1 तिमिथियुस 6:4 - मंडयाली नंऊँआं नियम

⁴ ता से बौह्त बडयाई करणे वाल़ा बणी गईरा, होर कुछ नी जाणदा। एह्ड़ा माह्णुं जो बेकारा री गल्ला पर होर सब्दा पर लड़ने होर बैहस करणे री ब्मारी ई। एता री वजहा ले हिर्ख, होर झगड़े, होर दूजेया री बदनामी, होर बुरे-बुरे सक पैदा हुंहाँ ऐं।

1 तिमिथियुस 6:4 Iomraidhean Croise

चुणिरे चेले रे काम 15:2

जेबे पौलुस होर बरनबासा रा तिन्हा किन्हें झगड़ा होर बैहस हुई ता ये तय कितेया कि, पौलुस होर बरनबास, होर बाकि चेले एस गल्ला रे बारे मन्झ यरुस्लेम सैहरा जो चुणिरे चेले होर कलीसिया रे अगुवे वाले जाए।

चुणिरे चेले रे काम 18:15

पर अगर ये बैहस सिर्फ सब्दा, होर नांऊँआं, होर तुस्सा री मूसा री व्यवस्था रे बारे मन्झ ई, ता तुस्से ही जाणा; क्यूंकि हांऊँ इन्हा गल्ला रा न्यायी नी बणना चाहन्दा।”

चुणिरे चेले रे काम 8:9

तेस सैहरा मन्झ समौन नांऊँआं रा एक आदमी था, जो जादू टोणा करी किन्हें सामरिया सैहरा रे लोका जो हरान करहा था होर आपणे आपा जो बड़ा आदमी बणाहां था।

रोमियो 12:16

आपु मन्झ एकता रखा; बडयाई करणे वाले नी बणा; पर नम्र दीन लोका साउगी संगती रखा; आपणी नजरा मन्झ बुद्धिमान मत बणा।

रोमियो 13:13

होर आस्सो एह्ड़े जीणा चहिए जिहां आस्से ध्याड़ीया रे प्रयासे मन्झ जीणे वाले, ना कि न्याहरे मन्झ रही किन्हें बुरे काम करी किन्हें जीणे वाले। इधी कठे आस्सा मन्झ रंगरलिया, पी किन्हें मुतालणा, व्यभिचार, लुचपना, झगड़े होर जल्नी नी हूणीं चहिए।

रोमियो 14:1

विस्वासा मन्झ कमजोर आदमी जो तेसरे व्यक्तिगत राय पर बगैर सक करी किन्हें अपनाई लो।

रोमियो 2:8

पर जो सिर्फ आपणे बारे मन्झ सोचा ऐं होर सच्चाई जो नी मन्नदे, पर बुराई करना चाहें, परमेसरा रा गुस्सा होर कैहर तिन्हा पर पऊणा।

1 कुरिन्थियो 11:16

पर अगर केसी जो लगहा कि हांऊँ गलत बोली करहा, ता तुस्से ये जाणी ले कि ये गल्ला आस्सा री कलीसिया मन्झ होर बाकि परमेसरा री कलीसिया मन्झ एह्ड़ी ही मन्हां ईं जाहीं।

1 कुरिन्थियो 11:18

क्यूंकि सभी ले पैहली गल ता ये कि मैं ये सुणीरा कि, जेबे तुस्से कलीसिया मन्झ अराधना रे कठे कठ्ठा हुंहाँ ऐं, ता तुस्सा मन्झ फूट पईरी हुंहाँ ईं, होर हांऊँ विस्वास करहा जो गल्ला स्यों बोली करहे तिन्हा मन्झ ले कुछ-कुछ सही।

1 कुरिन्थियो 3:18

कोई आपणे आपा जो धोखे मन्झ नी रखे; अगर तुस्सा मन्झा ले कोई आपणे आपा जो संसारा रे लोका री नजरा मन्झ ज्ञानी सम्झहा, ता से तिन्हारी नजरा मन्झ नर्क्कले बणी जाए; ताकि तुस्से परमेसरा री नजरा मन्झ ज्ञानी बणी सके।

1 कुरिन्थियो 3:3

क्यूंकि तुस्से हाल्ले भी संसारा रे लोका साहीं ऐं, इधी कठे जेबे तुस्सा मन्झ जल्नी होर झगड़ा हूँआ ता से एस गल्ला जो साबित करहा कि तुस्से हाल्ले भी संसारा रे लोका साहीं ऐं। होर तुस्से तिन्हा लोका साहीं जीहां ऐं जो प्रभु रे लोक नी ऐं?

