1 थिस्सलुनकियो 4:3 - मंडयाली नंऊँआं नियम

³ क्यूंकि परमेसरा री इच्छा येई कि, तुस्से पवित्र बणां; होर व्यभिचारा ले बची किन्हें रहा।

1 थिस्सलुनकियो 4:3 Iomraidhean Croise

मत्ती 12:50

क्यूंकि जो कोई मेरे स्वर्गीय बापू री इच्छा पर चले, सेई मेरा भाई, होर मेरी बैहण होर मेरी माऊ ई।”

मत्ती 15:19

क्यूंकि बुरे-बुरे सोच रखणा, खून करणा, नजायज रिस्ते रखणा, व्यभिचार करणा, चोरी करणा, झूठी गुआही देणा होर बदनामी करणा, जेह्ड़ी गल्ला मना ले बाहर निकल्हा ई।

मत्ती 5:32

पर हांऊँ तुस्सा किन्हें बोल्हा कि जो कोई आपणी लाड़ी जो व्यभिचारा रे अलावा केसी होर वजहा ले तलाक देहां, ता से आपणी लाड़ी ले व्यभिचार कुराहां, होर जो कोई तेस्सा तलाकसुदा किन्हें ब्याह करहा, से भी व्यभिचार करहा।”

मत्ती 7:21

“जो मेरे किन्हें, ‘हे प्रभु, हे प्रभु,’ बोल्हा ऐं, तिन्हा मन्झा ले हर एकिया स्वर्गा रे राजा रे अंदर नी जाणा, पर सिर्फ तेस ई जो मेरी इच्छा पर चल्हा।

मरकुस 3:35

क्यूंकि जो कोई परमेसरा री इच्छा पर चल्हा, सेई मेरा भाई, होर मेरी बैहण होर मेरी माऊ ई।”

यहून्ना 4:34

यीसूए तिन्हा किन्हें बोल्या, “मेरा खाणा ये आ कि, हांऊँ आपणे भेजणे वाले री इच्छा रे मताबक चलूं होर तेसरा काम पूरा करूं।

यहून्ना 7:17

अगर कोई परमेसरा री इच्छा पर चलणा चाहां, ता से एस उपदेस रे बारे मन्झ जाणी लेया कि से परमेसरा री तरफा ले आ, या हांऊँ आपणी तरफा ले बोल्हा।

चुणिरे चेले रे काम 15:20

पर तिन्हा जो एक चिठ्ठी लिखी किन्हें हुक्म दे कि स्यों, लोका रे ज्रीए मूर्तिया जो चढ़ाई रे खाणे जो नी खाये, होर व्यभिचार होर गला घुटी किन्हें मारिरे डांगरे रा मास होर खूना ले परे रैहे।

चुणिरे चेले रे काम 15:29

कि तुस्से लोका रे ज्रीए मूर्तिया जो चढ़ाई रे खाणे जो मत खांदे, होर व्यभिचार होर गला घुटी किन्हें मारिरे डांगरे रा मास होर खूना ले परे रैहया। अगर तुस्से इन्हा ले दूर रैंह्णां ता तुस्सा रा भला हूंणां, सुभकामणां।”

चुणिरे चेले रे काम 20:32

“होर ऐबे हांऊँ तुस्सा जो; परमेसर, होर तेसरे अनुग्रहा रे बचना जो सौंपी देहां; जो तुस्सा रे विस्वासा री बढ़ौतरी करी सक्हा, होर से तुस्सा जो विरासत देई सक्हा, जो तिन्हें आपणे पवित्र कितरे लोका साउगी देणे रा बादा कितिरा।”

चुणिरे चेले रे काम 26:18

कि तू तिन्हारी हाखिया खोल्हे, ताकि स्यों नह्यारे ले प्रयासे वखा जो, होर सैताना रे हका ले परमेसरा वखा जो फिरे; ताकि परमेसर तिन्हारे पापा री माफ करहे, होर तिन्हा लोका साउगी विरासत पाए, जेह्ड़े मेरे पर विस्वास करणे ले पवित्र हुई चुकिरे।’”

रोमियो 1:29

होर स्यों सभ किस्मा रे अधर्मा रे काम, होर दुस्टता, होर लालच, होर बैर-भाव किन्हें भर्ही गये। होर हिर्ख, होर हत्या, होर झगड़े, होर धोखा, होर बुरे बिचारा किन्हें बर्ताव करणे वाले, होर चुगलखोर बणी गईरे।

रोमियो 12:2

होर एस संसारा रे लोका साहीं नी बणा; पर परमेसर तुस्सा री सोचा जो बदली दे, जेस ले तुस्सा री जिन्दगी भी बधली जाए। तेबे तुस्से, तुस्सा रे कठे परमेसरा री जो खरी, होर खुस करणे वाली, होर सिद्ध इच्छा जो आपणे अनुभवा ले जाणी लेणा।

