1 तिमिथियुस 1:15 - मंडयाली नंऊँआं नियम

¹⁵ ये भरोसे करणे रे लायक गल्ला ई होर हर तरहा मन्नणे रे लायक ई कि, मसीह यीसू आस्सा पापिया रा उद्धार करणे रे कठे संसारा मन्झ आया, जिन्हा मन्झ सभी ले बडा पापी हांऊँ था।

1 तिमिथियुस 1:15 Iomraidhean Croise

मत्ती 1:21

तेस्सा एक बच्चा जमणा होर तू तेसरा नांऊँ यीसू रख्या, क्यूंकि तेस आपणे लोका रा तिन्हारे पापा ले उद्धार करणा।”

मत्ती 18:10

“देखा, तुस्से इन्हा छोटे बच्चे मन्झा ले केसी जो बेकार देख्या जाणदे; क्यूंकि हांऊँ तुस्सा किन्हें सच्च बोल्हा कि, स्वर्गा मन्झ तिन्हारे स्वर्गदूत मेरे स्वर्गीय बापू रे साम्हणें हमेसा हाजिर रैंहयां ऐं।

मत्ती 18:11

क्यूंकि हांऊँ माह्णुंआं रा मह्ठा भटकिरे लोका जो बचाणे रे कठे आईरा।

मत्ती 20:28

हांऊँ माह्णुं रा मह्ठा इधी कठे नी आईरा कि, मेरी सेऊआ किती जाए, पर इधी कठे आईरा कि, हांऊँ आपु दूजे री सेऊआ करूं, होर कईया रे छुटकारे रे कठे आपणी जान देऊँ।”

मत्ती 9:13

इधी कठे तुस्से जाई किन्हें एता रा मतलब सीखी लऊआ कि, हांऊँ बलिदान नी पर अनुग्रह चाहां; क्यूंकि जो आपणे आपा जो धर्मी सोच्हा ऐं तिन्हा जो मेरी ज्रूरत नी ई, पर तिन्हा जो मेरी जरूरत ई स्यों जे आपणे आपा जो पापी मन्हां ऐं।”

मरकुस 2:17

यीसूए ये सुणी किन्हें, तिन्हा किन्हें बोल्या, “भले चंगे जो बैदा री ज्रूरत नी ई, पर ब्मारा जो बैदा री ज्रूरत ई। जो आपणे आपा जो धर्मी सोच्हा ऐं तिन्हा जो मेरी ज्रूरत नी ई, पर तिन्हा जो मेरी जरूरत ई स्यों जे आपणे आपा जो पापी मन्हां ऐं।”

लूका 15:2

होर फरीसी लोक होर व्यवस्था स्खाणे वाल़े गलांण करी किन्हें बोल्दे लगे कि, “ये ता पापिया साउगी मिल्हा होर तिन्हा साउगी खांहां भी आ।”

लूका 19:10

क्यूंकि जो लोक परमेसरा ले दूर हुई गईरे तिन्हा जो तोपणे होर तिन्हारा उद्धार करणे रे कठे हांऊँ माह्णुं रा मह्ठा आईरा।”

लूका 5:32

जो आपणे आपा जो धर्मी सोच्हा ऐं तिन्हा जो मेरी ज्रूरत नी ई, पर तिन्हा जो मेरी जरूरत ई स्यों जे आपणे आपा जो पापी मन्हां ऐं तिन्हारे मना जो बदलने रे कठे आईरा।”

यहून्ना 1:12

पर जिन्हें से अपनाया, जो तेस पर विस्वास रख्हा ऐं, तिन्हें तिन्हा जो परमेसरा रे बच्चे हूंणे रा हक दितेया।

यहून्ना 1:29

दूजे ध्याड़े यहून्ना बपतिस्मा देणे वाल़े यीसू जो आपणी तरफ आऊंदे देखी किन्हें बोल्या, “देखा, ये परमेसरा रा छेलू आ, जो संसारा रे पापा जो चक्की लैहां।

