2 तिमिथियुस 1:12 - मंडयाली नंऊँआं नियम

¹² होर एस वजहा ले ही हांऊँ एथी जेल्हा मन्झ दुःख सहन करी करहा, पर सर्मिन्दा नी हुन्दा, क्यूंकि हांऊँ मसीह जो जाणहां, जेस पर मैं भरोसा रखीरा कि, मसीह आपणे वापस आऊणें रे ध्याड़े तक तेस चीजा री रखवाली करी सक्हा, जो तिन्हें मुंजो सौंपीरी।

2 तिमिथियुस 1:12 Iomraidhean Croise

मत्ती 12:21

होर जाति-जातिया रे लोका तेस पर आस रखणी।”

मत्ती 24:36

“तेस ध्याड़े होर तेस घड़ी रे बारे मन्झ कोई नी जाणदा, ना स्वर्गा रे स्वर्गदूत, होर ना मह्ठा, पर सिर्फ बापू।

मत्ती 7:22

न्याय रे ध्याड़े बौह्त लोका मेरे किन्हें बोलणा, ‘हे प्रभु, हे प्रभु, क्या आस्से तेरे हका ले भविस्यवाणी नी किती? होर तेरे हका ले दुस्टात्मा नी काढी? होर तेरे हका ले बौह्त बडे चमत्कारा रे काम नी किते?’

लूका 10:12

हांऊँ तुस्सा किन्हें सच्च-सच्च बोल्हा कि, तेस ध्याड़े तेस गांऊँआं रे लोका री हालत सदोम सैहरा रे लोका री हालत ज्यादा खराब हूणीं।”

लूका 23:46

होर यीसूए जोरा किन्हें चिंगी किन्हें बोल्या, “हे बापू, हांऊँ आपणी आत्मा तेरे हाथा मन्झ सौम्पेया करहा।” होर ये बोली किन्हें यीसूए प्राण छाडी दिते।

यहून्ना 17:15

हांऊँ ऐं प्रार्थना नी करदा कि, तू तिन्हा जो संसारा ले लग करी दे, पर ये भी कि तू तिन्हा जो तेस दुस्ट सैताना ले तिन्हारी हिफाजत कर।

यहून्ना 6:44

कोई भी मेरे वाले नी आई सक्दा, जेबे तक बापू, जिन्हें जे हांऊँ भेजिरा, से तेस जो मेरे वाले नी लई आये। होर मां से आखरी ध्याड़े दबारा मरिरे मन्झा ले जिउंदे करी देणा।

चुणिरे चेले रे काम 13:46

तेबे पौलुसे होर बरनबासे बगैर डरे बोल्या, “जरूरी था कि, परमेसरा रा बचन पैहले तुस्सा जो सुणाया जाए; पर जेबे की तुस्से तेस जो नकारी देयां ऐं, होर आपणे आपा जो अनंत जिन्दगी रे लायक नी बणान्दे, ता देखा, आस्से अन्यजाति लोका वाले जाई करहा ऐं।”

चुणिरे चेले रे काम 13:50

पर यहूदी अगुवे भक्त होर उच्च कुला री ज्नानिया जो होर सैहरा रे बडे लोका जो भड़काया, होर पौलुस होर बरनबासा पर जुल्म करी किन्हें तिन्हा जो आपणी देसा री सीमा ले बाहर काढी दितेया।

चुणिरे चेले रे काम 21:13

एता पर पौलुसे जवाब दितेया कि, “तुस्से क्या करेया करहा ऐं कि, रोई-रोई किन्हें मेरा दिल तोड़हा ऐं, हांऊँ ता प्रभु यीसू रे नांऊँआं रे कठे यरुस्लेम सैहरा मन्झ सिर्फ बान्हेया जाणे रे कठे नी, पर मरणे रे कठे भी त्यार आ।”

चुणिरे चेले रे काम 7:59

होर स्यों स्तिफनुसा जो पत्थरवाह करदे रैहे, होर से ये बोली किन्हें प्रार्थना करदा रैंहयां कि, “हे प्रभु यीसू, मेरी आत्मा जो ग्रहण करी ले।”

चुणिरे चेले रे काम 9:16

मां तेस जो दसणा कि, मेरे नांऊँआं रे कठे तेस जो केह्ड़ा-केह्ड़ा दुःख उठाणा पऊणा।”

रोमियो 1:16

क्यूंकि हांऊँ खुसी री खबर सुनाणे ले नी सरमान्दा। इधी कठे कि खुसी री खबर परमेसरा री सामर्थ ई जो सब विस्वास करणे वाले रा उद्धार करहा ई, सभी ले पैहले ता यहूदी लोका रा, फेरी गैर-यहूदी लोका रा।

