1 तिमिथियुस 2:7 - मंडयाली नंऊँआं नियम

⁷ एस वजहा ले परमेसरे मुंजो खुसी री खबरा रा प्रचारक होर चुणिरा चेला नियुक्त कितिरा। तिन्हें हांऊँ चुणिरा कि हांऊँ अन्यजाति लोका जो विस्वास होर सच्चाई रे बारे मन्झ सखाई सकूं। हांऊँ सच्च बोल्हा, झूठ नी बोलदा।

1 तिमिथियुस 2:7 Iomraidhean Croise

यहून्ना 7:35

यहूदी अगुवे एक दूजे मन्झ बोलदे लगे, “एस केथी जाणा कि, आस्सा जो ये नी मिलणा? क्या एस यहूदी लोका वाले जाणा, जो यूनान देसा रे सैहरा मन्झ तितर बीतर हुई किन्हें रैहें, होर तिन्हो जो भी स्खाणा चाहां?

चुणिरे चेले रे काम 14:27

होर अन्ताकिया सैहरा मन्झ पुज्ही किन्हें, तिन्हें कलीसिया कठी किती होर दसेया कि, परमेसरे आस्सा साउगी केह्ड़े बडे-बडे काम किते! होर अन्यजाति लोका जो प्रभु यीसू पर विस्वास करणे रे कठे मदद किती।

चुणिरे चेले रे काम 22:21

होर प्रभुए मेरे किन्हें बोल्या, ‘चली जा; क्यूंकि मां तू बौह्त सारी जातिया वाले दूर-दूर भेजणा।’”

चुणिरे चेले रे काम 26:20

पर पैहले दमिस्क सैहरा रे, फेरी यरुस्लेम सैहरा रे रैहणे वाल़ेया जो, तेबे यहूदिया ईलाके रे मन्झ होर अन्यजाति लोका मन्झ ये प्रचार करदा रैहया कि, पाप करणा छाडी देआ होर परमेसरा वखा जो फिरा होर एह्ड़ा काम करा ताकि तुस्सा री जिन्दगी ले पता लगी सके कि तुस्से आपणे पापा ले पस्चाताप करी लईरा।

चुणिरे चेले रे काम 9:15

पर प्रभुए तेस किन्हें बोल्या कि, “तू चला जा; क्यूंकि साऊल ता अन्यजाति लोका होर राजे माहराजे, होर इस्राएल देसा रे साम्हणें मेरा नांऊँ रा प्रचार करणे रे कठे मेरा चुणिरा एक जरीआ।

रोमियो 1:9

परमेसर मेरा गुआह आ कि, कियां हांऊँ तुस्सा सभी जो आपणी प्रार्थना मन्झ लगातार याद करदा रैंहयां। से परमेसर, जेसरे मह्ठे री खुसी री खबरा जो हांऊँ पुरे मना किन्हें प्रचार करहा।

रोमियो 10:14

पर जिन्हें लोके प्रभु यीसू मसीह पर विस्वास नी कितेया, ता तिन्हा से मददा रे कठे किधियो हाका पाणी? अगर तिन्हें प्रभु रे बारे मन्झ नी सुणिरा ता तेस पर विस्वास किहाँ करणा? होर स्यों किहाँ सुणी सके जेबे तक कि तिन्हो कोई प्रभु रे बारे मन्झ नी सुणाये?

रोमियो 11:13

हांऊँ तुस्सा अन्यजाति लोका किन्हें ये गल्ला बोल्हा। जेब्की हांऊँ अन्यजाति लोका रे कठे चुणिरे चेले आ, ता हांऊँ आपणी सेऊआ री बड़ाई करहा।

रोमियो 15:16

कि हांऊँ अन्यजाति रे लोका रे कठे मसीह यीसू रा सेऊआदार हुई किन्हें एक याजका साहीं परमेसरा रे वखा ले खुसी री खबरा रा प्रचार करहा। जेस ले अन्यजाति लोका जो जिन्हा जो पवित्र आत्मे पवित्र कितिरा, तिन्हा जो हांऊँ परमेसरा जो चढावे मन्झ चढ़ाई सकूं, जेस ले परमेसरा खुस हूंणा।