यहून्ना 12:47

अगर कोई मेरी गल्ला सुणी किन्हें नी मनदे, ता मां से दोसी नी मनणा, क्यूंकि हांऊँ संसारा रे लोका जो दोसी बनाणे रे कठे नी, पर संसारा रे लोका रा उद्धार करणे रे कठे आईरा।

यहून्ना 3:36

जो परमेसरा रे मह्ठे पर विस्वास करहा, अनंत जिन्दगी तेसरी ई; पर जो मह्ठे री नी मन्नदा, तेस अनंत जिन्दगी नी देखणी, पर परमेसरा रा गुस्सा तेस पर रैंहयां।”

चुणिरे चेले रे काम 11:1

चुणिरे चेले होर विस्वासियो जो यहूदिया ईलाके मन्झ थे सुणेया कि, अन्यजाति लोके भी परमेसरा रा बचन मनी लईरा।

चुणिरे चेले रे काम 11:18

ये सुणी किन्हें, स्यों यहूदी विस्वासी चुप रैहे, होर परमेसरा री बड़ाई करी किन्हें बोल्दे लगे, “ता परमेसरे अन्यजाति लोका जो भी अनंत जिन्दगी पाणे रे कठे पापा जो छाडी किन्हें मसीहा पर विस्वास करणे रा दान दितिरा।”

चुणिरे चेले रे काम 3:26

पतरसे बोल्या कि, जेबे परमेसरे आपणे सेऊआदारा जो मरिरे मन्झ ले जिउंदा करी किन्हें सभी ले पैहले तुस्सा इस्राएली लोका वाले आसीस देणे रे कठे भेज्या, ताकि तुस्सा मन्झा ले हर एक बुराईया ले फेरी सको।”

रोमियो 11:14

ताकि किहाँ नी किहाँ हांऊँ आपणे यहूदी लोका मन्झ जल्नी कुराई किन्हें तिन्हा मन्झा ले एकी रा भी उद्धार करी सकूं।

रोमियो 5:6

क्यूंकि जेबे आस्से कमजोर थे, ता परमेसरा रे नियुक्त टैमा पर मसीह यीसू आस्सा पापी लोका रे कठे मरेया।

1 कुरिन्थियो 15:9

क्यूंकि हांऊँ चुणिरे चेले मन्झ सभी ले कम खास आ, बल्की चुणिरा चेला बणने रे लायक भी नी आ, क्यूंकि मैं परमेसरा री कलीसिया रे लोक स्ताईरे थे।

इफिसियो 3:8

हालांकि परमेसरे रे पवित्र लोका मन्झा ले हांऊँ सभी ले छोटा आ। फेरी भी परमेसरे मेरे पर ये अनुग्रह कितेया कि हांऊँ गैर-यहूदी लोका जो ये खुसी री खबर सुणाई सकूं कि, मसीह ले मिलणे वाली आसीसे इतनी बडी कि तिन्हारा आस्से बखान नी करी सकदे।

1 तिमिथियुस 1:13

मसीह पर विस्वास करणे ले पैहले ता हांऊँ मसीह री निंदा करणे वाल़ा, होर विस्वासी लोका जो स्ताणे वाल़ा, होर निर्दयी था। क्यूंकि मैं हाल्ले तक विस्वासा नी कितिरा था, इधी कठे हांऊँ नी जाणदा था कि जो हांऊँ करहा था से गलत आ। होर एस वजहा ले मसीहे मेरे पर दया किती।

1 तिमिथियुस 1:19

तुस्सा रा मसीह पर विस्वास बणेया रहे, होर साफ अंतरात्मा हो। कुछ लोके आपणी एस साफ अंतरात्मा जो नकारी दितिरी, जेसरी वजहा ले तिन्हारा विस्वास रूपी जहाज डूबी गया।

1 तिमिथियुस 3:1

ये भरोसे करणे रे लायक गल्ला ई कि, जो कलीसिया रे अगुवा बणना चाहां, से इज्जता रे लायक काम करणे री इच्छा रखे।