रोमियो 6:22

पर ऐबे पापा ले छुटकारा पाई किन्हें होर परमेसरा रे गुलाम बणी किन्हें तुस्से एह्ड़े काम करहे जो पवित्रता री वखा जो लेई जाहें, होर एह्ड़े कामा रा अंत अनंत जिन्दगी ई।

1 कुरिन्थियो 1:30

पर परमेसरे तुस्सा जो मसीह यीसू साउगी एक कितिरा होर मसीह रे ज्रीए से आस्सो आपणा ज्ञान देआ। होर परमेसर आस्सा जो आपणी नजरा मन्झ धर्मी भी बणा। मसीह रे ज्रीए आस्से पवित्र कितिरे होर से आस्सो आस्सा रे पापा ले अजाद करहा।

1 कुरिन्थियो 7:2

क्यूंकि ये आम गल ई लोक नजायज रिस्ते मन्झ पई जाए, इधी कठे हांऊँ सलाह देआ कि हर एक मर्ध ब्याह करहे, होर आपणी लाड़ी किन्हें वफादार रहे।

2 कुरिन्थियो 12:21

केते एह्ड़ा नी हो जेबे हांऊँ दबारा वापस तुस्सा किन्हें मिलणे आऊँ मेरा परमेसर मुंजो बेज्जत करहे। होर मुंजो तिन्हा कईया रे कठे रोणा नी पई जाए, जिन्हें पैहले गंदे काम होर अपवित्रता, होर व्यभिचार, होर भोग विलास जेह्ड़े पाप कितिरे हो, होर तिन्हें पाप करणा नी छाडीरा हो।

गलातियो 5:19

तुस्से जाणांहे जो लोक पापा री इच्छा जो पूरी करहे स्यों केह्ड़े-केह्ड़े काम करहे; स्यों व्यभिचार होर गंदे काम करहे, तिन्हो भोग-बिलास करना खरा लगहा।

इफिसियो 5:17

इधी कठे नर्क्कले मत बणा, पर समझदारी किन्हें ये जाणने री कोसिस करा कि, प्रभु क्या चाहां कि तुस्से करो।

इफिसियो 6:6

होर माह्णुंआं जो खुस करणे वाले साहीं दिखाऊआ करणे रे कठे आपणे माल्का री सेऊआ नी करा। तुस्से मसीह रे गुलाम ऐं, इधी कठे तुस्से आपणे पुरे दिला ले से ही करहा, जो परमेसर तुस्सा ले चाहां।

कुलुस्सियो 1:9

इधी कठे जेस ध्याड़े ले आस्से तुस्सा रे बारे मन्झ सुणिरा आ, आस्से हमेसा तुस्सा रे कठे प्रार्थना होर विनती किती। आस्से प्रार्थना करहे कि परमेसरा री आत्मा तुस्सा जो ज्ञान होर समझा दे कि तुस्से तेसरी इच्छा जो पूरी तरहा समझी जाओ।

कुलुस्सियो 3:5

इधी कठे आपणे पाप रे स्वभाव ले जुड़ीरे बुरे कामा जो करणा छाडी देआ, जिहां कि व्यभिचार, असुद्धता, बुरी कामना, होर बुरी इच्छा। होर तुस्से केसी भी गल्ला रा लालच नी करहा क्यूंकि ये मूर्ति री पूजा करणे रे बराबर आ।

कुलुस्सियो 4:12

इपफ्रासा रा भी तुस्सा जो नमस्कार, से भी तुस्सा रे गांऊँआं ले आ। से मसीह यीसू रा सेऊआदार आ, होर हमेसा तुस्सा रे कठे दिला किन्हें प्रार्थना करहा, ताकि परमेसर तुस्सा जो मजबूत होर सिद्ध बणाए, होर एस गल्ला रा पूरा भरोसा दे कि तुस्से पुरे मना ले परमेसरा री इच्छा पर चले।

1 थिस्सलुनकियो 4:2

क्यूंकि तुस्से जाणहां ऐं कि, आस्से तुस्सा जो प्रभु यीसू रे दितिरे हका ले तुस्सा जो कुण-कुण बिधिया दिती।

1 थिस्सलुनकियो 4:4

होर तुस्सा मन्झा ले हर एक आदमी आपणी लाड़ी किन्हें पवित्रता होर इज्जता किन्हें रेहणा सीखी सको,

1 थिस्सलुनकियो 5:18

हर एक हलाता मन्झ धन्यावाद देआ, क्यूंकि तुस्सा रे कठे मसीह यीसू मन्झ परमेसरा री येही इच्छा ई।

