2 तिमिथियुस 1:10 - मंडयाली नंऊँआं नियम

¹⁰ होर ऐबे आस्सा रा उद्धारकर्ता मसीह यीसू आई गईरा होर आस्सा पर आपणा अनुग्रह दसिरा। तिन्हें मौता री सामर्था जो हराई दितेया, होर खुसी री खबरा रे ज्रीए ये जाहिर कितेया कि कधी नी खत्म हूंणे वाली जिन्दगी तक पूजणे रे एक रस्ता।

2 तिमिथियुस 1:10 Iomraidhean Croise

लूका 11:36

इधी कठे अगर तेरा सारा सरीर प्रयासे किन्हें भरीरा आ, होर तेसरा कोई हिस्सा नह्यारे मन्झ नी आ, ता तेस पूरी तरहा ले एह्ड़ा चमकणा जिहां कोई दिऊया तुस्सा पर आपणी किरणा चमकाया करहा।”

लूका 13:7

तेबे तिन्हें बगीचे रे माली किन्हें बोल्या, ‘देखा, तीन साला ले हांऊँ एस अंजीरा रे डाला मन्झ फल तोप्दा आया करहा, पर नी मिलदा। एस जो काटी दे क्यूंकि इन्हें बगीचे री बांकी जमीना रोकिरी।’

लूका 2:11

होर से खबर येई कि आज राजा दाऊदा रे गांऊँआं बैतलैहम मन्झ एक उद्धारकर्ता तुस्सा रे कठे जम्मिरा, होर येई मसीह प्रभु आ।

यहून्ना 1:9

होर से जे सच्ची जोती, हर एक माह्णुं जो प्रयासा देहां ईं संसारा मन्झ आऊणें वाली थी।

यहून्ना 14:6

यीसूए तेस किन्हें बोल्या, “पैंडा होर सच्चाई होर जीवन हांऊँ ईं आं; मेरे बगैर कोई बापू वाले नी पूजी सक्दा।

यहून्ना 20:31

पर ये चिन्ह इधी कठे लिखे गईरे, ताकि तुस्से विस्वास करी सको कि, यीसू ई परमेसरा रा मह्ठा मसीह आ, होर तेस पर विस्वास करी किन्हें अनंत जिन्दगी पाई सको।

यहून्ना 4:42

होर तिन्हें तेस्सा ज्नाने किन्हें बोल्या, “ऐबे आस्से तेरे कैहणे ले ई विस्वास नी करदे, क्यूंकि आस्से आप्हुए सुणी लैया, होर जाणहां ऐं कि सच्चे येई संसारा रा उद्धारकर्ता आ।”

यहून्ना 5:40

फेरी भी तुस्से अनंत जिन्दगी पाणे रे कठे मेरे वाले नी आऊंणा चाहन्दे।

चुणिरे चेले रे काम 13:23

एस दाऊदा रे बंसा मन्झा ले परमेसरे आपणे वादा रे मताबक इस्राएल देसा रे उद्धारा रे कठे यीसू मसीह जो भेज्या।

चुणिरे चेले रे काम 5:31

परमेसरे यीसू जो आपणे सीधी वखा जो प्रभु होर उद्धार देणे वाल़ा नियुक्त कितेया। परमेसरे ये इधी कठे कितेया ताकि इस्राएल देसा रे लोक पाप करणा छाडी दे, होर आपणे पापा रे कठे तिन्हा जो तेस ले माफी मिली सके।

रोमियो 16:26

होर जिहां सुर्हू ले परमेसरे हुक्म दितेया होर नबिया रे ज्रीए लिखी गया, ऐबे ये ल्कोईरी गल्ल सब जाति रे लोका मन्झ प्रचार किती गई, ताकि स्यों भी परमेसरा पर विस्वास करणे वाले, होर तेसरे हुक्म मनणे वाले बणी जाऐ।

रोमियो 2:7

जो लोक खरे कामा जो करदे हुए परमेसरा री वखा ले मिलणे वाली महिमा, आदर होर कधी ना खत्म हूंणे वाली जिन्दगी री तोपा मन्झ रैंहयां ऐं, परमेसरा तिन्हा सभी जो अनंत जिन्दगी देणी।