रोमियो 9:33

जिहां परमेसर पवित्र सास्त्रा मन्झ यीसू मसीह रे बारे मन्झ बोल्हा, “देखा हांऊँ सिय्योन सैहरा मन्झ लोका जो ठेस लगणे वाल़ा एक पात्थर, होर ठोकर खाणे री चटान रख्हा, होर जो तेस पर विस्वास करघा, तेस कधी भी सर्मिन्दा नी हूंणां।”

1 कुरिन्थियो 1:8

परमेसरा तुस्से आखरी तक तुस्सा रे विस्वास मन्झ मजबूत बणाई रखणे, ताकि तुस्से आस्सा रे प्रभु यीसू मसीह रे वापस आऊणें रे ध्याड़े मन्झ बेकसूर रही सको।

1 कुरिन्थियो 3:13

पर न्याय रे ध्याड़े आगिया हर केसी रे काम जाहिर करणे कि केसरे काम खरे थे होर केसरे काम बुरे थे; होर आगिया दसणा कि तेस माह्णुं रे कामा री कोई कीमत हाई की नी।

फिलिप्पियो 1:20

मेरे दिला री आस होर सभी ले बड़ी इच्छा ता येई कि, केसी गल्ला मन्झ हांऊँ सर्मिन्दा नी होऊं। पर हमेसा निधड़क हुई किन्हें मसीह रे बारे मन्झ प्रचार करु जिहां हांऊँ पैहले करहा था। चाहे हांऊँ जिउंदा रहूं या मरी जाऊं मेरी जिन्दगी रे ज्रीए मसीह री बढ़ाई हमेसा करदा रैहणा।

फिलिप्पियो 3:10

हांऊँ ये ही चांहा कि मसीह जो होर तेस्सा सामर्था जो मैहसूस करी सकूं, जेस ले मसीह मरिरे मन्झ ले जिउंदे हुईरा। होर मरणे मन्झ मसीह साहीं बणी किन्हें तेस साउगी दुःखा उठाणे मन्झ साझी बणी जाऊँ,

फिलिप्पियो 3:21

यीसू मसीह जेस तरीके ले आपणी सामर्था रे ज्रीए सभ चीजा जो आपणे बसा मन्झ करहा, तिहां ही आस्सा रे कमजोर होर एस संसारा रे सरीरा जो बदली किन्हें आपणे महिमामय सरीरा साहीं बणाई देणा।

फिलिप्पियो 3:8

क्यूंकि हांऊँ आपणे मसीह जो जाणना चाहां, जो सभ चीजा ले कीमती आ, इधी कठे मैं इन्हा सारी चीजा जो बेकार समझा। मैं सभ चीजा जो छाडी दितेया, होर तिन्हा चीजा जो हांऊँ कूड़ा सम्झहा, ताकि हांऊँ यीसू मसीह जो जाणी सकूं।

1 थिस्सलुनकियो 2:16

होर स्यों आस्सा जो अन्यजाति लोका मन्झ उद्धारा री खुसी री खबर प्रचार करणे ले रोक्हा ऐं, ताकि स्यों तेबे तक आपणे पापा रा घड़ा भरदे रहे जेबे तक परमेसर तिन्हा जो सजा नी दे। पर ऐबे ता परमेसरा सच्चे तिन्हो सजा देणी।

1 थिस्सलुनकियो 5:4

पर हे भाईयो होर बैहणो, तुस्से बुराई रे नह्यारे मन्झ नी ऐं कि, प्रभु यीसू रे दबारा वापस आऊणें रा ध्याड़ा तुस्सा पर चोरा साहीं अचानक आई जाए।

1 तिमिथियुस 6:20

हे तिमिथियुस, परमेसरे जो काम तुजो सौंपी रा, तू तेता जो पूरा कर। जो गल्ला आत्मिक नी, होर बेकारा री बैहसा ले दूर रह, होर तिन्हा ले भी जो परमेसरा रे सच्चे उपदेसा रे व्रोधा मन्झ ई, जिन्हा जो स्यों गलती किन्हें “ज्ञान” बोले।

2 तिमिथियुस 1:14

होर पवित्र आत्मा रे ज्रीए जो आस्सा मन्झ बस्सिरा, एस सच्चाई री रखवाली कर, जो तुजो सौंपीरी।

2 तिमिथियुस 1:16

भाई उनेसिफुरुसा होर तेसरे परिवारा पर प्रभु दया करहे, क्यूंकि से कई बार मेरे किन्हें मिलदे आया होर तिन्हें मेरी बौह्त मदद किती, होर एथी जेल्हा मन्झ आई किन्हें मेरे साउगी मिलणे रे कठे सर्मिन्दा नी हुआ।

2 तिमिथियुस 1:18

न्याय रे ध्याड़े प्रभु उनेसिफुरुस पर आपणी दया दसे! होर तुस्से आप्हुए जाणांहे कि इफिसुस सैहरा मन्झ रैहन्दे हुए तिन्हें मेरी कितनी मदद कितिरी।

