1 तिमिथियुस 5:8 - मंडयाली नंऊँआं नियम

⁸ पर अगर कोई आपणे रिस्तेदारा री, होर आपणे परिवारा री फिकर नी करहे, ता से विस्वासा ले मुखरी गया, होर अविस्वासी लोका ले भी बुरा बणी गईरा।

1 तिमिथियुस 5:8 Iomraidhean Croise

मत्ती 18:17

अगर से तिन्हारी भी नी सुणे, ता कलीसिया किन्हें बोली दे, पर अगर से कलीसिया री भी नी सुणे, ता तू तेसके एह्ड़ा व्यवहार करा जिहां तुस्से गैर-यहूदी होर चुंगी लैणे वाल़ा साहीं करहे।”

मत्ती 7:11

जेब्की तुस्से बुरे हुई किन्हें, आपणे बच्चेया जो खरी चीजा देणा जाणहां ऐं, ता तुस्सा रे स्वर्गीय बापू आपणे मांगणे वाल़े जो खरी चीजा कि नी देणी!

यहून्ना 15:22

अगर हांऊँ नी आऊंदा होर तिन्हा किन्हें गल्ला नी करदा, ता स्यों पापी नी ठैहरदे, पर ऐबे तिन्हा वाले तिन्हारे पापा रे कठे कोई भाना नी आ।

1 कुरिन्थियो 6:6

बल्कि एक विस्वासी दूजे विस्वासी रे खलाफ मुकद्दमे जो लेई किन्हें अविस्वासी न्यायधिसा वाले जा। होर स्यों एस कामा जो अविस्वासी लोका रे साम्हणें करहे।

2 कुरिन्थियो 12:14

ऐबे हांऊँ त्रीजी बारी तुस्सा वाले आऊणें रे कठे त्यार आ, होर एस बारी भी मां तुस्सा ले कोई मदद नी लैणी। क्यूंकि हांऊँ तुस्सा री जायदाद नी, बल्की हांऊँ तुस्सा जो चाहां। क्यूंकि बाल बच्चेया जो माऊ-बापू रे कठे धन दौलत कठा नी करणा चहिए, पर माऊ-बापू जो बाल बच्चेया रे कठे धन दौलत जोड़नी चहिए।

2 कुरिन्थियो 6:15

होर मसीह रा सैताना साउगी कोई रिस्ता नी आ। होर विस्वासी लोका रा अविस्वासी लोका साउगी कोई मेल नी आ।

गलातियो 6:10

इधी कठे जेबे भी आस्सो मौका मिले, आस्से सभी लोका रा भला करहे; खास करी किन्हें विस्वासी भाईया रा।

2 तिमिथियुस 2:12

अगर आस्से तेसरे खातर दुःख सहन करदे हुए धीरज रखे, ता आस्सा तेस साउगी राज भी करणा; पर अगर आस्से तेस जो जाणने ले मना करघे, ता तेस भी बोलणा कि आस्से तेसरे लोक नी ऐं।

2 तिमिथियुस 3:5

तिन्हा लोका परमेसरा रे भक्त हूंणे रा भेस ता धरणा, पर तेसरी सामर्थ जो नकारी देणी; जो सच्चे तिन्हा जो परमेसरा रा भक्त बणाई सकी, एह्ड़े लोका ले दूर रैंह्णां।

तितुस 1:16

झूठे उपदेस स्खाणे वाले बोल्हा ऐं कि, आस्से परमेसरा जो जाणहां ऐं; पर तिन्हारे काम एस गल्ला जो साफ जाहिर करहे कि स्यों परमेसरा जो नी जाणदे। क्यूंकि स्यों हुक्म नी मनणे वाले ऐे होर परमेसरा तिन्हा किन्हें नफरत करहा; होर स्यों कोई भी खरे काम नी करदे।

2 पतरस 2:1

होर जिहां बौह्त पैहले इस्राएल देसा मन्झ झूठे नबी हुंहाँ करहा ऐं थे, तिहां ईं ऐबे तुस्सा री कलीसिया मन्झ भी झूठे उपदेस देणे वाल़ेया आऊंणा, होर तिन्हा परमेसरा रे बारे मन्झ घातक झूठ बोलणा। एथी तक कि तिन्हा मसीह जो आस्सा रा एक ही माल्क ऐं तेसरा इनकार करणा, जिन्हें जे स्यों पापा ले अजाद किते, होर एस तरहा तिन्हा आपणे गास अचानक बिनास लेई आऊंणा।

यहूदा 1:4

क्यूंकि यीसू मसीह पर विस्वास करणे रा ढोंग करणे वाले कुछ लोक तुस्सा री कलीसिया किन्हें जुड़ी गईरे। ये परमेसरा री इज्जत नी करदे होर गलत उपदेस दें कि आस्से लुचपन करी सके, क्यूंकि परमेसर आस्सा रे पाप माफ करी देआ। स्यों प्रभु यीसू मसीहा रा इनकार करहा ऐं जो आस्सा रा एक ऐं प्रभु होर माल्क आ। बौह्त टैम पैहले पवित्र सास्त्रा मन्झ लिखिरा था कि परमेसर आस्सो सजा देआ।

प्रकासना री गल्ला 2:13

हांऊँ ये ता जाणहां कि, तू जेस सैहरा मन्झ रैंहयां, जेथी सैताना रा गढ़ आ। तू मेरे कठे वफादार रैहया, होर तैं कधी मेरे पर विस्वास करणा नी छाडेया। तेबे भी नी जेबे अन्तिपास तुस्सा रे सैहरा मन्झ मारी दितिरा था, जेथी जे सैताना रा वास आ, क्यूंकि से भरोसे रे लायक सेऊआदार था जिन्हें मेरे बारे मन्झ प्रचार कितिरा था।

प्रकासना री गल्ला 3:8

हांऊँ जाणहां कि तू क्या काम करहा, होर तेरी सामर्थ थोह्ड़ी ई, पर तैं मेरी गल्ला मन्ही री, होर जो विस्वास तेरा मेरे पर आ, से विस्वास तैं नी छाडेया। इधी कठे मैं तेरे साम्हणें एक दुराजा खोल्ही किन्हें रखिरा, जेस जो कोई बंद नी करी सक्दा।