1 थिस्सलुनकियो 2:2 - मंडयाली नंऊँआं नियम

² बल्की तुस्से आपु ई जाणहां ऐं कि, फिलिप्पी सैहरा मन्झ दुःख उठाणे होर दंगे सैहणे ले बाद भी आस्सा जो परमेसरे एह्ड़ी हिम्मत दिती कि लोका रा घोर व्रोध करणे पर भी तुस्सा रे सैहरा मन्झ भी आस्से तुस्सा जो परमेसरा री खुसी री खबर सुणाई सके।

1 थिस्सलुनकियो 2:2 Iomraidhean Croise

चुणिरे चेले रे काम 14:3

होर पौलुस होर बरनबास तेथी बौह्त ध्याड़े तक रुके होर प्रभु रे बारे मन्झ बगैर डरे प्रचार करदे रैहे; होर प्रभु तिन्हारे ज्रीए किते गये नौखे चिन्ह रे ज्रीए से आपणे अनुग्रह रे संदेसा जो साबित करदा रेहा।

चुणिरे चेले रे काम 14:5

जेबे अन्यजाति लोका होर यहूदी लोक आपणे मुखिये साउगी मिली किन्हें तिन्हा साउगी बुरा व्यवहार करणे होर तिन्हा पर पत्थरवाह करणे री चाल चली।

चुणिरे चेले रे काम 16:12

तेथी ले आस्से फिलिप्पी सैहरा पूजे, जो मकीदुनिया ईलाके रा एक खास सैहर होर रोम देसा रे लोका री बस्ती ई; होर आस्से तेस सैहरा मन्झ कुछ होर ध्याड़े तक रैहे।

चुणिरे चेले रे काम 16:19

जेबे तेस्सा रे माल्के देख्या कि, आस्सा री कमाई री आस चली गई, ता तिन्हें पौलुस होर सिलासा जो पकड़ी किन्हें चौका मन्झ प्रधाना वाले खींजी किन्हें लई गये।

चुणिरे चेले रे काम 16:37

पर पौलुसे तिन्हा किन्हें बोल्या कि, “आस्से जो रोम देसा रे लोक ऐं, दोसी ठैहराए बगैर, लोका रे साम्हणें मारेया, होर जेल्हा मन्झ पाया, होर ऐबे चुपके-चुपके स्यों आस्सा जो बाहर भेजी देणा चाहें, पक्का एह्ड़ा नी हूंणां; हूंणां ता ये चहिए कि स्यों आपु आई किन्हें आस्सा जो बाहर काढे।”

चुणिरे चेले रे काम 17:1

फेरी पौलुस होर सिलास अम्फिपुलिस होर अपुल्लोनिया सैहरा मन्झ हुई किन्हें थिस्सलुनिके सैहरा मन्झ आये जेथी यहूदी लोका री एक यहूदी सभा थी।

चुणिरे चेले रे काम 17:17

इधी कठे से यहूदी लोका री सभा मन्झ गया होर यहूदी लोक होर परमेसरा रा डर मनणे वाले यूनान देसा रे लोका किन्हें होर चौका मन्झ जो भी लोक तिन्हा जो मिल्हा ऐं थे, तिन्हा किन्हें हर रोज बैहस करहा ऐं थे।

चुणिरे चेले रे काम 19:8

होर पौलुस यहूदी सभा मन्झ जाई किन्हें तीन म्हीने तक निडर हुई किन्हें बोल्दा रैंहयां, होर परमेसरा रे राजा रे बारे मन्झ चर्चा करदा होर समझान्दा रैंहयां।

चुणिरे चेले रे काम 4:13

जेबे तिन्हें पतरस होर यहून्ना री हिम्मत देखी, होर ये जाणेया कि ये अनपढ़ होर आम आदमी आ। ता तिन्हा जो हरानी हुई; फेरी स्यों प्छ्याणी गये कि, ये यीसू साउगी रही चुकिरे लोक ऐं।

चुणिरे चेले रे काम 4:20

क्यूंकि ये ता आस्सा ले नी हुई सक्दा कि, जो आस्से देख्या होर सुणेया, से ना बोले।

चुणिरे चेले रे काम 4:31

जेबे स्यों प्रार्थना करी बैठे, ता से जगहा जेथी स्यों कठे हुईरे थे हिल्ली गया, होर स्यों सभ पवित्र आत्मा किन्हें भर्ही गऐ, होर परमेसरा रा बचन न्डरे सुणान्दे रैहे।

चुणिरे चेले रे काम 5:41

चुणिरे चेले एस गल्ला ले खुस हुई किन्हें माहसभा रे साम्हणें ले चली गये कि, आस्से यीसू रे नांऊँआं रे कठे बेज्जत हूंणे रे लायक ता समझे।

रोमियो 1:1

हांऊँ पौलुस ये चिट्ठी लिख्या करहा। हांऊँ यीसू मसीहा रा सेऊआदार आ। परमेसरे एक चुणिरा चेले रे रूपा मन्झ मेरा चुणाव कितेया, होर परमेसरे हांऊँ खुसी री खबर सुनाणे रे कठे नियुक्त कितिरा।

2 कुरिन्थियो 3:12

इधी कठे एह्ड़ी आस रखी किन्हें आस्से बड़ी हिम्मता साउगी बोल्हा ऐं,

कुलुस्सियो 2:1

हांऊँ चाहां कि तुस्से जाणी लो कि, हांऊँ कितनी कड़ी मेहनत करेया करहा। मेरी ये मेहनत तुस्सा रे कठे होर लौदिकिया सैहरा मन्झ रैहणे वाले लोका रे कठे, होर तिन्हा सभी रे कठे ई, जेह्ड़े जे मैं देखीरे भी नी ऐं।

1 थिस्सलुनकियो 1:5

क्यूंकि आस्सा री खुसी री खबर जो यीसू मसीह रे बारे मन्झ ई तुस्सा वाले ना सिर्फ गल्ला मन्झ बल्की सामर्थ होर पवित्र आत्मा, होर बड़े निस्चय किन्हें पुजीरा। जेह्ड़ा तुस्से जाणहां ऐं कि, आस्से तुस्सा री भलाई रे कठे तुस्सा रे बीचा मन्झ रैहन्दे हुए आस्सा रा व्यवहार केह्ड़ा था।

2 तिमिथियुस 1:12

होर एस वजहा ले ही हांऊँ एथी जेल्हा मन्झ दुःख सहन करी करहा, पर सर्मिन्दा नी हुन्दा, क्यूंकि हांऊँ मसीह जो जाणहां, जेस पर मैं भरोसा रखीरा कि, मसीह आपणे वापस आऊणें रे ध्याड़े तक तेस चीजा री रखवाली करी सक्हा, जो तिन्हें मुंजो सौंपीरी।

यहूदा 1:3

हे लाडले भाईयो होर बैहणो, हालांकि हांऊँ मना ले चाहां था कि परमेसरा ले आस्सा जो मिलणे वाले उद्धारा रे बारे मन्झ तुस्सा जो लिखूं जेसरे आस्से सभ साझी ऐं, पर ऐबे मैं ये जरूरत मैहसूस किती कि हांऊँ तुस्सा जो इधी कठे लिखूं कि तुस्से हिम्मत पाई किन्हें सच्चे उपदेसा रा बचाव करी सको, परमेसरे आस्सा जो ये सच्चाई आपणे पवित्र लोका रे कठे एक बारी ही देई दितिरी जेस्सा कधी नी बदलना।