2 पतरस 1:1 - मंडयाली नंऊँआं नियम

¹ हांऊँ समौन पतरस तुस्सा रे कठे ये चिठ्ठी लिखी करहा। हांऊँ यीसू मसीह रा सेऊआदार होर चुणिरा चेला आ। हांऊँ ये चिठ्ठी तुस्सा सभी रे कठे लिखी करहा, जो आस्सा साहीं तेस कीमती विस्वास रा साझा करहे, जो आस्सा जो आस्सा रे परमेसर होर उद्धारकर्ता यीसू मसीहे दितिरा। से आस्सो परमेसरा री नजरा मन्झ धर्मी बणा।

2 पतरस 1:1 Iomraidhean Croise

मत्ती 10:2

होर यीसू रे बारा चुणिरे चेले रे नांऊँ एह्ड़े ऐं, पैहला समौन, जेस जो पतरस भी बोल्हा ऐं, होर तेसरा भाई अन्द्रियास; जब्दी रा मह्ठा याकूब, होर तेसरा भाई यहून्ना;

मत्ती 4:18

तिन्हें गलील समुद्रा रे बाढे फिरदे हुए समौन जो, जेस्जो जे पतरस बी बोल्हा ऐं, होर तेसरे भाई अन्द्रियासा जो समुद्रा मन्झ जाल पांदे देख्या, क्यूंकि स्यों मछी पकड़ने वाल़े थे।

लूका 1:47

होर हांऊँ मेरे उद्धार करणे वाले परमेसरा री वजहा ले खुस ई।

लूका 11:49

इधी कठे परमेसरे आपणी बुद्धि रे ज्रीए ये भी बोल्या कि, मां तिन्हा वाले नबी होर चुणिरे चेले भेजणे, होर तिन्हा, तिन्हा मन्झा ले कितने मारी देणे, होर कितने स्ताणे।

यहून्ना 1:42

अन्द्रियासे समौन यीसू वाले ल्यांदेया; यीसूए तेस जो देखी किन्हें बोल्या कि, “तू यहून्ना रा मह्ठा समौन आ, तू कैफा रा मतलब पतरस बोल्या जाणा।”

यहून्ना 12:26

अगर जो कोई मेरी सेऊआ करणा चाहां, ता से आई किन्हें मेरा चेला बणे; होर जेथी हांऊँ आ तेथी मेरा सेऊआ करणे वाल़ा भी हूंणां। अगर कोई मेरी सेऊआ करघा, ता बापू तेसरी इज्जत करणी।”

यहून्ना 20:21

यीसूए फेरी तिन्हा किन्हें बोल्या, “तुस्सा जो सांति मिलो! जिहां बापूए हांऊँ भेजिरा, तिहां ईं हांऊँ भी तुस्सा जो भेज्हा।”

चुणिरे चेले रे काम 15:14

हे भाईयो, मेरी सुणां: समौन पतरसे आस्से समझाये कि, परमेसरे अन्यजाति लोका मन्झा ले कुछ लोका जो आपणे लोक हूणे रे कठे चुणी किन्हें सभी ले पैहले केह्ड़ा प्यार जाहिर कितेया।

रोमियो 1:1

हांऊँ पौलुस ये चिट्ठी लिख्या करहा। हांऊँ यीसू मसीहा रा सेऊआदार आ। परमेसरे एक चुणिरा चेले रे रूपा मन्झ मेरा चुणाव कितेया, होर परमेसरे हांऊँ खुसी री खबर सुनाणे रे कठे नियुक्त कितिरा।

रोमियो 1:12

जेबे आस्सा एक दूजे किन्हें मिलणा, ता हांऊँ तुस्सा जो तुस्सा रे विस्वासा मन्झ मजबूत करणा चांहा, पर हांऊँ ये भी चांहा कि तुस्से मुंजो भी मेरे विस्वासा मन्झ मजबूत करो।

रोमियो 1:17

क्यूंकि खुसी री खबरा एस गल्ला जो जाहिर करी कि परमेसरे आस्से आपणी नजरा मन्झ धर्मी माह्णुं बणाये, जो सुर्हू ले लेई किन्हें आखरी तक विस्वासा पर टिकीरी; जिहां पवित्र सास्त्रा मन्झ भी लिखिरा कि, “परमेसरे जेस जो आपणी नजरा मन्झ धर्मी माह्णुं बणाया, तेस विस्वासा ले ही जिउंदे रैंह्णां।”

1 कुरिन्थियो 1:30

पर परमेसरे तुस्सा जो मसीह यीसू साउगी एक कितिरा होर मसीह रे ज्रीए से आस्सो आपणा ज्ञान देआ। होर परमेसर आस्सा जो आपणी नजरा मन्झ धर्मी भी बणा। मसीह रे ज्रीए आस्से पवित्र कितिरे होर से आस्सो आस्सा रे पापा ले अजाद करहा।