रोमियो 3:31

ता क्या आस्सा रा विस्वास मूसा री व्यवस्था जो रद्द करहा ऐं? नी कधी नी, पर मसीह रे विस्वासा रे ज्रीए आस्से व्यवस्था जो पूरा करहा ऐं।

रोमियो 6:6

क्यूंकि आस्से जाणहां ऐं कि आस्सा री पुराणी पाप भरा स्वभाव मसीह यीसू साउगी क्रूसा प्रयाल्हे चढ़ाई गई, होर पाप भरा सरीर बेकार हुई गया, होर आस्से अगे जो पापा रे गुलाम नी रहे।

1 कुरिन्थियो 15:26

सभी ले आखरी दुसमण मौत ई, जेस्सा रा सर्वनास करी दितेया जाणा।

1 कुरिन्थियो 4:5

इधी कठे आस्सा रे प्रभु रे वापस आऊणें रे ध्याड़े तक कोई केसी रा न्याय नी करहे; क्यूंकि परमेसरा ही लोका रे मना रे मन्झ लुख्ही रे सारे विचार जाहिर करणे जिन्हों कोई नी जाणदा। होर माह्णुंआं रे मना रे विचार जाहिर करणे, होर तेबे परमेसरा हर एक माह्णुं री बड़ाई करणी।

2 कुरिन्थियो 5:4

होर आस्से ऐस सरीर रूपी डेरे मन्झ रैहन्दे हुये बोझा हेठ दभी किन्हें रोहें-पिट्हा ऐं; क्यूंकि आस्से इन्हा सांसारिक सरीरा जो छाडणा नी चाहन्दे, पर आस्से ये चाहें कि परमेसर आस्सो स्वर्गीय सरीर देई दे, ताकि ये मरणे वाले सरीर नी मरणे वाले सरीरा मन्झ बदली जाए।

गलातियो 5:4

तुस्से जो, मूसा री व्यवस्था मनणे रे ज्रीए परमेसरा री नजरा मन्झ धर्मी बणना चाहें, तुस्से सभीए मसीह साउगी आपणा रिस्ता तोड़ी दितिरा, होर आपणे आपा जो तेस अनुग्रह ले लग करी दितिरा, जेसरे ज्रीए परमेसरे तुस्सा रा उद्धार करी सका।

इफिसियो 1:18

हांऊँ ये भी प्रार्थना करहा कि परमेसर तुस्सा रे मना जो खोली दे, ताकि तुस्से इन्हा सच्चाई जो जाणी सको कि परमेसरे तुस्सा जो जेह्ड़ी आसा दितिरी से क्या ई, जेबे तिन्हें तुस्से सादिरे थे; होर से महान होर महिमामय आसीसे क्या ई जो परमेसरे आपणे पवित्र लोका जो देणे रा वादा कितिरा।

इफिसियो 1:9

सेई कितेया, जेसरी तिन्हें योजना बणाईरी थी। तिन्हें आस्सा पर आपणी ल्कोईरी योजना जाहिर किती, जो तिन्हें पैहले ले ही मसीह रे ज्रीए पूरी करणे रा फैसला लितिरा था।

2 थिस्सलुनकियो 2:8

तेता ले बाद तेस दुस्ट आदमिया जाहिर हूंणां, पर बादा मन्झ जेबे प्रभु यीसू मसीह आऊंणा, ता से तेस आपणे मुंहा री फूका किन्हें मुकाई देणा, होर आपणे आऊणें रे तेजा किन्हें भस्म करी देणा।

2 तिमिथियुस 1:1

हाऊँ पौलुसा एस्सा चिठ्ठी जो लिखी करहा। परमेसरे चाहां कि हाऊँ यीसू मसीह रा चुणिरा चेला बणुं। तिन्हें हांऊँ इधी कठे चुणेया कि हांऊँ ये प्रचार करी सकूं कि मसीह साउगी एक हूंणे री वजहा ले परमेसरे आस्सो अनंत जिन्दगी देणे रा वादा कितिरा।

