1 तिमिथियुस 1:4 - मंडयाली नंऊँआं नियम

⁴ होर लोका किन्हें बोल कि स्यों पुराणी मन घड़न्त काह्णियां, होर तिन्हारे बापदादेया री नांऊँआ री लम्बी सूची रे बारे री गल्ला पर आपणा टैम बर्बाद नी करहे। इन्हा गल्ला ले सिर्फ बैहस हुंहाँ ईं; होर बैहस करणे ले आस्सा री जिन्दगी मन्झ परमेसरा री योजना पूरी नी हुन्दी, होर एह्ड़ी योजना सिर्फ तेस पर विस्वासा करणे वाले रे ज्रीए ही पूरी हुईं।

1 तिमिथियुस 1:4 Iomraidhean Croise

2 कुरिन्थियो 1:12

आस्से आपणी अंतरात्मा री सच्चाई पर बडयाई करहा ऐं। संसारा मन्झ होर खास करी किन्हें तुस्सा रे बीचा मन्झ आस्सा रा जीवन पवित्र होर सच्चा था, जो परमेसरा री तरफा ले आस्सा जो मिलिरा था। आस्से माह्णुंआं रे ज्ञाना पर भरोसा नी रखेया, बल्कि परमेसरा रे अनुग्रहा पर भरोसा रखेया।

इफिसियो 3:2

परमेसरे आपणे बड़े अनुग्रहा ले मुंजो तुस्सा जो खुसी री खबर सुणाणे रा काम दितिरा, तेता रे बारे मन्झ तुस्से जरुर सुणिरा हुन्घा।

1 तिमिथियुस 3:16

होर एता मन्झ कोई सक नी आ कि, परमेसरे जो सच्ची खबर जाहिर कितिरी, से पूरी तरहा ले सच्च ई, मसीह जो माह्णुं रे रूपा मन्झ जाहिर हुआ, पवित्र आत्मे तेस जो हर कामा मन्झ धर्मी ठैहर्या, स्वर्गदूते से देखेया, होर स्वर्गा री महिमा री वखा जो से चकी लितेया गया, लोके तेसरे बारे मन्झ जाति-जाति मन्झ प्रचार कितेया, संसारा रे लोके तेस पर विस्वास कितेया।

1 तिमिथियुस 4:7

मन घड़न्त होर नर्क्कली काह्णियां रे कठे आपणा टैम बर्बाद नी करा, जेता ले जे परमेसरा जो इज्जत नी मिल्दी; होर भक्ति री जिन्दगी जीणे रे कठे आपणे आपा जो लगातार कोसिस करदा रेह।

1 तिमिथियुस 6:11

पर हे तिमिथियुस, तू जो परमेसरा रा जण आ, तू इन्हा गल्ला ले दूर रेह। हर एक कोसिस कर कि तू धर्मा रे काम करी सके। परमेसरा री भक्ति करणे वाली जिन्दगी जी। मसीह पर विस्वास रख। दूजे लोका किन्हें प्यार कर। मुस्किल हालात मन्झ धीरज रख। होर दूजे लोका ले नम्रता साउगी बर्ताव कर।

1 तिमिथियुस 6:20

हे तिमिथियुस, परमेसरे जो काम तुजो सौंपी रा, तू तेता जो पूरा कर। जो गल्ला आत्मिक नी, होर बेकारा री बैहसा ले दूर रह, होर तिन्हा ले भी जो परमेसरा रे सच्चे उपदेसा रे व्रोधा मन्झ ई, जिन्हा जो स्यों गलती किन्हें “ज्ञान” बोले।

2 तिमिथियुस 2:14

ये गल्ला जो मैं तुस्सा किन्हें बोलिरी, तुस्सा रे लोक इन्हा जो भूली नी जाये। होर प्रभु जो गुआह मनी किन्हें तू तिन्हो चेतावनी दे कि, स्यों सब्दा रे मतलबा पर बैहस नी करहे। एह्ड़ी बैहसा ले कोई फायदा नी आ; बल्की सुणने वाल़ेया जो नुकसान ही पूजा।

2 तिमिथियुस 2:22

तिन्हा बुरी गल्ला ले दूर रेह जेस जो करणे जो जुआना री इच्छा करी; होर जो सुद्ध मना ले प्रभु री अराधना करहा ऐं, तिन्हा साउगी धार्मिकता री जिन्दगी, विस्वास, प्यार, होर सांति रखी किन्हें अगे बढ़दे रहो।

2 तिमिथियुस 2:23

पर नर्क्कली, होर बेकारा री बैहसा ले दूर रैहया। क्यूंकि तुस्से जाणहां ऐं कि इन्हा ले लड़ाई-झगड़े हुंहाँ ऐं।

2 तिमिथियुस 4:4

तिन्हा सच्चाई नी सुणनीं, पर झूठी मन घड़ंत काह्णियां सुणनीं।

तितुस 1:1

हांऊँ पौलुस, एस्सा चिठ्ठी जो लिख्या करहा। हांऊँ परमेसरा रा सेऊआदार होर यीसू मसीह रा चुणिरा चेला आ। हांऊँ परमेसरा रे चुणिरे लोका रे विस्वासा जो मजबूत करणे रे कठे नियुक्त कितिरा, ताकि स्यों सच्चा जो जाणे होर परमेसरा जो खुस करणे वाली जिन्दगी जीए।

तितुस 1:14

यहूदी लोका री काह्णियां पर होर तिन्हा माह्णुंआं रे हुक्मा पर मन नी ल्गाऊआ, जो सच्चाई ले भटकी जाहें।

तितुस 3:9

बन्सावली किन्हें जुड़ीरे विवाद, मूसा री व्यवस्था किन्हें जुड़ीरे रगड़े झगड़े होर मूर्खतापूर्ण मतभेदा री गल्ला मन्झ नी पया; क्यूंकि इन्हा बैहसा ले कोई फायदा नी आ, ये सभ बेकार ऐं।

इब्रानियो 13:9

क्यूंकि यीसू मसीह कधी नी बदल्दा कोई तुस्सा जो कई किस्मा रे अजीब उपदेसा रे ज्रीए खरे रस्ते ले नी भड़काए, क्यूंकि तुस्सा रे मना रे कठे ये खरा आ कि स्यों अनुग्रहा रे ज्रीए पक्के बणे, ना कि खाणे पीणे री चीजा रे बिधिया रे मनणे ले, क्यूंकि इन्हा गल्ला जो मनणे ले तिन्हारा भी कोई फायदा नी आ, जो इन्हा गल्ला जो मन्हें थे।

2 पतरस 1:16

जेबे आस्से चुणिरे चेले तुस्सा जो प्रभु यीसू मसीह रे दबारा वापस आऊंणा होर तेसरी सामर्था रे बारे मन्झ दसेया था, ता आस्से चुतुराई किन्हें मन घड़न्त कहाणीया नी सुणाई री थी। बल्की आस्से आपणी हाखिया ले तेसरी महानता देखी थी।