2 तिमिथियुस 1:8

इधी कठे प्रभु यीसू मसीह रे बारे मन्झ दूजेयो जो दसणे रे कठे सर्मिन्दा नी हो, होर एता रे कठे भी सर्मिन्दा नी हो कि तेसरी सेऊआ करणे री वजहा ले हांऊँ हाले भी जेल्हा मन्झ आ। एता रे बजाय परमेसर जो तुस्सा जो सामर्था देआ, तेता रे ज्रीए खुसी री खबरा रे सुनाणे रे कठे मेरे साउगी दुःख उठा।

2 तिमिथियुस 2:9

क्यूंकि हांऊँ खुसी री खबरा रा प्रचार करहा, इधी कठे हांऊँ एक अपराधी साहीं दुःख सहन करहा, एथी तक कि हांऊँ कैदा मन्झ आ, पर परमेसरा रे बचना जो कोई भी आपणे कैदा मन्झ नी रखी सकदा।

2 तिमिथियुस 4:8

प्रभुआ मुंजो से ताज देणा जो धार्मिकता रा ताज आ। से जो धर्मा किन्हें न्याय करहा, जेस ध्याड़े तेस दबारा वापस आऊंणा मुंजो ये इनाम देणा। तेस सिर्फ मुंजो ई नी, बल्की तिन्हा सभी जो भी देणा, जो सच्चे चाहे कि से दबारा वापस आई जाये।

तितुस 3:8

ये जो कुछ मैं ऐबे तुस्सा जो लिखिरा ये भरोसे करणे रे लायक गल्ला ई, हांऊँ ये चाहां कि तू इन्हा गल्ला रे बारे मन्झ मजबूती किन्हें विस्वासी लोका जो सखा, इधी कठे कि जिन्हें लोके परमेसरा पर विस्वास कितिरा, स्यों आपणा ध्यान भले काम करणे रे मन्झ लगाई रखे। ये सखाईरी गल्ला सब लोका रे कठे खरी होर फायदेमंद ई।

इब्रानियो 12:2

आस्सो विस्वासा री वखा जो लेई जाणे वाले, होर आस्सा रे विस्वासा जो सिद्ध करणे वाले, यीसू री तरफ देखदे रहे। जिन्हें तेस्सा खुसी रे कठे जो तेस जो बादा मन्झ मिलणे वाली थी, बेज्जती री परवाह नी करी किन्हें क्रूसा प्रयाल्हे मरी गया, होर राजगद्दी पर परमेसरा रे सीधी वखा जो बैठी गया।

इब्रानियो 2:18

क्यूंकि यीसू री परखणी हुई होर तिन्हें दुःख भी सहन कितेया, इधी कठे से परखणी मन्झ पईरे लोका री मदद करी सक्हा।

इब्रानियो 7:25

इधी कठे जो यीसू मसीह रे ज्रीए परमेसरा वाले आहूँए, से तिन्हारा पूरा-पूरा उद्धार करी सक्हा, क्यूंकि से तिन्हारे कठे बिनती करणे रे कठे हमेसा जिउंदा आ।

1 पतरस 1:5

परमेसरा आपणी सामर्था ले तुस्सा री हिफाजत करहा, क्यूंकि तुस्से मसीह यीसू पर भरोसा रखे, होर मसीह रे वापस आऊणें रे आखरी ध्याड़े तक तेस तुस्सा री हिफाजत करदे रैहणा। तेबे तुस्सा जाणी लेणा कि परमेसरे तुस्से पाप होर मौता दुहीं ले पूरी तरहा बचाई लितिरे।

1 पतरस 4:16

पर अगर मसीहा रे लोक हूंणे री वजहा ले दुःख सहे, ता सर्मिन्दे नी हो, पर एस गल्ला रे कठे परमेसरा री बड़ाई करहा की तुस्से एक विस्वासी ऐं।

1 पतरस 4:19

इधी कठे जो परमेसरा री इच्छा रे मताबक दुःख सहन करहे, स्यों भलाई करदे हुए, आपणे आपा जो भरोसे रे लायक परमेसरा रे हाथा मन्झ सौंपी दे जिन्हें जे स्यों रचिरे।

यहूदा 1:24

एक ही परमेसर आ जो तुस्सा जो पऊणे ले बचाई सक्हा, होर जेबे तेस आपणी महिमा मन्झ तुस्से आपणे साम्हणें लेई आऊणें, तेबे से तुस्सा जो मगन होर बेकसूर रखी सक्हा। तिन्हें आस्सा रे, प्रभु यीसू मसीह रे ज्रीए आस्से बचाई लितिरे। सनातन काल ले लेई किन्हें महिमा, बड़ाई, होर गौरव, तेसरा था होर ऐबे भी तेसरा, होर जुग-जुग तेसरा ही रेहणा। आमीन।