2 तिमिथियुस 1:8

इधी कठे प्रभु यीसू मसीह रे बारे मन्झ दूजेयो जो दसणे रे कठे सर्मिन्दा नी हो, होर एता रे कठे भी सर्मिन्दा नी हो कि तेसरी सेऊआ करणे री वजहा ले हांऊँ हाले भी जेल्हा मन्झ आ। एता रे बजाय परमेसर जो तुस्सा जो सामर्था देआ, तेता रे ज्रीए खुसी री खबरा रे सुनाणे रे कठे मेरे साउगी दुःख उठा।

2 तिमिथियुस 4:1

जेबे मसीह यीसू राजेया साहीं राज करदे आऊंणा, तेबे तेस जिउंदेया रा होर मरिरे दुहीं रा न्याय करणा। होर इधी कठे परमेसर होर मसीह जो गुआह मनी किन्हें हांऊँ तुजो आदेस देआ,

2 तिमिथियुस 4:8

प्रभुआ मुंजो से ताज देणा जो धार्मिकता रा ताज आ। से जो धर्मा किन्हें न्याय करहा, जेस ध्याड़े तेस दबारा वापस आऊंणा मुंजो ये इनाम देणा। तेस सिर्फ मुंजो ई नी, बल्की तिन्हा सभी जो भी देणा, जो सच्चे चाहे कि से दबारा वापस आई जाये।

तितुस 2:11

क्यूंकि परमेसरे आपणा अनुग्रह एस तरहा जाहिर कितिरा कि तिन्हें सारे माह्णुंआं जो बचाणे रे कठे एक रस्ता बणाईरा।

तितुस 2:13

आस्से एह्ड़ा ही करदे रहे जेबे कि आस्से आपणे म्हान परमेसर होर उद्धारकर्ता यीसू मसीह जो आपणी महिमा साउगी एस संसारा मन्झ वापस आऊणें री आस करदे लगिरे।

तितुस 3:4

पर फेरी भी आस्सा रे उद्धारकर्ता परमेसरे आस्सा माह्णुंआं पर दया होर प्यार जाहिर किती।

इब्रानियो 10:32

पर तिन्हा ध्याड़े जो याद करा, जेबे तुस्से पैहली बारी मसीह पर विस्वास कितिरा था, होर तेता ले बाद तुस्से बौह्त दुःखा रा साम्हणां कितेया, होर भारी पीड़ा मन्झ मजबूत रहे।

2 पतरस 1:1

हांऊँ समौन पतरस तुस्सा रे कठे ये चिठ्ठी लिखी करहा। हांऊँ यीसू मसीह रा सेऊआदार होर चुणिरा चेला आ। हांऊँ ये चिठ्ठी तुस्सा सभी रे कठे लिखी करहा, जो आस्सा साहीं तेस कीमती विस्वास रा साझा करहे, जो आस्सा जो आस्सा रे परमेसर होर उद्धारकर्ता यीसू मसीहे दितिरा। से आस्सो परमेसरा री नजरा मन्झ धर्मी बणा।

2 पतरस 1:11

ठीक एस तरहा परमेसरा बड़े आदर साउगी अनंत राजा मन्झ दाखल करणा, जेथी आस्सा रा प्रभु होर उद्धारकर्ता प्रभु यीसू मसीहा जुग-जुग रे कठे राज करणा।

2 पतरस 1:3

परमेसरे आपणी सामर्था रे ज्रीए आस्सा जो से सब कुछ देई दितिरा, जेसरे ज्रीए आस्से सच्ची भक्ति री जिन्दगी जी सका ऐं। ये इधी कठे हुईरा की क्यूंकि आस्से परमेसरा जो जाणहां ऐं, होर तिन्हें ही आस्से आपणी खराई होर महिमा री वजहा ले आपणे लोक हूंणे रे कठे सादीरे।

2 पतरस 2:20

होर जेबे लोक यीसू मसीह जो आपणा प्रभु होर उद्धारकर्ता रे रूपा मन्झ अपनाई ले तेबे स्यों एस संसारा री कई किस्मा री बुराई ले बची निकले। पर दबारा ऐबे स्यों तिन्हा बुरे कामा मन्झ फसी गईरे होर स्यों बुरी गल्ला तिन्हो हराई देईं। ता तिन्हारी ऐबे री हालत जेबे की तिन्हें मसीह जो नकारी दितेया, पैहल्की हालता ले बुरी हूणीं जेबे की स्यों विस्वासी नी थे।

