चुणिरे लोका रे विस्वासा जो मजबूत करणे रे कठे नियुक्त कितिरा, ताकि स्यों सच्चा जो जाणे होर परमेसरा जो खुस करणे वाली जिन्दगी जीए।

1 पतरस 2:10

तुस्से पैहले परमेसरा रे लोक नी थे, पर ऐबे तुस्से परमेसरा रे लोक ऐं, पैहले तुस्सा पर अनुग्रह नी हुईरा था, पर ऐबे परमेसरे तुस्सा पर दया कितिरी।

1 पतरस 5:10

होर ऐबे परमेसर जो अनुग्रहा ले भरिरा आ, होर जिन्हें यीसू मसीह साउगी जुड़े रैहणे री वजहा ले आस्सा जो स्वर्गा मन्झ आपणी अनंत महिमा मन्झ साझी हूंणे रे कठे सादीरा, तुस्सा रे थोह्ड़ी देरा तक दुःख उठाणे ले बाद तेस आपु ई तुस्से खरे बनाणे, ताकि तुस्सा मन्झ कोई गलती नी हो होर तेस तुस्सा रे दिल मजबूत करणे, होर तेस तुस्से सामर्थी बणाई देणे ताकि तुस्सा रा विस्वास कमजोर नी हो।