1 तिमिथियुस 6:5 - मंडयाली नंऊँआं नियम

⁵ एह्ड़े माह्णुंआं हमेसा एक दूजे किन्हें लड़ने मन्झ लगी रैहया, होर तिन्हारी बुद्धि खराब हुई गईरी। होर ऐबे स्यों कधी नी समझी सकदे कि सच्चाई क्या ई। स्यों समझे कि परमेसरा री सेऊआ करणा पैसे कमाणे रा जरिया।

1 तिमिथियुस 6:5 Iomraidhean Croise

मत्ती 12:33

“एक डाल फला ले ई पछ्याणया जाहाँ। अगर डाल खरा, ता तेसरे फल भी खरे हूंणे, अगर डाल बुरा, ता तेसरे फल भी बुरे हूंणे।

मत्ती 21:13

होर यीसूए तिन्हा किन्हें बोल्या, “पवित्र सास्त्रा मन्झ लिखिरा कि, मेरा मन्दर प्रार्थना रा घर बोल्या जाणा, पर तुस्से ता ये डाकुआ रा आडा बणाई दितिरा।”

मत्ती 23:13

हे व्यवस्था स्खाणे वाल़े होर फरीसी लोको तुस्से पाखंडी ऐं, तुस्सा जो बौह्त सजा मिलणी! तुस्से माह्णुं रे कठे स्वर्गा रे राजे रे दुराजे बन्द करहा ऐं। तुस्से ना ता आपु ई तेस मन्झ दाखल हुंहाँ ऐं, होर ना तेस मन्झ होरी जो दाखल हूंणां देहां ऐं।

1 कुरिन्थियो 11:16

पर अगर केसी जो लगहा कि हांऊँ गलत बोली करहा, ता तुस्से ये जाणी ले कि ये गल्ला आस्सा री कलीसिया मन्झ होर बाकि परमेसरा री कलीसिया मन्झ एह्ड़ी ही मन्हां ईं जाहीं।

2 थिस्सलुनकियो 3:6

हे भाईयो होर बैहणो, जो हक आस्से प्रभु यीसू मसीहे आस्सो दितिरा आस्से तुस्सा जो हुक्म दे; कि हर एक एह्ड़े विस्वासी भाई बैहणा जो लेखे नी पाऊआ, जो नकर्मा आ, होर आस्से जो गल्ला सखाईरी, तेता रे मताबक नी करदा।

1 तिमिथियुस 1:6

झूठे उपदेसा जो स्खाणे वाले एह्ड़े खरे कामा जो करणा छाडी दितिरा, होर बेकारा री बैहस-बाजी मन्झ फसी गईरे।

1 तिमिथियुस 3:3

से दारुबाज या मारपीट करणे वाल़ा नी हो; बल्की दूजेया पर दया करणे वाल़ा हो। होर ना झगड़ा करणे वाल़ा हो होर ना पैसे रा लालच करणे वाल़ा हो।

1 तिमिथियुस 3:8

कलीसिया रे अगुवे साहीं कलीसिया रे सेऊआदार भी एह्ड़े लोक हो जिन्हारी लोक इज्जत करदे हो, होर जो कुछ स्यों बोलदे हो तेता मन्झ इमानदार हो, सराबी होर दूजेया जो धोखा देई किन्हें पैसे कमाणे वाले नी हो।

1 तिमिथियुस 4:7

मन घड़न्त होर नर्क्कली काह्णियां रे कठे आपणा टैम बर्बाद नी करा, जेता ले जे परमेसरा जो इज्जत नी मिल्दी; होर भक्ति री जिन्दगी जीणे रे कठे आपणे आपा जो लगातार कोसिस करदा रेह।

1 तिमिथियुस 4:8

क्यूंकि सारीरिक व्यायाम ले थोह्ड़ा ई फायदा हुंहाँ, पर भक्ति सभ गल्ला रे कठे फायदेमंद ई, क्यूंकि एस जिन्दगी मन्झ होर आऊणें वाले जिन्दगी मन्झ भी परमेसरा री वादा कितिरी जिन्दगी तुस्सा जो मिलाईं।

1 तिमिथियुस 6:6

पर परमेसरा री सेऊआ करणा होर जो कुछ से आस्सा जो देआ तेता मन्झ संतुस्ट रेहणा, येई सभी ले बडी कमाई ई।

2 तिमिथियुस 3:5

तिन्हा लोका परमेसरा रे भक्त हूंणे रा भेस ता धरणा, पर तेसरी सामर्थ जो नकारी देणी; जो सच्चे तिन्हा जो परमेसरा रा भक्त बणाई सकी, एह्ड़े लोका ले दूर रैंह्णां।

2 तिमिथियुस 3:8

ये झूठे उपदेस स्खाणे वाले सच्चाई रा व्रोध करहे, जिहां यन्नेसे होर यम्ब्रेसे पुराणे टैमा मन्झ मूसा रा व्रोध कितेया था; ये ता एह्ड़े माह्णुं ऐं, जिन्हारी बुद्धि खराब हुई गईरी, होर आपणे विस्वासा जो लेई किन्हें हारी गईरे।

तितुस 1:11

इन्हारा मुंह बन्द करणा चहिए; कि ये लोक एह्ड़ा नी स्खायें, क्यूंकि जेबे स्यों एह्ड़ा स्खायें, ता स्यों सभ परिवारा रे विस्वासा जो बगाड़ी दे। स्यों पैसे कमाणे रे कठे एह्ड़ा स्खायें।

2 पतरस 2:15

होर स्यों ठीक काम नी करदे, होर जिहां बौह्त पैहले बओरा रे मह्ठे बिलामे जो बुरे काम कितिरे थे, तिन्हें भी एह्ड़ा करणा सुर्हू करी दितिरा। तेस जो पैसा कमाणे रे कठे लोका ले पाप कुराणा बांका लगहा था।

2 पतरस 2:3

एह्ड़े स्खाणे वाले लोक लालची हूंणे, होर मन घड़न्त कहाणीया बणाई किन्हें पैसा कमाणे रे कठे तुस्सा जो धोखा देणा। परमेसरे बौह्त पैहले ले ही इन्हों सजा देणे रा फैसला कितिरा था। होर ऐबे से करणे रे कठे त्यार आ, तेस सच्चे स्यों नास करी देणे।

यहूदा 1:11

तिन्हा जो बौह्त सजा मिलणी! तिन्हें आदमा रे मह्ठे कैना साहीं बुरे काम किते, जिन्हें आपणे भाई रा खून कितेया। जिहां बिलामे पैसा कमाणे रे कठे लोका ले पाप कुराया था, तिहां ही जल्दबाजी मन्झ झूठे उपदेस देणे वाले भी ये गलती किती। होर जिहां मूसा रे विरोध करणे री वजहा ले परमेसरे कोरहा जो नास करी दितिरा था, तिहां ही ये लोक भी नास किते जाणे, क्यूंकि ये लोक प्रभु रा बिरोध करी करहा ऐं।

प्रकासना री गल्ला 18:13

होर तिन्हा ले दालचीनी, मसाले, धुप, इत्र, लोबान, दाखरस, जैतुना रा तेल, मैदा, कणक, गाय-बोह्ल्द, भेड-बकरिया, घोड़े, रथ, लेणे वाल़ा कोई नी रैहया। होर जो लोक चीजा रा लेण-देण करहे स्यों ऐबे लोका जो नी बेची सकदे।