1 कुरिन्थियो 15:9

क्यूंकि हांऊँ चुणिरे चेले मन्झ सभी ले कम खास आ, बल्की चुणिरा चेला बणने रे लायक भी नी आ, क्यूंकि मैं परमेसरा री कलीसिया रे लोक स्ताईरे थे।

1 कुरिन्थियो 9:1

जो कुछ मुंजो खरा लगहा तेता जो खाणे रे कठे हांऊँ अजाद आ। हांऊँ एक चुणिरा चेला आ। मैं आस्सा रा प्रभु यीसू देखीरा। प्रभुए जो काम करणे रे कठे मुंजो दितिरा तुस्से तेता रा नतीजा।

2 कुरिन्थियो 4:13

पर आस्से खुसी री खबर सुणांदे रहे क्यूंकि आस्सा रा से ही विस्वास आ जेहड़ा भजन लिखणे वाले रा था, जेबे तिन्हें पवित्र सास्त्र मन्झ एह्ड़ा लिख्या कि, “मैं विस्वास कितेया, इधी कठे ग्लाया।”

2 कुरिन्थियो 5:21

मसीह जो पापा ले अनजाण था, तेस जो ही परमेसरे आस्सा रे कठे पापी बणाया, ताकि आस्से परमेसरा री नजरा मन्झ धर्मी माह्णुं बणी जाये, क्यूंकि मसीहे आस्सा रे पापा री सजा जो आपणे गास लेई लितिरा।

गलातियो 2:8

क्यूंकि परमेसरे जिन्हें पतरसा जो यहूदी लोका रे कठे चुणिरा चेला नियुक्त कितेया, तिन्हें ई हांऊ भी नियुक्त कितिरा था कि हांऊँ गैर-यहूदी लोका रे कठे चुणिरा चेला बणुं।

इफिसियो 3:5

पर परमेसरे पिछले जमाने रे लोका जो एस लकोईरी योजना रे बारे मन्झ नी दस्सीरा था, पर ऐबे पवित्र आत्मे एस योजना जो तेसरे पवित्र चुणिरे चेलेया होर नबिया पर जाहिर कितिरा।

इफिसियो 4:11

मसीहे ही ये बरदान कलीसिया रे लोका जो दितिरे; तिन्हें कुछ लोका जो चुणी लितिरा कि स्यों चुणिरे चेले बणे, होर कुछ लोका जो इधी कठे कि स्यों नबी बणे। तिन्हें कुछ लोका जो इधी कठे चुणिरा कि स्यों खुसी री खबरा रा प्रचार करहे, होर कुछ लोक कलीसिया री रखवाली करणे रे कठे, होर कुछ लोका जो स्खाणे रे कठे चुणिरा।

इफिसियो 4:5

आस्सा सभीरा एक ई प्रभु आ, होर एक ई आ जेस पर आस्से विस्वास करहे होर से यीसू मसीह ही आ, होर आस्से सभीए एक ई बपतिस्मा लितिरा।

फिलिप्पियो 1:1

हांऊँ पौलुस, तिमिथियुस साउगी ये चिठ्ठी लिखी करहा, होर आस्से यीसू मसीह रे सेऊआदार ऐं। हांऊँ ये चिठ्ठी फिलिप्पी सैहरा मन्झ रैहणे वाले परमेसरा रे पवित्र लोका रे कठे होर कलीसिया रे अगुवे होर सेऊआदारा रे नांऊँ लिख्या करहा।

फिलिप्पियो 1:29

क्यूंकि मसीह री वजहा ले तुस्सा पर ये अनुग्रह हुईरा कि ना सिर्फ तेस पर विस्वास करा पर तेसरे कठे दुःख भी सहन करा।

फिलिप्पियो 3:9

होर हांऊँ तेस साउगी एक हुई किन्हें जीऊ। परमेसरे मुंजो आपणी नजरा मन्झ धर्मी इधी कठे नी बणाया कि मैं मूसा री व्यवस्था रा पालन कितिरा, पर मसीह पर विस्वास करणे री वजहा ले ही परमेसरे हांऊँ आपणी नजरा मन्झ धर्मी माह्णुं बणाया।

2 तिमिथियुस 1:5

तेरी माऊ युनिके रे अंदर जो भरपूर विस्वास था से मुंजो याद आ, होर तेरी नानी लोईस रा भी तेह्ड़ा विस्वास था। होर मुंजो भरोसा आ कि सेई भरपूर विस्वास तेरे मन्झ भी हाया।