2 पतरस 3:18

एता रे बजाय आस्सा रे प्रभु, होर उद्धारकर्ता यीसू मसीह रे अनुग्रहा जो होर ज्यादा ले ज्यादा मैहसूस करदे रैहया। होर तेसरे बारे मन्झ जो तुस्से समझ रखे तेता मन्झ बढ़दे जाऊआ। तेसरी बढ़ाई ऐबे, होर जुग-जुग हुन्दी रहे। आमीन।

2 पतरस 3:2

हांऊँ एह्ड़ा इधी कठे करहा क्यूंकि, बौह्त पैहले नबिया रे ज्रीए बोली गईरी गल्ला जो होर आस्सा रे उद्धारकर्ता प्रभु यीसू मसीह री सखाईरी गल्ला जो हांऊँ तुस्सा जो याद कुराणा चाहां, जेस जो चुणिरे चेले तुस्सा जो किन्हें सखाईरा था।

1 यहून्ना 1:2

(होर से जिन्दगी एस संसारा मन्झ आई, होर आस्से से देख्या, होर आस्से तेसरी गुआही ऐं। होर आस्से तुस्सा जो तेसरे बारे मन्झ दसा ऐं जो अनंत जिन्दगी ई, जो बापू साउगी था होर एस संसारा मन्झ आया।)

1 यहून्ना 4:14

होर आस्से से मह्ठा देखी भी लया होर गुआही भी देहां ऐं कि, बापू परमेसरे आपणा मह्ठा, संसारा रा उद्धारकर्ता रे रूपा मन्झ भेज्या।

प्रकासना री गल्ला 18:1

एता ले बाद मैं दूजे स्वर्गदूता जो स्वर्गा ले उतरदे देख्या। तेस वाले बौह्त बडा हक था, होर तेसरे बड़े प्रयासे री वजहा ले सारी धरती चमकी गई।

प्रकासना री गल्ला 2:7

जो मेरी गल्ला सुणदा लगीरा से बड़े ध्याना किन्हें सुणें कि आत्मा कलीसिया किन्हें क्या बोल्हा। जो लोक जीत हासिल करहे, मां तेस जो जिन्दगी देणे वाले डाला रा फल खाणे जो देणा जेह्ड़ा परमेसरा रे स्वर्गा रे बगीचे मन्झा आ।”

प्रकासना री गल्ला 20:14

होर तिन्हा सभी जो जिन्हारा नांऊँ जिन्दगी री कताबा मन्झ नी लिखिरा था, तेस जो आगा रे झीला मन्झ पाई दितेया गया। फेरी तेता ले बाद ऐबे आगे मौत नी रही होर ना ही पताल लोक रहा जेथी मरिरे लोका रहे, क्यूंकि स्यों सभ लोक जिन्हारा नाऊँ जिन्दगी री कताबा मन्झ नी लिखिरा था तिन्हो पैहले ले ही आगा रे झीला मन्झ पाई दितेया गया। होर एता जो ई दूजी मौत बोल्या जाहाँ, जो कि आगी री झीला मन्झ मिलणे वाली सजा ई।

प्रकासना री गल्ला 22:14

धन्य ऐं स्यों, जो आपणे कपड़े धोई लैहां ऐं, क्यूंकि तिन्हा जो दुराजे ले हुई किन्हें सैहरा मन्झ दाखल हूंणे रा हक मिलणा। होर तिन्हा जो जिन्दगी देणे वाले डाला ले फल खाणे रा भी हक मिलणा।

प्रकासना री गल्ला 22:17

होर परमेसर री आत्मा, होर छेलु री नौंईं लाड़ी यीसू किन्हें बोल्हा ई कि, “आऊआ!” होर जो भी इन्हा गल्ला जो सुणी करहा से भी बोले कि, “आऊआ!” होर जो सोखा हो, से आये, होर जिन्दगी देणे रा पाणी मुफ्ता मन्झ पीये।