1 थिस्सलुनकियो 3:2 - मंडयाली नंऊँआं नियम

² होर मसीह रे खुसी री खबरा जो सुनाणे मन्झ आस्सा रा भाई, होर परमेसरा रा सेऊआदार तिमिथियुसा जो मैं तुस्सा वाले इधी कठे भेज्या, ताकि से तुस्सा जो मसीहा रे विस्वासा मन्झ मजबूत करहे; होर प्रभु पर विस्वासा बनाये रखणे रे कठे तुस्सा जो हिम्मत दे।

1 थिस्सलुनकियो 3:2 Iomraidhean Croise

चुणिरे चेले रे काम 16:1

फेरी से दिरबे होर लुस्त्रा सैहरा मन्झ भी गये, होर तेथी तिमिथियुस नांऊँआं रा एक चेला था, जो केसी यहूदिया ईलाके री विस्वासणी रा मह्ठा था, पर तेसरा बापू यूनान देसा रा था।

चुणिरे चेले रे काम 16:5

एस तरहा तेथी री कलीसिया विस्वासा मन्झ मजबूत हुन्दी गई होर गिणती मन्झ रोज बधदी गई।

चुणिरे चेले रे काम 18:5

जेबे सिलास होर तिमिथियुस मकीदुनिया ईलाके ले आये, ता पौलुसे आपणा काम धंधा बंद करी दितेया होर बचना रे प्रचारा मन्झ लगी रैंहयां था, से यहूदी लोका जो गुआही देई किन्हें साबित करहा था कि यीसू ई मसीह आ।

रोमियो 16:21

तिमिथियुस भाई जो मेरा सहकर्मी आ, होर लूकियुस, यासोन होर सोसिपत्रुस जो मेरा यहूदी भाई आ, तुस्सा सभी जो तिन्हारा नमस्कार।

1 कुरिन्थियो 3:10

परमेसरे जो अनुग्रह मुंजो दितिरा, तेता रे ज्रीए मैं एक खरे राजमिस्त्री साहीं तेस घरा री निउंआं पाई, होर दूजे लोक तेस ही निउंआं पर घर बणाहें। पर हर एक माह्णुं चतन्न रहे कि से तेस निउंआं पर केह्ड़ा घर बणा।

1 कुरिन्थियो 4:17

इधी कठे मैं तिमिथियुस तुस्सा वाले भेजिरा। हांऊँ तेजो एक मह्ठे साहीं प्यार करहा, होर से प्रभु रा भरोसे लायक सेऊआदार आ तेस तुस्सा जो दसणा कि हांऊँ क्या करहा होर कियां मसीह यीसू रा चेला बणी किन्हें जियां, ठीक स्यों गल्ला जो हांऊँ हर जगहा री सभ कलीसिया रे लोका जो सखा।

2 कुरिन्थियो 1:1

हांऊँ पौलुसा ये चिठ्ठी तुस्सा रे कठे लिख्दा लगिरा। हांऊँ परमेसरा री इच्छा ले मसीह यीसू रा चुणिरा चेला आ। होर मसीह मन्झ आस्सा रा भाई तिमिथियुस मेरे साउगी आ। हांऊँ ये चिठ्ठी कुरिन्थुस सैहरा रे परमेसरा री कलीसिया रे लोका रे कठे होर सारे अखाया ईलाके रे सब परमेसरा रे पवित्र लोका रे कठे लिखी करहा।

2 कुरिन्थियो 1:19

क्यूंकि परमेसरा रा मह्ठा प्रभु यीसू मसीह जेसरे बारे मन्झ हांऊँ, सिलास होर तिमिथियुस प्रचार करहे, से प्रभु यीसू सच्चा आ; तेस मन्झ हां होर नांह दुंहें नी थी, पर तेता मन्झ “हां” ईं “हां” हुई थी।

2 कुरिन्थियो 2:12

होर जेबे हांऊँ मसीह री खुसी री खबर सुनाणे रे कठे त्रोआस सैहरा मन्झ आया, ता प्रभुऐ मेरे कठे प्रचार करणे रे कठे एक द्वार खोल्ही दितेया।