2 कुरिन्थियो 11:20

क्यूंकि जेबे तुस्सा जो कोई गुलाम बणाई लैहां, या सब कुछ लेई लेया जो तुस्सा वाले हाया, या तुस्सा रा फायदा लैहां ऐं, या आपणे आपा जो तुस्सा ले बडा बणाहां, या तुस्सा रे मुंहा पर चांडा मारहा, ता तुस्से तेसरी सही लैहां ऐं।

गलातियो 5:15

पर अगर तुस्से एक दूजे जो जानवरा साहीं काटहा-फाड़दे रहे, ता चतन्न रैहया कि, केतकी एक दूजे रा नास नी करी दो।

गलातियो 5:26

आस्से घमंड करणे वाले नी बणे, एक दूजे जो गुस्सा नी दलाणे वाले बणे; होर ना एक दूजे किन्हें हिर्ख रखा।

गलातियो 6:3

क्यूंकि अगर कोई कुछ नी हूंणे पर भी आपणे आपा जो बड़ा सम्झहा, ता आपणे आपा जो धोखा देहां।

फिलिप्पियो 1:15

ये सच्च आ की कुछ लोक मसीह रा प्रचार इधी कठे करहा ऐं क्यूंकि स्यों आस्सा ले हीर्ख रखे होर लड़ाई करहे, पर कुछ लोक खरी इरादे ले मसीहा रा प्रचार करहा ऐं।

फिलिप्पियो 2:14

सब काम बगैर गलांण होर बगैर बैहसा ले करा।

फिलिप्पियो 2:3

आपणे मतलब होर झूठी साना रे कठे कुछ मत करा, पर दीन हुई किन्हें, एक दूजे जो आपणे ले ज्यादा बढ़ी किन्हें समझा।

कुलुस्सियो 2:18

तिन्हा लोका रे धोखे ले बचा जो दीन हूंणे रा ढोंग करहे, होर स्वर्गदूता री अराधना करहे। स्यों डिंगा माराऐ कि आस्से दर्सन देखे। ये सारी गल्ला बेकार ई क्यूंकि एह्ड़े माह्णुंआं रे मन स्वार्थ इच्छा किन्हें भरीरा, होर स्यों बगैर वजहा घमंड करहे।

2 थिस्सलुनकियो 2:4

तेस परमेसर होर बाकि सभ चीजा रा विरोध करणा, जिन्हों लोक इस्वर बोली किन्हें तिन्हारी अराधना करहे, होर तेस एस गल्ला रा दावा करणा कि से इन्हा सभी ले खास आ। एथी तक कि दुस्ट आदमी परमेसरा रे मन्दरा मन्झ बैठी किन्हें ये भी दावा करहा कि से आपु ई परमेसर आ।

1 तिमिथियुस 1:4

होर लोका किन्हें बोल कि स्यों पुराणी मन घड़न्त काह्णियां, होर तिन्हारे बापदादेया री नांऊँआ री लम्बी सूची रे बारे री गल्ला पर आपणा टैम बर्बाद नी करहे। इन्हा गल्ला ले सिर्फ बैहस हुंहाँ ईं; होर बैहस करणे ले आस्सा री जिन्दगी मन्झ परमेसरा री योजना पूरी नी हुन्दी, होर एह्ड़ी योजना सिर्फ तेस पर विस्वासा करणे वाले रे ज्रीए ही पूरी हुईं।

1 तिमिथियुस 1:7

ये झूठे उपदेस स्खाणे वाले, तिन्हा व्यवस्था स्खाणे वाल़े साहीं बणना चाहें, जिन्हा जो मूसा री व्यवस्था रा ज्ञान आ। पर जिन्हा गल्ला जो स्यों स्खाणा चाहें, होर जिन्हा गल्ला जो स्यों बोलणे री हिम्मत करहे, तिन्हा गल्ला जो स्यों आपु नी समझ्दे।

1 तिमिथियुस 3:6

से एह्ड़ा माह्णुं नी हो, जो हाल्ले ही विस्वासी बणीरा हो, केते एह्ड़ा नी हो कि से घमंडी बणी जाये, होर परमेसर तेस जो तेस तरीके किन्हें सजा दे, जिहां सैताना जो भी घमंडी बणने पर सजा दितिरी थी।

