2 तिमिथियुस 1:1 - मंडयाली नंऊँआं नियम

¹ हाऊँ पौलुसा एस्सा चिठ्ठी जो लिखी करहा। परमेसरे चाहां कि हाऊँ यीसू मसीह रा चुणिरा चेला बणुं। तिन्हें हांऊँ इधी कठे चुणेया कि हांऊँ ये प्रचार करी सकूं कि मसीह साउगी एक हूंणे री वजहा ले परमेसरे आस्सो अनंत जिन्दगी देणे रा वादा कितिरा।

2 तिमिथियुस 1:1 Iomraidhean Croise

यहून्ना 10:28

होर हांऊँ तिन्हा जो अनंत जिन्दगी देहां, होर तिन्हा कधी नी मरणा, होर कोई तिन्हा जो मेरे हाथा ले नी छुड़ाई सक्दा।

यहून्ना 17:3

होर अनंत जिन्दगी येई कि, स्यों तुजो एकमात्र सच्चे परमेसरे होर यीसू मसीहा जो जाणी सको, जेस जो तैं भेजिरा।

यहून्ना 5:24

“हांऊँ तुस्सा किन्हें सच्च -सच्च बोल्हा, जो मेरे बचन सुणी किन्हें मेरे भेजणे वाल़ेया रा विस्वास करहा, अनंत जिन्दगी तेसरी ई, होर तेस पर सजा रा हुक्म नी हुन्दा पर से मौता ले पार हुई किन्हें नौंईं जिन्दगी पाई चुकिरा।

यहून्ना 6:40

क्यूंकि मेरे बापू री इच्छा येई कि, जो कोई मह्ठे जो मनी किन्हें तेस पर विस्वास करहे, तेस अनंत जिन्दगी पाणी। होर मां स्यों आखरी ध्याड़े दबारा मरिरे मन्झा ले जिउंदे करी देणे।”

यहून्ना 6:54

जो मेरा मास खांहां होर मेरा खून पींहां, अनंत जिन्दगी तेसरी ई, होर आखरी ध्याड़े से मां दबारा मरिरे मन्झा ले जिउंदे करी देणा।

रोमियो 1:1

हांऊँ पौलुस ये चिट्ठी लिख्या करहा। हांऊँ यीसू मसीहा रा सेऊआदार आ। परमेसरे एक चुणिरा चेले रे रूपा मन्झ मेरा चुणाव कितेया, होर परमेसरे हांऊँ खुसी री खबर सुनाणे रे कठे नियुक्त कितिरा।

रोमियो 5:21

परमेसरे ये इधी कठे कितेया क्यूंकि लोक पाप करी किन्हें मरदे लगिरे थे, पर यीसू मसीह रे ज्रीए परमेसरा रा अनुग्रह तिन्हो तेसरी नजरा मन्झ धर्मी माह्णुं बणा होर अनंत जिन्दगी देआ।

रोमियो 6:23

क्यूंकि पापा री मजदूरी ता मौत ई, पर जो दान परमेसर आस्सो देआ से अनंत जिन्दगी ई, से आस्सो प्रभु यीसू मसीह ले मिला।

1 कुरिन्थियो 1:1

हांऊँ पौलुस, एस्सा चिठ्ठी जो लिख्या करहा। हांऊँ एथी आस्सा रे विस्वासी भाई सोस्थिनेस साउगी आ जो मेरी मदद करी करहा। हांऊँ परमेसर री इच्छा ले मसीह यीसू रा चुणिरे चेले हूंणे रे कठे नियुक्त कितिरा।

2 कुरिन्थियो 1:1

हांऊँ पौलुसा ये चिठ्ठी तुस्सा रे कठे लिख्दा लगिरा। हांऊँ परमेसरा री इच्छा ले मसीह यीसू रा चुणिरा चेला आ। होर मसीह मन्झ आस्सा रा भाई तिमिथियुस मेरे साउगी आ। हांऊँ ये चिठ्ठी कुरिन्थुस सैहरा रे परमेसरा री कलीसिया रे लोका रे कठे होर सारे अखाया ईलाके रे सब परमेसरा रे पवित्र लोका रे कठे लिखी करहा।

2 कुरिन्थियो 1:20

क्यूंकि परमेसरा रे जितने वादे, स्यों सभ मसीह मन्झ हां ई, इधी कठे आस्से आमीन बोल्हा ऐं यानि हां, ताकि आस्सा रे ज्रीए परमेसरा री महिमा हो।

गलातियो 3:26

होर जेबे तुस्से मसीह रे नांऊँआ रा बपतिस्मा लितिरा था, तुस्से मसीह रे स्वभावा जो इंहां पैहनी लितेया, जिहां कोई नंऊँऐं कपड़े पैहना। इधी कठे जेबे तुस्से मसीह यीसू पर विस्वास कितेया, ता तुस्से सब परमेसरा रे बच्चे बणी गईरे।

गलातियो 3:28

इधी कठे मसीह मन्झ ऐबे ना कोई यहूदी लोक आ, होर ना कोई गैर-यहूदी लोक ऐं; ना कोई गुलाम आ, ना कोई अजाद आ; ना कोई मर्ध आ, ना कोई ज्नाने ई; क्यूंकि तुस्से सभ यीसू मसीह मन्झ एक ऐं।