रोमियो 9:1

ऐबे अगर परमेसरा रे प्यारा ले कोई आस्सो लग नी करी सकदा, ता किधियो इस्राएल देसा रे लोक परमेसरा ले दूर हुई गये जो मेरे आपणे यहूदी लोक ऐं, मुंजो एस गल्ला ले बौह्त दुःख आ होर मेरे दिला मन्झ तिन्हारे रे कठे बौह्त बोझ आ। मेरे आपणे लोका रे छुटकारे कठे अगर मेरे पर दोस लगे या हांऊँ मसीह ले लग भी कितेया जांऊँ, तेबे भी हांऊँ एता रे कठे त्यार आ। होर हांऊँ सच्च बोला कि मसीह मेरा गुआह आ। मेरी अंतरात्मा होर पवित्र आत्मा भी एस गल्ला री गुआही देआ कि हांऊँ झूठ नी बोलदा।

1 कुरिन्थियो 9:1

जो कुछ मुंजो खरा लगहा तेता जो खाणे रे कठे हांऊँ अजाद आ। हांऊँ एक चुणिरा चेला आ। मैं आस्सा रा प्रभु यीसू देखीरा। प्रभुए जो काम करणे रे कठे मुंजो दितिरा तुस्से तेता रा नतीजा।

2 कुरिन्थियो 11:31

परमेसर, जो यीसू मसीह रा बापू, जो हमेसा बड़ाई रे लायक आ, से जाणहां कि, हांऊँ झूठ नी बोल्दा।

गलातियो 1:20

परमेसर मेरा गुआह आ कि, जो गल्ला हांऊँ तुस्सा जो लिख्या करहा, तेता मन्झ कोई भी झूठ नी आ।

गलातियो 2:16

आस्से यहूदी विस्वासी लोक जाणांहे कि माह्णुं मूसा री व्यवस्था जो मनणे ले परमेसरा री नजरा मन्झ धर्मी नी बणदा, पर सिर्फ यीसू मसीह पर विस्वास करणे ले ही परमेसरा री नजरा मन्झ धर्मी बणहां। इधी कठे आस्से आपु भी मसीह यीसू पर विस्वास कितेया कि, आस्से मूसा री व्यवस्था जो मनणे ले नी पर यीसू मसीह पर विस्वास करणे ले परमेसरा री नजरा मन्झ धर्मी बणी जाये। क्यूंकि व्यवस्था जो मनणे ले कोई भी माह्णुं परमेसरा री नजरा मन्झ धर्मी नी बणना।

गलातियो 2:9

याकूब, पतरस, होर यहून्ना जो कलीसिया रे जाणे-माने अगुवे समझी जाहें थे, तिन्हें तेस बरदाना जो पछयाणी लितेया, जो मुंजो मिलिरा। तिन्हें मेरे होर बरनबास साउगी आपणा हाथ मलाई किन्हें आस्से आपणे साथी बणाये। होर स्यों एस गल्ला ले मंजूर हुई गये कि आस्सा गैर-यहूदी लोका वाले जाणा, होर तिन्हा यहूदी लोका वाले जाणा।

गलातियो 3:9

इधी कठे जो लोक परमेसरा पर विस्वास करहा ऐं, परमेसर तिन्हो भी अब्राहमा साहीं आसीस देआ।

2 तिमिथियुस 1:11

एस वजहा ले परमेसरे मुंजो खुसी री खबरा रा प्रचारक होर चुणिरा चेला नियुक्त कितिरा। ताकि हांऊँ अन्यजाति लोका जो सखाई सकूं।

2 पतरस 2:5

तुस्से ये भी जाणहां ऐं कि बौह्त पैहले एह्ड़े लोक थे जो परमेसरा रे डरा बगैर जिन्दगी जीहां ऐं थे, होर परमेसरे तिन्हा लोका रे बुरे कामा जो भी नजरअंदाज नी कितेया। एता रे बजाय परमेसरे तिन्हो सजा दिती होर जल प्रलय कुराई किन्हें पूरी धरती जो भरी दितेया, जेबे तक कि सारे लोक मरी नी गये। पर तिन्हें नूह बचाया जो परमेसरा री नजरा मन्झ धर्मी बणने रा प्रचार करहा था, होर तेस साउगी सात आदमी भी बचाए।