1 तिमिथियुस 4:9

ये भरोसे करणे रे लायक गल्ल ई, होर हर तरहा ले मन्नणे रे लायक ई।

1 तिमिथियुस 6:13

परमेसरा जो गुआह मनी किन्हें, जो सभी जो जिन्दगी देहां, होर मसीह यीसू जो भी गुआह मनी किन्हें जिन्हें पुन्तियुस, पिलातुस हाकमा रे साम्हणें सच्च बोलिरा था, हांऊँ तुजो ये हुक्म देहां,

2 तिमिथियुस 2:11

ये भरोसे करणे रे लायक गल्ला ई कि, अगर आस्से मसीह साउगी मरी गईरे, ता आस्सा तेस साउगी जिउंदे भी हूंणा।

तितुस 3:8

ये जो कुछ मैं ऐबे तुस्सा जो लिखिरा ये भरोसे करणे रे लायक गल्ला ई, हांऊँ ये चाहां कि तू इन्हा गल्ला रे बारे मन्झ मजबूती किन्हें विस्वासी लोका जो सखा, इधी कठे कि जिन्हें लोके परमेसरा पर विस्वास कितिरा, स्यों आपणा ध्यान भले काम करणे रे मन्झ लगाई रखे। ये सखाईरी गल्ला सब लोका रे कठे खरी होर फायदेमंद ई।

इब्रानियो 7:25

इधी कठे जो यीसू मसीह रे ज्रीए परमेसरा वाले आहूँए, से तिन्हारा पूरा-पूरा उद्धार करी सक्हा, क्यूंकि से तिन्हारे कठे बिनती करणे रे कठे हमेसा जिउंदा आ।

1 यहून्ना 3:5

होर तुस्से जाणहां ऐं कि, यीसू मसीह इधी कठे आया कि, पापा जो दूर करहे; होर तेस मन्झ कोई पाप नी आ।

1 यहून्ना 3:8

जो कोई बार-बार पाप करहा, से सैताना रा आ, क्यूंकि सैतान संसारा रे रचणे रे पैहले ले ही पाप करदा आईरा; परमेसरा रा मह्ठा इधी कठे आया ताकि से सैताने रे कामा रा नास करहे।

1 यहून्ना 5:11

होर से गुआही सेई कि, परमेसरे आस्सा जो अनंत जिन्दगी दिती; होर ये जिन्दगी तेसरे मह्ठे यीसू रे ज्रीए आस्सो मिलिरा।

प्रकासना री गल्ला 21:5

होर जो राजगद्दी पर बैठिरा था, तिन्हें बोल्या, “ऐबे हांऊँ सभ कुछ नंऊँआं बनाई करहा।” फेरी तिन्हें बोल्या कि, “जो कुछ मैं बोल्या तेता जो लिखी ले, क्यूंकि मेरे ये बचन भरोसे रे लायक होर सच्चे ऐं।”

प्रकासना री गल्ला 22:6

तेता ले बाद स्वर्गदूते मेरे किन्हें बोल्या कि, “जो गल्ला तुस्सा किन्हें बोलिरी, स्यों भरोसे रे लायक, होर सच्ची ई। प्रभु परमेसर जिन्हें आपणी आत्मा सभी नबिया जो दितिरी, तिन्हें ही आपणे स्वर्गदूता जो एथी आऊणें रे कठे आदेस दितेया कि, आपणे सेऊआदारा जो स्यों गल्ला दसे। जिन्हारा बौह्त जल्दी पूरा हूंणां जरूरी आ।”

प्रकासना री गल्ला 5:9

होर स्यों ये नंऊँआं गाणा गान्दे लगे कि, “तू एस कताबा री मोहरा जो तोड़ने, होर खोलणे रे लायक आ, क्यूंकि तू मारी दितिरा था, होर आपणा खून जो तैं क्रूसा प्रयाल्हे बहाईरा था, तेता रे ज्रीए तैं, लग-लग देसा रे लोका, होर हर कुला रे लोका, होर जातिया रे लोका, होर लग-लग भासा बोलणे वाले लोका, परमेसरा रे कठे लोका जो छुड़ाई लितेया।