2 कुरिन्थियो 2:13

मेरा तितुस भाई तुस्सा री कोई खबर लेई किन्हें मेरे वाले नी आया, जेता ले मेरे मना जो चैन नी मिल्या। इधी कठे हांऊँ त्रोआस सैहरा रे विस्वासी लोका ले विदा हुई किन्हें मकीदुनिया ईलाके जो चली गया ताकि हांऊँ तितुसा जो तोपी सकूं।

2 कुरिन्थियो 8:23

अगर कोई तितुसा रे बारे मन्झ पुछे, ता बोल्या कि से मेरा साथी, होर तुस्सा रे कठे मेरा सैहकर्मी आ, होर अगर आस्सा रे विस्वासी भाईया रे बारे मन्झ पूछे, ता स्यों कलीसिया रे लोका रे ज्रीए भेजिरे लोक ऐं, होर स्यों मसीह रे नांऊँआं रा आदर बढ़ाए।

फिलिप्पियो 1:25

होर इधी कठे कि मुंजो एस गल्ला रा भरोसा आ, हांऊँ जाणहां कि मां जिउंदा रैंह्णां, बल्की तुस्सा सभी साउगी रैंह्णां, ताकि प्रभु मन्झ मजबूत रैहणें होर तेस मन्झ खुस रैहणें मन्झ हांऊँ तुस्सा री मदद करी सकूं।

कुलुस्सियो 1:1

हांऊँ पौलुस, ये चिठ्ठी लिख्दा लगिरा। होर आस्सा रा विस्वासी भाई तिमिथियुस मेरे साउगी आ। परमेसरा री इच्छा ले ही हांऊँ मसीह यीसू रा चुणिरा चेला आ।

कुलुस्सियो 1:7

तुस्से आस्सा रे लाडले भाई होर सहकर्मी इपफ्रासा ले एसरे बारे मन्झ उपदेस सिखिरा। से आस्सा री वखा तुस्सा रे कठे मसीह रा सच्चा सेऊआदार आ।

कुलुस्सियो 4:12

इपफ्रासा रा भी तुस्सा जो नमस्कार, से भी तुस्सा रे गांऊँआं ले आ। से मसीह यीसू रा सेऊआदार आ, होर हमेसा तुस्सा रे कठे दिला किन्हें प्रार्थना करहा, ताकि परमेसर तुस्सा जो मजबूत होर सिद्ध बणाए, होर एस गल्ला रा पूरा भरोसा दे कि तुस्से पुरे मना ले परमेसरा री इच्छा पर चले।

कुलुस्सियो 4:9

होर हांऊँ तेस साउगी सच्चे होर लाडले विस्वासी भाई उनेसिमुस जो भी भेज्दा लगिरा। जो तुस्सा रे गांऊँआं ले आ, तिन्हा तुस्सा जो एथी री सारी गल्ला दसी देणी।

1 थिस्सलुनकियो 3:13

आस्से ये भी प्रार्थना करहे कि प्रभु यीसू मसीह तुस्सा रे मना जो एह्ड़ा मजबूत करहे कि, जेबे आस्सा रे प्रभु यीसू आपणे सभ परमेसरा रे पवित्र लोका साउगी वापस आये, ता स्यों आस्सा रे बापू परमेसरा रे साम्हणें पवित्रता मन्झ बेकसूर बणें।

1 थिस्सलुनकियो 3:5

एता री वजहा ले जेबे मेरे ले होर इंतजार नी हुआ की तुस्सा रा हाल चाल जाणी लू, तेबे मै तुस्सा रे विस्वासा रा हाल जाणने रे कठे तिमिथियुस जो भेजी दितेया। क्यूंकि हांऊँ एस गल्ला ले डरा था कि परखणी करणे वाले दुस्ट सैताने तुस्सा री परखणी कितिरी हो, होर आस्सा री मैहनत बेकार हुई गईरी हो।

2 थिस्सलुनकियो 2:17

आस्से प्रार्थना करहे कि स्यों तुस्सा रे मना जो हिम्मता किन्हें भरी दे, होर तुस्सा जो मजबूत बणाये कि तुस्से हमेसा खरा बोली सको, होर खरे काम करी सको।