1 थिस्सलुनकियो 5:23

सांति देणे वाल़ा परमेसर आपु ई तुस्सा जो पूरी तरहा ले पवित्र करहे; होर तुस्सा री पूरी आत्मा होर प्राण होर सरीर आस्सा रे प्रभु यीसू मसीह रे दबारा वापस आऊणें रे ध्याड़े तक बेकसूर होर सुरक्षित रहे।

2 थिस्सलुनकियो 2:13

हे भाईयो होर बैहणो, आस्सो हमेसा तुस्सा रे कठे परमेसरा रा धन्यावाद करणा चहिए, प्रभु तुस्सा किन्हें प्यार करहा। क्यूंकि तिन्हें संसारा जो रचणे ले पैहले ही तुस्से चुणी लितिरे कि पवित्र आत्मा रे कामा रे ज्रीए तुस्सा रा उद्धार करहे; जो तुस्सा जो पवित्र बणा। होर यीसू मसीह रे बारे मन्झ सच्चाई री खबरा पर विस्वास करणे रे ज्रीए भी।

तितुस 2:14

इन्हें यीसू मसीहे आपणे आपा जो आस्सा रे कठे बलिदान करी दितेया, ताकि आस्सा जो हर किस्मा रे पापा ले छुड़ाई ले; होर आस्सो सुद्ध करी दे ताकि आस्से तेसरे खास लोक बणी जाये जो खरे काम करणे री बड़ी इच्छा रखे।

इब्रानियो 10:36

क्यूंकि तुस्सा जो सबर रखणा जरूरी ई, ताकि तुस्से परमेसरा री इच्छा जो पूरी करी सके। तेबे परमेसरा तुस्सा जो से सब कुछ देणा जेता रा देणे रा वादा तिन्हें तुस्सा किन्हें कितिरा।

इब्रानियो 12:16

एह्ड़ा नी हो कि, कोई आदमी व्यभिचारी, या आदमा रे पोत्रू एसावा साहीं अधर्मी हो। क्यूंकि से जेठा था होर तेस वाले पैहले पोत्रू हूंणे रे सारे हक थे, पर तिन्हें आपणे जन्मसिद्ध हक जो हल्का समझी किन्हें एक टैमा रे खाणे रे कठे तिन्हें से आपणे छोटे भाई याकूबा जो बेची दितेया।

इब्रानियो 13:4

आपणे ब्याह रा आदर करहा, होर लाड़ा लाड़ी एक दूजे रे प्रति वफादार रहे। क्यूंकि परमेसरा व्यभिचारिया, होर नजायज रिस्ते रखणे रा न्याय करणा।

1 पतरस 1:2

होर परमेसर बापूए बौह्त पैहले ले ही तुस्सा जो आपणे लोक हूंणे रे कठे, होर पवित्र आत्मा रे कामा रे ज्रीए पवित्र हूंणे रे कठे चुणी लईरा था। एह्ड़ा तिन्हें इधी कठे कितेया की तुस्से यीसू मसीह रा हुक्म मान्नो, होर तेसरे खूना रे छिड़कणे ले साफ हुई जाओ। हांऊँ प्रार्थना करहा कि परमेसर तुस्सा जो बौह्त अनुग्रह होर सांति देंदा रहे।

1 पतरस 4:2

होर एस वजहा ले एह्ड़ा माह्णुं एस संसारा मन्झ रैहन्दे हुए आगे जो कधी भी आपणी जिन्दगी मन्झ माह्णुंआं री पापा री इच्छा जो पूरी नी करदा, पर से तेहड़ा ही करहा जेहड़ी परमेसरा री इच्छा ई।

1 यहून्ना 2:17

होर संसार होर ऐसरी इच्छाएं दुहें मिट्दी जाहीं, पर जो परमेसरा री इच्छा पर जिहां, से हमेसा बणी रैंहयां।

प्रकासना री गल्ला 21:8

पर जो मेरे पर विस्वास नी रखदे, स्यों तेस आगी री झीला मन्झ पाई देणे जो गन्धका किन्हें भख्दी रैंहयां ई, जो कि दूजी मौत ई। होर तिहां ही सभ लोक, जो दूजेया रे साम्हणें मुंजो मनणे ले डरे, होर बुरे काम होर खून करहे। जो व्यभिचारी ऐं होर जादू टोणा करहे, होर मूर्तिया री अराधना करहे; होर झूठ बोल्हे, तेस आगी री झीला मन्झ पाई देणे।”

प्रकासना री गल्ला 22:15

पर कुत्ते साहीं अपवित्र लोक, होर जादू टोणा करणे वाले, होर व्यभिचार करणे वाले, होर हत्या करणे वाले लोक, होर मूर्तिया री अराधना करणे वाले लोक, होर हरेक लोक जो झूठ बोलणा पसंद करहे, तिन्हा सभिया एस सैहरा ले बाहर रैहणां।