1 तिमिथियुस 1:12 - मंडयाली नंऊँआं नियम

¹² होर हांऊँ, आस्सा रे प्रभु यीसू मसीह रा धन्यावाद करहा, जिन्हें मुंजो सामर्थ दिती; कि तिन्हें मुंजो भरोसे लायक समझी किन्हें आपणी सेऊआ रे कठे नियुक्त कितेया।

1 तिमिथियुस 1:12 Iomraidhean Croise

मत्ती 20:4

होर अंगूरा रे बगीचे रे माल्के मजदूरा किन्हें बोल्या, ‘तुस्से भी अंगूरा रे बगीचे मन्झ जाऊआ, मां तुस्सा जो ठीक मजदूरी देणी।’ होर स्यों भी जाई किन्हें बगीचे मन्झ काम करदे लगे।

चुणिरे चेले रे काम 16:15

आपणे पुरे टब्बरा समेत बपतिस्मा लैणे ले बाद तिन्हें आस्सा किन्हें ये बोल्दे हुए अर्ज किती, “अगर तुस्से मुंजो प्रभु री विस्वासी मन्नहां ऐं ता आऊआ होर मेरे घरा रुका,” होर से आस्सा जो मन्नाई किन्हें लई गई।

चुणिरे चेले रे काम 9:15

पर प्रभुए तेस किन्हें बोल्या कि, “तू चला जा; क्यूंकि साऊल ता अन्यजाति लोका होर राजे माहराजे, होर इस्राएल देसा रे साम्हणें मेरा नांऊँ रा प्रचार करणे रे कठे मेरा चुणिरा एक जरीआ।

चुणिरे चेले रे काम 9:22

पर साऊल होर ज्यादा सामर्थी हुन्दा चली गया, होर एस गल्ला रा सबूत देई-देई किन्हें कि यीसू ई मसीह आ, होर दमिस्क सैहरा मन्झ रैहणे वाले यहूदी लोका रा मुंह बंद करदा रैहया।

1 कुरिन्थियो 15:10

पर अगर आज हांऊँ चुणिरा चेला आ ता परमेसरा रे अनुग्रह ले आ, होर तिन्हें जो अनुग्रह मेरे पर कितेया, से बेकार नी हुआ। पर मैं तिन्हा दूजे चुणिरे चेलेया ले बढ़ी किन्हें मैहनत किती; तेबे बी ये मेरी तरफा ले नी हुएया, पर परमेसरा रे अनुग्रहे मेरी बड़ी मदद किती कि हांऊँ तेसरा काम करी सकूं।

1 कुरिन्थियो 3:5

ता फेरी सोचा कि अपुल्लोस कुणहां? होर हांऊँ पौलुस कुणहां? आस्से ता सिर्फ परमेसरा रे सेऊआदार ऐं जिन्हारे ज्रीए तुस्से मसीह पर विस्वास कितेया, होर आस्सा मन्झा ले सभीए से काम कितेया जो परमेसरे दितेया।

1 कुरिन्थियो 7:25

कुआरिया रे बारे मन्झ प्रभु रा कोई हुक्म मुंजो नी मिलिरा, पर प्रभुए आपणी दया ले मुंजो भरोसे रे लायक ज्ञान दितिरा होर तेता री वजहा ले हांऊँ आपणी राय देहां।

2 कुरिन्थियो 4:1

इधी कठे जेबे आस्सा पर परमेसरा री एह्ड़ी दया हुई कि, आस्सा जो परमेसरा रे बचना जो प्रचार करणे री सेऊआ मिली, ता आस्से हिम्मत नी हारदे।

गलातियो 3:26

होर जेबे तुस्से मसीह रे नांऊँआ रा बपतिस्मा लितिरा था, तुस्से मसीह रे स्वभावा जो इंहां पैहनी लितेया, जिहां कोई नंऊँऐं कपड़े पैहना। इधी कठे जेबे तुस्से मसीह यीसू पर विस्वास कितेया, ता तुस्से सब परमेसरा रे बच्चे बणी गईरे।