इफिसियो 3:6

परमेसरा री योजना ये ई: मसीह यीसू साउगी एक हूंणे री वजहा ले गैर-यहूदी लोका भी खुसी री खबरा रे ज्रीए तेस विरासता रे साझीदार हूंणे जो यहूदी लोका रा। स्यों एक ही सरीरा रे अंग ऐं, होर परमेसरा रे कितिरे वादे रे साझी ऐं, जो तिन्हें यहूदी लोका किन्हें कितिरा।

1 तिमिथियुस 6:19

अगर स्यों एह्ड़ा करहे ता मानो स्यों आपणे रे कठे स्वर्गा मन्झ धन कठा करी करहे, जो कधी भी नास नी हूंणा। होर तिन्हा जो सच्ची जिन्दगी भी मिलणी यानि हमेसा री जिन्दगी।

2 तिमिथियुस 1:10

होर ऐबे आस्सा रा उद्धारकर्ता मसीह यीसू आई गईरा होर आस्सा पर आपणा अनुग्रह दसिरा। तिन्हें मौता री सामर्था जो हराई दितेया, होर खुसी री खबरा रे ज्रीए ये जाहिर कितेया कि कधी नी खत्म हूंणे वाली जिन्दगी तक पूजणे रे एक रस्ता।

2 तिमिथियुस 1:13

जो सच्चे उपदेस तैं मेरे ले सुणीरे, तिन्हा जो आपणा उदाहरण बणाई किन्हें रख। विस्वास होर प्यारा किन्हें तू इन्हा उपदेसा जो पूरा कर क्यूंकि तू यीसू मसीह साउगी एक आ।

2 तिमिथियुस 1:9

परमेसरे ही आस्सा रा उद्धार कितेया, होर आस्से पवित्र जिन्दगी जीणे रे कठे सादे; होर तिन्हें आस्से आस्सा रे भले कामा री वजहा ले नी पर आपणी योजना रे मताबक सादेया। परमेसरे एस संसारा जो रचणे ले पैहले ही तय करी लितिरा था कि यीसू मसीह जो एस संसारा मन्झ भेजी किन्हें आस्सा पर आपणा ये अनुग्रह दसणा।

2 तिमिथियुस 2:1

इधी कठे हे मेरे मह्ठे तिमिथियुस, तू ये जाणी किन्हें आपणे आपा जो मजबूत कर कि, परमेसरे तुजो से अनुग्रह दितिरा, जो आस्सा रे मसीह यीसू साउगी एक हूंणे ले वजहा ले मिला।

2 तिमिथियुस 2:10

इधी कठे हांऊँ परमेसरा रे चुणिरे लोका रे कठे सभ कुछ सैहन करहा, ताकि स्यों भी मसीह यीसू पर विस्वास करी किन्हें उद्धार पाए, होर अनंत महिमा पाए।

2 तिमिथियुस 2:3

तू एक मसीह यीसू रा खरा स्पाही आ, इधी कठे जिहां दूजे लोक दुःख सहन करही करहे, तिहां तू भी तिन्हा दुःखा जो सहन कर।

2 तिमिथियुस 3:15

होर जेबे तू एक बच्चा ई था ता तैं पवित्र सास्त्रा जो सिख्या, जो तुस्सा री एस गल्ला जो समझणे मन्झ मदद करहा कि, जेबे तुस्से मसीह यीसू पर विस्वास करहे, ता परमेसर तुस्सा रा उद्धार करहा।

तितुस 1:2

जेसरी वजहा ले स्यों परमेसरा साउगी अनंत जिन्दगी जीणे री आस रखे। एह्ड़ा परमेसर जो कधी झूठ नी बोल्दा, होर जिन्हें संसारा रे रचणे ले पैहले ले ही वादा कितिरा था कि तेसरे लोका जुग-जुग जिउंदे रैहणा।

तितुस 1:4

तितुस ये चिठ्ठी हांऊँ तुजो लिखी करहा, तू सच्चे मेरे मह्ठे साहीं आ, क्यूंकि आस्से यीसू मसीह पर विस्वास करहे। हांऊँ प्रार्थना करहा कि आस्सा रा बापू परमेसर होर उद्धारकर्ता मसीह यीसू तुजो अनुग्रह होर सांति देंदा रहे।

इब्रानियो 9:15

इधी कठे मसीह परमेसर होर लोका रे बीचा नौंईं वाचा रा बिचौलिया बणेया। ताकि चुणिरे लोक हमेसा री विरासत पाए, जेस जो देणे रे वादा परमेसरे तिन्हा किन्हें कितिरा था। क्यूंकि पैहली वाचा रे अधीन रैहन्दे हुए लोके जितने पाप कितिरे थे, तिन्हो तेता री सजा ले छुड़ाणे रे कठे यीसुए आपणे प्राण देई दिते।

1 यहून्ना 2:25

परमेसरे आस्सा जो अनंत जिन्दगी देणे रा वादा कितिरा।