2 तिमिथियुस 2:14

ये गल्ला जो मैं तुस्सा किन्हें बोलिरी, तुस्सा रे लोक इन्हा जो भूली नी जाये। होर प्रभु जो गुआह मनी किन्हें तू तिन्हो चेतावनी दे कि, स्यों सब्दा रे मतलबा पर बैहस नी करहे। एह्ड़ी बैहसा ले कोई फायदा नी आ; बल्की सुणने वाल़ेया जो नुकसान ही पूजा।

2 तिमिथियुस 2:23

पर नर्क्कली, होर बेकारा री बैहसा ले दूर रैहया। क्यूंकि तुस्से जाणहां ऐं कि इन्हा ले लड़ाई-झगड़े हुंहाँ ऐं।

2 तिमिथियुस 3:4

दूजेया जो धोखा देणे वाले, ढीठ, आपु जो दूजेया ले बडे समझणे वाले होर परमेसरा किन्हें प्यार नी करणे वाले, पर सुख विलासा रे चाहणे वाले लोक हूंणे।

तितुस 3:9

बन्सावली किन्हें जुड़ीरे विवाद, मूसा री व्यवस्था किन्हें जुड़ीरे रगड़े झगड़े होर मूर्खतापूर्ण मतभेदा री गल्ला मन्झ नी पया; क्यूंकि इन्हा बैहसा ले कोई फायदा नी आ, ये सभ बेकार ऐं।

याकूब 1:19

हे भाईयो होर बैहणो, ये गल तुस्से जाणी लेया; तुस्से सुणने रे कठे हमेसा तैयार होर बोलणे मन्झ सब्र रखणे वाले होर गुस्सा करणे मन्झ जल्दबाजी नी करणे वाले हो।

2 पतरस 2:12

पर ये स्खाणे वाले बेअक्ल जानवरा साहीं ऐं, क्यूंकि ये जानवर आपणे दिमागा ले कुछ नी सोचदे होर सिर्फ पकड़े होर मारे जाणे रे कठे जम्मिरे; ये लोक जो तिन्हारे मना मन्झ आये तेह्ड़ा ही करहे, होर जिन्हा गल्ला रे बारे मन्झ नी समझ्दे तिन्हारे बारे मन्झ भी बुरा भला बोल्हा ऐं, परमेसरा सच्चे स्यों इंहां ही नास करी देणे, जिहां लोक जानवरा जो मारी दे।

2 पतरस 2:18

जेबे स्यों लोको स्खायें, स्यों बेकार होर बडयाई री गल्ला जो बोल्हे। स्यों बोल्हे कि स्यों आपणी सरीरा री इच्छा रे मताबक बेज्जत करणे वाली सारी गल्ला जो करही सक्हा ऐं। होर जिन्हें लोके ऐबे-ऐबे बुरे काम करणा छाडी किन्हें विस्वासी बणिरे, स्यों तिन्हा जो धोखा देई किन्हें वापस पाप करणे रे कठे हिम्मत दे।

यहूदा 1:10

पर ये लोक जिन्हा गल्ला जो नी समझ्दे, तेता रे बारे मन्झ बुरा-भला बोल्हा ऐं। होर जिन्हा गल्ला जो स्यों समझे होर जिन्हा गल्ला जो स्यों नासमझ जानवरा साहीं स्वभावा ले ही करहा ऐं, इन्हा पाप भरी गल्ला करणे ले ही स्यों आपणे आपा रा नास करी करहा ऐं।

यहूदा 1:16

ये लोक हमेसा परमेसरा रे खलाफ बोल्हे होर दूजेया री गलतिया काढे, होर आपणी इच्छा रे मताबक हमेसा बुरे काम करहे। स्यों आपणे बारे मन्झ बडी-बडी गल्ला बोल्हे होर दूजेया री तारीफ करणे रा ढोंग करहे, ताकि तिन्हो तेता ले कुछ फायदा मिली सके।

प्रकासना री गल्ला 3:17

तू सोच्हा कि हांऊँ अमीर आ, होर मेरे वाले सभ कुछ आ होर मुंजो केसी गल्ला री कमी नी ई। पर तू ये सच्चाई नी जाणदा कि, तू अभागा, बेकार होर गरीब होर काणा, होर नांगा आ।