गलातियो 3:28

इधी कठे मसीह मन्झ ऐबे ना कोई यहूदी लोक आ, होर ना कोई गैर-यहूदी लोक ऐं; ना कोई गुलाम आ, ना कोई अजाद आ; ना कोई मर्ध आ, ना कोई ज्नाने ई; क्यूंकि तुस्से सभ यीसू मसीह मन्झ एक ऐं।

फिलिप्पियो 2:11

होर बापू परमेसर री महिमा रे कठे हर एक माह्णुं मनी ले कि यीसू मसीह ई प्रभु आ।

फिलिप्पियो 4:13

मसीह रे ज्रीए जो मुंजो सक्ति देहां तेता मन्झ हांऊँ सभ कुछ करी सक्हा।

कुलुस्सियो 1:25

परमेसरे हांऊँ नियुक्त कितेया कि हांऊँ तुस्सा जो परमेसरा रे बचना जो पूरी तरहा समझाऊँ, होर एस वजहा ले ही हांऊँ कलीसिया रा सेऊआदार बणेया।

1 तिमिथियुस 1:1

हांऊँ पौलुस, एस्सा चिठ्ठी जो लिख्या करहा। आस्सा रे उद्धारकर्ता परमेसर होर यीसू मसीह रे हका ले जेस पर आस्से आस रखे, हांऊँ यीसू मसीह रा चुणिरा चेला आ।

1 तिमिथियुस 1:11

ये सच्चा उपदेस आस्सा रे परमप्रधान परमेसरा री महिमा री खुसी री खबरा रे मताबक ई, जिन्हें मुंजो एता री प्रचार करणे री जिम्मेदारी दितिरी।

1 तिमिथियुस 1:2

हे तिमिथियुस, हांऊँ ये चिठ्ठी तुजो लिखी करहा, तू मेरे आपणे मह्ठे साहीं आ क्यूंकि तू भी मसीह पर विस्वास रखा। हांऊँ प्रार्थना करहा कि बापू परमेसर होर आस्सा रा प्रभु मसीह यीसू तुजो अनुग्रह, दया, होर सांति देंदा रहे।

1 तिमिथियुस 6:13

परमेसरा जो गुआह मनी किन्हें, जो सभी जो जिन्दगी देहां, होर मसीह यीसू जो भी गुआह मनी किन्हें जिन्हें पुन्तियुस, पिलातुस हाकमा रे साम्हणें सच्च बोलिरा था, हांऊँ तुजो ये हुक्म देहां,

2 तिमिथियुस 2:2

तैं बौह्त लोका साम्हणें मुंजो मसीह रे बारे मन्झ संदेस स्खान्दे हुए सुणीरा था। इधी कठे हांऊँ चाहां कि तू भी इन्हा गल्ला जो दूजे भरोसे रे लायक विस्वासी लोका जो सखाई दे; जो होरिया जो भी स्खाणे रे लायक हो।

2 तिमिथियुस 4:17

पर प्रभु मेरा मददगार रैहया, होर तिन्हें मुंजो सामर्थ दिती; ताकि हांऊँ तेस कच्हरी मन्झ बैठीरे सभी लोका जो मसीह रे बारे मन्झ खुसी री खबरा रा प्रचार करी सकेया, होर सभ तेस गैर-यहूदी लोक तेसरे प्रचारा जो सुणी सके। होर एस तरहा तिन्हें हांऊँ मरणे ले बचाई लेया जिहां एक भूखे सेरा रे मुंहा ले बचाया।

तितुस 1:4

तितुस ये चिठ्ठी हांऊँ तुजो लिखी करहा, तू सच्चे मेरे मह्ठे साहीं आ, क्यूंकि आस्से यीसू मसीह पर विस्वास करहे। हांऊँ प्रार्थना करहा कि आस्सा रा बापू परमेसर होर उद्धारकर्ता मसीह यीसू तुजो अनुग्रह होर सांति देंदा रहे।