तितुस 1:1

हांऊँ पौलुस, एस्सा चिठ्ठी जो लिख्या करहा। हांऊँ परमेसरा रा सेऊआदार होर यीसू मसीह रा चुणिरा चेला आ। हांऊँ परमेसरा रे चुणिरे लोका रे विस्वासा जो मजबूत करणे रे कठे नियुक्त कितिरा, ताकि स्यों सच्चा जो जाणे होर परमेसरा जो खुस करणे वाली जिन्दगी जीए।

तितुस 1:4

तितुस ये चिठ्ठी हांऊँ तुजो लिखी करहा, तू सच्चे मेरे मह्ठे साहीं आ, क्यूंकि आस्से यीसू मसीह पर विस्वास करहे। हांऊँ प्रार्थना करहा कि आस्सा रा बापू परमेसर होर उद्धारकर्ता मसीह यीसू तुजो अनुग्रह होर सांति देंदा रहे।

तितुस 2:13

आस्से एह्ड़ा ही करदे रहे जेबे कि आस्से आपणे म्हान परमेसर होर उद्धारकर्ता यीसू मसीह जो आपणी महिमा साउगी एस संसारा मन्झ वापस आऊणें री आस करदे लगिरे।

याकूब 1:1

हांऊँ याकूब, परमेसरा होर प्रभु यीसू मसीह रा सेऊआदार आ। हांऊँ ये चिठ्ठी तिन्हा यहूदी विस्वासिया रे बारा गोत्रा जो संसारा मन्झ तितर-बितर हुई किन्हें रैंहयां ऐं लिख्दा लगिरा। तुस्सा सभी जो मेरा नमस्कार।

1 पतरस 1:1

हांऊँ पतरस, एस्सा चिठ्ठी जो लिखी करहा। हांऊँ यीसू मसीह रा चुणिरा चेला आ। हांऊँ ये चिठ्ठी परमेसरा रे चुणिरे तिन्हा लोका रे कठे लिखी करहा, जो परदेसिया साहीं पुन्तुस, गलातिया, होर कप्पुदुकीया, आसिया होर बितूनिया ईलाके रे कई सैहरा मन्झ रैंहयां ऐं।

1 पतरस 1:7

होर ये परेसानिया इधी कठे हुंहाँ ताकि ये जाहिर हो की तुस्सा रा विस्वास परमेसरा पर हाया की नी। मसीह पर तुस्सा रा विस्वास आगा मन्झ परखिरे सुद्ध कितिरे सोने ले भी ज्यादा कीमती आ। जिहां नास हूंणे वाल़ा सोना भी आगी किन्हें परखी जाहाँ, होर इंहां ही अगर तुस्सा रा विस्वास भी परेसानिया रे बीचा मन्झ मजबूत निकले, ता जेबे यीसू मसीहा दबारा वापस आऊंणा, तेस ध्याड़े तुस्सा जो भी बड़ाई, होर महिमा होर आदर मिलणा।

1 पतरस 2:7

इधी कठे तुस्से जे मसीह यीसू पर विस्वास करहे ये विस्वासी लोका रे कठे कीमती पात्थर आ। पर विस्वास नी करणे वाले लोका रे कठे पवित्र सास्त्रा मन्झ लिखिरा कि, “से पात्थर जेस जो राज मिस्त्रिये बेकार जाणेया था सेई पात्थर कोणे रा पात्थर बणी गया।”

1 पतरस 5:1

एक होर गल ई जो हांऊँ तुस्सा लोका किन्हें यानि कलीसिया रे अगुवे किन्हें बोलणा चाहां, क्यूंकि हांऊँ भी तिन्हा साहीं एक कलीसिया रा अगुवा। मैं आपु स्यों दुःख देखिरे जो मसीहे बौह्त पैहले काटीरे। जेबे तेस दबारा वापस आऊंणा मां तेसरी महिमा रा भी साझीदार बणना। तुस्सा साहीं अगुवा हूंणे रे नाते हांऊँ तुस्सा किन्हें अर्ज करहा,

2 पतरस 1:4

होर तेसरी खराई होर महिमा री वजहा ले तिन्हें आस्सा किन्हें महान होर कीमती वादे कितिरे। इन्हा वादे रे ज्रीए आस्से एस संसारा मन्झ जो बुरी इच्छा ई तेता ले बची सके, जो लोका रा नास करही। होर आस्से परमेसरा रे आपणे स्वभाव मन्झ साझी हुई जाये।

यहूदा 1:1

हांऊँ यहूदा एस चिठ्ठी जो लिखी करहा। हांऊँ यीसू मसीहा रा सेऊआदार होर याकूबा रा छोटा भाई आ। परमेसरे जिन्हा लोका जो आपणे गास विस्वास करणे रे कठे सादिरे, हांऊँ तिन्हा लोका जो ये चिठ्ठी लिखी करहा। बापू परमेसर तुस्सा किन्हें प्यार करहा होर यीसू मसीहा रे ज्रीए तुस्से सुरक्षित ऐं।